عاهد كرمول

عاهد كرمول

Amman . Since September 2010
Instrumentation Engineer GE Sensing Product Specialist
94 Reviews
Added places
3
Reviewed first
15
Added reviews
94
Liked places
2

My reviews

  • Review by عاهد of Nasser Al Sersawi Restaurant
    8 years ago
    مطعم ناصر أحد المطاعم المشهورة في صويلح .. يمتاز بأكله الطيب
    المطعم نظيف ومرتب على الرغم إنه صغير .. وما شاء الله عليه ضغط خصوصاً الصبح لأنه مشهور ومحبوب بين الناس بالنسبة إلي بطلب من عنده حمص وفلافل وسندويشات .. أكله طيب وما عليه حكي تتميز سندويشاته بنكهة مميزة بضيفها لسلطة الطحينة أسعاره معتدلة أنصح بتجربته
  • Review by عاهد of Woodpecker Restaurant
    8 years ago
    يقع هذا المطعم في حي نزال في مكان ممكن فيه الاصطفاف .. لا توجد مواقف خاصة بالمحل
    صاحب هذا المطعم انسان محترم وشاطر بصنع السندويشات .. ومحله نظيف وبسيط بس جميل المحل يبقدم برجر وبطاطا وهيك أشياء بصراحة أنا بحب البرغر تبعه خصوصاً إنه برتبط عندي بالطفولة أنصح بتجربته
  • Review by عاهد of Odeh Restaurant
    8 years ago
    مطعم عوده مطعم مشهوع في البيادر الناس بيحبوه
    المطعم مرتب ونظيف .. وما شاء الله الناس دايما عليه طابور بالنسبة إلي .. جربت من عنده الساندويشات .. بس ما بعرف كل ما آكل من عنده بتعب بحس أكله ما بيناسبني ما بيعرف لأ بالنسبة لي بطلت أروح عليه .. بس بيسوى تجربوه وتحكموا بنفسكم
  • Review by عاهد of Al Fursan Chocolate
    8 years ago
    شوكولاته الفرسان محل قمة في الروعة
    أولا: المحل ديكوره رهيييييب وأول ما تفوت بتشوف أشكال وألوان من تشكيلات الشوكولاتة والمضايف بطريقة جميلة ومرتبة للغاية جوده الشوكولاتة المقدمة عالية .. وزاكية بصراحة ..عنده أشكال وألوان من الشوكولاته شو ما يجي عبالك أصحاب المحل محترمين وشاطرين في عمل الهدايا .. ولا بد من الضيافة بس تفوت لعندهم بالإضافة إنه أسعاره مناسبة جدا أنصح تجربته
  • Review by عاهد of Al Tamimi Ice Cream
    8 years ago
    بوظة التميمي محل طيب كتير وزاكي ..
    بداية .. المحل نظيف .. والمواد المستخدمة في البوظة جودتها عالية النكهات عنده كتير طيبة وموفقة .. بحسه أزكى من غازي (المحل اللي جنبه الحيط بالحيط) بحب أطلب من عنده البوظة .. والسلاش مع بوظة .. أسعاره منيحة أنصح الكل بتجربته
  • Review by عاهد of Faisal Al Qadi Sweets
    8 years ago
    هذا المحل من أول المحلات في الحسين .. المحل نظيف وواسع
    من ناحية شغله .. الحلويات ما إلها دخل بالحلويات! الكنافة سيئة .. والحلو المشكل كله سمنة .. يعني مرة أجاني حلو مشكل منه هدية .. أكلت حبة كأني عم باكل بأصبع زبدة! الخلاصة .. لا أنصح بتاتاً بتجربته لسوء جودة منتجاته
  • Review by عاهد of Al Qudsi Sweets
    8 years ago
    حلويات القدسي .. من أعرق محلات الحلويات في عمان
    يشتهر جدا بالتمرية .. وهيه مميزة للغاية وما عليها كلام بالإضافة لهيك كل الحلويات عنده زاكية .. خصوصاً وربات الجوز المطعم نظيف وأصحابه مناح ومحترمين أنصح بتجربته بشدة
  • Review by عاهد of Al Hamadiyah Ice cream
    8 years ago
    هاد المحل موجود بعمان مول .. جربت من عنده البوظة .. نكهتها سيئة وخفيفة جدا (أقرب للميه)
    المطعم من ناحية نظافة جيد .. وتعاملهم عادي .. بس الطعم سيء لا أنصح بتاتاً بتجربته
  • Review by عاهد of Lumi Market
    8 years ago
    لومي ماركت سوبر ماركت مميز جدا .. منتشر في جميع كازيات المناصير
    هديك اليوم كنت على الطريق الصحراوي .. ومريت على فرعهم اللي بالقطرانة .. بصراحة المحل قمة الترتيب والروعة .. كل شيء متوفر ومرتب بعناية ديكور المحل قمة في الروعة .. والله من زمان ما انشرح بالي بدخلة بسوبر ماركت قد دخلته الشاب اللي هناك كان قمة في الاحترام والتعاون الأسعار عادية أنصح الجميع باعتماده :)
  • Review by عاهد of Barhomeh Roastery
    8 years ago
    محمص برهومة محمص عريق جدا ومتميز
    أول محمص أدخل المكسرات المدخنة عالبلد وللعلم .. عنده أزكى مكسرات عالإطلاق بس سبحان الله كيف الرزقة .. الناس حالياً دابة على غيره انا بالنسبة إلي لساتني بوثق فيه وبحب أجيب من عنده جودة مكسراتهم جيدة .. وتعاملهم جيد .. ومحلهم جميل .. وأسعارهم جيده أنصح الجميع بتجربته
  • Review by عاهد of Johret Al Quds
    8 years ago
    بالزمنات كنت أشتغل بالعبدلي .. فبالتالي جربنا هالمطعم كتير
    المطعم يتميز بسندويشاته الغريبة .. يعيني عبارة عن بعض طبخات البيت معمولة في سندويشات .. وسناكات أخرى مثلاً: عندهم سندويشة كفته (كفته طيحنة)، وسندويشة مفركه، وسندويشة سمك، وسندويشة روست بيف، وكبده وفلافل والذي منه المطعم نظيف والشباب شاطرين بالشغل جدا أسعاره منيحة ومقبولة .. المطعم بيناسب اللي دوامه طويل وحاب يحس إنه أكل شي يشبعه لحد ما يروح .. أنصح بتجربته
  • Review by عاهد of Dina
    8 years ago
    هالمطعم بحب قعدته .. خارجية بس مسكرة وعندهم دفايات حدائق ..
    قعدته مريحة وعائلية .. وبتحس بخصوصيتك لأنه الطاولات مو قريبة على بعض بالإضافة لهيك في فرن بيعلموا فيه خبز مشروح .. موجود في محل قعدة الزباين .. يعني بصراحة بتتشهون على ريحة الخبز قبل ما يوصل الاكل الحمص كتير مميز من عنده .. الفلافل زاكي .. الفول عادي .. بس الوجبة بتطلع سوبر مع الخبز الرائع اللي توه طالع من الفرن المخللات منيحة وطيبة عندهم السندويشات مش أوي! النظافة جيدة جدا .. وتعامل الشباب رائع للغاية الأسعار مرتفعة شوية أنصح بتجربته بشدة
  • Review by عاهد of Al Quds Restaurant
    8 years ago
    مطعم القدس من أقدم وأعرق المطاعم في عمان
    بصراحة المطعم ما عمري رحت قعدت فيه .. بس جربته تواصي المناسف في المناسبات الجماعة أولا بيلتزموا بالموعد .. تعاملهم محترم المنسف تبعهم .. خرافي بمعنى الكلمة .. يعني من توب التوب في الأردن بتذكر مرة كنا بعزا وراح واحد جاب منسف من عند القدس.. الكل ما شاء الله دق فيه حتى أهل المرحومة (الله يرحمها) على الرغم من إنهم كانوا مقطعين حالهم عياط قبل ما يوصل الغدا ههههههههه أسعاره أعتقد جيدة أنصح تجربته بشدة :)
  • Review by عاهد of Ghaith Restaurant
    8 years ago
    مطعم غيث من أقدم المطاعم وأشهرها في الأردن
    المطعم مطعم محلي .. يعني بيقدم أكلنا يلي بناكله في البيوت .. طبخ رز (منسف، أوزي، كبسة)، صواني، ... بالإضافة للأكل الشعبي (حمص وفلافل وشاورما ودجاج فحم وشواية والذي منه) بالنسبة للقعدة أنا بحب أقعد بصالة الطابق الخامس .. رائعة ومطلة ومريحة نظافة المحل بعطيها 80% .. ديكور المحل جميل خصوصاً بعد التجديد اللي عمله قبل حوالي السنتين طاولاته مو قريبة على بعض يعني بتاخد راحتك خصوصاً إذا إنك مع عيلتك بالنسبة لمأكولاته/ عندكم المنسف تبعه شهي للغاية، طبخات الرز التانية ماشي حالها، الصواني ما جربتها بس بصراحة نفسي أجربها سندويشات الحمص والفلافل زاكي كتير، الشاورما منيحة (بعطيها 70%) .. بس الشاورما بالكعك كتير زاكية أسعار المحل منيحة .. مرة كان عندي ضيوف من بريطانيا وحبوا يروحوا محل شعبي .. أخدتهم عليه وانبسطوا بالنسبة لتعامل الويترز .. مو أوي .. بس ما ننسى أنا بنحكي عن مطعم شعبي :) أنصح بتجربته
  • Review by عاهد of Arz wa Zaatar
    8 years ago
    أرز وزعتر محل معجنات لبنانية في جبل الحسين
    المحل ما فيه قعدة .. شغل تيك أوي وطلب توصيل المطعم نظيف من ناحية المعدات والأكل .. والستاف بيراعوا شروط النظافة ما عجبني تعامل الستاف صراحة .. بتعاملوا بتكبر شوي عجينته منيجة وهشة بس حلوة شوي .. يعني لازمها شوية تزبيط مقادير جربت من عنده الزعتر والجبنة معجناته منيحة مو سيئة .. بس بصراحة أنا ما عجبتني .. يعني ما ذقت إشي زاكي اللي يخليني أرجعله تاني مرة بالإضافة لأنه أسعاره غالية كتير مقارنة بما يقدم أنا شخصيا مش راح أرجعله مشنو ما عجبني وما بنصح حد يروحه .. بصراحة البدائل أزكى وأرخص
  • Review by عاهد of Malak Al Tawouk
    8 years ago
    مطعم ملك الطاووق مطعم لبناني موجود بكثرة في ضواحي بيروت .. افتتح في عمان أتوقع منذ 7 سنوات
    المطعم نظيف .. والستاف محترفين ومحترمين الوجبة المشهورة عنده هيه وجبة الطاووق .. سندويشة شيش طاووق بخبز لبناني مع خلطة خاصة وملفوف وبطاطا وجبنة (حسب الرغبة) الوجبة تقدم مع بطاطا وبيبسي .. مشبعة للغاية حتى للأكيلة طبعاً الأكل نظيف للغاية ومكوناته طازجة بيجوز احيانا بتكون السندويشة ناشفة شوي بس انا بطلب زيادة الخلطة وبطلب إنه يقسملي السندويشة بالنص مشان أعرف أكلها سعره جيد أنصح بشدة بتجربته :)
  • Review by عاهد of Sifeen
    8 years ago
    سيفين .. مطعم الشعب منذ أوائل التسعينات
    بتذكر لما بدأ المحل كان عبارة عن باص أكل عند باب الأردنية الرئيسي .. كان المطعم المفضل لنص الجامعة .. باستثناء سندويشة البطاطا من باص هاواي .. ههههههههه ذكريات ولا أروع بداية المحل يقع في شارع البوابة الشمالية مما يجعل الاصطفاف وقت دوام الجامعة صعباً للغاية .. وبيكون المحل كمان مليان طلاب وأزمة المطعم رائع من ناحية تجهيزات .. نظيف ورائحته جيدة .. صالته واسعة (3 طوابق) .. تعامل الموظفين رائع جدا بالنسبة للأكل .. عنده كتير وجبات زاكية زي الشيش طاووق، البطاطا الروستد، سندويشة الكوكتيل، السكالوب، إضافة للمشروبات الغازية والعصائر الطازجة والكوكتيل الطبيعي 100% بالإضافة لهيك بيضيف بابريكا على البطاطا الفرايز أو الودجر بتطلع نكهتها بتشهي نظافة الأكل منيحة نكهة الأكل طيبة ومزبوطة ،، بس من فترة (شي سنة) ،، نكهة الأكل مبطلة زي أول الأسعار بصراحة كل ما أروح بلاقيهم مغليينها شوي .. يعني صار المطعم غالي إلى حد ما أنصح اللي ما بيعرفه إنه يجربه
  • Review by عاهد of pizzeria castello
    8 years ago
    مطعم كاستيلو من المطاعم الجيدة للبيتزا
    بداية يقع المطعم قرب الجامعة الألمانية والجمعية الملكية مما يجعل الصفة خلال وقت النهار صعبا للغاية المطعم ديكوره خشبي وجميل جدا ونظيف .. المطعم برتاح فيه نفسيا طبعا المحل دايما مليان من طلاب الجامعة اللي بيقعدوا وبيطولوا (زي ما كنا نساوي بس كنا بالجامعات :)) .. مشان هيك بالغالب باخد طلبي وبطلع باكله بالسيارة الرجل صاحب المطعم حباب ومحترم للغاية وبيتذكر زباينه نظافة الأكل ممتازة .. نكهات البيتزا متنوعة وتناسب مختلف الأذواق .. ومكوناتها لذيذة وخبزها متقن الأسعار متوسطة أنصح بتجربته :)
  • Review by عاهد of Yanabe' Al Sham Restaurant
    8 years ago
    بداية المحل يقع في شارع ماركا الرئيسي دايما في أزمة وصعب تلاقي صفة إلا بعيد طوال النهار سواء صبح أو مسا
    تقييمي للمطعم من ناحية نظافة مرافق 50 بالمائة ودورات المياه دايما مو نظيفة الصالة: عادية بالنسبة للأكل: جربت عنده الدجاج البروستد، الشاورما، والمشاوي الدجاج البروستد: شارب زيت كتير ومو نظيف بتاتاً .. مغطيين ريحة الزنخ بتكثير نكهة الغار اللي مبينة واضحة في الدجاج الشاورما: لا إلها ولا عليها (يعني مو زاكية ومو سيئة) المشاوي: ماشي حالها .. وسعرها منيح عموماً أسعاره منيحة وبتناسب الجميع الخدمة: بطيئة للغاية (من 20 دقيقة وطالع .. مرة وصلت 45 دقيقة مشان مشاوي) .. والستاف زهقانين عيشتهم لا أنصح بتجربته
  • Review by عاهد of Al Arabi Restaurant
    8 years ago
    جربت مطعم العربي كونه قريباً من مكتبي في عمان
    بصراحة ما جربت من عنده غير السندويشات .. سندويشاته طيبة .. بحط عليها طحينة طعمها مميز المطعم نظيف والموظفين محترمين بصراحة المشكلة الوحيدة في هاد المطعم إنه جاي مقابل العيادات الخارجية للخدمات الطبية .. فبتكون الدنيا قدامه أزمة وعجقة وصعبة الصفة بتكون وهو بيكون أزمة .. بس ربنا الله خدمتهم سريعة يستحق التجربة
  • Review by عاهد of The Man Fashion Co
    8 years ago
    شركة أزياء الرجل أو كما هي معروفة The Man ,, شركة ألبسة رسمية وشبه رسمية (سبورات) رجالية
    المكان هو المكان المعتمد لي لشراء الألبسة الرسمية .. الشركة لديها مصنعان في تركيا والصين المحل ديكوره منيح وبضاعته متنوعة وبتناسب معظم الأذواق بضاعتهم من ناحية الجودة والتنوع هي الأفضل بنظري .. اشتريت من عنده: 1- بدل 2- جكيت سبور 3- بنطلونات قماش 4- بلايز شتوي 5- قمصان كل القطع منيحة وشيك .. يعني أحسن من جودة البضاعة الشائعة بالسوق .. خصوصاً إذا أخدت التركي مش الصيني. يعني أنا البنطلونات اللي بشتريها من عندهم بروح المسا بتكون يا دوب متجعلكة شوي (خصوصاً إنه الواحد بيتحرك كتير وبيصلي في الدوام) .. وأنا هاد الشي بيحل عندي إشكال كبير .. لأنه مرات بضطر أصلي وبيكون عندي بعدها موعد او اجتماع .. فبروح بيكون البنطلون مو متجعلك مشنو خامته منيحة :) تعامل الشباب محترم وبيحترموك خصوصاً إذا إنك زبونهم .. بيقدموا خدمة تقصير الألبسة وتصليحها لتناسبك (إذا كان بدها تضييق أو توسيع شي بسيط) .. طبعا الخدمة مجانية لكل قطعة بتشتريها الأسعار أغلى من السوق بتقريبا 30 - 50% .. بس بتاخد شي مضمون عالآخر من ناحية جودة المحل بيجبرك إنك ترجع عنده لأنه جودة بضايعه فل بخلاصة بنصح الكل يزوره
  • Review by عاهد of Al Isra'a Restaurant
    8 years ago
    مطعم الإسراء مطعم يقع على طريق عمان جرش .. في مكان مميز جدا ومشرف على سد الملك طلال وجبال البلقاء.. هذا المطعم من المطاعم المفضلة لدي بشدة .. بداية .. المطعم يقدم المشاوي والمقبلات المختلفة والعصائر .. أبدأ بالمقبلات .. مقبلاته زاكية ومتقنة كلها ثم المشاوي .. كتير زاكية ومتقنة .. عمري ما أكلت عندهم وطلعت مو مزبوطة المطعم عنده قعدتين واحدة خارجية والتانية داخلية .. هي مش بناء بس برندة مشرفة وحاطين الها زجاج .. قعدتها منيحة بالشتا .. القعدة جدا رائعة وأنا بصراحة بروق أعصابي لما أقعد وأتطلع على السد .. بغير جو غير شكل خدمة الزبائن منيحة والستاف مناح السعر سعره زي سعر غيره زي ريم البوادي وتل الرمان .. مرات بحس سعره أرخص شوي كميات الأكل وجودتها تستحق السعر المدفوع أنصح الكل بتجربته :)
  • Review by عاهد of Zero One Men'S Wear
    8 years ago
    محل زيرو ون محل في مجمع بهجت جاردنز ..
    محل منيح بصراحة .. عنده سبورات رجالي وكاجيوال .. صارلي فترة بشتري أواعيي من عنده أول شي ديكور المحل حلو .. تعامل الشباب منيح وخاصة صاحب المحل .. شخص حباب وبعتني بكل زبون بشكل خاص .. بيعجبني فيه هالزلمة شغلة .. إنو مو زي معظم البياعين بلبقلك أول تلبيقة بوجهه وبيحكلك حلوة .. لأ بيضل يغير لك الألوان لحد ما تطلع تلبيقة رائعة وبيقنعك فيها مرة كانت قبل العيد بيوم .. ضل معي قريب ال 35 دقيقة لحد ما لبقلي لبسة مرتبة .. على الرغم من إنه موسم اللي بخليني أشتري منه وأرجعله .. إنه بيتعامل مع خامات أواعي منيحة .. يعني بتشتري القطعة وبتبين عليك إنو لابس شي مرتب .. وكمان شي كتير مهم إنه القمصان شيك وما بتجعلك أسعاره شوي أغلى من غيره بنسبة 20% - 40% .. بس بصراحة بتشتري بتريح راسك إنو دفعت مصاريك بشي مرتب رح يخدمك كونه الجاردنز .. كلنا بنعرف عجقة الاصطفاف هناك .. بس كلنا كمان بنعرف ندبر حالنا بشارع فرعي :) بنصح الكل يروحه
  • Review by عاهد of Al Dayaa
    8 years ago
    أنا من عشاق الضيعة .. فهو من أفضل المطاعم في جودة الأكل .. النظافة .. ونكهة الطعام
    بالنسبة لهاد الفرع تحديدا : أولاً: الشب الكاشير وقت النهار محترم للغاية ثانيا: الاصطفاف عنده صعب كون المنطقة مزدحمة ثالثاُ: دون كل فروع الضيعة .. هالفرع أكله مو مزبوط .. ما بعرف ليه كل ما آكله بحسه مو مستوي وبحس السندويشة فيها شي غلط فكرت حالي متوهم بس في شخصين من صحابي كمان أكدولي نفس الكلام بطلت أروحه لأنه في فرع تاني قريب عند مبنى المسافرين .. هداك الفرع منيح لا أنصح أحد بتجربه هاد الفرع
  • Review by عاهد of Asia Medical Lab
    8 years ago
    مختبر آسيا واحد من أفضل المختبرات التي دخلتها في الأردن
    أولا المختبر بسوق صويلح يعني ما في مشكلة تندل عليه تعامل الكادر كلهم قمة في الاحترام .. وكمان مديرة المختبر تعاملها راقي الأسعار مناسبة للغاية ،، الشيء اللي خلاني أعطيهم ال 5 نجوم .. احترامهم لخصوصية المريض .. حيث في مكان معين بمحل أخد العينات بتحط عليه العينة وبتطلع بتروح وهم باخدوها بعدين ،، بدون مؤاخذة من الجميع بيجنبوك الاحراج بنصح الكل باعتماده عند الحاجة
Next

Places I like