Salam Almasri

Salam Almasri

عمان . منذ أبريل 2012
13 من المراجعات
مراجعاتي
13

مراجعاتي

  • Review by Salam of لذة اسطنبول
    قبل 8 سنوات
    مطعم لذة اسطنبول مطعم عادي جدا.. الاكل الي المفروض يكون تركي ما بيشبه الاكل التركي فعليا السلطة كانت بايتة والتبولة مأساة عبارة عن برغل معاه شوية بقدونس وبندورة دبلانة! قطع الدجاج كانت صغيرة ودهنية جدا الخدمة جيدة وسريعة والمكان نظيف ومرتب لكنه صغير الموسيقى كانت عبارة عن اغنية تركية وحدة بتتكرر طول الوقت لا يوجد اماكن مخصصة للاطفال ولا اماكن مخصصة للتدخين أسعاره مش رخيصة مقارنة بجودة الاكل الي بيقدمه يعني غدا الشخص بيكلف تقريبا 10 دنانير
  • Review by Salam of الجزيرة للسياحة والسفر
    قبل 8 سنوات
    نوع الرحلة: مرة على تركيا ومرة رحلة عمرة لمكة المكرمة العروض: كانت جذابة وحقيقية وما فيها تلاعب زي عروض بعض المكاتب السياحية الأسعار: أسعارهم كانت مناسبة وتكاد تكون الأرخص مقارنة بمستوى الخدمات المقدمة اثناء السفر اجراءات الحجز سهلة جدا والموظفين متعاونين شركة الطيران المعتمدة لدى مكتب الجزيرة أعتقد انها بترا لانه بالمرتين سافرنا معاهم التنظيم كان عالي جدا والالتزام بالمواعيد وهاد اهم شي بالنسبة الي بالرحلة كان ممتاز الادلاء الي قابلناهم بتركيا كانوا متعاونين وظرفاء وبالهم طويل واهم شي انهم ملتزمين بمواعيدهم الفنادق الي نزلنا فيها كانت ممتازة مقارنة بالسعر الي دفعناه بنصح الجميع يجرب يرتب رحلة معاهم لأنهم خيار ممتاز
  • Review by Salam of محمية غابة عجلون
    قبل 8 سنوات
    فكرة المحميات بحد ذاتها فكرة جميلة وحضارية لكن يؤسفني إنه متلها متل كتير أفكار تشوهت عند التطبيق مش عيب بالفكرة ولكن عيب بالمنفذين.. رحلتنا للمحمية كانت بسيارتنا الشخصية أنا وزوجي .. بعد ما تصفحنا موقع المحمية ع الانترنت وعرفنا عنها تقريبا كل شي وإليكم تقرير بالاختلافات الي وجدناها ما بين ما ذكر على الويب سايت وبين ما وجدناه على أرض الواقع 1- في الموقع ذكروا انه في المحمية ممرات للمشي والاستمتاع بالطبيعة مختلفة في الطول ودرجة الصعوبة وبالتالي فيه منها ممرات ممكن تمشيها لوحدك وممرات لازم يكون معك دليل.. والممرات الي بتحتاج لدليل لازم تدفع عليها فلوس بتتراوح من 9 - 21 دينار على الشخص الواحد (من غير ضريبة المبيعات)! ومش جايبين ابدا سيرة الحجز المسبق للمشي بالممرات الواقع: لما وصلنا بعد عناء طويل وطريق شاق وصعب قالولنا انه ما بنقدر نمشي باي ممر - باستثناء الممر القصير الي اسمه الايل الاسمر اعتقد- لانه ما في حجز! انا مش فاهمة .. الممر الي ما بده دليل لايش نحجز؟ ولما قلنالهم انه ع السايت ما في ذكر للحجز الا لاماكن التخييم قالوا احكوا معنا تلفون! 2- ممر الايل الاسمر المتاح للجميع وبدون دليل قالوا لنا الموظفين انه بياخد مشي ساعتين.. قلنا ممتاز شدينا الهمة وبدينا نمشي.. صدقا انه انهينا الممر ورجعنا لنقطة البداية بعد مشي 13 دقيقة فقط! 3-المطعم كان مغلق وما فيه اي بوادر انه يفتح بالاجل القريب رغم انه احنا رايحين يوم جمعة وبفصل الربيع والاجانب اكتر من العرب بالمحمية 4- دكان الطبيعة وهي عبارة عن دكان صغيرة فيها منتجات من الطبيعة .. اسعارها مبالغ فيها جدا وما في تنوع بالمعروضات 5- على الويب سايت قالوا انه فيه اماكن مخصصة لاشعال النيران لكن لاواقع انه ممنوع باي مكان تشعل نار 6- المكان الوحيد للجلوس والاستراحة هو المطعم المغلق والشاليهات المخصصة للمبيت فقط 7- بالنسبة للاخت الي سألت عن الاسعار الاسعار موجودة كلها على موقع المحمية ع الانترنت مع ضرورة الانتباه الى انه الاسعار غير شاملة ضريبة المبيعات لكن بشكل عام رسوم الدخول للمحمية دينارين + 16% ضريبة مبيعات نصيحتي.. للناس الي بتحب المشي والمغامرة والاكتشاف فيه حوالين قلعة عجلون ممرات طبيعتها بتسحر وببلاش وفيه اماكن تستريح فيها وتاخد راحتك ع الاخر وسلامتكم
  • Review by Salam of بيتزا هت
    قبل 9 سنوات
    ايجابياته: البيتزا عنده لزيزة وخصوصي الرقيقة الهشة المقبلات كمان لزيزة والخبز بالتوم والبطاطا نفس الشي ديكوراته جميلة ومريحة والاضاءة والموسيقى مريحة سلبياته: صعب تلاقي مصف عنده تعامل الموظفين سيء.. مرة كنت انا وزوجي رايحين نتعشى ووقتنا ضيق قلت للموظف كم بده الاوردر وقت؟ قلي يعني ربع ساعة.. قلت له استعجل قد ما بتقدر لانه عنا موعد لو سمحت.. قلي طيب خليها نص ساعة!! كان زوجي رح يعمل معاه مشكلة وبالفعل ما اجانا الطلب قبل نص ساعة!! كميات الاكل عنده قليلة جدا جدا أسعاره مرتفعة جدا مقارنة بغيره ما بعتقد اني مممكن ارجع اكل عنده مرة تانية لانه الخدمة بالنسبة الي اهم من الاكل
  • Review by Salam of يوسف البيك
    قبل 9 سنوات
    انا من رواد مطعم البيك في الجاردنز.. اكله كتير لزيز ونضيف وعنده سندويشات رائعة بيقدم الدجاج المقلي بكل انواعه واشكاله مع الرز البرياني والسلطات البسيطة والعصائر ومؤخرا اضافوا الايس كريم قعدته كتير حلوة وواسعة وديكوراته مرتبة ومكيف صيف شتا والموسيقى مش مزعجة وفيه مكان للاطفال فيه العاب .. التواليت دايما نضيف ومعطر وفيه مصلى صغير فوق الموظفين لطيفين وخدمتهم ممتازة ما بياخد الطلب وقت اكتر من 10 دقايق أسعاره أقل من أسعار اي مطعم بيقدم نفس الاكل بيعمل عروض قيمة جدا عن طريق دفتر كوبونات بيعطيك وجبات مجانية وطلبات اضافية وخصومات عنده خدمة التوصيل مقابل دينارين للطلب واماكن الاصطفاف متوفرة دايما بالاضافة لوجود باركينج بجنبه لكن آخر مرة رحت عليه قبل كم يوم كان مغلق للصيانة! فتأكدوا قبل ما تروحوا
  • Review by Salam of قرية النخيل
    قبل 9 سنوات
    قرية النخيل مطعم مميز بجلساته خصوصي المفتوحة فيه جلسات تحت بيت شعر وجلسات بالطبيعة والشجر والمي الاكل فيه متوسط مش لزيز كتير الخبز الساخن والمقبلات عندهم اطيب من الاطباق الرئيسية الي عجبني فيه انه فيه مصلى للرجال وللنساء الخدمة ممتازة والموظفين لطيفين بتعاملهم أسعاره مقبولة ومناسبة لجودة الاكل اماكن الاصطفاف ما في اكتر منها بالاضافة لخدمة الفاليه مناطق خاصة بالتدخين .. مش فارقة لانه جلساته مفتوحة وما حدا بيأثر ع حدا اما الجلسات المغلقة اعتقد انه المدخن وغير المدخن مع بعض
  • Review by Salam of مطعم ديوان السلطان ابراهيم
    قبل 9 سنوات
    اسم على مسمى.. فعلا بيصلح يكون ديوان لسلطان! قعدته من اروء واجمل قعدات المطاعم بعمان اجواء لبنانية بامتياز الاكل شي يفوق الوصف والخدمة اكتر من رائعة الموظفين لطيفين بشكل رهيب وكميات الوجبات عندهم كبيرة وبيعتنوا جدا بطريقة التقديم ما فيه اماكن مخصصة للاطفال لانه اصلا مش مناسب الا للكبار ولجلسات العمل خدمة الاصطفاف متوفرة شجر ومي واحواض سمك .. اجواء مريحة للاعصاب فعلا أسعاره عالية لكن بصراحة بيستاهل ما بعرف اذا بيقدموا مشروبات روحية لاني زرته برمضان قدمولنا خروب وعرق سوس وقمر الدين :) وصحتين:)
  • Review by Salam of المنقل تشكن تكا
    قبل 9 سنوات
    مطعم المنقل أكله لزيز جدا وأهم من هيك انه صحي لأنه مشوي شوي بعيدا عن الزيوت والدهون طعهم مميز جدا .. الخبز البوري مع المتومة رائع.. أسعاره مناسبة جدا وجبة منوعة لشخصين حوالي 10-12 دينار وبيضيفوك قهوة وانت طالع كمان :) المكان نضيف والخدمة ممتازة والموظفين متعاونين سلبياته مقبلاته نوعا ما محدودة.. والتواليت غالبا مش نضيف للأسف! كالعادة في جبل الحسين مش سهل انك تلاقي مصف لكن فيه باركنج بالارجة قريب منه ودايما فيه محلات فاضية وانا عندي مشكلة مع طاولاتهم عالية وبتتعب الايدين وانت رافعهم :) ومشكلة الموسيقى الصاخبة الي بتوجع الراس وبتخليك ما تسمع الي جنبك شو بيحكي لو يستبدلوها بسوفت ميوزيك بيكون احسن بكتير
  • Review by Salam of أبو جبارة
    قبل 9 سنوات
    ما بننكر انه ابو جبارة من أفضل الأماكن الي ممكن تاكل فيهم الفلافل والحمص والفول.. اكله لزيز والمكان نضيف جدا والمصفات متوفرة والخدمة ممتازة لكن المشكلة بأسعاره .. أسعاره نااااااار ومش مبررة ابدا ببساطة لو شخصين طلبوا فطور متواضع كم حبة فلافل وصحن حمص وصحن فول ومقبلات وكاستين شاي كم بتتوقع الفاتورة؟ ما رح تكون أقل من 10 دنانير!! وبحكي عن تجربة بدون مبالغة وصحتين :)
  • Review by Salam of مطعم حمادة
    قبل 9 سنوات
    مطعم حماده الجاردنز برأيي افضل مطعم ممكن تاكل فيه الاكلة الرهيبة الفلافل! سندويشاته لزيزة جدا ونظيفة واسعاره كتير معقولة مقارنة بالخدمة السوبر الي بيقدمها للزباين لما يجينا ضيوف عرب او اجانب وبدنا نعرفهم ع الاكلة الشعبية الاشهر بالاردن بناخدهم ع حمادة وبيطلعوا مبسوطين كتير بيقدم بالاضافة للفلافل والحمص والفول.. الفتة بكافة اشكالها والمتبل والبطاطا المقلبة والمقبلات عنده طازجة ونخب اول دايما اما الخبز حكاية لحاله.. بيجيك ساخن وطري بيشهي :) نصيحة جربوه ما بتندموا
  • Review by Salam of سناك هاوس
    قبل 9 سنوات
    سناك هاوس لازم يعطوه وسام التميز في الخدمة ووسام التميز في جودة ونظافة الاكل بدون مبالغة هو مطعم السناك الوحيد الي ممكن تاكل منه وانت مغمض عيونك .. لزيز جدا ونظيف بشكل غير عادي الصيني عندهم شي خيال.. والبطاطا مختلفة عن اي بطاطا ممكن تاكلها وسلطاته كمان منوعة ونظيفة واهم من كل هاد انها طازجة مش بايتة من شهر بالتلاجة زي باقي المطاعم! خدمة التوصيل سريعة جدا خلال 20 دقيقة بتكون الوجبة عندك لو كنت من مناطق خلدا او تلاع العلي ومقابل دينار واحد فقط رغم انه مطاعم اقرب منه بياخدوا دينارين بعد ما يعلوا قلبك وانت تستنى والعروض الي بيعملها قيمة جدا واحسن شي انه اسعاره المعلنة شاملة الضرايب يعني مش بتشوف الوجبة بدينارين بتطلع عليك بالفاتورة باربع دنانير! جربوه ما بتندموا
  • Review by Salam of فندق لاند مارك
    قبل 9 سنوات
    فندق لاند مارك بعد تجربتي من ارقى الفنادق.. غرفه واسعة ومرتبة ونظيفة.. عناية بأدق التفاصيل.. الموظفين تعاملهم احترافي وقمة في الزوء.. اجراءات الحجز بسيطة جدا ما بتاخد اكتر من دقيقتين.. موقعه لا بأس فيه قريب من سنتر المدينة الانترنت متوفر ومجاني على عكس اغلب الفنادق المرافق انا ما استخدمت غير مطعم colors الاكل فيه نظام بوفيه.. لزيز جدا ومنوع سواء افطار او غدا او عشا .. المقبلات رائعة.. والطباق الرئيسية كمان اطلالته ع المسبح ساحرة خصوصي بالليل او الصبح بدري.. هادئ جدا للناس الي بتبحث عن الهدوء وبعيد اي مظهر من مظاهر الصخب بنصح اي حدا حابب يتعشى عشا رومنسي او حتى عشا عمل ويحكي براحته بدون ما حدا يزعجه انه يجرب مطعم colors والتراس فوق بالصيف بياخد العقل خدامة الاصطفاف متوفرة وبسهولة الأسعار مناسبة وبتصير رائعة لو كنت من مشتركي بطاقة الدايموند كارد الي بتعطيك خصم 50% على الاكل باي مطعم من مطاعم لاند مارك وخصم 20% ع المشروبات بالاضافة لميزات كتيرة وقيمة جربوه وما رح تندموا :)
  • Review by Salam of تشيه تشيه
    قبل 9 سنوات
    كافيه حلو ومرتب واهم شي انه نظيف والموظفين لطيفين بالتعامل اكله لزيز جدا من أحسن الكافيهات الي بتقدم سناك اسعاره مقبولة سلبيته الوحيدة من وجهة نظري هي اجواؤه الصاخبة البعيدة عن الهدوء وغالبا بيكون معجوق واكتر رواده من الشباب الصغار
  • Review by Salam of اولد فيو كافيه
    قبل 9 سنوات
    كافيه مختلف عن الكافيهات التانية بسبب موقعه اطلالته ديكوراته القديمة واجواؤه العمّانية البحتة نظيف ومرتب وخدمته ممتازة خدمة الاصطفاف متوفرة سلبياته انه دايما معجوق ولان مكانه ضيق مش واسع ما بتشعر بالخصوصية يعني ما بينفع لجلسة هدوء ورواء اسعاره غالية شوي بنصح بتجربته من باب التغيير لانه شي مختلف عن اي كافيه تاني
  • Review by Salam of جي بي سي كافيه
    قبل 9 سنوات
    جي بي سي كافيه نظيف ومرتب وديكوراته حلوة للي بيحب الجلسات الشرقية والجلسات المفتوحة قائمة طلبات للمشروبات والسناك منوعة وأكلهم لزيز ونظيف أسعارهم مقبولة ما بيقدم مشروبات روحية والي بيتدايق من الدخان والارجيلة ممكن يقعد برا بالهواء الطلق النقطة السلبية الوحيدة هي بطئ الموظفين في تلبية الطلبات رغم انهم لطيفين جدا
  • Review by Salam of هاشم
    قبل 9 سنوات
    نصيحتي لأي شخص بيفكر ياكل في هالمطعم انه يلغي الفكرة نهائيااااا .. أصلا حرام يسموه مطعم! لانه ما بيشبه المطاعم بشي.. نظافة تحت الصفر.. سواء الطاولات او الارضية او حتى كاسات وصحون الاكل شي مقرف جدا.. والموظفين صحيح سريعين بتقديم الخدمة لكنهم بيفتقدوا ادنى مستويات النظافة بلباسهم او طريقة تقديمهم للأكل أنا اول مرة بحياتي بشوف موظف مطعم بيعمل ايده صينية وبيحط عليها الصحون والخبز مباشرة ع بشرته وهو عرقان والدنيا حر! الديكور يا عيني ع الديكور حسيت حالي قاعدة بكراج سيارات مش بمطعم! الاصطفاف الكل بيعرف معاناة وجود مصف بوسط البلد.. الأكل أبدا مو لزيز .. والأسعار عادية زي اي مطعم شعبي باختصار سندويشة وحدة من حمادة بتسوى مطعم هاشم كله!
Next