حمد العدوان

حمد العدوان

Amman . Since June 2011
11 Reviews
Added places
1
Reviewed first
1
Added reviews
11

My reviews

  • Review by حمد of Chapatti
    8 years ago
    كنت بالصويفيه وحسيت بالجوع، و بما إنو الجيران في عمان مدحوا في كتير فقررت أجربوا دخلت المحل و كان كتير مرتب و على عكس ما كنت أتوقع،، يعني كنت متخيل إني راح أشم رائحة البهارات الهنديه المزعجه بس كان العكس تماما، و الانطباع الأول كان مريح. عندو منيو كبيره و متنوعة و فيها الدجاج و اللحمه و السمك و السندويشات الشاورما و الرز و السلطة بالإضافه للعصائر الطازجة و المعلبه .. الاسعار من النظرة الأولى كانت متوسطة .. بس ما بعرف كيف الحجم بالنسبه للسعر إحترت شو بدي أطلب ..و أخيرا قررت أجيب شاورما لعدة أسباب منها إنو شكلها كتير زاكي و لونها أحمر و غريب، و تاني إشي أنا ما عمري جربت الأكل الهندي و لسه ما بعرف راح أحبه ، فى يعني أجرب إشي خفيف حتى أعرف في أمل ولا لأ. أخذت ساندويشتين شاورما و سألني إذا بدي إياهم يكونوا حاريين أو لأ فى طلبتهم وسط، 5 دقائق كانو جاهزين. كتيييييييييييييييييييييييير زاكي و قد ما أحكي ما راح أعطي حقوا ... و مع إنو كانت كتير حاره إلا إنها خرافيه ، و المره الجاي راح أطلبها حاره جدا .. و أزكى شي إنو السندويشات بعملها في الخبز الهندي (البوري) السعر دينار واحد لكل سندويشه و هو مناسب جدا ،، يعني ساندويشتين و علبة بيبسي بشبعوا و زياده انشالله في المرات الجاي راح أجرب الوجبات لإنه الواضح إنهم محترفين .. بالنسبه لسعر الوجبات بين 4 و 6 دنانير ... أنصح فيه
  • Review by حمد of Jafra Cafe
    8 years ago
    جفرا من الاماكن الحلوه إنك تروح عليها كل فتره من باب التغيير من ناحية الديكور .. يعني أشياء قديمه و انتيك و خشب.. جوه في الليل حلو ، بكون في إم كلثوم و عبد الحليم و هيك نوع من الأغاني و أجوائه طربيه و روقان بامتياز ، بس أكيد مستحيل تروق و الكافيه فل بس مع شوية تركيز و تأمل و تفكر و يوغا بتقدر تسمع ٥ كلمات من الأغنيه !!! الصبح كتييير أحلى، و مع كاسة شاي و منقوشة زعتر و جبنه و ارجيله بكون يومك بدا صح ؛) عندو برنده صغيره كتير، يعني صعب إنك تلاقي طاوله بس أنا أصلا بخاف منها و بحسها ممكن توقع فينا و تكون الحلقة الأخيرة ف بقعد جوا كل شيء لهون مبيين مثالي و هوه هيك إلا الأرجيله !! ما بتكمل ١٠ دقائق بتكون انحرقت و بلش طعم الفحم يبين ... ما بعرف شو نوع المعسل إلي بيستخدمو بس كتير سيئ ، و كل مره بروح بتأمل إنها تتحسن بس عبث، ف عشان هيك راح أصير أجيب المعسل معي تقييمي لجفرا ٥ نجوم لناس ما بدها ارجيله. أكله زاكي و أسعاره مناسبه و أكيد بنصح في :) طبعا مشكلة الصفه للسياره موجوده و الحل إنك تجي موصلات أو بتلاقي كراج بالأجرة ، بلاش ترجع و تلاقي المخالفه بترفرف على زجاج السياره و يخف عقلك و يوقف قلبك ! ف خدها من قاصرها
  • Review by حمد of Feel Burgers
    8 years ago
    أخيرا ... جربت فيل :)) على قد ما قرأت عنو في جيران ، أخذت الخطوه الجريئة - على الأقل إلي، لإني مقتنع تماما إنو بس المطاعم العالميه بتعرف تعمل برغر زاكي زي ال-mcdonalds و-burger king و TGI Fridays وصلت عندو في وقت الغداء يعني حوالي ال-2:00 وطلبت وجبة المطعم (برجر فيل و بطاطا و بيبسي) ... الكاشير كان لطيف ومبتسم وحكالي عن مكونات كل سندويشه بس بالأخير أخدت برجر فيل لأنها كانت البرغر الطبيعيه، يعني لحمه وبصل وبندورة وجبنه وما فيها أي شي غريب زي الأناناس أو الجبنه الزرقا .. البيبسي علبه 330 مل ف واضحة وما بدها حكي ، البطاطا كانت زاكيه كتير ، صحيح انها بطاطا مجمده بس والله شكلها وطعمها بحكو انها من النوع المدفوع عليه ، مش زي باقي المحلات إلي بجيبو أرخص نوع - والله أعلم - . البرغر وهو الأهم.. عبارة عن قطعتين من اللحم المشوي واللذيذ إلى أقصى حد، مع شرحتين من الجبن الذائب، والأهم هو الصوص الأحمر - إلي أنا مش عارف ايش هوه بس كان خورافي !! - والبصل والبندورة الطازجٍين !! كانت ألذ مما وصفت ! اللحمه كانت طريه و الواضح والأكيد انها مش برجر جاهز مجمد إلي بتقدر تشترها من أي سوبر ماركت ... لأ هاي كانت واضحة انها من ملحمه واللي عملها فنان !! دفعت 5,00 دنانير وإنتظرت 20 دقيقة بس كانت تستاهل .. الصفه متوفرة شيء أخير .. بكل شيء ممكن تتحمل عدم الكرم في إلا في الاكل، يعني بتلاقي بياع الشاورما لما تحكلو زياده مايونيز بسلخك جحره كانك طلبت منكر !! واللي زيو كتير .. بعطيك الساندويشه ونفسو يوخد منك مصاري ويعطيك ولا اشي !! أنا شفت عند فيل شيء ممكن يكون عادي لشخص غيري بس بصراحة كتير حلو ، كل طاولة عليها -بالإضافه للكتشب - زجاجه باربكيو صوص ومن النوع الجيد جداً وفي طاولات عليها زجاجتين وأكيد مش مخلوطين بمي !! يعنى بال-mcdoanlds إذا طلبت باربكيو بحطلك علبه صغيرة و- بتتدفع 35 قرش ... كتير حبيت الاكل والكرم ب فيل وان شاء الله يضلوا بهاد المستوى :)) وشكرا جيران لإنو بدونكم ما كان عرفنا أماكن مميزة
  • Review by حمد of Habibah Sweets
    8 years ago
    هو أكيد عندو أزكى كنافه ناعمه في الحياه، بس لما رحت عندو قلت مستحيل أكل شي بعرفو ومجربو، فطلبت عثمليه بالقشطة، وللأسف ما كان موجود، مع انها موجوده على المنيو، نبدأ من الأول .. الصفه متوفره، في البدايه حاولت أصف عند البازار اللي بجانبو، بس طلعلي عمو وحكالي إنو المواقف هاي لزبائن البازار، وأكيد حقو، بس بعدين مشي الحال وصفت بالخلف. لما دخلت المكان كان كتير حلو، وصاحبو الحج محمود حبيبه كان قاعد وبتأكد إنو كل اشي تمام، ضيفوني قهوه سادة وشوكلاتة والشباب مبتسمين الله يعطيهم العافيه ... الطابق الأول في كل شيء .. الشوكلاتة والكيك بأنواعو (التشيز كيك والموس ا غيرها) والدونات والحلويات الشرقيه والغربيه وكل شيء بندرج تحت قائمة الحلاويات، وكمان كان في معجنات وشكلهم بشهي.. والنظافه شيء لا يصدق ، يعني لو بفندق 5 نجوم مش هيك، ما شاء الله ... اطلعت على الطابق الثاني (في درج كهربائي) وشو هالقعده ... وشو هالكراسي والكنبايات اشي بجنن ومدفوع عليه كتير والله أعلم، والبرندة إلي على شارع المدينه المنورة، يعني لا تعليق، هو الديكور كلو على بعضو وطريقة تصميم المبنى اشي غريب ومش طبيعي :)) بس لازم إتشوفو بعينكم ... كنت بدي عثماليه بالقشطة بس ما كان في وما بعرف ليش، بس إنو عادي لإنو المنيو بدك ساعة لتقدر تقرأها وتختار منها، أخيرا طلبت بين ناريين (الكنافه إلي من فوق ومن تحت بتكون عجينة الكنافه وبالمنتصف الجبنه) وزجاجة ماء، لو أحكي فيها قصيدة شعر قليل عليها.. خيال بحت !! كتييييييييييييييييييييييييييير زاكيه ... وفي عندهم القهوه بأنواعها، يعني بعد الحلو تشرب قهوه سادة ، يا سلام ! بس كنت مستعجل فما قدرت أعيش هاد الشعور ، بس ان شاء لله في المرات القادمه. طلع الحساب حوالي 2.50 دينار ، و بستاهل كل قرش إندفع. اللي جاي على بالو مكان مرتب ويوكل في حلو وينبسط، لازم يجربوا :))
  • Review by حمد of Darabuka
    8 years ago
    إتشجعت أروح على دربكه بعد ما شفتو في جيران، لإني مش من الناس المغامرين، يعني إتروح عشان تغير جو ويجو ينكدو على أهلك !! رحت على دربكه على ال-11 صباحا الأربعاء الماضي ، الصفه بحكم الوقت كانت متوفرة لإن ما كان حدا بالشارع لسه. المكان بوخد العقل، قعدت على الطابق الثاني وكان المنظر ساحر على وسط البلد وجبل عمان والهوا برد الروح. طلبت قهوه امريكيه، مو هالشئ الكبير إلي ممكن أحكم على محل في بس كانت طيبه، شوي إتأخر بس إنو عادي. الطاولة اللي بجانبي طلبت فطور، كان شكلو مبين إنو زكي و الريحة بتجنن، ما حاولت كتير أدقق بلاش أحسد الجماعة ويتشردقو ويروحو فيها، فاختصرت . :)) :p الشباب هناك محترمين وانبسطت كتير والله وأكيد برجع أعيدها ان شاء لله . دفعت حوالي 3.5 دينار لإنو في ضريبه وفي ١٠٪ خدمه (سياحي) وعشان هيك 4 نجوم لإنو أسعارو غاليه شوي، بس بضل مكان غير شكل.
  • Review by حمد of Snax Convenience Stores
    8 years ago
    مرة وحده جربتو وكان كتير مرتب والموظفين في كتير محترمين (فرع الصويفيه) اشربت من عندهم سلاش زاكي كتير ب-35 قرش !!! وأكلت هوت دوغ أزكى ومن يومين شفت إنو صار عندهم تطبيق على App Store كتير حلو و في أخر جديدهم وعروضهم أسعارو رخيصة والجوده عاليه وأكييييد بنصح الكل في
  • Review by حمد of Vega Fitness Clubs
    8 years ago
    والله شو بدي أحكي لا أحكي !! يعني لما اشتركت في شفتو ضخم وإن كتير كبير ، بس طلع عدد المشتركين يمكن أضعاف أضعاف حجم النادي ! 1) أجهزة الركض: 12 جهاز وعدد الأشخاص إلي بكونو ينتظرو دورهم أكتر من عدد الاجهزه، ونسبة انك ما تستنى على الدور وتتطلع على جهاز ركض بسرعة = -23% !! 2) المسبح والجاكوزي: كتير صغار وبالنسبه لحجم الناس، اشبه بالبانيو !! 3) الخزائن: حوالي 300 خزانه و اكتر وبتجي مرات ما بتلاقي خزانه !! 4) صالة الحديد: مستحيل تلعب بدون ما تستنى ونااااااااااااااااااااااااس وحدث ولا حرج !! 5) الكراج: طابقين ومع هيك ممكن إتصف السيارة برة بالشارع (هدا إذا لقيت مكان). 6) المصعد: هو مصعد واحد من الكراج الأول للتاني للإستقبال (تقريباً بدك تستنى 3 سنوات)، وبعدين في مصعد عشان تتطلع على طابق الرجال الأول والثاني (و هون كمان راح تستنى 13 سنه) وأكيد راح تتطلع على الدرج وتوصل تعبان وترجع تنزل وتاخد شاور وإتروح!! 7) الحمامات: 8 حمامات وزيهم زي أجهزة الركض، لو تتطلع براسك شجرة ما بتتدخل بدون ما تستنى بإختصار: النادي أشبه ب-Mecca Mall ليلة العيد !! وباختصار كمان: التمرين إلي بدو 45 دقيقة راح يأخذ معك ساعتين،، هدا إذا ما روحت وإنت معصب ! نصيحه أخيرة: إذا قررت تشترك في النادي، روح شوف كيف وضعوا وقت ما إنت راح تجي تلعب في، مثلاً إذا راح تصير تروح عليه على الساعة 7:00 روح شوفو على الساعة 7:00 وشوف كيف الوضع بكون واطلب انك اتشوف النادي قبل لا إتسجل، وما إتسجل وإنت على الإستقبال لإنك أكيد ما راح اتكون شايف الوضع 100% النادي في أشياء حلوه أكيد ونظيف بس يا حرام ضاعوا مع كل هالمساوئ
  • Review by حمد of Kababji Jordan
    9 years ago
    أنا جربتو مرة كتير زمان وكان كتير زاكي وبنصح الكل يجربوا ، بس ما بتذكر إذا كان في أرجليه أو لأ
    بس سؤال يا كبابجي .. كم سعر بوفيه الافطار في رمضان شامل الضريبه والخدمه ؟؟
  • Review by حمد of Furun Sabaho
    9 years ago
    على قد ما سمعت بجيران قررت أروح وأجرب !! ويا ريت ما جربت !! هلا هوه مش سيئ بس كتير كتير كتير كتير عادي !! أكلت من عندو منقوشة زعتر ووحده جبنه عكاوي .... بصراحة مخبز "أبو خميس" الي موجود بل الصويفيه كتير أحسن منو بالف مرة !! عنجد هداك الجبنه العكاوي عندو لو امك بتعملها بالبيت ما بتتوصى فيها زيو !! خورافي والله !! أخ يا صيامي :)
  • Review by حمد of Al Dayaa
    9 years ago
    الشاورما عندو لا يعلى عليها ، وخصوصاً هاد الفرع !! الشباب إلي هناك محترمين لدرجه خرافية وكتير بشوشين مع إنه عندهم ناس كتير - ماشالله عليهم !! البطاطا الودجز إلي عندو يا اخوان قصه لحالها !! على قد ما أكلت ودجز بحياتي بس زي هي ما أكلت ... مش معقوله شو زاكيه !! لازم توكلوا من عندو ، لو في 1000 نجمه كان أعطتو
  • Review by حمد of Al Shalati Central
    9 years ago
    في ليله ما فيها ضو قمر ، روحت أصور من عندو 10 صفحات عشان أن عندي تاني يوم إمتحان !! حاسبني على الصفحة الوحده 15 قرش!!! يعني طلعوا علي 1.50 دينار ... مع العلم انهم بالمكاتب إلي جنب الجامعة بطلعو كلهم ب 15 أو 22 قرش (الصفحة الوحده ب 2 قرش ) ... هلا المبلغ كلو مش مستاهل الحكي بس المبدأ !! يعني اغلى ب 10 أضعاف !! هاد لو بدي أصور دوسيه شو أعمل ؟؟ أقدم على قرض !!
  • Review by حمد of SmartBuy
    9 years ago
    بصراحة مرة اشتريت من عندكم وطلع مش شغال وجاء المدير ما عمل اشي وحكالي ما بقدر يعمل اشي
    !! انتو بس شغل حكي وأعلانات ولو بقدر ما بعطيكم ولا نجمه !!
Next