Saleh Thaher

Saleh Thaher

عمان . منذ أكتوبر 2011
طالب في جامعة البترا بحب كرة القدم والتصوير.. https://www.facebook.com/pages/Saleh-Thahers-Photography/134610313311560
137 من المراجعات
الأماكن المضافة
33
من وجدوا مراجعتي مفيدة
2
مراجعتي كانت الأولى
52
مراجعاتي
137
صوري
301
أماكن فضّلتها
25

مراجعاتي

  • Review by Saleh of فيل بيرغر
    قبل 5 سنوات
    رح أكتب قبل ما أجرب المكان للأسف بسبب الموقف التالي.. طلبنا انا وزملائي بالشغل 12 وجبة وكان وقتنا جدا محدود، خلصنا مع الشب عالتلفون ووعدنا بالوقت الفلاني انه يكونو عنا الوجبات، ولما مر الوقت اللي قال عنه اتصلنا فيه نسأل وين الوجبات، حكالنا "اتصلت بعد 5 دقايق أأكد عالطلب وكان لا يمكن الإتصال" بكل بساطة قاللنا هيك.. ايش أعمل بال12 اللي صرلهم ساعة بستنو الوجبات؟ كان موقف غير مقبول وأسعفني مطعم تاني، ما رح أرجع أحاول أجربه للأسف.
  • Review by Saleh of فاير فلاي برغر
    قبل 5 سنوات
    طلبت عالتلفون من عند فير فلاي ل12 شخص بالشغل وكان وقتنا ضيق بسبب تجربة سيئة مع خدمة توصيل فاشلة من مطعم تاني، المهم وعدني يكون الطلب جاهز بعد نص ساعة عشان اجي آخده وفعلا عالوقت.. كان الطلب جاهز وأموره تمام وكتير زاكي وقدّرت موضوع الوقت وشكرته عليه وحبيت اكتبه هون.. غالبا بطلب من عنده كاماكازي وبنصح اي حدا بشبعش بسهولة إنه يطلبها اذا اجا عباله برغر، الوجبة مع بطاطا وبيبسي سعرها 5.50 تقريبا.. برأيي السعر متوسط بس جدا بستاهل وبخلص الواحد الوجبة وهو مبسوط.. قعدة المطعم مناسبة سواء للعائلة او مجموعة شباب او بنات المكان مريح.. زاكي لأي حدا بده برغر كبير.
  • Review by Saleh of مغرم البيتزا
    قبل 5 سنوات
    المكان حلو كتير وهادي، القعدة كتير حلوة بتزبط للعيلة او للشباب، والمعاملة 5 نجوم كتير لطيفين اللي بالمحل، البيتزا كتير زاكية بس خفيفة كتير ما بتشبع كنت بفضل تكون أسمك، بالنسبة للأسعار المحل يعتبر غالي كتير بسبب الضريبة والخدمة.. يعني كان هدفي أجرب المحل لما رحت فما أكلت كتير.. طلبت بيتزا وحدة انا وصديقتي تشاركنا فيها (الحجم موحد) صراحة ما بتكفي حتى لشخص واحد يا دوب تشبع مع بيبسي وماء ودفعت تقريبا 10 دنانير.. برأيي زاكي المحل بس غالي ممكن مرة بالسنة أروح عليه.
  • Review by Saleh of مطعم السروات
    قبل 5 سنوات
    هاي تاني مرة بكتب عن مطعم السروات.. المرة الاولى زمان كانت خاصة بالمشروبات الرمضانية فقط.. انا بشوفه زاكي كتير.. بحب من عنده شاورما الجاج واللحمة وخصوصا خبز الصمون بستمتع جدا بشاورما اللحمة بالصمون، كمان المشاوي عنده زاكية عادة منوصي عالتلفون عجاج مشوي ومنروح منلاقيه جاهز.. وسبب التوصاية على التلفون الأزمة الخانقة ولا ممكن أتحمل أزمته.. وصعب جدا جدا تلاقي صفة دايما بصف بالشارع اللي ورا بس أروح.. عنده قعدة فوق بس ولا مرة جربتها.
  • Review by Saleh of قصب وسط البلد
    قبل 5 سنوات
    قصب السكر من هذا المكان بارد ومنعش وكتييير زاكي، بحب دايما أشرب من عنده بس أمر، سعره مناسب جدا الكاسة بنص دينار والقنينة بدينار وحلوة طريقة كتابة فوائد قصب السكر على الكاسة والقنينة، والشباب اللي فيه لطيفين جدا أحيانا بطلب شقفة من عود قصب السكر ما بيقبل ياخد حقها.. ممكن اذا شخص مارر بالسيارة يكون صعب عليه يتناول كاسة عالسريع لإنه مافي مكان قدام المحل يقدر يصف فيه، بالنسبة إلي هذا من افضل الأماكن لكل محبي القصب.
  • Review by Saleh of مطعم شهرزاد الشعبي
    قبل 6 سنوات
    اول مرة بروح على شهرزاد وأكلت عرايس وصينية كفتة بطحينية.. كانو زاكيين خصوصاً صينية الكفتة رائعة.. بس ما بعرف ما إرتحت كتير لسبب إنه عشان السرعة عم بصير الوضع شلفقة مش سرعة منيحة يعني.. يعني وانا على طاولتي شايف واحد من عاملين المطعم حامل 7 صحون مخلل وبكب من هون ومن هون.. وكمان بكون في علئ كل طاولة صحن ملح وفلفل ما غيرولنا إياه.. كقعدة ما بتزبط إلا للشباب حسيت (اللي تحت).. كان الطلب سريع وسخن وانا الصراحة إنبسطت لولا هالكم إشي اللي شفتهم بعد ما كل صحابي كانو يحكولي أجربه..
  • Review by Saleh of وزاب دوغ
    قبل 7 سنوات
    مباااااارح فتح عنا وزاب دوغ بجامعة البترا!! غمرتني الفرحة وسارعت انا والشباب عليه.. بالرغم من الأزمة اللي كانت إجانا طلبنا بسرعة زي ما تعودنا عليه بشارع الرينبو... من مطاعم الهودوغ المفضلة عندي.. كانت أول هودوغ باكلها من عنده رائعة... وبتوقع طول ما هو موجود ما نفكر كتير شو بدنا ناكل بالبريك.. معاملتهم كتير منيحة ومرتبين كتير.
  • Review by Saleh of كافيتيريا القدس
    قبل 8 سنوات
    القدس زاكي وحلو الواحد وهو ماشي بشارع الرينبو يمر يسلخ كعكة من عنده.. صار زي تقليد بس أكون هناك وانا مروح بمر من عنده باكل بس المشكلة الكبيرة إنه غالبا بس أمر بمر وانا مروح بكون خلص الكعك من عنده ومش مرة ومرتين بس، كتير! وسيئة تانية إنه ما بيعطي فلافل حب... غير هيك لو كان عنده الكعك طول اليوم بكون ممتاز.
  • Review by Saleh of مطعم كيوي
    قبل 8 سنوات
    يعني صرت مجرب شغلتين وكتبت نصيحة من قبل بس ما كتبت عن التشيز كيك جديد جربته!!! مش قادر أقرر شو بدي أجيب المرة الجاي مش طبيعيييي ما أزكااااااااااه التشيز كيك وبرضو التمر شيك خرافي.. فعلا رائع وهاي المرة ما واجهت مشكلة بالتأخير طلبنا 4 وإجونا على السريع.. الشيز كيك معه بسكوت وكرز وتقيل بنصحش حدا يكون ماكل قبله لحالو بشبع... كتير راضي عن المحل فعلا مميز.
  • Review by Saleh of حلويات السهل الأخضر
    قبل 8 سنوات
    ما بعرف ليش فكرتي ما كانت مش كتير منيحة عن السهل الأخضر بجوز من حكي الناس بس بعد التجربة شفتهم غلطانين.. جربت الكنافة الناعمة فعلا إنها زاكية والقعدة بسيطة ونظيفة.. اول ما قعدنا إجانا واحد من المحل وأخد طلبنا وكان لطيف ورحب فينا.. وأسعاره كتير مناسبة.. كانت تجربة جميلة وإن شاء الله رح أرجع عليه مرة تانية وبنصح فيه.
  • Review by Saleh of متحف الأطفال
    قبل 8 سنوات
    متحف الأطفال كتير حلو ومفيد لكل الأعمار مش بس للأطفال.. من ناحية النظافة كتير نظإنه ممنوع إدخال الأكل وحتى المي عشان النظافة والمحافظة على كل شي معروض.. طبعا أول جمعة بكل شهر في يوم مجاني مفتوح للكل بس ممنوع دخول إلا اللي معه أطفال.. الإضاءة فيه ممتازة وحوة كتير وفي كتير أشياء بتعجبني بالمتحف بحسها فعلا بتصب بالهدف الرئيسي للمتحف اللي هو تعليم الأطفال من خلال التجربة الأشياء.. مثل البنك والسوبر ماركت اللي بخلي الأطفال يعيشو تجربة السوق ويمسكو عربايات ويعبوها أغراض وبالاخر يروحو عند الكاش ليحاسبو.. والمكتبة اللي غير كتبها الحلوة بتعلمو فيها إنه مكتبة يعني هدوء.. برأيي هاي الأشياء الصغيرة بتأثر بالأطفال أكتر من أشياء تانية.
  • Review by Saleh of الأمير
    قبل 8 سنوات
    مطعم صغير مقابل المسجد الحسيني.. زاكية كعكة الفلافل من عنده ومرتبة.. نظيف شغلهم ومعاملتهم كتير منيحة..
  • Review by Saleh of وزاب دوغ
    قبل 8 سنوات
    وزاب دوغ خيالي، من محلاتي المفضلة كتيييييير زاكي إدمان أقل إشي ممكن أحكيه عليه... ما عنده غير الهوت دوغ وبحط فيها شبس وفلفل وجبنة وكل شي... القعدة فيو صغيرة قدامهم وفي كرسي قدام باب المحل للي بحب ياكل عندهم.. شغلهم مرتب ونضاف ومعاملتهم كتير منيحة وممتازة.. كتير بنصح أي حدا بمر بشارع الرينبو يجربهه (بدخلة جيرارد)...
  • Review by Saleh of تيرتيل جرين تي بار
    قبل 8 سنوات
    جربتو برا المحل.. كان في Event وكانو عاملين Booth إلهم فيه.. جربت الشاي البارد كان زاكي وجربت الساندويشات الصغيرة اللي بقدموها كتير زاكية قد ما الواحد بياكل منهم ما بوقف كتير زاكيين.. يعني تجربتي بسيطة بس زاكية وشجعوني أروح على المحل نفسه أشوف شو في عندهم كمان :)
  • Review by Saleh of فاير فلاي برغر
    قبل 8 سنوات
    افففف أفففففففف ما أزكاه وشو بشبع.. كنت بدي إشي جد يشبعني انا وصحابي وجربت أطلب منه.. طلبت "كاماكازي" برغر كبيرة كتيييير طبقتين برغر وإكسترا تشيز وكانت خرافية لو إنو منسف مش هيك بدها واحد صرلو يومين مش ماكل كتيييير زاكية وكبيرة... كانت المشكلة مع المطعم إنه (بدون مبالغة) قعد ساعتين بالزبط ليجيبلنا الطلب وإحنا مش بعاد عنه بالويبدة.. طلبنا 4 وجبات "كاماكازي" ووجبة "فير فلاي".. إجانا 7 وجبات "كاماكازي" مش عارف كيف ومافي "فير فلاي" والورقة ملزقة بالبرغر من كتر ما لفت بالطريق... قد ما حبيت البرغر على قد ما حقدت على الشب تبع التوصيل.. مش طبيعي ساعتين يعني... إذا جد بدي أنصح نصيحة مفيدة بنصح اللي بدو ياكل منه إنه ما يطلب ديليفري ويروح على المحل نفسه بأول شارع الرينبو على الشمال.
  • Review by Saleh of مطعم ومقهى كومفي
    قبل 8 سنوات
    كومفي كتير حلو ورايق مكانه.. القعدة حلوة كتير والكراسي مريحة، البيتزا عنده زاكية والتشيز كيك كمان زاكية كتير، المحل نظيف وهو طابقين بس صغير شوي.. المعاملة فيه ممتازة والخدمة سريعة، جوه حلو ومناسب وما في ريخة دخان.. فيو إنترنت وعنده مصفات مخصصة إلو.. جميل المحل وبنصح فيه :)
  • Review by Saleh of مؤسسة لوياك
    قبل 8 سنوات
    مؤسسة لوياك هي عائلة مش مؤسسة، ساعدتني كتير على تنمية قدراتي وزيادة خبرتي بالتعامل مع فئات مختلفة من الناس والتجارب التطوعية بشكل عام وببيئة العمل كمان.. إشتركت ببرنامج "درب" عن طريق طلب على الإنترنت وهو برنامج تدريب صيفي مدفوع الأجر يعني مناخد راتب فوق ما إحنا منتدرب، مقابل التدريب هاد الواحد عليه إنو يتطوع بخدمة المجتمع 18 ساعة، وإتصلو معي وقابلوني وأعطوني ورشة عمل مدتها يومين تعلمت منها كيف أكون إيجابي وأكتشف أشياء جديدة بحالي بقدر أعملها وأكون مفيد فيها وأبعد عن الخجل وأسأل وتعلمت كيف مطلوب أتعامل مع الموظفين اللي رح أشوفهم إيش أحكيلهم وإيش ما أحكيلهم وكيف ألتزم حدودي معهم وأعكس صورة حسنة عن المؤسسة اللي انا جاي عندهم عن طريقها.. بعد الورشة أمنتلي لوياك تدريب ببنك الإستثمار العربي الأردني إشتغلت فيه 5 أسابيع بأربع أقسام وكتير تعلمت أشياء جديدة ما كان عندي أي فكرة عنها بقطاع البنوك وكانت تجربة كتير حلوة واستفدت منها وزادت خبرتي على البكير وانا طالب سنة أولى لسى.. وأعطوني راتب وشهادة خبرة مقابل هدول ال5 أسابيع، استفدت كمان أشياء زي الإلتزام بالوقت وشخصيتي صارت أقوى.. بالنسبة للتطوعات منقدر نساعد ونتطوع بكتير أشياء ومنقدر إحنا كمان نطلع بمبادرات، مثلا هلأ برمضان إشتركت بتنظيم إفطارين للأيتام وإفطار لعمال الوكالة تقديرا لمجهودهم، وكمان انا لإني بحب التصوير صرت أتطوع فيه، يعني بصور تطوع معين ولوياك باخدو مني الصور للموقع وللفيس بوك عشان يشوفه الكل ويتشجع لهاي الأعمال التطوعية.. كمان ساعدت بدهان بيت ناس محتاجين بقرية بعجلون، وشاركت بمبادرة شكر وتقدير شرطة السير كنا نلف عليهم بالشارع بإشراف شرطي ونوزع عليهم ماء ومحارم وغير التوزيع كنت بصور كمان، كمان شاركت بتطوع بمخيم الطالبية عملنا نشاطات وألعاب صغيرة لأطفال المخيم وتعرفنا عليهم وقضينا معهم وقت كتير حلو وغيرنالهم جو، هاي من أكتر التطوعات اللي تركت أثر وإشي حلو فيي وتعلمت منها كتير أشياء وتعلمت إني بقدر أكون مفيد بدون أي تكاليف وإنو ممكن استغلال اي مورد صغير عند الواحد مع كلمة حلوة تخلي شخص يتيم أو عامل نظافة أو محتاج يتفائل وتخلي اللي حاسس منهم إنو مختلف عنا يعرف إنو جزء من المجتمع زي ما إحنا جزء منه.. تجربتي رائعة مع لوياك وانا كتير بحبهم ونص وقتي بقضيه معهم بالتطوع وبنصح أي شخص عمره بين ال16 وال24 إنو يكون فيها.
  • Review by Saleh of مسجد الهمشري
    قبل 8 سنوات
    مسجد الهمشري من أفضل المساجد في المنطقة.. كتييييييييييير مرتب وفخم وديكوره بالأبيض حلو كتيييييييير... سماعاته عالية وصوتها واضح والسجاد مرتب ومريح والإضاءة جميلة وفيو شاشات كبيرة كمان فعلا إنو كتير فخم!!!!! المتوضأ ولا مرة دخلته مش نظيف وما فبو ريحة سيئة.. برأيي إنو من أريح المساجد لصلاة التراويح والقيام!!!
  • Review by Saleh of سوبرماركت المدينة
    قبل 8 سنوات
    سوبر ماركت المدينة فعلا إنو أحسن الأماكن للتبضع بالمواد التموينية وكل الأغراض اللازمة للعزايم.. ممتاز من كل النواحي.. أسعاره كتير رخيصة وعروضه قوية كتير وعنده كل شي كل شي بدل النوع عشرة.. والعاملين هناك وصاحب المحل من أرقى الناس بالتعامل وصاحب المكان دائما موجود للتأكد من إنو كل شي ماشي صح.. المشكلة اللي ما إلها حل وزادت بشكل كبير برمضان اللي هي الأزمة بس مع هيك ما بتمنعنا إنو نجيب كل أغراضنا من هناك وهو بعيد عنا كمان بس كتير مميز...
  • Review by Saleh of مخابز برادايس
    قبل 8 سنوات
    كنا انا وصحابي بنحضر لفطور خيري للأيتام وخطر على بالي إنو أجيبلهم للأيتام قطايف عصافيري بجوز إشي جديد عليهم وينبسطو عليه.. والفكرة أجيب عصافيري لإنو الكبير رح يغلنا نعمل ل50 طفل.. فجبت 2 كيلو عصافيري من عند برادايس.. تغلبت كتييير بالأزمة نص ساعة وانا أستنى دوري.. يعني هاي السيئة الوحيدة بس القطايف ممتاز 100%.. انا عملته نوتيلا وقشطة وحجمه مناسب وما غلبني وكتير زاكي وإنبسطو عليه والحمد لله كان إشي مختلف وحلو ^_^
  • Review by Saleh of مطعم السروات
    قبل 8 سنوات
    مطعم السروات كتيييييير بحب من عنده المشروبات الرمضانية (الليمون والخروب).. بروح عليه خصوصي عشان أجيبهم من هناك والإشي الوحيد اللي بغلبنا فيه الصفة بس بستاهل توصله خصوصي وتتغلب عشانه.. بحس الليمون من عنده فعلا طبيعي وزاكي والخروب على كيفي مش كتير تقيل وبشهي.. برأيي إنو أحسن مكان لخروب وليمون رمضان!!!
  • Review by Saleh of جي بي سي كافيه
    قبل 8 سنوات
    حبينا انا والعائلة بعد الفطور نطلع نغير وبما إني مجرب جي بي سي من قبل فنصحتهم فيه بعد ما جربته أكتر من مرة.. كنا 9 أشخاص مع طفلين صغار ورتبولنا طاولتين جنب بعض وما قصرو معنا وكانو خدومين.. أول ما قعدنا إجانا واحد ضيفنا قهوة سادة بعدين طلبنا، انا طلبت ميلك شيك شوكولا بحبه كتير وكان زاكي.. كانت قعدة كتير حلوة إستمرت للساعة 2:00 بالليل وكان في عرض دبكة جوا كنا مفكرين إنو ما رح نقدر نشوفه لإنا برة بس خلصو من جوة وإجو عنا برة وكان الجو كتير حلو وإنبسطنا.
  • Review by Saleh of الضيعة
    قبل 8 سنوات
    بعد تجربة الضيعة اخر فترة صرت كنير أحبه.. كنت ماخد عنه فكرة سيئة من قبل بس الحق يقال غيرت رأيي.. بحب كتير وجبة الشباب بتشبع كتيييييييير وزاكية زاكية!!! القعدة فوق حلوة والعاملين لطيفين.. وطلبنا ديليفري مرة منو وكان سريع وكانت الوجبة ممتازة زي أول مرة جربتها!!!!!!!!
  • Review by Saleh of منقوشة وأكثر
    قبل 8 سنوات
    محل معجنات متواضع بس كتييير زاكي جربت من عندة معجنات سلامي مع جبنة وكانت ممتازة وبتشبع.. معاملتهم منيحة كتير وخدومين ولطيفين بالتعامل... أسعاره متوسطة والمحل نظيف.
  • Review by Saleh of مطعم كيوي
    قبل 8 سنوات
    جربت من عنده عصير تمر على أساس بدي أجرب إشي جديد.. خرافييييييييييييي كان كتير زاكي وبشبع يعني إذا بدك تجربه روح مش ماكل وبحطو معو فستق ولوز.. المعاملة منيحة بس انا ما عجبني إنو تأخر علينا نص ساعة بدون مبالغة.. هو صح زاكي بس مش هيك!!! عنده قعدة برانية حسيتها صغيرة كتير ما بتكفي لحدا.. أسعاره متوسطة مش رخيص... إذا بدو الواحد عصير وكوكتيل وميلك شيك مميز وكان ما عنده مشكلة بالوقت بنصحو يجرب!!
Next

أماكن أفضلها

صور أضفتها

جزء من الأستديو - حياة اف ام
حلاوة الجبنة - فعلا أزكى حلاوة جبنة بالبلد حلاوة الطاحونة الشامية
مكسرات - سوبر ماركت عودة