Lina ASh

Lina ASh

عمان . منذ يوليو 2011
63 من المراجعات
الأماكن المضافة
4
مراجعاتي
63
صوري
250
أماكن فضّلتها
3

مراجعاتي

  • Review by Lina of الدكتور رائد سليمان
    قبل 4 سنوات
    دكتور اكتر من رائع اول دكتور بشوفه مستمع جيد جدا للمريض و حسيته بخاف من قلبه على المريض ممتاز جدا جدا و بهتم بالحالة الي قدامه بنصح فيه كتير بالنسبة للكشفية انا على التامين بس اظن كشفيته 30 و عملت فحص كفاءة التنفس داخل العيادة ,ما بعرف السعر كم بصراحة قبل التامين لانه بس دفعت 6 دنانير للفحص بس بشكل عام الدكتور جدا مريح و اهم ميزة انه بسمع المريض و بيعطيه كل وقته هاي الميزة ما لقيتها بكتييير من الدكاترة للاسف , و اول دكتور مش شايف حاله و لا متكبر بصراحة
  • Review by Lina of هالا تريتس
    قبل 4 سنوات
    رائع رائع رائع المحل بجججننننن و ستايل المحل كتير حلو و راقي طلبنا اكتر من شي حلو و مالح و كل شي طلع اطيب من التاني و عنجد عرفت معنى كلمة out of this world ال dream pie تحفة طعم بياخد العقل.. شوي كانوا بطيئين و هدا اكيد بسبب انه كان المحل مليان و بعدهم فاتحين جديد. طلبنا كيش طلعت شوي مو مستوية بس قولنا للموظف و اخدها و قال راح يرجعوا يخبزوها,, و لما اجينا نحاسب كاينين لاغينها من الفاتورة و خبزوا 2 كيش فريش و اعطونا اياها takeaway ضيافة من المحل يعني عن جد مزوقين و تعامل راقي يا ريت المحلات الي حوليهم يتعلموا منهم.. بتمنى الهم التوفيق
  • Review by Lina of ذا كيكيري
    قبل 4 سنوات
    سيء سيء سيء سيء اسوء خدمة زباين بالدنيا لا في احترام للزبون و لا لقيمة الزبون , موظفة عندهم صغيرة بالعمر ترفع صوتها علي و تبهدلني و الله ما صارت باي مكان بالعالم... و المشكلة اني كنت بناقشها باسلوب محترم و هادي.. حتى في زبونة كانت واقفة و قالت الها شو ما كان الوضع ما بصير تصيحي على الزبونة! غير هيك كانوا بدهم يضحكوا علي بالفلوس مفكريني غشيمة... يعني بهدلوني و قلوا من قيمتي قدام العالم... غير عدم الاحترام من بداية دخول المحل... بس انا الحق علي كان المفروض ارمي الأغراض بوجههم و اطلع مش ادفع الهم فلوس كمان.. خسارة فيهم.. و محل عامل حاله 5stars لما اطلب كيس عشان اقدر احمل فيه الأغراض يعطيني كيس بلاستك صغير جدا شفاف زي تبعون البقالات الصغيرة... و الموظفين شايفين حالهم....
  • Review by Lina of مدرسة كامبردج
    قبل 4 سنوات
    المدرسة نظامها انترناشونال شهادتها شهادة البكالوريا السويسرية IB... و دايما طلابها بحققوا اعلى النتائج... ابني بالمدرسة اله 3 سنوات ,,, لحد الآن لم نعاني من اي شيء بالمدرسة متل ما الاشاعات الي سمعتها عنها,, الشيء الوحيد الي بعاني منه انه المدرسة قوية جدا بالدراسة و في ضغط دراسي على الطلاب خصوصا وقت الامتحانات و بعتقد انه افضل للطالب عشان يضل عقله مشغول بالدراسة , و اسئلة الامتحانات عندهم جزء كبير منها بكون غير مباشر خصوصا بمادة الماث عشان تشجع الاولاد يشغلوا مخهم شوي وتهيئهم للمراحل القادمة,,, طريقة التدريس انا مبسوطة عليها كل اسبوع بيكون في كويز بالمواد عشان يضطر الطالب يراجع المواد اول باول... انا جربت اكتر من مدرسة قبل كامبردج لقيتها افضل وحدة من بين المدارس الي جربتهم بيجي فاهم الدروس و بتخلي الولد يتعود على جو الدراسة و هدا بالنسبة الي مهم كتيير ... بهتموا كتير بالماث و بيجيبوا اسئلة صعبة بالواجبات و بالامتحانات... عندهم مختبرات للعلوم بروحوا عليها يعني مش بس منظر المختبرات زي بعض المدارس... الانجليزي قوي جدا عندهم... و العربي كمان بهتموا فيه و في دوسيات خارجية كتير حلوة لقواعد العربي بتسهل الدراسة.... و في دراما و موسيقى كمان... في انشطة بعد المدرسة متل تعليم العود و البيانو و الجيتار وكرة القدم و السلة,,, النظام شديد على الطلاب يعني ما في فلاتان بالمدرسة و قلة ادب,, في نظام بالمدرسة بصراحة بتعلم الأهل الانضباط و احترام النظام و هدا الشيء الأغلب ما بحب يحترم النظام فا بينقل لمدارس ما عندها نظام.... باختصار انت انسان بتحب تحترم الأنظمة و القوانين و بتحب الدراسة و الضغط الدراسي تعال على المدرسة ....و كمان في انشطة خارجية دايما بالمدرسة... المدرسة بتحاول جاهدة تكون متوازنة من كل الجهات دراة شديدة مع انشطة خارجية كمان..... و في شي بزعجني بالمدرسة انه الانشطة الخارجية بتكون بعد المدرسة بساعتين يعني مش على طول بعد المدرسة... الي بعد المدرسة على طول هي تدريبات لمنتخب المدرسة و الباصات ما بتوصل الطلاب المشاركين بالنشاطات بعد المدرسة...
  • Review by Lina of تشوفي بيت القهوة والشوكولاتة
    قبل 5 سنوات
    حبيت المكان كتيير و ديكوراتو حلوة و بسيطة و حبيت انو المطبخ قدامنا و بنشوفهم و هم بجهزوا الحلويات و الطلبات،، الشاي مميز جدا عندهم طلبت شاي بالياسمين كتييير زاكي و طلبت الوافل رهيب خلطة ألوفا غريبة جدا و طعمها عجبني كتييير و بقدموها مع شوكولاتة دائبة و سكوب فانيلا ايسكريم و الشوكولاتة مميزة عندهم و طيبة كتيير ،،، الموظف الي استقبلنا لطيف بالاستقبال و كان دايما يسال اذا كل شي تمام ، يمكن عشان لسه المحل جديد،، بس تجربة حلوة و اكيد راح أعيدها. خصوصا انو المحل ما فيو أراجيل و هدا اهم شي عندي ،، بس التدخين مسموح،، أسعارهم معتدلة جدا بنصح فيه كتيير خصوصا لمحبي الشاي بالنكهات الغريبة
  • Review by Lina of برجر ميكرز
    قبل 5 سنوات
    كتييير طيب و زي شغل البيت ، طعم البرغر عجبني كتييير .. طلبنا ٣ وجبات حجم ١٨٠غرام الوجبة مشبعة جدا و طلعت الفاتورة تقريبا ١٤ دينار ،، لقيتو أفضل من محلات الوجبات السريعة المعروفة و بصراحة كتيييييير ازكى و أطيب ،، و الحلو انو بعمل البرغر اللحمة قدامنا ...
  • Review by Lina of مركز تلاوتي
    قبل 6 سنوات
    المركز رائع بمنتهى النظام و النظافة و الترتيب و العاملين لطفين جدا و بشوشين و الي على الاستقبال بشوشة جدا, و المعلمات لديهم الطاقة الكبيرة لتحمل الأطفال, و بعلموا الأولاد القاعدة النورانية ليتمكنوا من نطق و اخراج الحروف من مخارجها الصحيحة عشان يتقنوا التجويد,, الله يجزيهم كل خير القائمين على هذا المركز,, شارك ابني مهعم بالنادي الصيفي كان عبارة عن دورة الRobotics و خلال النادي كان مقرر يحفظوا سورة النبأ,, و كل يوم الأطفال برجعوا و معهم يا أكلات "حلويات" قاموا بعملها اثناء النادي او اشغال فنية يدوية بالاضافة الى رحلة كل نهاية أسبوع... بنصح الأمهات فيه خصوصا الأولادهم بمدارس الدين فيه سكر خفيف و ما بحفظوهم قرآن "للآسف الشديد" ...و كمان ممتاز للأولاد الي اللغة العربية مو قوية عندهم لأنه شفت بيعطوا دروس خصوصي لهذة الفئة..
  • Review by Lina of فونجان كافيه
    قبل 6 سنوات
    المحلات التابعة ل EAT متميزة بديكوراتها الخلاقة و الغريبة بس هاي المرة تفوقوا على أنفسهم بالديكورات، كل زاوية مميزة و مبدعة بالمحل و لم أتخيل انه اللون الأصفر يعطي حلاوة و هدوء للمكان ، بس ياريت لو ما في أراجيل كان المحل بكون من أجمل الأماكن ، بس عن جد بهنيكم على المحل و ديكوراته ، بالأمس اول مرة بروح عليه رحنا صباحا على الفطور ، بس منيو الفطور حسيته ضعيف جدا يا ريت لو يضيفوا أطباق أكتر و منوعة أكتر ، بس كل شي كان تمام و طيب ، باستثناء شيء واحد المملحة كانت مفتوحة من تحت و لما صرنا نملح اندلق الملح على كل الطاولة و الشاي صار شاي بالملح!! بس كاين الموقف بضحك و ضاف جو من الفرحة و البهجة علينا!! و اكيد برجع وبزور المحل اكتر من مرة، بس يا ريت لو مافي أراجيل بس اكيد صعب لأنه الشعب عاوز كدة
  • Review by Lina of هاجن داز
    قبل 6 سنوات
    الموظفين كتيييير لطيفون و محترمين و بشوشين ، و تقريبا كل شي بالمنيو طيب و لذيذ،، بنصح بال waffle مع الكراميل كتييييييير طيب ، و تقريبا كل الآيس كريم عنده طيبة
  • Review by Lina of انتي هنادي تشيز كيك اند كوكيز
    قبل 6 سنوات
    تجربة سيئة جدا جدا ، بالأمس انا و زوجي رحنا على المحل الساعة ١١ مساء و كانت الإضاءة منارة بالكامل و أصوات الأغاني بتلعلع من التلفزيون و ما كان في اي علامة انه المحل مغلق، المهم دخلنا و كان في شاب لطيف جدا يضع نظارات اول شي سألناه : متى بتسكروا ؟ حكى الشاب بنسكر على ال ١١ و نصف ، فسألناه: يعني بنقدر نطلب و نقعد لفترة قصيرة و كان في منتهى اللطافة نعم بتقدروا تفضلوا... المهم فجأة بطلع شاب تاني من جوا و بصيح على الشاب الأولاني و بقولوا كيف دخلتهم؟ المهم و بقولنا معلش صعب تقعدوا احنا بنسكر على ال ١١ المحل ، فا استغربنا شو هل تناقض واحد بقول تفضلوا و التاني بطردنا،، الي بدي أوصله أنه انطردنا من المحل بشكل غير لائق ابدا ... موقف محرج جدا و غير حضاري من قِبل موظفكم، حتى اعتذار بسيط ما قدم . يعني لو حضراتكم مسكرين ليه التلفزيون و الأغاني شغالين و صوتهم واصل لآخر الشارع, لو حضراتكم مشغلين كل لمبات المحل كانت مضاءة؟ يعني شو بدي أضرب بالمندل تا أعرف انكم مسكرين ؟؟؟؟؟؟ عصبتوني يا جماعة!!!!! لو الموظف عنده ذرة احترام ألنا كان قال لا مو مشكلة تفضلوا و اهلا و سهلا مو ينط و يخانق فينا؟؟؟؟
  • Review by Lina of فارم كيتشن
    قبل 6 سنوات
    رحنا عليه قبل رمضان ، المطعم بالمول الطابق التالت مقابل اورانج ، باختصار شديد جدا من أرخص المطاعم الي لقيتها بعمان الوجبة ب خمس دنانير تقريبا مع soft drink و مع الضريبة كمان الأكل مقارنة مع السعر ممتاز جدا جدا يعني متل طبق الدجاج المشوي مع الخضار باي مطعم بعمان سعره تقريبا فوق ال ٨ دنانير بدون ضريبة و بدون بيبسي او عصير و كمان بقدموا مع كل وجبة قطعة كيك مجانا يعني بخمس دنانير بتآكل و بتشرب و بتتحلى كمان
  • Review by Lina of جوس بانغ بانغ
    قبل 6 سنوات
    انا لم اتذوقه بصراحة بس ابني خزق راسي بده يشربه انا بصراحة وجدته كتيييييييير غالي الكاسة الي طلبها ب ٤ دنانير ونص و يا دوب ابني قدر يكمل نصها قالي : ماما مو كتير طيبة،، بس المحل نظيف و الموظف لطيف
  • Review by Lina of ذا كيك شوب لاونج
    قبل 6 سنوات
    Amazing place , I love this place because of free smoke environment, The food is very delicious , the employees are very kind, and another thing is very special that the breakfast menu is served all day long
  • Review by Lina of ماجيك بلانيت
    قبل 6 سنوات
    اول مرة بروح عليه بالأمس بالتاج مول ... كتييير حلو بس المساحة صغيرة فا الوضع مزعج كتيير يمكن لما رحنا كان في ناس كتيير .. و الأصوات مزعجة الموسيقى و أصوات الألعاب ،، يعني زي اي محل ألعاب للأطفال بدك علبة بندول بعد ما تطلع من المحل،، ابني أكيد انبسط كتيير،، بس الأسعار كتييير غالية مقارنة بالمحلات التانية يعني عبينا البطاقة ب ٢٠ دينار و لطفل واحد يادوب تكفيه بس عندهم ازا بتعبي البطاقة ب ٢٠ بناهد ٦ دنانير رصيد إضافي .. اقل لعبة ٩٠٠قرش و اغلب الألعاب ٣ دنانير و دينارين و في ألعاب يتوصل ٣.٩٠٠ دينار يعني بدها ميزانية الروحة هناك خصوصا ازا كان في اكتر من ولد بالعائلة
  • Review by Lina of بي اف تشانج
    قبل 6 سنوات
    Great place and atmosphere, the employees was so kind, the food very scrumptious but very small portions .....but the place a little bit expensive compare with other Chinese restaurant.. By the way this is my first time using the phone application,
  • Review by Lina of دلميشين 101
    قبل 6 سنوات
    ممتاز جدا انا ابني عمره 8 سنين و نص و من لما كان عمر ابني سنة و نحنا بنروح عليه, و الموظفين اللي فيع ممتازين و لطفين و طولين بال على الأطفال,, و ولا مرة صارت معنا مشكلة او اي شي يخلينا نتضايق
  • Review by Lina of هاجن داز
    قبل 6 سنوات
    هدا المحل الوحيد اللي كل شي بالمنيو زاكي و مشهي و اختار اي شي من المنيو و انت مغمض عيونك,, و دايما بتكون ريحة البسكوت الفريش معبية المكان,, كل ما اروح ع التاج مول او الستي مول لازم نروح عليه
  • Review by Lina of نستلة تول هاوس كافيه
    قبل 6 سنوات
    المحل مرتب و مريح و نظيف , الموظف اللي اخد طلبنا لطيف و طويل بال كتيير بس يمكن اتغير لأنه انا رحت عليه مرة واحدة و قبل رمضان, طلبنا كابوتشينو كانت طيبة و ميني سينامون رول كتيييييييير طيبة و مشهية
  • Review by Lina of حديقة صرح الشهيد المرورية
    قبل 7 سنوات
    أول مرة بروحها السبت الماضي و عجبتني كتيير كونها حديقة تابعة لآمانة عمان و مرتبة و نظيفة,, سمعت انه دايما بتكون عجقة و مليانة أطفال,, بس حظي كانت تقريبا شبه فاضية العائلات و الأطفال كانوا بنعدوا عاى الأصابع و استطاع ابني يلعب كتيييير و سعر التذكرة رمزي يمكن 20 قرش او 40 قرش ناسية و الحديقة فيها أشجار و خضار و مقاعد فوقها مظلات الحديد,, الحديقة عبارة عن شوارع مخصصة لسيارات الأطفال و فيها شواخص مرورية و اشارات مرورية , بس السيارات شوي تعبانة لازم تجديد بس بمشّوا الحال خصوصا انه السعر رمزي كتييير,, و كمان في مراجيح و زحازيل او سحاسيل و سيسو,, بس اللي ما عجبني أنه مافي سوبرماركت او كُشك يبيع ماء و عصير و اللازي منه للأطفال,
  • Review by Lina of تشيليز
    قبل 7 سنوات
    من الأماكن اللي بفضل الذهاب لها خصوصا لما يكون معنا أطفال المطعم نظيف و مرتب و الموظفين لطيفين كتيير خصوصا مع الأطفال,, قائمة الطعام متنوعة و فيها ما لذ و طاب ;) أكله طيب كتيير و رحت يوم سبت و كان المطعم مليان بس ما تأخروا بالطلبات أبدا.
  • Review by Lina of كافيه سوشال
    قبل 7 سنوات
    اليوم بعد الفطور رحنا عليه,, ديكورات المحل كتيير حلوة و الألوان رايقة و كل المحل عبارة عن كنبايات فأول انطباع حسيت اني داخله على غرفة صالون او محل اثاث بس حلو كتييرحسيته cozy كتيير , يعني تقريبا ما في كراسي كله كنبايات و الكرسي عندهم عبارة عن كنباية armchair يعني باختصار الجلوس مريح و في اكتر من تلفزيون ع الحيط,,,, المحل كتييير لطيف,,,, و الموظفين كتاااااااار منهم الكويس و منهم العاطل,, نيجي للمهم و اللي ما عجبني ابدا مبدأ ال cover charge للشخص الواحد. على الشخص يدفع 3.5 دينار غير شامل اي شي , يعني نحنا كنا 3 أشخاص دفعنا بس للجلوس بالمحل 13.20دينار مع الضريبة و شو قدمولنا مجانا 3 صحون صغار ترمس و حمص حب و فول حب و كانوا بصراحة تقريبا معفنين و مرطبين و ابدا مو طيبين, يعني و الله حرام كل هل مبلغ لو يخلوها على الطاولة مو على عدد الأشخاص , بس ما هو صاحب المحل بده يعوض انه مغلق وقت فترة الفطور فكيف بده يعوض خسارته الا بهل طريقة و نحنا بنستحي و بندفع,, (مع انه الكافيه تابع لمجموعة EAT يعني مو محتاج لهل استغلال خلال شهر رمضان) و أول ما جلسنا على طول قدم الموظف 3 عبوات مي من غير ما نطلب يعني خاوة بدكم تشربوهم و خاوة بدكم تدفعوا حقهم, كان نفسي اقوله شيل المي بس استحيت :) كاتبين بالمنيو في قائمة المشروبات الساخنة (وكل المشروبات الساخنة حتى الشاي ب 3 دنانيرطبعا من غير ضريبة) انهم بقدموهم بطريقة خاصة و مميزة فاطلبت كابتشينو ع أساس اشوف الشي المميز ,, لما اجت الكابتشينو كان الكوب فيو رغوة الحليب و الكابتشينو بابريق شفاف و بس , و انا نزلت الصورة ,, طلبنا كابوتشينو و ميراندا و أرجيلة و 3 عبوات المي الإجبارية طلعت الفاتورة 31 دينار و فراطة O_o أكيد بعد رمضان برجع أروح له بتكون قصة ال cover charge per person راحت :)
  • Review by Lina of بكداش
    قبل 7 سنوات
    اليوم و اخيرا جربنا البوظة و يا ريتنا ما جربناها الطعم جدا مخيب للآمال... و المشكلة انه جبنا كيلو و الكيلو بعشر دنانير.. بس ليه العالم فوق بعض عنده نفسي أعرف؟ و البوظة طعمها غريب.. المهم انا ما عجبتني و لا حتى زوجي عجبته... و اكيد لولا اختلاف الاذواق لبارت السلع
  • Review by Lina of تيبريوس لونج
    قبل 7 سنوات
    الكافيه هادي و نظيف و مرتب و كتييير واسع و الترس كبيير كتييير, الحلو في الكافيه انه بضاحية الرشيد بخدم المنطقة , وفي جلسات بجانب بركة ماء كبيرة و بداخل البركة شلال او نافورة ماء مو متزكرة بالاضافة للجلسات الداخلية رحنا عليه قبل يومين بعد الفطور الأجواء كانت هادية و لطيفة جدا و الموظفين ودودين و لطيفين الأسعار جدا معقولة حتى مقارنة بباقي الكافيات يعتبر رخيص الأرجيلة عندهم ب 3 دنانير , انا ما بفهم بالأراجيل بس اللي كانوا معي عجبتهم و عندهم تشكيلة من الساندويشات و السناكس و الآيس كريم
  • Review by Lina of تاج سينما
    قبل 7 سنوات
    السينما هناك حكاية ... احلى ما في الموضوع انه مو مضطر تدخل المول عشان تحضر السينما ,, السينما بمبنى مستقل و مدخل مستقل .. بس ما في كراجات جنب مدخل السينما بس فاليه .. مبنى السينما نظيف و مرتب و راقي كتييير و في طابق فيو على ما اعتقد مطاعم او كفيهات بصراحة ما نزلت اشوف بس لمحت على السريع... نحنا رحنا على تاج كلاس الديكور حلو الجدران بتحسهم زي المخمل باللون الأسود و الخمري و الإضاءة هادية و القاعة ما فيها اعداد كبييرة يمكن بس 16 او 20 بالكتييير و الكراسي حكاية تانية lazy boy recliners و اول ما تقعد على الكرسي بيجي الموظف و بعلمك من وين بتشغل الكرسي و كل كرسيين او بالأحرى كنبايتين بتشاركوا بطاولة بالوسط و على الطاولة زر احمر بتكبسه بيجي موظف و بتطلب منه يا بوب كورن او مشروبات او ...الخ بس (انا بفضل تشتروا من برا احسن لأنه بصير ازعاج) .. المهم تجربة غير شكل بتحس حالك واحد مهم و الكل بهتم فيك :) و الكراسي مرييييحة لدرجة انه ازا كان الفليم مو اكشن اكيد راح تنام :) نصيحة ابدا ما تاخدوا بالصف الأول نحنا الله يسامحها لما حجزنا على التلفون الساعة 6 المسا لعرض 10 قالت كله full ما في الا بالصف الأول بس ما يهمكم كتيير بكون واضح و لأنه الكرسي ريكلاينير بتمدوا قد ما بدكم و بكون واضح,,, للآسف خدعتنا الصف الأول مزعج جدا اول شي لأنه 3D الفليم ما بتحسه واضح من قريب و تاني شي رقبتي و جعتني كتيييييير لأنه الكرسي لازم يتمد تا يصير زي السرير عشان تقدر تحضر مزبوط بالصف الأول يعني حرام ال 14 دينار يندفعوا بالصف الأول نحنا حسينا حالنا تمقلبنا بالصف الأول تاني نصيحة ما تحضروا فلم براد بيت world war Z طلع كله عن الزومبي و نحنا لما شفنا دعاية الفليم ما كان مبين انه بحارب الزومبي ,, بس اللي بحب قصص الزومبي يروح يحضر :) 3 تذاكر 42 دينار مع بيبسي و 2 ماء و واحد بوبكورن لارج مالح و وسط كراميل و ساندويش هوت دوج 16 دينار اكيد برجع بكررها بس مو بالصف الأول ,, الصف الأول مزعج كتيييييييييييييير و لهلأ رقبتي بتوجعني
  • Review by Lina of حلويات نفيسة
    قبل 7 سنوات
    يوم الجمعة جربته لأول مرة جربت الكنافة الناعمة و الخشنة بصراحة مالهم اي طعم و مقارنة مع باقي محلات الكنافة المعروفة و حتى غير المعروفة عنا بعمان كتييير أطيب,, الجبنة ابدا مو طيبة و الكنافة الناعمة حسيت خبز اللي فوق و ناقص الكنافة سكر.. و جربت المدلوقة بصراحة اول مرة بسمع فيها و بدوقها,, اللي بحب القشطة الطازة راح يحب المدلوقة.. الموظفين لطفين و بدوقوا من الحلويات للزباين... المحل جديد فا بعده نظيف و مرتب..
Next

أماكن أفضلها

    صور أضفتها

    صورة للمحل من الداخل
    The snack tray
    yummmy