سما خالد

سما خالد

Amman . Since April 2011
32 Reviews
Added places
1
Reviewed first
4
Added reviews
32

My reviews

  • Review by سما of Ward Restaurant
    9 years ago
    كتير كنت حابة اروح هالمطعم على اد ما سمعت عنه واليوم رحت مع الاهل افطرنا هناك وتعليقي هو انه عادي جدا من حيث المأكولات والخدمة مو سريعة وممكن نحكي دون المستوى اللي كنت اتخيله والشي الوحيد الللي حسيته مميز هو الاعدة والجو العام فعلا حلوة واجواء مميزة وشي منيح يضاف اله وجود مصلى للجنسين .
  • Review by سما of Robina
    9 years ago
    قبل ما اتعامل معهم سمعت عنهم كتير انهم روعة ومحترفين لحديت ما جربتهم وفعلا ما حد يسمع من الناس لانهم ببالغوا بشكل كبير ...
    تعاملت مع روبينا قسم المحجبات وسيء جدا والموظفات صغيرات بالسن كتير وما عندهم اي خبرة واي احترافية واول ما رحت كانوا عالفيس بوك وتويتر وبتخوتوا على بعض . المهم انه الصور ابدا ما كانوا بالشكل المطلوب مع العلم اني خبرتهم على شو بالزبط يركزوا ومع ذلك ما كان في اي شي مميز والله العظيم شغل صغار فعلا . غير انه مواعيدهم مو دقيقة بالمرة 4 ايام رايحة جاي اليوم وبكرة ومشغولين وما بعرف شو مع العلم اني كنت دافعة. شكيت عالبنات الموجودات و الصور رميتهم لانهم بأرفوا واتصل المدير فيي يرجعلي الفلوس وما رضيت . روبينا للمحجبات سيء سيء سيء سيء .
  • Review by سما of King Hussein Cancer Center
    9 years ago
    انا تفاجأت من المركز اولا كبناء كتير مرتب ومتعوب عليه والنظافة جيدة جدا ولكن تعليقي الوحيد انه لما قمت بزيارة احد المرضى من الاقارب في الجناح الثالث قسم الرجال تفاجأت من اسلوب الكادر التمريضي لما طلبت منهم متابعة حالة المريض وانه يريد ان يشرب الماء ومو اي حد بقدر يشربه المي لحالته الدقيقة والحرجة وجاوبوني ما النا دخل لما ييجي الممرض المختص بالمريض سيقوم بمتابعته علما انهم حكولي وين اللي كان بشربه السوائل بالبيت ؟؟؟ حكيتلهم انها ابنته الممرضة وبس هي مو موجودة هلا . المهم انهم ما شربوا المريض وهو كان ميت عطش عن جد انا تفاجأت من الاسلوب ؟؟؟
  • Review by سما of Cafe des Artistes
    9 years ago
    فعلا مكان مريح وهادي وأعدته حلوة واجواءه مختلفة نوعا ما عن غيره بالديكور الفني والبسيط واسلوب عرض اللوحات وفكرة نشر الغسيل اللي ذكرها جاري هشام كانت حلوة ومميزة بالمكان .وبتحس حالك بالبيت ايام الشتا والكل أعد بالصالون والغسيل حواليه شعور كتير حلو واله معنى خاص وطريقة ترتيب الكنب والكراسي مريحة والمشروبات متنوعة وجيدة والخدمة سريعة بس ياريت يمنعوا التدخين منعا باتا .
  • Review by سما of TGI Fridays
    9 years ago
    فعلا اكله زاكي كتير وخصوصا الستيك التوسكاني مع صوص البلسميك والمشروبات منعشة واساميها غريبة ناسية شو طلبت .
    والأعدة حلوة ونظيف والخدمة جيدة جيدا والاجواء مريحة بس غالي يعني بتخيل اقل طبق ب 10 بدون عصير ومقبلات واشيا تانية بس ستحق التجربة .
  • Review by سما of Carrefour
    9 years ago
    آه من كارفور ؟؟؟
    بالنسبة الي ما برتاح فيه ابدا ولا مرة رحته وجبت كل شي بدي اياه بالعكس بجيب الشي اللي ما بدي اياه و دايما بدوخ وانا بدور ويا سلام لو وانا طالعة تزكرت شي ورجعتله طبعا ماراثون وانا بلفلف على أد ما هو كبير . بس اكيد فيه كل شي وبعمل عروض كويسة بس انا بفضل المكان الاصغر للتسوق .
  • Review by سما of Natural Looks
    9 years ago
    كتير بحب هالمكان وبحب منتجاته من كريمات مغذية للبشرة طبيعية والكريمات بالفايتيمينات الطبيعية من مصدر البرتقال والخيار والصبار وفعلا رائحتها طبيعية وانواع مزيلات العرق رائعة والسبريي شور والميك اب الطبيعي . بس اخر فترة غيروا التشكيلة وانا حسيت كانت افضل من هلا وبالنسبة للاسعار غالية ومرات ببالغوا بالاسعار على اساس انه طبيعي .
  • Review by سما of French Embassy
    9 years ago
    تعاملهم لطيف والخدمة منظمة وبمواعيد مسبقة انا جربتهم بخصوص معاملات الهجرة والبعثات والدراسة وكانت المسؤولة مدام هند ملكاوي رائعة وببتعطيك كل التفاصيل المطلوبة والمعلومات بشكل واضح وسهل .
  • Review by سما of Sara Saudi Spa/University street
    9 years ago
    سارة السعودي فرع اجبيهة كتير روعة من حيث الديكور الداخلي والمبنى والتعامل والتنظيم طبعا في طابق سفلي للاجهزة والايروبيكس والمائيات والمدربات لطيفات ومتعاونات والطابق العلوي كل خدمات البشرة والليزر وفي مسبح مكشوف بالصيف.
    اوقاتهم كتير حلوة من 7 صباحا لل 10 مساء والجمعة من 9 صباحا لل 7 مساء واحلى شي انه فقط للسيدات ... اسعاره طبعا غالية مقارنتا مع غيره بس فعلا نادي مريح انا جربته من السنة الماضية وان شالله حرجعله .
  • Review by سما of Samhouri Exchange
    9 years ago
    السمهوري للصرافة كتعامل راقي وخدمة ممتازة تعاملت معهم بالحوالات ارسال واستقبال حوالات كتير خدمتهم كويسة وتعاملهم لطيف وعمولتهم اغلى من غير محلات صرافة بس ملتزمين وبتحملو اي خطا ممكن يحصل لانه مرة صار في تأخير واتصلوا اعتذروا وكان اسلوبهم راقي بالتعامل وحلوا المشكلة بسرعة .انا تعاملت مع السمهوري فرع شارع الجامعة الاردنية.
  • Review by سما of Al Ridwan
    9 years ago
    مدارس الرضوان من افضل المدارس بعمان بالجمع بين الدين والعلم البرامج التعليمية والمناهج كتير متطورة ومتناسبة مع ثقافتنا وبنفس الوقت بتضاهي التطور المطلوب .والانشطة اللامنهجية كتير غنية ومفيدة والكادر التعليمي مؤهل واادارة جيدة جدا بس ما بشغلوا الا المعلمات المجلببات وما بعطوا فرص لغيرهم وبالنسبة للاقساط نوعا ما غالية وعندهم بالصيف بعملوا نوادي صيفية غنية بالنشاطات .انا ما جربتها بس اختي معلمة فيها وكتير بتمدحهم .
  • Review by سما of Hayat FM
    9 years ago
    قناة متنوعة بطابع ملتزم ومتوازن بتطرح قضايا مهمة واخبارها جديدة وسباقة وبرامحها كتير حلوة وخصوصا برنامج عالم حواء بيطرح كل شي بهم المراة باسلوب جميل وبرنامج لدكتور امجد قورشة كمان كتير حلو .انا بفضلها وبعتبرها افضل الموجود عالساحة حتى لو في بعض الانتقادات اللي مممكن اصلاحها .
  • Review by سما of The Children's Museum
    9 years ago
    متحف رائع بمعنى الكلمة عبارة عن مجتمع صغير للاطفال بتحليل علمي وعملي فعلا تجربة جميلة للاطفال والكبار لانهم حيستفيدوا ورح تضل بالذاكرة ويا ريت تتكرر متل هالمشاريع اللي بتخدم الاطفال وتكون بمتناول الجميع متل المجتمع الياباني اللي عنده هالمشاريع متوفرة للكل وموجهه للعقول .
  • Review by سما of JBC Cafe
    9 years ago
    النظافة سيئة مرة طلبت قهوة وكان الفنجان وسخ من بقايا سابقة . وتلبية الطلبات بطيئة وفعلا بالشتا بكون بارد وآعد على اعصابك من البرد واسعاره غالية والطلبات عادية والنسكافيه اللي بقدموه مو اصلي وطعمه بالمره .
    فقط الديكور حلو والاعدة الخارجية .
  • Review by سما of Scholl
    9 years ago
    مكان رائع ومريح والعاملين فيه كفاءة عالية والمستلزمات المستخدمة حديثة كتير ان كان اهتمام بالقدم من علاج ومساجات ومراهم وترطيب واحذية طبية كتير رائعة من حيث الراحة بس كأشكال للاحذية ما بتكون مودرن يعني عادية بس فعلا مريحة واسعاره غالية بس بستاهل .
  • Review by سما of Amal Abdullah Beauty Center
    9 years ago
    الصالون حلو ومرتب والميك اب بسيط وحلو بس بالنسبة الي ما حرجع لانه تعاملهم سيء وخصوصا امل العبدالله يا الله شو مستبدة وما بتحب اي رأي يمشي غير رأيها وبتحسسك انك حشرة عم تحكي وما بتعمل الا الرؤية اللي هي بتشوفها حتى لو انتي طلبتي غير شي .
  • Review by سما of Gorgeous Beauty Center
    9 years ago
    هاد الصالون جربته بعرس اختي بناء عسمعته الكبيرة .
    حجزنا لعروس ومرافقة ويوم العرس ما بتتخيلوا العجأة بالصالون والكل مشغول ومافي اي اهتمام بالعروس وتوتر مو طبيعي بالوقت وهم يحكولنا هلا وكمان شوي وفعلا اندمنا وقتها والمهم بالاخير عملت التسريحة للعروس بتلت ساعة والمكياج والله 5 دقائق واسعاره غالية اخدوا 350 ومابعرف على شو يعني كنا متوقعين معاملة ملوكية ومريحة بس للاسف طلع العكس تماما ومع كل هالتوتر اللي صار .
  • Review by سما of Tche Tche
    9 years ago
    مكان جلو ونظيف وأعدته جميلة وخصوصا بالهواء الطلق كتير روعة والخدمة جيدة ونفس الملاحظة للجيران انه فعلا الجراسين تعاملهم مو كتير لطيف.
    واكيد رح يضل هالمكان اله انطباع خاص بسبب لقاء الجيران بهاد الفرع وتشرفت بالجميع بس كأنه كان كل اتنين او تلات قريبين من بعض عم بحكو مع بعض وما كان في مجال للحوار الجماعي بسبب البعد بالجلسة وتاني شي بسبب صوت الاغاني العالي. بشكل عام المكان حلو بس الاحلى الأعدة برا .
  • Review by سما of Rawan Cake
    9 years ago
    روان كيك من الاماكن المفضلة عندي بمجال الحلويات كتير مرتب ونظيف والجودة عالية والاسعار مناسبة وافكاره مبتكرة وخصوصا بحفلات اعياد الميلاد للاطفال عنده كل مستلزمات اعياد الميلاد من الكيك للبالون .
  • Review by سما of Mango
    9 years ago
    هلا في ملابس عنده حلوة ومميزة بس مرات كتير بتلائي ملابس كتير غالية بدون ما يكون فيها شي مميز بروح اتفرج اغلب الاحيان و يمكن كل سنتين بشتري منه لبسة.
  • Review by سما of Al Jbaiha Amusement City
    9 years ago
    فعلا اصبحت سيئة من العاب قديمة وعدم راحة نفسية ابدا لوجود شباب سيئين واسعارها زادت عشي فاضي مافي اي تطوير وبتخيل بيوم من اايام لا سمح الله نسمع عن حوادث داخلية بالالعاب لانه ما بتوقع في صيانة اصلا .ومحلات التحف والانتيك والتذكارات صارت شغل استهبال بالاسعار غالية كتير .يعني غير ملائمة للعائلات بوقتنا الحالي بانتظار التحديث ان حصل
  • Review by سما of King Hussein Park
    9 years ago
    حديقة جميلة وكبيرة ومتكاملة للصغار والكبار فيها ساحات للعب ومتحف الاطفال رائع والركض والمشي والتأمل فيها كتير حلو ومريح للبنات مافي مضايقات بس اتدايق على طول بروح حدائق الحسين اتنفس هوا نقي .بنصح الكل يجربوها ويحافظوا عليها ويكونو اد المسؤولية بنظافتها .
  • Review by سما of Zain Telecom
    9 years ago
    من احسن الشركات حتى لو غالية بالنسبة الي مرتاحة معهم من 6 سنين نفس الخط معي وما رح اغيره خدمتهم كويسة وارسالهم قوي وتعاملهم لطيف وعروضهم كتيره وما بعملو الها اعلان كافي عشان هيك ما بنستفيد من العروض بس بشكل عام هي الشركة الاولى والاحلى والاجمل والافضل بالاردن . جربت امنية النصابه بخط فاشل وجربت اورانج النصابة التانية بالانترنت والضرائب الخفية اللي بصدموك فيها لما بدك تفصله .
  • Review by سما of Umniah
    9 years ago
    خدماتها سيئة ونصابة وارسالها مقرف ونفسي ارفع قضية عليهم وخدمة الزبائن من اسوا الشركات بحكولك كل شي تمام وبالحقيقة مو عاملين شي انا اشتريت خط امنيه وحكيت لصاحب المحل اللي اشتريته منه انه بدي اياه بس استخدمه خلال فترة قصيرة انزل اعلان بالجريده فيه وبعدها بفصله يعني مو مهتمة كتير بالعروض المطروحة واعطاني خط بنغالي ههههه وبحياتي ما شفت اسوا من هيك خط 24 ساعة رسائل هبلة مالها معنى وبس اشحنه على طول يخصمه منه لو شحنته ب5 بخصمه 5 ولو 10 بخصمه 10 بدون اي شي واضح وسبب وطلعت روحي وانا اتصل واراجع الشركة وعالفاضي بالاخير رميته من الزهأ.
  • Review by سما of Talal Abu-Ghazaleh Knowledge Society
    9 years ago
    مجتمع طلال غزالة يقدم لطلاب الجامعات كل الخدمات الميسرة من اجواء دراسة وكافتيريا ومكان جلوس وانترنت واماكن نقاش جماعي ونوادي للغات باشتراكات سنوية رمزية ومحاضرات مجانية متنوعة تخدم فئة الشباب ومكتبة لبيع القرطاسية والنسخ والتصوير ومحاضرات باسعار رمزية في مجال التسويق والاقتصاد والترجمة وبناء الذات.ويعقد فيه نادي توظيف كل سنة بمشاركة كبرى الشركات والمؤسسات من مختلف المجالات .
Next