Areej AlDajani

Areej AlDajani

عمان . منذ ديسمبر 2016
134 من المراجعات
الأماكن المضافة
101
من وجدوا مراجعتي مفيدة
24
مراجعاتي
134
صوري
1043
أماكن فضّلتها
89

مراجعاتي

  • Review by Areej of مريم كافيه - زيروفور
    قبل سنتين
    جربته من فترة قريبة بشكله الجديد ك مريم كافيه، التميز لسا موجود فيه وبالعكس زاد تميز عن قبل، قعدته رايقة وحلوة، وجميع الوجبات المقدمة فيه مختلفة ورائعة بطعمها وطريقة تقديمها، أسعارهم عادية جداً وبتناسب كثير من الناس كانت تجربة فريدة من نوعها خصوصاً بالأطعمة والنكهات الطيبة الموجودة عندهم كمان قاعات خاصة للاحتفالات او المناسبات الخاصة بتقدر تحجزها وقت ما بدك .. وديكور المكان جميل جدا وهادي
  • Review by Areej of ازول كوفي هاوس
    قبل سنتين
    اليوم زرنا Azul مع جيران، المكان لطيف جدا وقعدته مريحة وحلوة، جربنا الكوكيز والدونات والبوظة والكيك عنده الكوكيز خفيف وطيب كثير، وجربنا العربية وبوظة الليمون والاناناس كثير زاكيين والكيك كمان خفيف وزاكي خصوصا اللوتس
  • Review by Areej of كريبا هوليك
    قبل سنتين
    اليوم رحنا على كريب هوليك، أول اشي المكان سهل توصلوه، وبإمكانك تصف السيارة بالشارع، المحل كثير نظيف وديكوره حلو ومميز .. وقعدته حلوة، جربنا كثير اصناف عنده مثل كريب السينابون وكريب الاوريو وهوليك كاب، والتشيز كيك، ووافل الشوكلاته والفراولة بصراحة حبيت كل اشي عنده، كثير زاكي واذا جربتوه مرة رح ترجعوا تزوروه كثير لانه بضلوا يعملوا اصناف جديدة وبأشكال حلوة .. والمكان مناسب لقعدات الاصحاب
  • Review by Areej of بيل موندو
    قبل سنتين
    حضرنا المباراة فيه، القعدة كثير كانت حلوة ورايقة، الموظفين كويسين، وأسعاره منيحة مش غالية، ما جربت الاكل عنده، بس باقي الشغلات ممتازة .. من ناحية نظافة ومساحة الكافيه ومكانه وقعدته
  • Review by Areej of مادو الأردن
    قبل سنتين
    جربته مرتين، أول مرة كانت برمضان، كنا حاجزين عدد طاولات كثير، وعددنا كبير، بس ضلوا الموظفين ع طول حولينا عشان اذا احتجنا اشي، الاكل عندهم بشكل عام زاكي وخفيف والنظافة كثير ممتازة جربته مرة ثانية افطار صباحي مع صديقتي، بصراحة عجبني اكثر بعد رمضان وحبيته بزيادة، قعدة رايقة والموظفين لطيفين، والسعر كثير منيح مش غالي أبدا
  • Review by Areej of مطعم راجعين
    قبل سنتين
    جربته من فترة قريبة، غداء عمل للشركة، أول اشي مكان المطعم كثير منيح وما بضيع وفي مصفات للسيارات، بالنسبة للنظافة برضو كثير نظيف المطعم، الموظفين مبتسمين ع طول وبضلوا كل شوي ييجوا يتطمنوا اذا كل اشي تمام، طلبنا مشاوي وشاورما ومسخن ومقبلات بأنواعها من سلطات وتبولة وفتوش وبطاطا، بصراحة حبيت كل اشي، طعم زاكي وأناقة بتقديم الوجبات يعني شكل وطعم بجنن، في أراجيل كمان بالمطعم، مش كثير حبيت موضوع الاراجيل لانه شبابيك المطعم مش كلها بتفتح فبصير الجو كله أراجيل اذا حدا بيتحسس ما بكون الوضع منيح، بس باقي الشغلات كلها ممتازة.
  • Review by Areej of طقس العرب
    قبل سنتين
    طقس العرب هي شركة الطقس الرائدة في الوطن العربي، بتضم موقع الكتروني وتطبيق على الهواتف الذكية، بحب التطبيق تبعهم لانه مفيد جدا من عدة جوانب .. اول اشي تحديثات الحالات الجوية بتضلها تتغير ساعة بساعة وثاني شغلة حلوة انه في خاصية بتقدر تصور منها الحالات الجوية من خلال التطبيق وتشاركها مع كل الناس اللي محملين التطبيق .. واهم اشي انهم دائما ببعتوا تنبيهات على الهواتف في حال وجود حالات جوية مهمة .. ما في تطبيق طقس بيعمل مثلهم
  • Review by Areej of فتنس ون فيجا
    قبل سنتين
    اول اشي المكان كثير مناسب، وسهل توصله وكحجم للنادي فهو كبير ومنيح، مرتب جدا ومقسم بطريقة حلوة ولطيفة، سجلت فيه 3 اشهر .. طول فترة وجودك بالنادي بكون في مدربة او مدربتين معك بيعطوك نصائح وبساعدوك بالتمارين.. مش غالي مقارنة مع باقي النوادي اللي بنفس مستواه، النتيجة كانت ممتازة وجدا سعيدة اني اشتركت معهم ورح اكرر تجربتي معهم اكيد،
  • Review by Areej of تشاباتي
    قبل سنتين
    جربته قبل فترة مع تيم الشغل، المكان مميز جداً وقعدته حلوة كثير، نظافة ممتازة وديكورات حلوة، ما كنت بعرف انه عندهم بوفيه مفتوح دايما، اشي كثير حلو، الاكل عندهم بشهي جربنا كل اشي تقريبا وكله كان اطيب من التوقعات .. السعر ممتاز ومش غالي جوه حلو ومناسب لغداء عمل
  • Review by Areej of فرن سامر
    قبل سنتين
    كثير زاكي وأسعاره منيحة، اكثر شي زاكي عنده الحلوم و "الجبنة والزعتر"
  • Review by Areej of كريم
    قبل 3 سنوات
    كنت كثير بحب اتعامل مع كريم، بس من يوم ما طلعوا قرار انه اي كابتن بيوصلوا طلب ع سوا لازم ياخده صاروا سيئين جدا .. يعني بتكون انت رايح ع دوار الشعب بركبوا معك حدا رايح ع النصر، ومرة ركبت من طبربور رايحة برضو ع دوار الشعب يعني طالعة من طبربور .. ركبوا معي وحدة رايحة ع مدرسة جوا اعماق طبربور .. بس مش ع طريقي بالمرة وعكس الاتجاه كمان .. مش فاهمة شو هدفهم!! اذا بفكروا انهم هيك بيكسبوا الزبون ف لا هيك بيخسروه
  • Review by Areej of ماجو آيس كريم
    قبل 3 سنوات
    مبارح كانت أول تجربة الي عند ماجو، أول اشي المحل نظيف جدا والديكور كثير حلو، الموظفين تعاملهم راقي ومحترمين، الشيف لطيف جدا وبياخد ويعطي معك خلال شغله وفيك تسأله وتسولف معه عن الاشياء اللي بيعملها، جو المحل حلو كمان من ناحية راحة بالقعدة وصوت الاغاني ونوعيتها.. أما بالنسبة للأكلات الزاكية، جربت عندهم الكريب والوافل والبوظة والقهوة التركية وكمان صنف جديد مبارح أول مرة بيعملوا، كنت اول حدا بجربه.. بصراحة كثير زاكيين وما عليهم أي ملاحظة.. شغل ممتاز واتقان كمان ومثل ما بيحكوا العين بتاكل أول، هم مهتمين بأشكال الاطباق كثير، الشكل لحاله بشهي فما بالك بالطعم، والسعر كمان ممتاز جدا
  • Review by Areej of شي شاورما
    قبل 3 سنوات
    مبارح كانت اول مرة بجرب المطعم، طلبنا ساندويش شاورما دجاج، الخدمة سريعة جدا، ومش طبيعي قديش زاكية وبتشهي، ما قعدت في المطعم فما بعرف كيف الجو بس من برا شكله قعدته حلوة ومرتبة، والموظفين لطيفين كمان.
  • Review by Areej of فريق التحديات
    قبل 3 سنوات
    قبل يومين طلعنا مع الشركة يوم تدريب معهم للموظفين، رحنا ع مخيم قريب من البحر الميت والمكان جدا فخم، فريق المدربين محترفين جدا وتسلينا معهم وما في لعبة او تمرين بيعطونا اياه الا واله فائدة وهدف جميل بساعدنا بشغلنا ومتعاونين جدا مع المتدربين، التمارين كمان مسلية جدا وبتناسب اعمارنا، هم اصلا بيتعاملوا مع مختلف الاعمار والفئات فبكونوا محضرين برنامج تدريبي كامل للفريق بيتناسب مع مؤهلاتهم واعمارهم وكل شي بدهم اياه.. ازا انت بشركة وحابب تطلع يوم رحلة تفاعلية والعاب وتمارين تزيد من ترابط الموظفين عندك فبنصحكم فيه، مش رح تندموا.
  • Review by Areej of ستيك وبرجر فيليز
    قبل 3 سنوات
    اليوم جربت فيليز لأول مرة، كثير سمعت عنه انه زاكي ومرتب فحبيت اجربه، أول اشي مكان المطعم كثير حلو وفي مصفات للسيارة قدامه، هو طابقين الطابق الارضي للطلبات والثاني قعدة وبصراحة مرتبة جدا قعدته، طلبنا فيليز بالجبنة مع بطاطا وبيبسي، وعملولنا خصم 20% اشي جميل جداً لاني نشفت بس شفت الحساب، خدمة الموظفات حلوة جدا وتعامل راقي وابتسامتهم جميلة والمدير كمان فخم جدا، نيجي للأكل، انا شبعت من نص سندويشة دسمة كثير حسيتها، بس ما كانت زاكية كثير كان في طعم بصل وما حسيت بطعم الدجاج انه زاكي، البطاطا كانت مقطعة كبيرة مش اشي تستمتع وانت بتاكله، مش عارفة ازا رح اجربه مرة ثانية وإذا جربته ما رح اطلب فيليز بالجبنة ممكن اجرب نوع ثاني. معاملتهم الحلوة هي اللي رح تخليني اروح عندهم مرة ثانية.
  • Review by Areej of شماسي كافيه
    قبل 3 سنوات
    جربته من فترة قريبة، أول شي مكان الكافيه كثير مرتب.. في اماكن بالشارع انك تصف السيارة بس اذا رحت بوقت ازمة صعب شوي تلاقي مصفات قريبة، بالنسبة للقعدة حلوة بس عجقة والطاولات قريبة كثير من بعضها اشي شوي بدايق، الاغاني لطيفة ومش مزعجة، المكان مسلي كثير.. اجواء طلعات الاصحاب ولعب شدة وجاكارو، وفي اراجيل كمان..طلبنا وقتها بس اشياء نشربها وكل شي كان تمام، خدمة الموظفين ممتازة جدا وسريعة رغم عجقة الناس. حلو تروحوا هناك مع الشلة بتتسلوا كثير.
  • Review by Areej of تيمز بيرغر
    قبل 3 سنوات
    اليوم جربنا البرجر من المطعم المميز tim's burger، اول شي مكان المطعم كثير حلو بشارع الرينبو، النظافة ممتازة 100% والموظفين لطيفين جدا، السيد صبحي صاحب المطعم كثير رائع وتعامله جد حلو مع الموظفين وزوار المطعم، انا جربت برجر الكلاسيك عنده كثير زاكية وبتشبع.. برجر المشروم برضو زاكي كثير كل اشي بيتحضر بالمطعم وطازج ع الطلب بعطيه 10/10 ع الطعم وشكل الوجبة.
  • Review by Areej of مطعم جوانا
    قبل 3 سنوات
    اليوم جربت مطعم جوانا، نبلش بالجو العام والنظافة، المطعم مساحته عادية، مش كبير كثير بس فيه بحدود 6 طاولات وكمان طاولات وقعدة برا المطعم، النظافة ممتازة جداً.الموظفين تعاملهم لطيف جداً، بيضحكوا بوجهك وأسلوبهم جيد مع الزباين. بالنسبة للأكل، جربت عندهم أكثر من شغلة.. البيتزا: هم بيعجنوها وكل الشغل بكون قدام عينك وكيف ما بدك، زاكية كثير ويا سلام لما تاكلها وهي سخنة بتشهي. المطبقات: ما جربتها من قبل بأي مطعم ثاني، طعم غريب وجديد عليي مش رح اعرف اقارنها بمطعم ثاني لكنها جيدة وطعمها جيد. الشاورما: يعني أطيب شاورما بجربها من سنة تقريبا، بحطوا عليها خلطات مميزة وخاصة فيهم، كثير زاكية ورح أرجع اروح عندهم وأطلبها ألف مرة. الزنجر: زاكية كثير ومع الصلصة اللي هم بيعملوها بتطلع بتشهي كثير المطعم بشكل عام بجنن واذا جربته مرة رح ترجعله مليون مرة.
  • Review by Areej of المبرور وقدورة للأسماك الطازجة
    قبل 3 سنوات
    مبارح كانت أول مرة بروح ع المطعم، وكانت تجربة مميزة جدا وحلوة وأكيد رح أكررها موقع المطعم كثير ممتاز وسهل توصله وسهل كمان تلاقي مصفات قدامه، اول ما تدخل ع المطعم رح تحس بالفخامة والرقي، الديكور جد فخم ومرتب وكثير مريح، مناسب للعزايم الصغيرة ولاجتماعات العمل، من ناحية النظافة فالموظفين جد مو مقصرين بإشي، والمطعم كثير نظيف، خدمتهم ممتازة، المظف اللي كان مسؤول عن طاولتي كان يضل يشيك ويطل علينا ويخدمنا ويساعدنا بأي اشي وعلى طول بيضحكوا مع الزباين، ما شفت موظف مكشر بوجه زبون، الاكل هو الاهم، انا ما بحب الاكل البحري كثير بس الاكل اللي جربته مبارح كان غير شكل، جربت شوربة الكريما والشريم كانت ممتازة جدا وطعمها زاكي كثير وصيادية الفيليه كمان زاكية جدا ومنظرها بشهي، يعني برتبولك الاكل بطريقة بتكون بس بدك تضل تتفرج عليه وعلى منظره الحلو، اللي بدخل المطعم لأول لحظة بحس انه كثير غالي بس فعليا فيه كل اشي واسعار مناسبة للكل يعني بدك غالي بتلاقي وبدك رخيص برضو بتلاقي، بس الجودة ما رح تختلف بتضل ممتازة شو ما كان الطلب. أكيد رح ارجع اروح ع المطعم كل ما ييجي ع بالي أكلة سمك بنصحكم تجربوه
  • Review by Areej of شركة آستر للنجيل الصناعي‎
    قبل 3 سنوات
    ما اشتغلت معهم اشي بس بعرف موظفينها وشفت كم مشروع من شغلهم بصراحة اشي بجنن، وحتى اسعارهم ممتازة، رقي بالتعامل وتسليم المشروع ع الوقت تماما.. والنتائج مميزة وفخمة
  • Review by Areej of صحيفة الرأي
    قبل 3 سنوات
    من اهم الجرايد بعمان، فيها تفاصيل كثير ومصداقية بنقل الخبر، اخبارها بتهم المواطن وحتى اعلاناتها مرتبة جدا، وتعاملهم جميل وجيد
  • Review by Areej of حدائق الحسين
    قبل 3 سنوات
    يعني اكثر مكان حلو في عمان، الحديقة كبيرة كثير وحلوة وبتجنن وشجر بكل مكان وفيها قعدات مرتبة، واماكن لتسلية الاطفال، والمسجد احلا اشي فيها كبير ومرتب وصوت الامام هادي وحلو جدا.. بالصيف احلا من الشتا طبعا، واغلب الوقت بكون فيها فعاليات وانشطة مرتبة للشباب والعائلات
  • Review by Areej of مكتبة الجامعة الاردنية
    قبل 3 سنوات
    مرات بتكون ازمة وكل الناس فيها خصوصي فترة الامتحانات بس باقي الوقت مريحة وهادية جدا ومناسبة للدراسة، وما عمري دورت ع كتاب فيها الا ولقيته يعني كمان بتتوفر فيها كل المصادر للمعلومات اللي بدك اياها
  • Review by Areej of كرز بوكس
    قبل 3 سنوات
    ما بحبه بالمرة، عجقة كثير وازمة تقول كل طلاب الجامعة قاعدين فيه، مش هادي بالمرة، اسعاره عادية ومناسبة، وبقدم اشياء زاكية مرتبة.
  • Review by Areej of محطة توتال
    قبل 3 سنوات
    تقريبا كل يوم الصبح بنمرق من هون لنعبي بنزين، وبصراحة ما شفت موظفين كازية الطف واحسن من هيك، محترمين للغاية.. وموقعها ممتاز جدا.
Next

أماكن أفضلها

صور أضفتها

من اجمل الفنادق اللي رحت عليها و تعاملهم مميز جدااا
من أجمل الفنادق اللي رحت عليها
القاعات المميزة