Hamzeh Malkawi

Hamzeh Malkawi

Amman . Since January 2011
10 Reviews
Reviewed first
2
Added reviews
10

My reviews

  • Review by Hamzeh of xpsBox - Jordan
    7 years ago
    هاي الشركة عبارة عن شركة شحن بضائع من الولايات المتحدة الأمريكية للأردن وخدمتهم شبيهة جداً بالخدمة اللي بتقدمها أرامكس Shop&Ship لكن المميز بالشركة إنو بعطوك كم رح يطلع على شحنتك رسوم جمركية وبالعادة ما بكون مبالغ فيها وهذا اهم شيء للي بدو يشتري من برا . الشركة شركة صغيرة مش بحجم أرامكس أو الشركات المشهورة لكن شغلهم كثير مرتب ومتقن وبسيط أيضاً - أسعار الشحن : على كل 0.5 كيلو مبلغ 6 دنانير وأحياناً بعملوا عروض بتوصل لحد 5 دنانير للـ 0.5 كيلو - مدة الشحن : من أسبوعين إلى ثلاثة أسابيع ( وهذه ممكن تكون لكثير ناس عبارة عن السلبية الوحيدة لكن هو بالنسبة إلي مش سلبية أبداً ) - ما في رسوم تخليص جمركي إطلاقاً والرسوم الجمركية نفسها بتكون منخفضة . - التعامل كثير جيد والموظفين متعاونين لابعد الحدود . - السوائل والمكملات الغذائية غير ممنوعة عندهم عكس شركة أرامكس مثلاً وغيرها ( وهذا فعلياً سبب تجربتي إلهم إني كنت بدور على مكملات غذائية معينة عنا في البلد لكن ما لقيت وبالنهاية شحنتها من امازون على هاي الشركة بدون مشاكل إطلاقاً ) - ببعثولك صورة لشحنتك وهي على الميزان قبل ما تنشحن من أمريكا . عندهم خدمتين بالنسبة للتسوق من الإنترنت : الأولى : ممكن انت تشتري السلعة وتشحنها على عنوانهم وبالتالي فقط بتدفعلهم الشحن والجمرك . الثانية : انك تبعثلهم اللنك ويشترولك السلعة وهون لازم تدفعلهم ثمن السلعة مع الشحن والجمرك وما بزيد السعر كثير فهي كخدمة مقدمة منهم . شحنت تقريباً 7 شحنات معهم ورح أضل أشحن معهم ويا ريت تبقى خدمتهم في هذا المستوى وأحسن .
  • Review by Hamzeh of Big Daddy's Burger
    7 years ago
    كنت في المنطقة مع صديقي مرينا على سمارت باي وبدنا نطلع على الشارع الرئيسي فبالصدفة انتبهنا على المحل وكان ملفت للنظر بصراحة وبما إنو احنا من محبي البرجر قلنا لازم نجربه , وفعلاً كان كثير ممتاز من جميع النواحي - طلبت Dady's burger وكان عبارة عن لحمة 200 جم محشية بثلاثة أنواع جبنة وكثير كثير طيب ومتميز عن أي برجر جربته قبل هيك , - نظافة المحل جيدة والمحل واسع جداً والطاولات كبيرة والجلسة مريحة - الأشخاص الموجودين كثير كان تعاملهم لطيف وكويس - الطلب أخذ 10 دقائق لحتى جهز - مواقف خارجية واسعة جداً - الوجبات متنوعة ويقدم وجبة فطور سلبيات : - الواجهة الزجاجية للمحل كبيرة ولازم ينظفوها أكثر من هيك . - أيضاً الحمامات بدها تنظيف أكثر . لازم المطعم يعمل أي نوع من أنواع الدعاية لحتى الناس تعرفه أكثر , بنصح أي شخص يجربه بدون تردد .
  • Review by Hamzeh of Pc Zone
    8 years ago
    تقريباً أفضل مكان مختص بالكمبيوترات بعمان التعامل كثير ممتاز كل شي بتلاقيه عندهم
    أحلى شي عندهم فرع بالعقبة لو بدك توفر على حالك شوي بتروح على العقبة وبتجيب لابتوب مثلاً بنفس الكفالة والجودة بس بسعر أقل كثير :) . أقوى شي عندهم الكفالة ، صديق لي اشترى كرت شاشة سعره 250 دينار تقريباً احترق معاه مرتين مش لإنو نوعيته سيئة بالعكس نوعيته كثير ممتازة ، بس لازم مع كرت الشاشة يركب باور سبلاي قوي بدعم كرت الشاشة فالمرة الثالثة ركبله المحل باور على جهاز صديقي ولحد الآن ما في مشاكل أبداً . يعني لو محل ثاني كان حط الحق على العميل بسبب سوء الاستخدام وما عوضه بشيء . بنصح فيه بقوة .
  • Review by Hamzeh of Taipei Computers & Communications
    8 years ago
    الأسبوع الماضي رحت عليهم لإني ناوي أجمع جهاز كمبيوتر بمواصفات قوية :
    الموظف اللي قابلني كثير تعامله راقي وفهمان في مجاله تقريباً سألته عن 8 قطع كمبيتر وهو شرحلي عن كل شي بخصها ونصحني بالاختيار كنت معاه أكثر من 20 دقيقة أسئله عن القطع والابتسامه على وجهة على طول بصراحة إشي كثير كويس . بالنسبة لترتيب المحل المحل كثير مرتب وما عليه كلام . السعر : أنا لفيت محلات كثير قبله هو بدون شك أقل سعر لأنو يعتبر وكيل لبعض الماركات اللي ببيعها مثل كولرماستر و جيجابيت فعنده أقل سعر بالسوق لهاي القطع . أي حد مهتم بالكمبيوتر بشكل زائد :) هاد المحل أول محل لازم يروح عليه . باختصار بعطيه 5/5 بدون تردد .
  • Review by Hamzeh of Al Jazeerah Stores
    9 years ago
    سوبر ماركت عادي ، ماشي كبير وبتلاقي فيه أغلب الأشياء ، بس نصيحتي إلهم إنهم يحسنوا التعامل مع الزباين ويبتسموا شوي رحت عليه أكثر من مرة وما برجعله إلا إذا كنت مضطر !!
  • Review by Hamzeh of Sameh Mall
    9 years ago
    كل إشي موجود بالمول من الصغيرة للكبيرة لما بدي أشتري أغراض للعزايم بروح عنده على طول لأني عارف حالي رح ألاقي كل شي عنده .
  • Review by Hamzeh of City Mall
    9 years ago
    المول كثير مرتب برمضان بحب أطلع عليه أنا والشباب بعد الفطور بنشرب قهوة أو حتى بنوكل بوظة ولو لقينا حالنا فاضيين بنروح على السينما اللي فيه .
  • Review by Hamzeh of Domino's Pizza
    9 years ago
    البيتزا كثير مميزة عنده وأنواعها كثيرة ، برمضان عامل عرض فطور منيح وسعره مقبول كثير بصراحة لما بدي أفطر من برا البيت بروح عليه لأني بحب البيتزا وخاصة من عنده .
  • Review by Hamzeh of Philadelphia Bakery
    9 years ago
    المخبز خبزه ممتاز ومن أحسن المخابز في عمان ، وبرمضان القطايف عنده مميزة وعلى السريع بتوخذ طلبك بس إلا ما يمر عليه أوقات يكون في عجقة .
  • Review by Hamzeh of Hommosani Restaurant
    9 years ago
    المطعم كثير مميز ونظيف وأسعاره معقولة ، وبرمضان بعمل عصائر طبيعية رمضانية كل يوم وأنا مروح لازم أشتري من عنده تمر هندي بجنن وطبيعي مش أصباغ ونكهات .
  • Review by Hamzeh of Al Jazzera Tours & Travel
    9 years ago
    انبارح رحت سجلت معهم لرحلة على مرمريس بتركيا يوم 2 سبتمبر مبدئياً المعاملة كثير ممتازة والموظف بشرحلك كل اشي وكل الأمور ممتازة لحد الآن حتى الموظف عمللنا خصم محرز وما قصر .
    هاي أول مرة بطلع معاهم بعد ما أرجع من الرحلة إن شاء الله بالسلامة بنحكيلكم شو صار معنا .
  • Review by Hamzeh of Mawakeb Travel & Tourism
    9 years ago
    تعامل الموظفين بالمكتب كثير ممتاز ومتعاونين كثير
    التزامهم بالمواعيد وببرنامج الرحلة جيد جداً رحت معهم رحلتين رحلة على البترا ووادي رم والعقبة بهاي الرحلة كان مبيتنا في العقبة بس مبيت أغلب اللي جايين معنا في وادي رم فحجزولنا باص مخصوص إلنا يوخذنا من وادي رم لحد الفندق في العقبة وثاني يوم أخذونا من باب الفندق لنكمل الجولة بالعقبة والمرشد كان كثير مهتم فينا وبكل واحد في الرحلة ورحت كمان معهم على سوريا يوم واحد كانت ممتازة ما عدا المرشد كان ثقيل دم واستغلالي من حيث المصاري يعني أخذ من كل راكب مبلغ من المال عشان الحدود السورية طبعاً 3 أرباعه لجيبته وجيبة السايق . إجمالاً بعطي مواكب 5 نجوم بس اللي خلاني أعطيهم 4 بعض المرشدين لازم يختاروا ناس أحسن ومش غلط لو اتصلوا بعد الرحلة ببعض الناس وسألوهم عن المرشد تبعهم .
  • Review by Hamzeh of Malak Al Tawouk
    9 years ago
    مطعم متميز ومن أفضل المطاعم كخدمة ونظافة وجودة في الطعام ، السعر عالي شوي بس بستاهل
    أنصح الجميع بتجربته بس رقم التلفون مكتوب بشكل خاطئ الصحيح : 065358358
Next