Salam Mahmoud

Salam Mahmoud

عمان . منذ يونيو 2012
42 من المراجعات
من وجدوا مراجعتي مفيدة
1
مراجعاتي
42

مراجعاتي

  • Review by Salam of تشيه تشيه
    قبل 6 سنوات
    رجعتله اليوم من بعد فترة قلت يمكن تحسن متل الفروع التانية ..بس للاسف طلبنا اومليت ما في طلبنا بان كيك ما في ..طلبنا مناقيش اجت مو طيبة خاصة الزعتر ..الجبنة والتريكي اهون ..بس كالعادة بطووووووووووووولو عبين ما تطلع روحك..وبس يجو ع الغالب الطلب فيه غلط !! اسعاره منيحة بس خدمته مش بزيادة القزاز وسخ وسخ كأنو خسارة في اهل عمان الشرقية النضافة الحمام دايما ما في مي ! وما كانو مشغلين الميكفات فكان شوووووووووووووب بكفي ؟؟ بقترح يا يزبطوه يا يسكروه بنفعش هيك .. هاي تالت مرة بتمقلب في هاد الفرع !!
  • Review by Salam of بافيليون مول
    قبل 6 سنوات
    المول صح جديد الى حد ما بس مشكلته الاساسية انه وسخ كتير كتير يعني كأنه اهالي عمان الشرقية خسارة فيهم النضافة !! الفود كورت بخزي من كتر الوسخ ..الكراسي والطاولات بتقدرش تقعد عليها والقزاز والارض ..ولا الحمامات دايما مقرفة ..طبعا طلعت الفود كورت مرتين تلات بس ان شا الله ما بعيدها !! حتى فرع تشي تشيه فيه وسخ وحماماتهم فش مي ودايما بسمعو الطلب غلط وبتأخرو واغلب اللي بتطلبو مش موجود .. المحلات مكررة بتحس نفس البضاعة ومو مشكلة ..ابصر كيف ..المهم انه النقظة الاساسية الوسخ !.
  • Review by Salam of منتجع و فندق البحيرة
    قبل 6 سنوات
    انا كتبت نصيحة قبل 11 شهر وهلأ رح ارجع اكتب واغير رأيي لانه الي شفته قبل غير الي شفته هلا .. مبارح نزلنا ..طبعا بالحجز مليون قصة ومليون تلفون وكل مرة احكو بكرا احكو بعدو عشان يعرفو يعطونا سعر مناسب وهاد غلط مفروض الامور محددة سلفا ! الغرف مو نضيفة ابدا ما بتشبه الغرف السنة الماضية ! دخلنا الارض كأنه حد مخبط فيها بالطين مو مشطوفة او بعد ما شاطفين موسخين ! والحمام كمان مو نضيف تماما ..بحكي عن الارضية . الحشرات في البرك حدث ولا حرج !! مليانه حشرات المرة الماضية ما كانت هيك ناقلين السيارة الي بتنقل الصبايا للمسبح البعيد لمكان خفي مو مبين وبعيد اساسا وما في اي اشارة توضح مكانه فبالتالي رحنا مشي اول مرة وتاني مرة صدفة عرفنا الطريق وما كان غيرنا عارف لانه الكل كان عالطريق القديم ماشي مشي ..صغار وعجايز وبعز الشوب !! طلبنا عشا اجا بعد اكتر من ساعة بااااردة الاطباق وبتحرق حتى البطاطا بوجبات الاطفال !! للاسف اغلب الاكل انكب لانه بحرق بطريقة خرافية ! خلصنا اكل وضلو الصحون ع الطاولة ساعتين او اكتر واضطرينا نلم بقايا الاكل ونكبو لانه ما ضلت بسة بالغور الا لزقت فينا وناديناهم يشيلو بس للاسف حتى الاطباق الفاضية اللي جمعناها فوق بعض ضلت لتاني يوم بمكانها !! وصورتها والصورة معي !! المرة الماضية كان ممنوع نوقف جنب بركة الرجال نساعدهم بالصغار او نصورهم هاي المرة للاسف كان في نساء بمناظر مش مريحة جنبهم !! اللبس غير المحتشم في برك النساء مفروض يراجعو قوانينهم بخصوصه استغفرنا عن سنة !! غرف الغيار والشورات اغلبها قفولتها خربانة بدك سنة لتلاقي باب بسكر !! والحال ع الخزاين كمان تلت ارباعهم خربانين وانت وحظك !! رح تضطري تحطي اواعيكي بخزانة مسكورة ! حبيت البحيرة زمان بس اليوم حسيتها فقسة وخاصة انه كان معنا ناس من برا !! صحيح بركة الاطفال دايما باردة والحلو بس قوينا قلبنا وبدنا ننزلهم اكتشفنا انه احد الاطفال عاملها ع تقيل جوا البركة !! اسفة بس هاي كانت الحقيقة المقرفة !! وحتى بركة النساء مش بس حشرات لا وطين ع جناب بلاط وحدود المسبح يعني المياوهات والعجال كلهم توسخو وسخ مش طبيعي !!
  • Review by Salam of الدكتورة سناء الحموري
    قبل 7 سنوات
    ما رح احكي كتير غير انها .. مو شاطرة كتير ما قرات تقريري بدقة وبالتالي تشخصيها كان بناءا على ما لفت انتباها اله مو العكس حددنا موعد عملية وقبل بيومين اكتشفت انه مو محددة وحددتو مع المستشفى بنفسي ما راعت اني مريضة وع سرير العملية و" بهدلتني " ع تأخيري مع انه مو انا الي تأخرت عمدا التأمين وموافقته هو الي تأخر. بعد العملية طلعت من غير ما تشوفني او تكتبلي خروج كانت كاتبة الدوا غلط ..حسب الصيدلي وكانوا يتصلو ا فيها وما ترد وطلعت ع مسوؤليتي ما حددتلي مراجعة ولا حكتلي اي اجراء غيرت ع الجرح بنفسي وكانت خياطتها سيئة للغاية صابتني صدمة نفسية منها .. اثار جانبية عديدة عانيت منها مع انه غيري ما عانوا متلي بس بسبب اخطاء منها او ما بعرف .. عالمراجعة ما استقبلتني باي كلام منيح ولا حمدلله ع السلامة ولا كيفك ولا اشي كانت جافة جدا وشالت لي كم قطبة موتتني من الوجع بدون ما توضحلي شو الي صار معي وليش هيك سائت حالتي كنت اساسا ما الي رغبة اشوفها بعد العملية بس لانه اخلاقيا ما بصير دكتور تاني يكمل ع عملية زميله بالخلاصة تجربتي كانت سيئة جدا معها ما بنصح حد فيها ابدا ابدا..والله الغني !!
  • Review by Salam of لا ميرابيل
    قبل 7 سنوات
    المكان مميز ..قعده وخدمة واصناف ونضافة واسعار وكل شي ..بحبه كتير وكل ما بروحله بحس انه نفس المستوى ما تراجع ..السيئة الوحيدة انه مو مفصول اماكن المدخنين يعني الي بدايق من الدخان ممكن يأثر عليه الي بدخن جنبو ..يعني ممكن لو انفصلت القعدة بكون كامل :) يعني لانه الطاولات قريبة ع بعض ..
  • Review by Salam of روان كيك
    قبل 7 سنوات
    زمان كان كتير طيب وسعره مناسب ..تشكيلة فخمة وروعة لما كان منفرد ومميز بس هلا غالي كتير وطعمه عادي ..واخر مرة قلنا نرجع نجيب منه للاسف كل القطع كبيناها جد الطعم سيء للغاية ..وحرااااااااام سعره فيه ..ما بعرف انه استغلال ولا شو مبالغ في السعر خاصة الكوكيز وقطع الكب كيك تاعت الصغار ..التشوكليت موس صاير اشي غريب عجيب ..حاسة راح وقتو وراحت موضته ..
  • Review by Salam of ركوة عرب
    قبل 7 سنوات
    قعدتو حلوة ..واكلو طيب ..وخدمته منيحة ..الديكور مرتب انسو انه حاطين بابور فوق اله الموسيقى ..وانسوا انه حاطين كتاب دليل الطالب بين الكتب ..بس الجو بشكل عام لطيف وقريب على القلب خاصة اني رحته الصبح ما كان في كتير ناس ولا كان خنقة ولا اشي ..يعني تجربة لطيفة بحب اعيدها خاصة الصبح ..
  • Review by Salam of تشيه تشيه
    قبل 7 سنوات
    انا جربت تلت فروع اول اشي فرع مكة مول مرتين واكتر من مرة بالعقبة ومرتين بالياسمين ..هلأ كل فرع تجربة مختلفة وهاد بحد ذاته سلبيه يعني مفروض تكون كل فروعه نفس الخدمه ونفس الطعم ..هلأ مكة مول اجانا مرة ع الغدا بااااااارد ومو طيب ابدا ..ومرة ع الفطور كان كل شي تمام ..بالعقبة كانت تجربة روعة في كل المرات ..القعدة الخدمة والطعم كلو سوبر ..هلأ فرع الياسمين ..جربتو مرة ع الغدا كان فاشل ..الاكل ابدا مو طيب..وبارد ووجبة الصغار كانت حارة ..وتأخرو علينا لانه اساسا جابو طلب غير اللي طلبناه ..هلأ اخر مرة فطور بفرع الياسمين ..اول اشي تأخروا كتير كتير تاني اشي اجا طلب مختلف ..وتالت اشي الطعم عادي مو مميز بس منقوشة الزعتر كانت طيبة ..يعني ازا ما في خيارات ممكن ينراح عليه بس مو لانه مميز..
  • Review by Salam of قهوة ابو عمر
    قبل 7 سنوات
    المكان ابدا مش مميز باشي ..لا القعدة ولا الاكل ..ولا الخدمة ..ولا التقديم ولا النضافة ..في اماكن اصطفاف بس مو مريحة يعني لانه جاي ع ميلان ..اسعاره غاليه ..وطعم عادي..رحنا عاساس بيفتحو ع 9 متل ما سمعنا رحنا ع 9 و30 حسينا تفاجئوا فينا المهم قعدنا وبلشو يشطفو وعادي المنظفات والمي ع الارض يكبو لحتى اجتنا كم طرطوشة !! نضفو الطاولة وضلت مو نضيفة والشوكة كانت مو نضيفة .. وجابو المنيو وطلبنا وطووووووووووووووووووولو قد ما طوووووووووولو المهم اجا الاكل بالاخروجابو صحن مكسور ما انتبهنا الا لما شلنا كمن قطعة من المنقوشة !! عادي جدا ونشف بسرعة ما خلصناه .والقعدة عادية يعني كانو الواحد في بيته قاعد ..مش انه اشي حلو لا يعني لا تغيير ولا تجديد ولا اي اضافة @@.يعني تجربة سيئة للغاية ما رح اعيدها ..والاهم انه غالي كتير ..
  • Review by Salam of منتزه و مطعم نبع البحاث
    قبل 7 سنوات
    مبارح طلعنا جروب كبير جربناه . كان المكان حلو عشان الخضار . والمي . بس ما كان نضيف كتير ولا مرتب كتير يعني القعدات حلوة بس ما في عناية كافية يمكن المساحة الكبيرة وطبيعة المكان انه مي وشجر بتصعب السيطرة عليه كل دقيقة بس بشكل عام مو وسخ بس مو نضيف يعني بما انه الناس ماخدة راحتها اللي بده يشوي والي بدو يلعب بالمي او يعمل حفلة ولا سهرة ولا يأرجل ما في سيطرة او تدخل فبتلاقي الكراسي اشي بالمي اشي بنص الطريق اشي الطاولات مزيحة واشي مقلوبة وهيك يعني مفروض يكون في ناس تنتبه او تنظم ع الاقل متل ما كان في ناس بتلف بتلم الزبالة وبتغير الكياس من السلال طول الوقت المكان الي قعدنا فيه كان ريحتو مجاري بعيد عنكم يمكن اختيارنا الغلط او ما بعرف بالزبط شو الي صار. مع الحمامات نضيفة وفيها كل شي بلزم. الزغار بنبسطوا بس مو امان يعني الدرج حجارة مو مصقولة بتغلب الصغار اللي عدد لا باس منو وقع وانجرح مع انه متابعينهم وحريصين عليهم. وقت الاكل كان الدبان والنحل متواجد بطريقة صرعتنا صرع. في شجر ليمون وتين الخضار كتير حلو والهوا حلو بس شوب لانه انطلقنا الضهر تقريبا والا ما يكون في اماكن مش مظللة تماما في خصوصية للاماكن للعائلات . ممكن تنبسطوا بس ممكن ما تعيدوها :)
  • Review by Salam of شكر للالبسة الاسلامية
    قبل 7 سنوات
    اضطريت برمضان اروح عليه اشوف ازا فيه اشي ممكن اشتريه لاني بشوف موديلاتهم عالنت حلوة المهم الي بتبيع مش مركزة بالمرة بتحكيلها بدي لون تاني بتعطيكي نمرة تانية بتقوليلها بدي اكبر بتعطيك ازغر..وهيك . عجبنا موديل اخدنا قطعتين انا واختي سعره غالي بس كان شكله مميز المهم ممنوع التبديل ولا الترجيع وعالدفع عجقت الدنيا اللي بتبيع عشان الفيزا وما فيزا اشي مو عارفة تستخدمها اشي خبصت المهم بطلنا ندفع بالفيزا وكومت الجلباب تكويم بدها تحطو مجعلك بالكيس !! اجت وحدة تانية حاولت تساعدها ورتبته طوته اقصد! بعد مليون سنة طبعا انجزوا المهمة وبس روحنا ع البيت لبسته اختي طلع عليه خط ابيض متل المصلي يعني مكوي من فوق الخطوط من برا !! نفس الانتقاد اللي انتقدته عليهم زمان لساتو موجود ربنا ما اراد نكتشف الا بعد فوات الاوان لانه نصيبنا !! بس بشكل عام قطعة مرتبة ولو انه الي شافوها فكروا انها قطعة قديمة ههه لانها واسعة وحلوة بس مبينه القماشة مش بزيادة يعني بدك تدفعي 92,5 دينار ع قطعة مو مبينة جديدة !!
  • Review by Salam of كازاريتشو
    قبل 7 سنوات
    اليوم جربتو . المكان حلو ورايق وما كان في حد تقريبا ونضيف بس الاكل ما حبيتو كتير توقعت احسن من هيك ..طلبنا باستا بكريمة وفطر طعمها طيب وطلبنا صدور دجاج بكريمة وصدور دجاج بفلفل وفطر ..كانت ريحته مو حلوة وطعم الفطر ابدا مو زاكي . بس الجاج طعمه جيد.. التواليت كتير ديق يعني الي معو ولد صغير يادوب يقدر يفوت معو وما كان نضيف المنيو مكتوبة بالايطالي الشرح يعني اللي بدو يفهم بالزبط بدو يخمن طلبت البطاطا تكون مقلية اجتني مسلوقة وجوزي العكس .. يعني بصراحة لو في تقييم وسط بقيمه وسط مو جيد..
  • Review by Salam of الطازج
    قبل 7 سنوات
    زمان كان جيد جدا بس هلأ سيء يعني زمان كنت اطلب منه كبسة كتير زاكي الرز والجاج ماشي حالو وكنت غالبا بطلب ساندويشات سكالوب طيبة كتير بس مرة طلبت مسحب كأني باكل بخبزة حاف ..واخر مرة جربت البروستد سيء للغاية لون الدجاج احمر ومن برا الجلد شِكلو مو حلو ابدا .. طعمو وسط يعني الزنجبيل طاغي ع الطعم كتير ..والبطاطا كانت باااااردة كانهم شايلينها من صحن تاني وشاربة زيت النظافة وسط اقرب الى الجيد مو وسخ يعني بس مو كتير نضيف في مصلى هاد اشي ايجابي بس العاب الاطفال مأساة .مفروض مطعم كبير هيك تكون الالعاب اكبر ومجانية مو هيك ما اعتقد ارجعلو يمكن بس انسى هههه
  • Review by Salam of منتجع و فندق البحيرة
    قبل 7 سنوات
    بيني وبين حالي بحكي فوق الخيال بس لانه في كمن ملاحظة رح احكيهم بس اكيد ما اثروا ع التجربة الفريدة في البحيرة..اكتر ما عجبني القسم النسائي ..يعني اكيد اشي بتحلم فيه اي محجبة ..سباحة من غير اختلاط وبحرية كاملة ..في بحيرة مالحة بشط رملي بتحسي كانك بالبحر الحقيقي..وبركة السحاسيل الروعة وبركة للاطفال باردة ..بس حلوة كتير ..فيها العاب مائية..والسحاسيل بتجنن ..مخيفة بس تجربة حلوة كتير ما بتملل بالمرة..المنتجع بشكل عام مرتب وحلو كتير ونضيف الحمامات والغرف بس مو لدرجة ممتازة يعني جيد جدا ..للي بدقق كتير.تعامل الموظفين ممتاز متعاونين ولطيفين ...الاكل كتير زاكي وسعرو منطقي مو غالي ابدا ..في العاب للصغار كرات ونطاطة وفي منطقتين كمان العاب ع الرمل..في قوارب سريعة وقوارب ع البدالات سعرها منيح كمان..ع البركة الرئيسية ممنوع النساء يقربوا كتير ع البرك..اكيد اشي منيح !! وبقسم السيدات ممنوع الكاميرات والتلفونات ..هلأ الملاحظات الي عندي : 1_ بما انه شعارهم سياحة عصرية بقيمنا العائلية : تمنيت ما يكون في كشف للعورات وتفاجأت بصراحة انه في نساء كتير بيطلعوا عادي بشورتات ولبس شبه عاري .. 2_ الممرات الخارجية فوق مكشوفة اللي عند الغرف فيها شوية حشرات بس حسب طبيعة المنطقة ما حسيت اشي مزعج كتير بما انه خارج الغرف ومنطقة مكشوفة مو جوا الغرف فيمكن صعب السيطرة لدرجة كبيرة مع وجود طبعا مصائد حشرات بكل مكان.. 3_ طلبنا الاكل اجا بارد بس طعمه زاكي . 4_الكراسي الي عالبحر ضهرها ثابت ما بيتحرك مو متل كراسي البحر بمناطق تانية..فقعدتهم مو مريحة خاصة للنساء الي ما بيقدروا يتمددوا..
  • Review by Salam of بيت التصميم الاسلامي
    قبل 7 سنوات
    كنت زبونة دائمة للمحل في فترة من الفترات بس للاسف اخر مرة صار معي موقف اللي هو اني اشتريت جلباب وطلت قماشته من المقدمة اطول من البطانة ورجعتلهم ياه كولي ياه وما زبط حكولي اغسيله وارجعي اكويه بزبط طبعا عملت هيك ما زبط وحكيتلهم انه بعرقل الحركة فحكولي انه في مشكلة في كل الجلابيب من نوعه وباعوني بطانة اضافيه لحل المشكلة وبس روحت اكتشتف انه كمه مخزوء تلت خزقات حكيت معهم حكولي جيبيه خلص بنبدله بس جبتو ما رضو يبدلوه وحكولي ما بنقدر غير نعملك خصم ع اي جلباب بدك تشتريه !! يعني اكافئهم باني ادفع مصاري وانا اصلا ما رح ارجع البسه ! من هون لهون حكولي مفروض من اول مرة كان زتيتيه بوجهنا فتركته وطلعت وهيك كبيت 70 دينار ع الارض عشان تعنتهم كان بامكانهم حل المشكلة بتبديله او بخصم مناسب بيني وبينهم لاني صدقا مو متأكدة من متى انخزق وكيف بس ما بحط بذمتي اني ما كنت منتبهه واشتريته هيك..مو مسامتحتهم وبنصح الكل يتأكد من القطعة قبل ما يشتري منهم وعلى فكرة بوصلك للبيت من المصدر نفسه ارخص يعني من بريطانيا فما في داعي تشتري من هون اغلى وتعامل مو منيح
  • Review by Salam of بيري بيري
    قبل 7 سنوات
    اول مرة بجبرو واخر مرة ان شا الله..السعر مناسب والطبق مو طيب ابدا الجاج شادد بالعافية لتطلع شقفة منو والرز مر بدون الصوص ومع الصوص بصير مو زاكي كمان..الوجبة مناسب حجمها بس اكيد ما قدرت اكملها لانها جد مرة..ما حبيتو ابدا ..
  • Review by Salam of الكرم قادري
    قبل 8 سنوات
    بتشوف موديلاته عالفيس بوك بتحسها نص نص من ناحية الموديل والتفصيل بتشوفها ع الطبيعة بتلاقيها مو حلوة ابدا ..يعني شغل ستات كبار كبار وفي عبي اشكال الوان بتحسها مو شرعية ابدا ..الجلابيب ع النت غالية وبالموقع شفت اشياء رخيصة ..
  • Review by Salam of سو سويت
    قبل 8 سنوات
    كل مرة وكل تجربة اطيب من التانية ..جد ما شا الله عنهم روعة ..كيكاتو فاخرة وسعرها مناسب وحجمها بكفي وزيادة ..ما في قعدة بس بتوصي وهم بوصلوا كمان ..
  • Review by Salam of مجمع جبري المركزي
    قبل 8 سنوات
    الاكل عنده مافي مشكلة طيب وسعرو مناسب ..خاصة المنسف والمسخن والرقاب..بس جاية اكتب عن الحلويات وضعها مأساوي يعني اللي عمرها ما عملت حلو بتعرف تعمل اطيب وازكى من حلوياتو شكلها حلو بس طعمها بالمرة ..وغالية المشكلة..يعني التشيز كيك ريحتو مو حلوة ابدا بتكشش ..والكنافة مش كنافة اي اشي تاني ما بشبه الكنافة..قعدتو بتحس حالك بمقصف او بكافتيريا بكلية قديمة ..بس نضيف خاصة الحمامات..
  • Review by Salam of أبو دقة
    قبل 8 سنوات
    غالي بس كبير ومليان بضاعة ما بحبها لانها محلية وعادية مو مميزة بس شو غالي عشو ما بعرف يعني بتحسي بتدفعي نص اجار المحل ازا بدك تشتري منه ..ما بتزكر اشتريت منه بس اكتر من مرة افوت اسأل عن اشي والاقي اشي مو حلو واطلع ..بحيك عن فرع نزال اللي بالمرج ما عمري شفتو ..
  • Review by Salam of لا في ان روز
    قبل 8 سنوات
    دايما تشكيلة حلوة ومميزة وبس اسعاره غاليه شوي بس طبعا بالتنزيلات بتقدري تشتري براحتك منو ..مشكل وحلو بيجامات قمصان نوم وملابس داخلية ..راقي ومميز وحلو..وطريقة العرض مرتبة والعاملات متعاونات بس مش كتير لطيفات بالتعامل خاصة اللي بفرع الستي مول ..
  • Review by Salam of مطعم وكافيه لا نوزيت
    قبل 8 سنوات
    رحت عليه 3 مرات خلال 6 سنوات يعني ما بشدك ترجع عليه بس لما تكون مو عارف وين تروح وتلمحه ممكن تفوت ..كل شي عادي عندهم يعني ساندويشاتهم او اكلهم كانو بالبيت وحتى المشروبات يعني شاي ولا هوت شوكلت اي اشي كأنك عامله بيالبيت بدون اي تميز ..خدمتهم منيحة وقعدتهم مريحة بس بدون تميز وسعرهكم كمان منيح ..
  • Review by Salam of صيدلية الساطعة
    قبل 8 سنوات
    كم كلمة بس مهمين ..عدوا مصاريكم منيح قبل ما تروحوا والصيدلية ازمة بتحس كل شي فوق بعض والمسوؤلة الصبح مش كتير شاطرة ولازم تتاكد وتسمعها منيح وتسمعك وتتاكد من الاشي اللي بدك ياه خاصة ازا كان مستحضر تجميلي او اشي غير الدواء .. ما بنصح حد يروح عليها لانه ليس كل ما يلمع ذهب
  • Review by Salam of فارمسي ون
    قبل 8 سنوات
    اللي بالياسمين عند ستي ستار مأساة تعامل الموظفين في واحد كبير ببهدلك عادي كأنك بتشتغل عنده والصبية بتلبسك الدواء تلبيس حتى لو ما بدك ياه ..صارت معي مرة منو ومرة من الصبية وكنت مفكرة اشكي منها لسا بسألها عن الدوا راحت جابتلي بديل عنه وكتبت عليه وحطتلو واكتشفت انه مو هو انه اشي تاني وبس قلتلها بتقولي هداك مقطوع وكانت كتير مش لطيفة ..ما بنصح حد يشتري من هاد الفرع تجنبا للاحراج
  • Review by Salam of صيدلية العز
    قبل 8 سنوات
    الصيدلانية المسوؤلة وجوزها والشب اللي بداوم مسائي كتير محترمين ومتعاونين حتى لو مش كتير بروفشنال بس بحاولو يقرأو ويستزيدوا وما يفتوا كتير من غير علم ..حقانين ومش مغلوانين بكل شي وبنصحوك وبسمعولك اي استشارة ع التلفون حتى ..وبطولوا بالهم .بس الصبية الجديدة اللي عندهم مش كتير شاطرة ومش لطيفة زيهم..برجعوا الدوا او الحليب او اي مستحضر ازا بطلت عنه مثلا ما دام مسكر ما عندهم مشكلة وبلطف..وحتى معاملات التأمين متعاونين وبطولو بالهم كتير...بس ناقصهم خبرة شوي اكتر ..بالاول والاخر بحس الصيدلاني لازم يكون اجتماعي زيهم وما بتفلسف كتير لانه لازم يكون فاهم شو بيحكي..وصيدليتهم نضيفة وفيها تشكيلة منيحة من ادوات التجميل ولوازم الاطفال
Next