Somaiah Abu Tammam

Somaiah Abu Tammam

Amman . Since October 2011
!! Hate Routine
158 Reviews
Added places
36
Added reviews
158
Added photos
598
Liked places
29

My reviews

  • Review by Somaiah of Zuhour Al Shafa Butchery and Grills
    8 years ago
    هاد الفرع التاني للمحل يلي موجود بمنطقه ابونصير بس هاد الفرع فيه مكان ممكن انك تاكل جوا المطعم لما تدخل المكان ابدا مابتحس بريحه زفر او لحمه كتير نظيف ومرتب والموظفين ولا احسن من هيك تعامل والاسعار مناسبه كتير ماحستها غاليه، طلبنا ٣ دجاج مسحب تركي مشوي عالفحم بس طعمه مابتصدق كتير طيب وطري وبشهي ومقبلات طلبنا بطاطا مقليه بتدوخ من كتر مو زاكيه وباباغنوج شي خيالي وحمص ومتبل و خضار مشويه ومتومه ومخلل‎ ‎يعني شو بدي احكيلكم عنجد رح تاكلو اصابعكم وراه ههههه اما بالنسبه للسعر عنجد مابعرف كانت عزومه بس شفت المنيو والاسعار جدا مقبوله واكيد سهل تلاقو مصف قدام المحل يعني هي منطقه معجوئه وسوق وهيك بس سهل تصف السياره قدام او قبال المحل و ازا مابدكم تاخدي تيك اواي في جوا المحل ٤ طاولات ممكن تاكلو فيهم وممكن تطلبو ديليفيري وأكيد بنصحكم فيه وبشده :)
  • Review by Somaiah of Boston Fried Chicken
    8 years ago
    جربنا هاد المطعم من باب الفضول مش اكتر لانو دايما بنمرق من جنبه وماعمري فكرت افوت اجرب كيف طعم الاكل عندهم!! وفي مكان تصف سيارتك باب المحل شفنا شوفي عروض عندهم وبالاخر طلبنا وجبة ل3 اشخاص فيها 10 قطع دجاج و كولسلو كبير و3 بطاطا و3 خبز و 2 بيبسي 1 لتر وعرض معها صحن كبير بتعبي شومابدك من سالاد بار عندهم يلي فيها حوالي 10 انواع سلطة مختلفه شرقي وغربي موجودين جوا حوض تلج كبير وكل هاد بس ب 12 دينار حكالنا بدهم ربع ساعه يجهزوا .. طلعنا عالطابق التاني استنينا وشفنا المحل ولفت نظري انو في مكان لعب للصغار وبركة طابات كبيره حبيتها كتير ولعبت فيها هههههههه وماحبيت انو الحمام مشترك والمغاسل كمان يعني مافي خصوصيه !! وصل الاكل وكان سخن كتير وبس اكلت اول لقمه حسيت في شوية زنخ بالطعم حاولت اكل من سلطة البار كانت لزيزه وكل نوع طعمه مبين وفرش والبطاطا كتير حبيتها طريه بس ناقصها ملح يعني مابعرف شو رأيكم بس بالنسبه الي هوي واحد من المطاعم يلي مارح ارجع عليها حتى لو كنت مضطره
  • Review by Somaiah of La Saison
    8 years ago
    اول مافتنا استقبلنا الموظف وخبرنا انه بدنا نقعد بالتراس يلي بالطابق التاني وكنا ٥ اشخاص واخترنا الطاوله يلي بدنا ياها مع انه المكان تقريبا كله مليان واول ماقعدنا جابولنا المنيو وهات بعدين نشوف وجه حدا ياخد طلبنا اكتر من نص ساعه بنستنا بأي حدا يسألنا شو بدنا نطلب وما اجو غير لما ناديناهم طلبنا ٢ سفن مع ليمون و ارجيلة بطيخ ونعنع وقهوه اسبرسو و فوندانت كيك مع ايسكريم... وصلت الارجيله اول شي وبعد ربع ساعه وصل العصير بدون ليمون والقهوه وبعدها ب١٠ دقايق وصلت الكيكه واخر شي وصل شرحات الليمون بعد ما زكرناهم فيها مرتين الخدمه كانت جدا سيئه وبطيئه والفحم كل وين و وين ليتذكرونا فيهم قعدنا حوالي ساعتين ولولا الصحبه الحلوه ماكنت تحملتهم بصراحه ما اظن ارجع مره تانيه حتى لو اضطريت :)
  • Review by Somaiah of Comfy Restaurant & Cafe
    8 years ago
    مكان هادي ولطيف بس صغير شوي عباره عن طابقين قعدنا بالطابق الارضي كنا تقريبا ١٥ شخص وقربولنا ٤ طاولات جنب بعض والطابق التاني فيه ٣ طاولات والتواليت هلأ العنوان مابضيع للناس يلي بيعرفو فاشن كافيه متل مو مكتوب عالخارطه بس الواقع شي تاني يعني يلي مابيعرف وين رح يتغلب ليوصل هوي باختصار موجود اخر الشارع يلي قبل ستاربكس الديكور رايق والاضائه مناسبه والالوان هاديه واختيار الاغاني مناسب والصوت مقبول وفي قدام المحل مصفات طلبت عصير اورنج فرش بس حسيته خفيف وغريغ سالاد كان ناقصها ملح ودريسنغ ممكن يكون ازبط من هيك وبيتزا كانت طيبه بس مافي معها ديب الموظفين كتير خدومين وحوالينا طول الوقت كانت تجربه حلوه بوجود الجيران :)
  • Review by Somaiah of Popeyes
    8 years ago
    لانو هاد اقرب فرع على بيتي اضطريت اخد منه تيك اواي بس انا مابحب بوبايز كتير دخلت المحل وطلبت وجبه ل ٥ اشخاص وكان في عرض بتاخد معها ١٠ تندر فري وطلع الحساب٢٥ دينار وفراطه المهم استنيت حوالي ربع ساعه لجهزو الموظفين بطيئين بشكل خيالي ونصهم مابفهمو عليك بس تحكي !!!! في بالطابق التاني قعده مرتبه ازا فكرتو تاكلو بالمحل
  • Review by Somaiah of Friends Cake
    8 years ago
    بصراحه ماتوقعت بعد كل النصائح يلي شفتها بجيران انه يخيب ظني بالمكان وصينا على كيكه بتكفي ٢٠ شخص وعليها صورة صاحب العيد ومن جوا طلبنا تكون نصها فانيلا والنص التاني شوكولا والحشوه شوكوشيب مع فريز هلأ الكميه ممتازه كفت و زادت بس طعم الكيك ابدا مو طيب وناشف عالاخر والكريمه سميكه كتير يعني الاغلب حكو نفس التعليق والحمدلله كنت جايبه كيكه من محل تاني وبيضت وجهي وبالنسبه لسعرها طلعت ب ٣٠ دينار ومارح اجرب هالمكان مره تانيه
  • Review by Somaiah of Dr. Ashraf Kamleh
    8 years ago
    تعرضت لاصابه بإيدي اليمين ورحت عالطوارئ وطلبولي د. اشرف كاملة وما تأخر علي ابدا وصل بسرعه و عملي صور الاشعه المطلوبه وتبين انه عندي شعر في ٣ اصابع بإيدي اليمين وكان كتير لطيف ومتعاون وصبر علي كتير لاني بصراحه كنت كتير موجوعه وتحملني وجبرلي إيدي وشرحلي بالتفصيل كل شي لازم اعمله وكيف اهتم فيها وكتبلي ادويه و مسكنات وحكالي اراجعه بالعياده بعد اسبوع وبس رحت استقبلني بعيادته وفكلي الجبص وكشف عليها ورجع حطلي جبيره تانيه اخف مشان كان لازم ارجع على شغلي الدكتور مافي منه وكتير لطيف و زوء بالتعامل وبعيد الشر عنكم بس ازا احتجتوا دكتور عظام فهمان بنصحكم فيه
  • Review by Somaiah of Winter Valley Warwick Resort And Spa
    8 years ago
    هاد الفندق جديد يعني لسا soft opening موقعه مابضيع ابدا قبل100 متر من نقطة تفتيش البحر الميت يلي عند vis a vis cafe and restaurant بس من شارع الخدمات يلي عجنب الشارع الرئيسي ... رحنا مشان احتفال الشركه يلي بشتغل فيها بعيدها ال19 وكان بوفيه غداء بصراحه المكان كتير حلو من جوا والكل موجودين مشان راحتك وخدمتك والوان الفندق هاديه من جوا بتعتمد ع الخشب الفاتح والاورانج والاخضر والديكورات ابدا مو معقده بالعكس بتحس حالك بجو صيفي مريح للاعصاب بالنسبه للأكل كان كتير طيب وتقسيم البوفيه متسلسل بالمقبلات البارده والساخنه والمشروبات والاطباق الرئيسيه والحلويات وموقع المطعم جنب بركة السباحه يعني بتقدروا تشوفوا ال pool من حيطان المطعم الزجاجيه وفي قسم للمدخنين والموظفين كتير حبابين وكل شوي بيطمنو عليك وبجبولك المشروبات لعندكو واول ماتخلص بسألوك ازا بتحب شاي او قهوه بعد الغدا رحنا جوله بالفندق مع مرشد الاوتيل لسا في اقسام مو جاهزه بس اغلبيته خالص ومن خلال الجوله لاحظت انه في غرف خاصه فيها اجهزة كمبيوتر للنزلاء وفي خدمة الوايرليس كمان وكل الغرف الها اطلاله عالبحر الميت وكمان بكل غرفة في ضيافة الاوتيل يلي عباره عن سخان مي وفناجين وبكيتات نسكافيه وفي خزنة مشان الاشياء الشخصيه والمجوهرات وحكالنا انه في كل جمعه beach party يعني بصراحه الفندق كامل مكمل وبس يخلص ويفتتحوا رسمي رح يكون بجنن وهوي 4 stars .. اه وفي شغله كمان انه يلي بدو ينزل عالشط في سيارات خاصه بتنزلكم هناك وبترجعكم لانو بعيد حوالي 100 متر بس
  • Review by Somaiah of MovieMax 4D Theatre
    8 years ago
    رحت انا وعيلتي على movie max ‎‏ يلي بيعرض افلام انميشن 4D‏ مدتها نص ساعه اول توصل بستقبلكم موظف بابتسامه عريضه وبيستفسر منكم كم شخص بدكم تحضروا وبحكيلكم عن الفيلم يلي رح ينعرض بعد شوي سعر البطاقه هلأ ٦ دنانير بس كانت قبل ٥ مابعرف ليه رفعوا سعرها !!! المهم كنا ٧ اشخاص ودفعنا عن ٤ بس وطلعلنا ٣ free‏ :)‏ الصاله كتير نظيفه وتقريبا واسعه واول ماتدخل بستقبلك موظف تاني وبيعطيكم نظارات خاصه مشان تحضروا الفيلم ! وبسألكم وين بتحبوا تقعدوا :)‏ هلأ صح مده الفيلم قصيره بس كتير بتنبسطوا خصوصي لو معكم صغار واكيد بتعرفوا عن موضوع 4D ‎‏ كيف بيكون انو بتحس حالك جوا الفيلم غير عن التأثيرات التانيه متل الكرسي بيتحرك فيك واشياء غريبه بتمشي من بين رجليك وهوا ومي بيطلعو بوجهك ههههه يعني بتحس حالك عنجد بعالم تاني حضرنا night at the museum‏ يلي الكل اكيد بيعرف قصتها بس متل ماحكيت انميشن وبنصحكم تجربوه وكتييييير كمان لانو رح تنبسطوا كتيييير وتغير عن العاده خصوصا الصغار لانو اخواتي طار عقلهم ههههه
  • Review by Somaiah of Al Tahonah Al Shameiah
    8 years ago
    لما فت المحل كان صاحبة بخانئ برجال كبير وعم بطرده من المحل لانو الو ساعه مو عارف شو بدو ياخد حلويات !!! بصراحه انصدمت من طريقه التعامل وبنفس الوقت صرت بالمحل ومابدي اتأخر وادور علي غيره طلبت كيلو ونص هريسه شاميه طلع طعمها بايت وقطرها قليل وناشفه ونص كيلو حلاوة الجبن طبعا مقسمين من قبل و جاهزين الله اعلم من متى !!! وكان صاحب المحل كتير معصب ودفش بالتعامل وبخانئ دبان وجهه سألته كم الحساب بحكيلي اللهم اني صائم كمان هاي بدك تناقشي فيها !!! ماصدقت اخدت الحلو وطلعت بسرعه وأخر مره بحياتي برجع بفوته مع انه كتير ناس بمدحوا فيه
  • Review by Somaiah of Moka
    8 years ago
    عنده اطيب قطايف عصافيري بنكهات جديده بلوبيري تشيزكيك، كراميل بالمكسرات، شوكولا مع حبيبات كرانش مو طبيعي شو طيب وخفيف كتير عالمعده بنصحكم تجربوه اكيد
  • Review by Somaiah of Abu Arif Restaurant
    8 years ago
    انعزمنا برمضان تيك اواي من هاد المطعم حوالي ٣٧ وجبه عباره عن نص فروجه صغيره مشويه مع بطاطا ومتومه وببسي وشنينه و٣حبات تمر ومي سعر الوجبه ٣ دنانير بعتقد ، كمية الاكل برمضان بتكفي لانو الواحد مابياكل كتير اساسا بس بغير رمضان مابظن، الدجاج كان زنخ شوي وبعضه مو مستوي والبطاطا بايته ومزيته كتير، الاغلب علقو نفس الشي انه زنخ زياده بصراحه اول مره بجرب من عنده ومابدي احكم عليه من تجربة رمضان لانو اغلب المطاعم بتدنى مستوي الخدمه عندهم
  • Review by Somaiah of Jo Bedu
    8 years ago
    سمعت عن هاد المحل كتير وماعمري فكرت اروح ازوره غير لما اخوي وصاني على Tshirt من عندهم شافو عالموقع تبع المحل عالنت واتصلت قبل ما اروح استفسر اذا موجود منه بالقياس يلي بدي ياه وحكالي انو مابتوفر غير بعد نص ساعه بس كميه محدوده وكلها محجوزه سألته عن العنوان وكان كتير لطيف وطول باله علي لعرفت وين بالزبط بالرغم اني ضعت لاني بعمري مارحت على هاي المنطقه وبس وصلت المحل ابدا مو متل ماتوقعتو يعني مساحته صغيره بس مستغلين كل زاويه فيه وعارضين البضاعه بطريقه حلوه والموظفه يلي كانت كتير زوء وخبرتها اني اتصلت وحجزت تي شيرت وبابتسامه عريضه لفتلي ياه بكيس المحل يلي عليه ثيم الجمل المعروف وعملتلي اكاونت عندهم واعطتني كرت يلي بتسجل عليه كل مره بتشتري من عندهم شي لتاخد قطعتين ببلاشو عجبوني بطاقات المعايده بمختلف انواعها والاسعار يعني مقبوله
  • Review by Somaiah of Romero
    8 years ago
    مكان كتير رايق وهادي ومناسب لافطار رمضاني مابنتسى هلأ عاملين بوفيه رمضان بتضمن الشوربه والسلطه والعصير والطبق الرئيسي والحلوايات كلها من اختيارك وعلى زوئك ب 18++ دينار بس الوقت محدد من 7 ونص لل 9 بعد هيك بينحسب عشا عادي بنصحكم فيه واكيد مابتندمو
  • Review by Somaiah of JBC Cafe
    8 years ago
    برمضان احلى شي اللمه والجمعه مع العيله بغض النظر ووين بس في JBC CAFE بكون الجو كتير عائلي بالديكورات والبروغرام تبع السهره يعني لو حتى معكم صغار ابدا ما بتخاف عليهم من المناظر المؤذيه يلي ممكن يشوفوها بغير كافيهات جو عائلي بحت مع رقصات فلوكلوريه وحلويات رمضانيه والتمر الهندي ومابنسي فنجان القهوه الساده اول ماتقعد الشي الوحيد يلي بزعجني انو تصف السياره حتى لو في عندهم هالخدمه القعده الخارجيه كتير حلوه بهاد الوقت بكون الجو رائع المسا بنصحكم فيه خصوصا انو هالفتره عندهم مطربين
  • Review by Somaiah of Abu Nsair Mosque
    8 years ago
    مسجد كتير مرتب ومكانه مناسب للجميع بالمنطقه خصوصا انو اله ساحه مصفات خاصه كبيره وواسعه المسجد من جوا نظيف ومرتب ومزخرف والاضائه جدا مناسبه وبحب برمضان اكتر شي اروح عليه الامام كتير بخفف عالمصلين بقيام الليل والتراويح يعني مابهلكنا واحنا واقفين وليلة القدر ولا احلى منها خشوع واقامه مابتحس بالتعب ابدا واحنا بنتطوع مشان نوزع السحور عالمصلين الجو بكون رائع والموكيت نظيف وفي كراسي للناس يلي مابقدروا يوقفوا ومصلي السيدات كبير ونظيف ولا صلاة العيد عنجد مابحس انو عيد الا مع صلاة العيد والمسجد بكون مليان ناس والساحه الخارجيه كمان
  • Review by Somaiah of Noor Flowers
    8 years ago
    ولا ارقى من هيك محل وهيك تعامل عنجد ببيضو الوجه ومتعاونين عالاخر و شو مابتطلب بعملولك وبساعدوك بالافكار وبوصلولك طلبك لعندك كمان انا دايما بتعامل معهم لما بدي بوكيه ورد لجميع المناسبات بحطو اكسسوارات بتجنن مع الورد انا مره اتصلت اوصي علي باقة ورد لعيد ميلاد وكنت بشغلي فحكيتلو انو بس اخلص دوامي بمرء عليكم احاسب حكالي لا ماتغلبي حالك بنخلص البوكيه وبنجي عندك بتشوفه وبتدفعي وبنرجع نوصله لصاحبه يعني عنجد زوء بالتعامل ولطيفين مابحكموك بسعر لانو على أد فلوسك بيعملولك شي مميز وكمان ضمة العروس من عندهم شي بيحكي وراقي ومعها لولو و ستراس وفراشات حتى بالحفلات تنسيقاتهم روعه مع الشموع والكريستال و الورد على سيارة العروس ولا ارقى من هيك بس الشي الوحيد يلي ممكن يدايق انو المحل عالشارع الرئيسي ف ممكن ماتلاقو مصف واكيد اكيد بنصحكم فيه
  • Review by Somaiah of Carrefour
    8 years ago
    كل شي بتحتاجه بتلاقيه هون وخصوصا بعزايم رمضان كل شي موجود الخضره والحلويات واللحمه والعصير والضيافه كلها عندهم يعني مركز تسوق شامل لكل شي
  • Review by Somaiah of Telal Al Sham Bakeries
    8 years ago
    ازكي قطايف من عندهم العجينه بتشهي وبتضل طريه لتاني يوم ومابخرب بالشوي او القلي وعندوا حلويات رمضان والخبز والكعك الطازه كل يوم
  • Review by Somaiah of Hashim
    8 years ago
    احلي سحور ممكن الواحد يجربه من عند مطعم هاشم غير الاكل الطيب الجو الرمضاني يلي بتعيشه في مكان شعبي اله طعم تاني بتلاقي كل الناس حواليك بعيدوا عليك بتحس بروح رمضان عنجد وازكي شي الفته والمسبحه
  • Review by Somaiah of The Cake Shop Cafe
    8 years ago
    شو بدي احكيلكم عن هاد المكان عنجد انه مابنوصف خيالي بكل معنى الكلمه حسيت حالي في Doll House‏ رح ابدا بالعنوان من دوار خلدا باتجاه دابوق بس توصل اشارات النسر يمين بعدين شمال اول مجمع عاليمين المحل من برا واضح كتير عالباب مكتوب ممنوع التدخين و موجود WiFi ‎‏ وممنوع دخول انغر بيرد فيس :)‏ و ٢٥% خصم ازا تخالفت وانت عندهم في موظف بفتح الباب وبستقبلك وبخليك تختار الطاوله يلي بدك ياها ديكور المحل كتير حلو باللون الزهر والاخضر الكراسي وورق الحيطان والكاسات كلو نفس الرسمه مشان هيك حكيت عنه متل بيت الالعاب، اخترنا طاوله وقعدنا وجابولنا المنيو كتير مرتبه وديزانيها حلو ومكتوبه بس بالانجليزي والاسعار فيها منطقيه ومكتوب على طرفها انو الاسعار بالدينار الاردني الشي يلي ماحبيته الدبل تاكس !!! طلبنا غريك سالاد كانت فريش والجبنه من احسن الانواع والدريسنغ ممتاز و طلبنا سناكس تراي مع شاي بالنعنع ، التراي بجي فيها معجنات صغيره مشكله و ساندويشات حلوم و تيركي وتونا و أربع انواع من الحلويات هاي التراي بتكفي ٤ اشخاص وطلبنا كمان بيتزا دجاج بتشهي وبس طلبنا الحساب جابولنا ضايفة المحل صحن كوكيز مشكل بنصح الكل يجربه واكيد مارح تندموا
  • Review by Somaiah of Exit Club
    8 years ago
    من ارقى واجمل واشيك حفلات الزفاف يلي حضرتها بحياتي كلها يعني باختصار كان عرس ولا بالاحلام كانه من قصص الف ليله وليله تنظيم الحفله والديكور الخارجي وتنسيق الطاولات والديكورات والورد والاضائه والDJ‏ مهتمين بكل التفاصيل وأصغرها وعاملين بست رقص واسع كتير و اول الحفله بطلعو العرسان من بلكون بيلبسوا الدبل وبقطعو الكيك وبرقصو الرقصه الاولى يلي بفتتحو فيها الحفله كل شي فوق الخيال عنجد والاكل كمان كتير طيب والبوفيه المفتوح متنوع وفيه كل شي والمقبلات بتشهي والورد عالطاولات كلو طبيعي وكل عيله الهم طاوله باسمهم وفي مكان للصغار يلعبو فيه وبكون معهم سوبرفايزر يعني مافي خوف عليهم يعني انشالله بس يجي النصيب اول مكان رح افكر فيه اكيد
  • Review by Somaiah of Shallalat Abu Zad Restaurant
    8 years ago
    موقعه سئ كتير ومستحيل تلاقي مصف اقرب من ٢٠٠ متر ورقيب السير دايما باب المحل عطول بخالفك بالنسبه لاكل كتير طيب جربنا من عنده بروستد ودجاج محشي فريكه و رز ومعجنات و فروج مشوي وشاورما كلو كان زاكي وسريع بالتحضير بنصحكم تطلبو تيك اواي وماتجربوا تقعدوا بالمحل كتير عجئه وما بهتوا بنظافه الطاولات ولا الحمامات وممكن ينسوك حتى !!! والاسعار حسيتها معقوله يعني اخر مره طلبنا دجاجتين محشيات وصحنين رز و بطاطا بروستد مع سلطه طلع الحساب ١٣ دينار بس
  • Review by Somaiah of Jana Lebanese Cuisine
    8 years ago
    انعزمنا على العشا بهاد المطعم انا ووالدي مع كابيل اجانب كان كل شي فوق الخيال المقبلات البارده والساخنه والمشاوي والعصير والجو كتير رايق والاضائه هاديه ونوع الموسيقي كمان ،حبيت الفتوش بدبس الرمان كتير طيب والمشاوي مو ناشفه وبتدوب لحالها والرييش كانو مزبوطين عالاخر طلبناهم نص استوا والتبوله والكبه و يلانجي كلو ممتاز ومحضر بطريقه متقنه والتقديم على مستوي عالي طلبنا عصير برتقال فرش والمضيفين طلبو مشروبات روحيه وبالغلط انكبت كاسة المشروب على ملابس المدام يلي معنا وعلي طول غيروها وساعدوها تنشف ملابسها بماده خاصه الموظفين لطيفين بالتعامل وحواليك دايما والطاولات بينهم مجال منيح وكان عندهم حجه بتخبز عالتنور وقتها كتير حبيت الفكره بيستاهل ٥ نجوم وبنصحكم تجربوه
  • Review by Somaiah of Zaman Dry Clean
    8 years ago
    اقرب دراي كلين على بيتي بس ابدا مو منيح ويلي بدو يستغني عن قطعه ملابس بحبها ياخدها عندهم تمقلبت معهم صراحه واخدت ملابسي وكان في شي بدو ازالة بقع وشي بس دراي كلين عادي وفستان سواريه طلع الحساب ٣٠ دينار مابعرف ليش !! وحكالي بدهم ٣ ايام !!! وهاي مده طويله يعني لازم بالكتير تاني يوم بخلصوا المهم رحت استلم الدراي كلين وتفقدت الملابس ولسا عليهم بقع كانو بس مكويين خبرت صاحب المحل انه متل ماجبتعم بعدهم بحكيلي والله مابروحوا بالمره حكيت ممكن فعلا مابروحوا وبس روحت اكتشفت انه الملابس ( كشو) صغر حجمهم كتير رجعتلهم كمان مره بحكيلي الله بعوضك نصيبك هيك !!! فعلا لا زوق ولا احترام
Next

Places I like

    Photos I added

    صحون أزكدنيا المميزة
    مقبلات - فتوش بدبس الرمان وقطع الدجاج - قلاية بندوره مع خبز مقلي ( ضيافة المحل )
    منقوشة زعتر و عصير برتقال فريش