عبير هشام ابو طوق

عبير هشام ابو طوق

عمان . منذ يوليو 2010
صحفية، مدونة، مصورة فوتوغرافية، عملت مسؤولة عن موقع جيران عمّان من 6/2010 - 1/2012، اجتماعية جدا، بقرأ كتير كتب، بحب السفر والمشي. abeeryarmouk2010@gmail.com
72 من المراجعات
الأماكن المضافة
25
مراجعاتي
72
أماكن فضّلتها
20

مراجعاتي

  • Review by عبير هشام of بانكيك اند وافل هاوس
    قبل 9 سنوات
    جربت المكان من فترة قريبة بعد ما انعزمت عليه مع مجموعة من الزملاء في العمل .. المكان لطيف، قعدته مريحة .. اللي حبيته فيه انه مقسوم لنصين: مدخنين وغير مدخنين .. لانه الدخان بعملي مشكلة خاصة في الشتا وقت ما الابواب والشبابيك مسكرين .. وهذا شي مشجع ع البيئة .. فشكرا للادارة ع هالخطوة :)
    انا وقتها طلبت (Spanish Omelet) كانت كتير زاكية .. كتير بنصحكم فيها .. والكمية معقولة، او بالاحرى بالنسبة الي حسيتها كتيرة شوي لاني ما باكل كتير .. كمان طلبت معها عصير ليمون مع نعنع، بس ما كان كتير زاكي .. عادي، لانه ما كان مركز زي باقي المحلات .. ولهيك ما عجبني كتير لانه خفيف! الموظفين اللي هناك خدومين .. وبشوشين .. وبتلاقي شاب بستقبلك ع الباب اثناء الدخول للمكان وبرجع بودعك عند الخروج .. وهي لفتة حلوة .. بحبها أنا :) الدفع عنده كان ع الكاش .. ما كان فيه فيزا .. وهالموضوع عادي بالنسبة الي .. لانه ما بحمل بطاقات انا .. كله كاش، يمكن على عكس كتير ناس .. شوية المكان بتحسه غير ظاهر للكل .. الا اذا انت بتعرف المكان منيح من قبل .. لانه جاي في دخلات وشوارع فرعية بين البيوت .. بدك دليل لتوصل .. الاسعار من خلال تصفحي للمنيو .. حسيت انها عادية .. يعني وجبة الفطور تقريبا بتكلف 5 دنانير بدون ضريبة على ما اعتقد .. لكن، المكان لطيف بستحق تجربوه وتعيدوا التجربة كمان .. صحتين مقدما :)
  • Review by عبير هشام of كيتشينت
    قبل 9 سنوات
    جربت مطبخي مرتين خلال الاسبوع الماضي بعد ما قرأت كتير مديح عن مأكولاته على تويتر .. وبعد ما جربت صحن صغير من الباستا لديهم خلال واحدة من النشاطات الاجتماعية التطوعية التي شاركت فيها مؤخرا.
    طلبت منه في المرة الاولى وجبة مقلوبة الفول مع اللحمة، اجاني الطبق رائع جدا .. كميته كبيرة من حيث الفول واللحمة اضافة الى أنه كان مع الاكل علبة لبن صغيرة، الاكل كتير زاكي .. ما بتفرق طعمته عن أكل البيت. أما في المرة التانية طلبت دجاج تندوري، فكان كتير زاكي .. فيه كمية جيدة من الرز اضافة الى قطعة كبيرة من الدجاج المخلوط بالصوص الخاص لهذا الطبق. طبعا مطبخي بوصلوا الاكل سخن .. مع أنه أنا مكتبي في الصويفية وهم عند الجامعة الاردنية بس فعلا الاكل محفوظ بطريقة مرتبة .. بحيث تضمن لك وصوله ساخن وفي مكانه، يعني ما كب داخل الكيس اي نقطة. بحب تعامل الموظفين اللي بوصلوا الاكل في مطبخي .. لأنهم راقيين بالتعامل .. عارفين شغلهم مزبوط .. مع اني في المرة التانية لما طلبت وعن غير قصد لخبطت في رقم عمارتنا في المكتب وبالتالي تأخر الموظف شوي ولكنه لما أجا اعتذرلي عن التأخير مع انه انا السبب. التغليف للأطعمة في مطبخي رائعة جدا .. عبارة عن أكياس ورقية وليست بلاستيكية وهذا فيه حماية للبيئة .. كمان بحطوا داخل الكيس نكاشة اسنان + شوكة + سكينة + فاينة. بتقدر تطلب من مطبخي بأكثر من طريقة، على تويتر .. الايميل .. اون لاين من خلال الموقع الالكتروني او هاتفيا .. كل الطرق متاحة. الطلب ما بياخد وقت ليوصلك .. وبتقدر تطلب وجبة غداك ضمن ثلاث اوقات متاحة خلال جميع ايام الاسبوع ما عدا الجمعة والسبت .. بنصحكم تجربوا مطبخي .. رح تحبوه كتير .. فعلا، إنه طبق مصنوع من الحب بحسب شعار مطبخي الرائع :)
  • Review by عبير هشام of كوشنز لاونج
    قبل 9 سنوات
    انا جربت المكان من يومين لما رحنا على بطلعة جماعية مع اعضاء وفريق جيران عمان، المكان جدا لطيف .. ديكوره كتير حلو .. الكنبايات جدا مريحة.
    الضيافة كانت مميزة .. ما تأخروا علينا ولا بطلبية مع انه العدد كان كبير (60) شخص .. حبيت عندهم عصير البرتقال كتير زاكي وفريش. جربت عندهم النسكافيه كمان .. زاكية :) الكوكيز كان زاكي كمان وجديد .. حبيته .. المكان اجمالا مرتب .. في قعدة جنب الشبك كتير حلوة خاصة بالصيف. بنصح فيه لعمل اجتماعات او قعدات جماعية :)
  • Review by عبير هشام of مطعم ورد
    قبل 9 سنوات
    من قبل ما أبلش أكتب .. بخبركم أنه النصيحة رح تكون قاسية .. تحملوا :)
    المكان كبير كتير .. شغل عرس او افطار اجماعي .. حلو، فيه مناظر رائعة من الاشجار والنوافير .. ومن هالناحية بعطيهم عشرة على عشرة. أما الاكل والتقديم والخدمة وهدول الاهم برأيي .. اليكم الملاحظات التالية:- 1. الاكل أقل من عادي .. ولو انه كله نعمة كريم .. بس انا لما قرأت نصائح عن ورد وسمعت عنه توقعت الاقي شي خرافي .. اكتر من لزيز .. لكني "تمقلبت" وطلع الاكل عادي جدا. 2. السلطات برأيي كمان عادية .. ما شفت ولا شي غريب، يمكن بحكم اني طالعة نازلة دايما من الاوتيلات. 3. المشروبات عادية وما فيها تنوع .. كل الموجود بحسب ما شفت كان قمر دين .. سوس .. خروب .. وفي نوع لبن ما دقت طعمه لأحكم عليه. 4. الضيافة عادية .. مش هالاشي الفظيع .. بالعكس حتى اخد الجرسون وقت ليجيبلي معلقة بدل اللي وقعت ع الارض وتوسخت، وقضيت وقت الانتظار هذا آكل رز في الشوكة! 5. كمية الاكل المتاحة لم تكن جيدة .. حسيت في كتير ناس راحوا يعبوا الصحون مرة تانية ما لقوا اكثر من نوع من الاكل .. ولهيك نصيحتي للقائمين على ورد: اما بزيدوا الاكل .. أو بقللوا عدد الحضور. 6. الحلويات .. كانت عادية .. اهم شي بالنسبة لي انه كان فيه كنافة ناعمة مغطاة بكمية جيدة من القطر. ملاحظة أخيرة: بنصح فيه للاعداد الكبيرة .. لكن بالنسبة لي ما رح أزوره مرة تانية .. لأنه كان أقل من التوقعات بكتير!
  • Review by عبير هشام of كازاريتشو
    قبل 9 سنوات
    زرت هذا الفرع اليوم برفقة مجموعة من الزملاء في العمل .. المكان حلو .. بس فيه كم ملاحظة سلبية عليه:-
    اول شي القعدة تبعتنا كانت مطلة على الشارع الرئيسي، يعني خد ازعاج قد ما بدك من زوامير سيارات وشاحنات كمان! الخدمة بطيئة جدا، والجرسون خربش بالطلبات وصار يسأل مين طالب عصير مانجا ولمين الليمون، صرنا ندل فيه احنا! الاكل طعمه عادي ويمكن أقل من عادي، انا طلبت سلطة يونانية طمعها زي اي مكان بره، وطلبت صحن سباغتي .. كبير ع الفاضي، وطعمه كمان عادي! الملاحظة اللي استفزتني كتير انه حجم الاطباق عنده كبير بشكل لا يوصف، انا مش النوع الاكيل .. بس مع هيك فعلا كان حجم الطبق للكل كتير كبير، لدرجة انه الصحن اللي حطلي اياه بكفي كل عيلتي المكونة من سبع اشخاص! وهالحكي - حجم الاطباق - الكبيرة زيادة حسيته منتقد من اكتر من زميل، لدرجة انه ما حدا كمل صحنه، ومديرنا طلب ياخد باقي البيتزا اللي طلبها تيك اوي! المكان نظيف .. الكراسي مش كتير مريحة .. في أماكن اصطفاف .. الديكور والجو العام حلو .. برأيي ما بستاهل اكتر من نجمتين .. بس انا كتبت ثلاثة كرمال الشباب والصبايا اللي كانوا معنا في هاليوم :)
  • Review by عبير هشام of مخابز الطاحونة
    قبل 9 سنوات
    بشتري من هذا الفرع كل جمعة تقريبا معجنات: زعتر وجبنة .. الحجم جيد لشخص مش أكيل كتير، النظافة في المحل ممتازة ..
    والخدمة سريعة مع أنه الدور بكون كتير خاصة الجمعة الصبح، بس العمو اللي بياخد الطلبات سريع وضحوك، وهالاشي مشجع وبفتح النفس بزيادة :) المكان جاي ع اللفة، يعني مش بسهولة تلاقي مصف لسيارتك، بس بتدبرها .. لكن هم ما عندهم خدمة اصطفاف للزبائن. العيب الوحيد على هذا المكان هو قلة ذوق وسوء تعامل موظف الكاش، دايما الاخ معصب .. متوتر .. بحجة أنه في ضغط من الزبائن. والمشكلة أنه ما برد التحية الصباحية .. لما تقوله "صباح الخير" ما برد، وبفتح ايده دغري لياخد المصاري! كله تمام في هالمحل ما عدا الكاشير، لازم ادارة الطاحونة تعمل واحد من اتنين بخصوصه: إما بتغيره أو بتخليني أعطيه كم دورة في التعامل وأسلوب الحكي الناعم مع الآخرين، ومجانا بعطيه اياها :)
  • Review by عبير هشام of حدائق الحسين
    قبل 9 سنوات
    مكان رائع جدا لقضاء اوقات الفراغ .. بروح عليها اسبوعيا مع عائلتي كل صباح جمعة لنمشي هناك ..
    الحديقة واسعة .. مرافقها جديدة، فيها أكثر من مكان للعب الاطفال. وفيها كراسي خشبية بعدد كبير جدا، بحيث يتسع للمرتادين لها. الحلو فيها أنها بأرقى منطقة في عمّان، حيث الهدوء .. والهواء المنعش. كذلك، يتوفر فيها أماكن اصطفاف واسعة للسيارات، يعني اللي عنده سيارة بصفها، وبنزل يمشي او يقضي وقت وباله مرتاح. شكرا لأمانة عمّان على هذه الحديقة التي تعتبر مكان رائع جدا للعمانيين وغيرهم من زوار المدينة لقضاء وقت مميز، بعيد عن صخب العاصمة. لمحبي الرياضة والمشي، ما الكم الا حدائق الحسين :)
  • Review by عبير هشام of فارمسي ون
    قبل 9 سنوات
    صيدلية متميزة جدا، كل ما بدي اشترى دوا أو أي شي طبي لازم أروح لأي فرع من فارمسي ون .. نظافة .. ترتيب .. تعامل رائع ..
    بتعامل مع فرع الصويفية من فترة كتير قريبة، لكنهم قدروا يخلوني واحدة من زبائنهم الدائمين .. ما بقدر اعطي هالفرع حقه من التقييم، لأنه كل شي فيها تمام. الصيدلانيات فيها كتير حبوبين .. بتعاملوا برقي واضح مع الزبائن، وهذا سر نجاح هالفرع وغيره من فروع فارمسي ون. الصيدلية بتتعامل مع كتير شركات تأمين من بينها الشرق العربي، اللي أنا مأمنة فيها. مستوى الاسعار مقارنة بروعة الخدمة ممتاز .. ومناسب للجميع .. انصح الجميع بالتعامل مع اي فرع من فروع فارمسي ون، وزي ما بقول الاطباء والصيادلة: اسألوا مجرب وما تسألوا طبيب .. ثقوا برأيي. بحب بسلسلة صيدليات فارمسي ون التي أسسها الريادي د. أمجد العريان، ونال عليها جائزة ارنست ويونغ أنها موجودة بكل مكان في عمّان تقريبا .. بتمنالهم التوفيق ويفتحوا المزيد من الفروع.
  • Review by عبير هشام of منتجع نسيم الجبل
    قبل 9 سنوات
    زرته لأول مرة يوم السبت الماضي، 28/5/2011 برحلة جماعية مع الشركة، توقعت الاقي مكان فخم جدا لأنه كنت سامعة عنه كتير.
    بس المكان عادي .. وما في شي مميز باستثناء وجوده على قمة جبل في السلط، اللي هي أصلا حلوة بشجرها وجوها اللطيف. المكان فيه كم قعدة حلوة، ومنها مكان خاص للعب الاطفال، لكنه صغير جدا. الاكل قصته قصة .. اول شي ما كان زاكي .. عبارة عن ساندويشة همبرغر، انا اخدت على دجاج .. كانت يابسة كتير .. لدرجة حسيتها قديمة! ما في تنوع بالمشروبات المقدمة، لانه كلها غازية .. بالنسبة للميّ، اشتريتها مني، واخدوا حقها نص دينار، مع انه حقها المكتوب عليها (20) قرش .. شكلهم اصحاب المكان بفكرونا سياح، لهيك كان سعر زجاجة المياه الصغيرة سياحي! اعطيت المكان نجمتين كرمال عيون الطلعة الجماعية مع الشركة بس :)
  • Review by عبير هشام of تشيه تشيه
    قبل 9 سنوات
    زرت هذا الفرع لأول مرة يوم السبت الماضي، 28/5/2011 لانه كان في عنا طلعة تجمع فريق المجتمع في عمّان مع مجموعة من الاعضاء المتميزين في الموقع.
    المكان لطيف .. قعدته حلوة .. المشروبات عادية .. انا اخدت شاي، كانت الكاسة كبيرة، لدرجة مستحيل تخلص بقعدة، مع اني طلبتها أصغر حجم! الخدمة نوعا ما جيدة، بس في كم من موظف "جرسون" كان تعاملهم ناشف ع الآخر، لدرجة بفكروا حالهم مستضيفين المجموعة ببلاش! المكان نظيف .. مرتب .. وشغل طلعات جماعية او فردية .. الجو العام فيه حلو .. وفيه تهوية جيدة، خاصة وأنه مكان يقدم الاراجيل ومسموح التدخين فيه، وهذه نقطة ايجابية له. ما عندي فكرة عن الاسعار، لاني ما دفعت .. بس بتوقع انها مقبولة ومناسبة للجميع. يوفر أماكن اصطفاف، وفيه موظفين من الكافيه بساعدوك لتلاقي مكان تصف فيه سياراتك، وهم شوي تجاوبهم من الطلب بطيء زيهم زي اللي بقدموا الطلبات من مشروبات ومأكولات خفيفة وغيرها. اجمالا المكان جيد .. وانا اعطيته (4) نجوم، خصمت نجمة لتعامل الموظفين فيه، وخدمتهم اللي مش ولا بد.
  • Review by عبير هشام of محمص عرفان الحموي
    قبل 9 سنوات
    بحب اشترى مكسرات وشوكولاته فاخرة من هذا الفرع، مع أنه ما صارلي فترة بشتري منه بس تعودت عليه ..
    المحل مرتب كتير .. نظيف كتير .. عنده تشكيلة كبيرة من العصائر ومشروبات الشوكولاته الباردة .. بنصح بتجربتها. لما بدي أخد هدية مرتبة من حلويات او شوكولاته لازم أروح على محمص عرفان، مع انه الاسعار غالية بس بتلاقي جودة ممتازة. العمو اللي هناك كتير محترم، دايما بضيفني حبة شوكولاته فاخرة. المكان موقعه مناسب، ما في مصفات خاصة للمحل .. بس الا ما تلاقي صفة لسيارتك .. بنصح الكل يتعامل مع محمص الحموي، والمرة الاولى أكيد رح تتكرر أكتر وأكتر .. صحتين :)
  • Review by عبير هشام of الهيئة الملكية الأردنية للأفلام
    قبل 9 سنوات
    كتير بروح على الهيئة الملكية للأفلام، لمشاهدة عروض حديثة لأفلام عربية وعالمية.
    موقع الهيئة مميز جدا، فهي تقع في آخر شارع الرينبو .. في جبل عمّان، وهناك عراقة المكان وأهميته التاريخية بالنسبة للعمانيين وزوار المدينة. الكافتيريا في الهيئة نظيفة كتير، وفيها مجموعة متنوعة من المشروبات الساخنة والباردة. وكتير اخدت فيها دورات متنوعة .. صحفية وغيرها، وكانت مكان مناسب جدا للتدريب والاستفادة من المحاضرين. الافلام اللي بتقدمها الهيئة بتكون مجانية، وكل اسبوع عندهم عروض مميزة، بنصحكم تروحوا اذا لسه ما زرتوا المكان ولا مرة .. خاصة أنه في لجنة مميزة هي اللي بتختار الافلام .. عدا عن هيك المكان ما في عجئة، يعني اللي عنده سيارة ما بحتار فيها. الحلو كتير في الموضوع، وحبي للهيئة الملكية للأفلام، اني لما بروح هناك بشوف الاميرة ريم علي بالصدفة، طبعا فرصة لأتصور معها المزيد من الصور الحلوين .. للذكرى :)
  • Review by عبير هشام of بنك الاسكان
    قبل 9 سنوات
    اكتر من مرة تعاملت مع هالبنك، وكل مرة بصير معي موقف ابيخ من التاني ..
    قبل فترة رحت عندهم لأودع مبلغ مالي بحساب أخوي، بعد ما أعطيت الموظف المصاري وقعهم على الارض وبلش يلم فيهم وهو يتأفف مع أنها غلطته! بعدين أجا موظف تاني واعطاه دولارات، وبالتالي حسيته التخم لانه أكتر من حدا حكا معه: انا والموظف التاني، ولهيك سألني سؤال استفزني: مدام، انت اعطيتيني مصاري؟! تخيلوا، يعني حسيت انه مش صاحي الموظف، وبالمناسبة هالحكي كان الساعة (8:30) بالزبط، يعني أكيد لسه ما لحق يتعب أو يزهق من الشغل لدرجة تخليه ينسى اذا أخد مني مصاري أو لأ! اليوم الصبح كمان، رحت عليهم بالغلط لاسحب مصاري، طلبت مبلغ معين، واكتشفت انه نفس الموظف سحبلي كل المصاري اللي في الحساب، مع اني فهمته كم بدي أسحب! وبالتالي، ليصحح غلطته، صار يعتذر وبلش يعمل معاملة جديدة ليعمل فيها ايداع بالفرق بين اللي طلبته من المصاري وباقي الموجود في الحساب. خلص، بعد موقف اليوم والمرة الماضية مستحيل أرجع أتعامل معهم! . زعلوني :( حتى النجمة كتير عليهم!
  • Review by عبير هشام of انتركونتيننتال الأردن
    قبل 9 سنوات
    واحد من أرقى فنادق عمّان ومعالمها المميزة، يتميز الفندق بموقعه في منطقة هادئة، وعريقة لأن فيها اكثر من معلم عماني له تاريخه.
    الخدمة في الفندق ممتازة جدا، كتير انعزمت عليه سواء لمؤتمرات صحفية أو مناسبات اجتماعية. الاكل طعمه اكتر من رائع ومتنوع في الاصناف وخاصة لما تكون الجهة المستضيفة لأي حدث دافعة منيحة، وقتها الخدمة بتكون (7) نجوم مش خمسة.
  • Review by عبير هشام of بابا جونز
    قبل 9 سنوات
    اليوم زرت بابا جونز مع مجموعة من الزملاء في العمل، حبيت المكان .. ما في عجئة .. هادي، واخترنا مكان للقعدة مطل على شارع الوكالات.
    طلبنا اكتر من نوع بيتزا، أنا جربت قطعتين، وكان طعمهم زاكي .. السلطات عندهم زاكية كمان، بس الصحون صغيرة، مع انه الواحد بقدر يعبيه اكتر من مرة. الموظف اللي ما بعرف جنسيته واللي كان ياخد طلباتنا قصته قصة .. ما بستوعب بسرعة، واستغربنا كيف أنه ما قبل يسألنا شو نشرب، اعتمدنا على "صبري" لنطلب بيبسى، سفن وغيرها! الخدمة شوي بطيئة حسيتها، عدا عن هيك المكان مرتب والاهم بالنسبة الي اني كنت معزومة، فما دفعت ولا اشي :)
  • Review by عبير هشام of حبوب جراند ستورز
    قبل 9 سنوات
    حبوب ستور، بتلاقي فيه معظم الاشياء اللي بدك اياه، من أدوات منزلية .. مواد غذائية .. العاب ومواد التنظيف.
    عنده بين فترة وفترة عروض مميزة، بنصحكم تستفيدوا منها، لانها بتكون باسعار مناسبة للجميع. المحل اجمالا نظيف، وتعامل الموظفين فيه عادي .. مش مميز. في عنده خدمة مصفات للسيارات، وهذه نقطة ابجابية في موقعه. لكن المكان صغير الحجم، يعني مرات بتتضايق وانت تشترى اغراضك خاصة لما يكون في كتير زوار له بنفس الوقت.
  • Review by عبير هشام of فروت سالاد
    قبل 9 سنوات
    من أزكى محلات العصائر وسلطات الفواكه في عمّان .. كل شيء عندهم طازج وبعملوا الطلبيات وانت واقف .. كتير بحب اشترى من عندهم عصير الليمون مع النعنع .. كتير زاكي بنصحكم تجربوه.
    عنده علب متنوعة الاحجام .. يعني بتقدر تشترى بحسب حاجتك، سواء لشخص واحد أو مجموعة وعنده أحجام كافية ومناسبة جدا للعائلات. سلطة الفواكه عندهم .. مش طبيعي طعمها .. كتير زاكية، دايما بشترى منهم "جاط" لكل عيلتي .. بنصح بنوع يسمى "جاط الفواكه الاستوائية" .. مممم .. لازم تجربوه، لتحكموا بنفسكم على زكاوته. المكان نظيف جدا .. وفيه ديكورات حلوين وقعدة داخل وخارج المحل .. مع انه صغير، لكن بتقدر تقعد فيه لتاكل السلطة او تشرب العصير. الاسعار برأيي عادية لانه اصلا الفواكه سعرها غالي .. المكان لا يتوفر فيه مصفات خاصة للسيارات، لكن الدوار الثاني اجمالا بتقدر تلاقي فيه اي صفة بأي مكان. مكان رائع جدا .. بتمنالهم التوفيق وانهم يفتحوا كمان فروع في عمّان. صحيح .. هالمحل بستاهل اكثر من خمس نجوم :)
  • Review by عبير هشام of كمبنسكي عشتار البحر الميت
    قبل 9 سنوات
    يعني بنطبق على هالفندق "أن تسمع بالكمبنسكي خير من أن تراه" .. سيء جدا، اول شي القاعات ما فيها عزل صوتي .. حضرت فيه دورة تدريبية من فترة، واحنا قاعدين بالقاعة بتسمع اصوات الاشخاص المتواجدين في القاعات المجاورة، طبعا القاعات ع البلاط .. ما فيها سجاد! ولا اباريز الكهرباء، كلها مكشوفة او ملزقة بتب منظره مقرف جدا!
    الخدمة عادية .. بس العاملين اللي هناك خدمتهم بالمرة، طلبت من اكتر من واحد وصلة كهربا لأشحن اللاب توب تبعي وكانت حجتهم: ما في ابريز فاضي وما في وصلات! تخيلوا! الاكل عندهم زاكي، بس مش فخم بمستوى الاكل المقدم بالفنادق الاخرى، والكميات قليلة جدا، يا دوب تكفي نص بني آدم! آخر ملاحظة سلبية الي عليهم، أنه ما عندهم اختراع اسمه غاز .. جابولنا الشاي والنسكافيه والقهوة باردة جدا، تقول حاطينها بالفريرز، مع انه بسألك: مدام شو بتحبي تشربي شي سخن! يا للمفارقة! الروحة ع الكمبنسكي، البحر الميت .. تنزكر وما تنعاد .. ومنيح أني كنت مدعوة، يعني ما دفعت مصاري ولا كان المصيبة كبرت عليّ .. ما في خدمة وفوقها خسارة مصاري! بالمرة ما بنصحكم فيه. جيران .. لازم يكون في تصنيف "صفر نجمة"، لهيك أماكن في عمّان.
  • Review by عبير هشام of مطعم غيث
    قبل 9 سنوات
    غيث واحد من المطاعم المشهورة في عمّان، بحب آكل من عندهم الشاورما بالخبز العادي وكمان المعجنات.
    المكان مع انه كبير بس دائما عجئة .. بتلاقي عنده أزمة وخاصة اذا فكرت تحجز طاولة للغداء مع مجموعة اشخاص، مع اني ما بنصح بهيك لانه الطاولات كتير قريبة على بعض، لدرجة أنك بتحس أن في غدا جماعي :) الاسعار مناسبة جدا، خاصة انه فاتح بمنطقة شعبية، وقياسا بحجم الاكل اللي ببيعه فالاسعار منطقية ومناسبة للكل. طبعا موضوع المصفات انسوها، لانه كل جبل الحسين أزمة ودايم مليان سيارات. أما خدمة الزبائن فهي تمام، والاهم أنك لو تقدمله عشرين ليرة مقابل انك اشتريت ساندويشة واحدة فهو - الكاشير - ما عنده مشكلة، بصرفلك .. مش زي بعض المطاعم التانية اللي بده صرافة دائما.
  • Review by عبير هشام of المركز الثقافي الملكي
    قبل 9 سنوات
    المركز رائع جدا .. فيه تجهيزات ممتازة لحضور اي فعالية ثقافية، فنية ..
    دايما بروح هناك .. بحب المكان .. يتوفر فيه مصفات للسيارات، الكافتيريا الداخلية يتوفر فيها كافة انواع المشروبات لزوار المركز. موقع المركز والنظافة فيه ممتازين جدا .. وأنا ملاحظة أنه صار وضعه أحسن وأحسن مجرد ما تسلم ادارته السيد محمد ابو سماقة اللي بوجهله تحية على جهوده. بقترح على ادارة المركز الاهتمام اكثر بالمساحات الخارجية له، بالاعتناء فيها اكثر .. يعني ممكن يزدوا عدد الكراسي فيه لحتى يلتقوا الناس هناك، بين الشجر بكون الجو بجنن خاصة واحنا جايين ع الصيف :)
  • Review by عبير هشام of صيصان فرايد تشيكن
    قبل 9 سنوات
    بناء على نصائح الجيران عن صيصان جربت المطعم من اسبوع تقريبا، وأخدت الوجبة العائلية بسعر 15 دينار .. واجمالا هي زاكية وحجمها مناسب لعائلة مكونة من سبعة أشخاص.
    المحل كتير صغير بس في قعدة على جنب ممكن الواحد يقعد وياكل فيها، لكنه ما بحس بخصوصية لانه رواد المحلات في الطابق والمجمع نفسه "اشنانة" طالعين نازلين .. ما بنصح الواحد يتغدا هناك. الاسعار عادية .. ومنطقية .. وخدمة الزبائن كمان عادية ..لكن ملاحظتي الهم انه يسرعوا بتلبية طلبات الزبائن .. يعني أنا وقتها ضليت استنى الطلب تبعي اكثر من نص ساعة! تجربة جيدة اجمالا لكن الطعم عادي جدا.
  • Review by عبير هشام of ماكدونالدز
    قبل 9 سنوات
    هالفرع جدا متميز، بزوره كل سبت تقريبا، بحب اكل عنده ساندويشة "ماك ارابيا" مع سلطة السيزر بقطع الدجاج .. كتير زاكية.
    تعامل الموظفين هناك ومعظمهم من طلبة الجامعات جدا راقي .. بتعاملوا مع الزبون بشكل ممتاز. نظافة المحل ممتازة والاسعار جيدة خاصة عندما ننظر لحجم الوجبة او الساندويشة، يعني بستاهل السعر المدفوع عشانه. بحب من عندهم البوظة والتحلاية وخاصة الكيك البراوني .. زاكيين .. انصح بزيارته خاصة انه عندهم انترنت مجاني من خلال أجهزة كمبيوتر خاصة بالمحل.
  • Review by عبير هشام of صيدلية حكم
    قبل 9 سنوات
    واحدة من افضل الصيدليات في عمّان، موجود عندهم كل انواع الادوية .. وحتى اذا احتجت صنف ما وما لقيته بوقت معين بتقدر توصي عليه ليتم احضاره لك.
    خدمة الزبائن جيدة، وخاصة لما تكون الصيدلانية صاحبة الصيدلية هناك .. كتير لطيفة في التعامل. عائلتي بتتعامل مع الصيدلية من زمان، من وقت ما كنا صغار، وكنا نشترى منها بكل وربطات للشعر :-) مشكلة الصيدلية في مكان الصفة، وهي مشكلة الصويفية بشكل عام لانه الشوارع وحتى الدخلات فيها دايما مليانة سيارات وعلى طول الوقت.
  • Review by عبير هشام of بيت ستي
    قبل 9 سنوات
    اليوم المسا زرت بيت ستي برفقة فريق جيران، كانت الزيارة الاولى .. كتير انبسطت هناك .. تجربة اعداد الطعام بذاتك بحد ذاتها متعة فريدة، فكيف لما تكون مع فريق جيران .. اكيد غير شكل.
    المكان موقعه رائع جدا .. في اللويبدة ويطل على مناطق ومناظر جميلة في عمّان .. الموظفين هناك متعاونين جدا .. علمونا مهارات جديدة في الطبيخ، شخصيا ما كنت اعرفها. النظافة ممتازة .. وبنصح أي شخص من باب كسر الروتين وتغيير الجو يروح لهناك برفقة الاصدقاء او العائلة .. بتمنى لبيت ستي التوفيق ممثلة بالست ماريا حداد.
  • Review by عبير هشام of أبو شيخة للصرافة
    قبل 9 سنوات
    بتعامل مع هذا الفرع تحديدا من سنة، بروح عليهم كل ما بسافر لأحول المصاري اللي معي من أردني الى عملة البلد التي سأزورها.
    تعاملهم مريح جدا، في اكتر من موظف بقدروا يمشولك معاملتك على السريع خاصة اذا ما كان عندهم أزمة. والحلو أنه عندهم كل انواع العملات والتي لا يتم فيها التداول بكثرة، يعني طلبك الا ما تلاقيه عندهم. هالفرع كتير صغير، يعني يا دوب يوسع لاربع مراجعين على الأكثر، لهيك مرات بنضغط وبتضطر ترجع بوقت تاني. المحل موجود بمنطقة مزدحمة، وبالتالي بكون صعب احيانا تلاقي مكان لتصف سيارتك.
Next

أماكن أفضلها