ziad m

ziad m

Amman . Since December 2010
11 Reviews
Added reviews
11

My reviews

  • Review by ziad of Malek Al Tawouk
    5 years ago
    اليوم أول مرة بجرب ملك الطاووق وأخذت من عنده طبق الكبدة، الكبدة كان طعمها جيد بس الي حبيته أكثر هو طعم البطاطا والمثومة تاعتهم بصراحة خرافية! وبنصح الكل يجربه
  • Review by ziad of Abu Al Haj Group Al Moumayaz Taxi
    5 years ago
    أنا شخصياً جربت التكسي المميز مرتين وفي المرتين كنت متجه للمطار. المرة الأولى وصل السواق قبل الموعد المتفق عليه وكان زلمة محترم جداً وخلوق بس قبل ما نوصل المطار بشوية السيارة صار فيها عطل في الكهرباء ووقفت بشكل كلي وبطلت تشتغل. حكى السواق مع الشركة ولا حد رد عليه! ضل يرن عليهم أكثر من 15 دقيقة ما حد رد عليه! وحسب حكيه "شكله كلهم نايمين"!! بالآخر حكى مع واحد من زملاءه السواقين حتى يجي ياخدنا بسيارته، المسكين إجانا بسرعة ووصلنا. بالآخر تأخرنا تقريباً ساعة كاملة بسبب هذا العطل وسوء التنظيم من طرف الشركة بس الحمدالله الطيارة ما راحت علينا. في المرة الثانية السواق كان لا مبالي، كان طول الوقت يدخن وياكل ترمس وهو عم بسوق طول الطريق وريحة السيارة زي المدخنة. هذا غير مرة قبل 3 سنوات تقريباً عمّي الله يرحمه كان راكب بالتكسي المميز بشارع مكة والسواق كان بلعب بالتلفون وخش بشجرة على يمين الطريق. عمي صار عنده كسر بالكتف وقعد بالمستشفى فترة طويلة بعد الحادث. هذا كله غير أسعارهم المبالغ فيها. بصراحة ما بنصح أي حد بالتكسي المميز لأنها بصراحة شركة غير مبالية ومستهترة جداً.
  • Review by ziad of Deeritna Express
    6 years ago
    بصراحة مطعم سيئ للغاية وتعامل الموظفين أكثر من سيئ. اليوم طلبت من هذا المطعم عن طريق موقع آي فود وطلبت استلام الأكل الساعة 2، رحت على المطعم الساعة 2 ولا الموظفين بقولولي إني طلبت الأكل للساعة 2.30 مش 2.00، قلتلهم كيف؟ قام واحد منهم اتصل بآي فود حتى يتأكد (لأنه الزبون دائماً كذاب ومستحيل همه يغلطوا) وبالفعل طلعت الطبية للساعة 2 والغلط من ديرتنا. وبعدها الموظف لا اعتذر ولا شي وبس قلي إنه الطلبية بدها 20 دقيقة. بصراحة الموضوع مش مستاهل وكلنا منغلط مش مشكلة كبيرة، بس المشكلة إنهم غلطوا ولا حتى اعتذروا وحاولوا يحطوا الحق علي بأي طريقة واتصلوا بآي فود حتى يتأكدوا من كلامي! كثير عيب هذا الحكي. بس قلي بدو 20 دقيقة قلتله خلص إلغي الطلبية لأني عارف إنه 20 دقيقة رح تاخد ساعة كاملة من تجاربي السابقة مع ديرتنا. بصراحة آخر مرة بطلب من عندهم.
  • Review by ziad of Cafeteria Al Quds
    8 years ago
    للأسف بطل فلافل القدس زي أيام زمان، زمان كان من أطيب محلات الفلافل بعمان بس جودة السندويشات نزلت بشكل خرافي. هداك اليوم أخذت من عندو سندويشات فلافل وكانت سيئة جداً، الخبز ناشف والطعم أقل من عادي، للأسف ما رح أرجعلوا، في كثير محلات أزكى منو
  • Review by ziad of Two Jars
    8 years ago
    بصراحة ساندويشات الفلافل من عندو خرافية! ما جربت الحمص والفول بس بقدر أحكي إنو ساندويشاتو من إزكا الساندويشات الموجودة في عمان، وهو من المحلات الوحيدة اللي ما غلت أسعارها، سعر السنادويش 35 قرش، بنصح الجميع يجربه
  • Review by ziad of Saleh Hjaazin Center
    8 years ago
    اليوم رحت على مركز صالح حجازين بعد ما قرأت عنه النصائح الممتازة هون على موقع جيران. بصراحة ما عملت صيانة لسيارتي من فترة طويلة جداً فعملي تشيك أب كامل للسيارة وغيرلي البواجي والبريكات وفلاتر وزبطلي السيارة 100% والزلمة في غاية الإحترام والمهنية وأسعاروا مناسبة جداً أنصح الجميع بالتصليح عنده
  • Review by ziad of Gerard
    8 years ago
    باختصار أزكي بوظة في العالم، كثير جربت أنواع بوظة في الأردن وبرة الأردن بس بتظل بوظة جيرارد أزكى وحدة
  • Review by ziad of Feel Burgers
    8 years ago
    جربت هذا المطعم اليوم بعد ما سمعت عنو على الإنترنت، المطعم كثير نظيف لدرجة أنو أول ما تدخل بتشم ريحة مواد التنظيف لول أظن لازم يحلوا هالمشكلة عشان الريحة مش كثير مستحبة، طلبت فيل بيرغر وبصراحة كانت كثير زاكية، مش أزكا برغر باكلوا بحياتي بس كان كثير زاكي، وبنصح الناس تجربه
  • Review by ziad of Al Rifai Roastery
    9 years ago
    أنا بصراحة مستغرب من التقييمات التانية، إمبارح كنت بالسيفوي السابع وقلت لحالي خليني أجرب الرفاعي، أسعاره بصراحة خيالية وكثير مبالغ فيها، كيلو المخلوطة ب20 دينار وكيلو اكاشيو بالجبنة 26 دينار!! ويا ريتو زاكي كان الطعم أقل من عادي وما بستاهل ربع المبلغ، شاهين كثير أزكي وأرخص منو. ... ما رح أرجعلوا مرة ثانية
  • Review by ziad of Lebnani Snack
    9 years ago
    طول عمرنا واحنا منجيب كوكتيل من لبناني سناك وحسب رأي أنو أطيب كوكتيل في الأردن، بس إمبارح رحنا على فرع الصويفية ولما قعدنا شفنا صرصور جنبنا بكزدر فقلت للويتر عنو قالي "عادي" وظل ماشي!!! عادي يكون في صرصور في مطعم؟؟ لو صرصور بمكتب أو شركة مش مشكلة بس بمطعم؟ ما ظنيت. غير هيك الويتر تاعنا كان أزنخ إنسان بشوفة ودايماً مستعجل ولما تسأله سؤال بتحس كأنك دايقتوا وأخذت كثير من وقته المهم.
  • Review by ziad of Faroujna
    10 years ago
    الأكل زاكي بس الأسعار كثير غالية صراحة، الجاجة المشوية بـ 7 دنانير مع الضريبة! وبتيجي جاجة حاف بدون سلطة أو بطاطا! في المحلات الثانية الجاجة المشوية ب 4 دنانير ومع بطاطا ومخللات.
  • Review by ziad of Chili House
    10 years ago
    تشيلي هاوس من المطاعم الجيدة ولكن مشكلته إنو كل فرع غير عن الثاني، الطعم غير الكمية غير المكونات غير حتى الأكياس والعلب غير! أنا بفضل تشيلي ويز صراحة
  • Review by ziad of Fuddruckers
    10 years ago
    ما عندي تعليق على الأكل بس حاب أحكي كيف الويتر (النادل) حاول يسرقني، في يوم من الأيام رحت أنا وشخصين نتعشى بالمطعم، كل شي كان تمام ولما إجا الحساب طلع 35 دينار، أعطيت الزلمة 50 دينار، رجع الباقي كمشة دنانير، الزلمة إمفكرني إني رخ أخدهم بدونما أعدهم وأطلع، عديتهم طلعوا 12 دينار، إستغربت، عديتهم مرة تانية 12 دينار، قبل ما إنادي الويتر لاحظت مصاري مخبية ورة الفاتورة! الإزعر كان مخبي 3 دنانير ورة الفاتورة عشان ما ألاحظهم وأنساهم. فيا إخوان ديروا بالكو من هذه الخدعة في هذا المطعم وفي جميع المطاعم.
Next