Wala Ahmad

Wala Ahmad

عمان . منذ سبتمبر 2011
19 من المراجعات
الأماكن المضافة
1
مراجعاتي
19
صوري
64
أماكن فضّلتها
1

مراجعاتي

  • Review by Wala of مقهى ومطعم أتاي
    قبل 7 سنوات
    رحت عليه قبل أسبوع تقريبا، اول شي موقعه سيء جدا يعني ما بندل الواحد عليه بسرعة وفي قعدة برا وقعدة جوا، القعدة اللي برا ما وصل الواي فاي لإلها! و الاستقبال كويس بس الوايترز كتير بحكو مع بعض وبلتهوا ف طول الطلب لوصلنا، المشروبات عندهم مش كتير متنوعة في عندهم اشي اسمه حامض فراولة ما حبيته بالمرة ولما سألت عن العصائر حكولي اغلبها مش فريش! المحل المفروض يكون مغربي يعني لازم يكون في حلو مغربي، لما سألت استغربو شو اللي سألتهم عنه وصارو يحكولي بس في بفرع شارع مكة! أسعاره قريبة من اسعار الكافيهات التانية وعندهم فاليه.
  • Review by Wala of مركز علاء الدين للالعاب
    قبل 7 سنوات
    اشتريت من عنده البلاي ستيشن بالنسبة الي كان أحسن محل لأنه لفيت ودورت كتير ما حدا أعطاني زي العرض اللي هوه أعطاني ياه, والشباب اللي هناك خدومين وبالهم طويل وأسعاره غالية شوي بس لما يعمل عروض بكونوا روعة وبوفر عليك كتير
  • Review by Wala of وزاب دوغ
    قبل 7 سنوات
    بالنسبة الي أحسن محل هوت دوج بعمان كتير سندويشاته زاكية وأنا عملي ادمان بالفترة الاخيرة بس عنده مشكلتين انه مافي كتير مصفات يعني بدك تمشي شوي وانه صغير المحل أسعاره منيحة بالنسبة لجودة اللي بقدمه والموظفين تعاملهم روعة وبشوشين عنده مشروبات غازية وعصائر وice tea بنصح الكل يجربه
  • Review by Wala of دي سيلفا
    قبل 7 سنوات
    رحت عليه مرة وحدة, المكان كتير مرتب و الديكور غريب وحلو أكتر شي عجبني فيه الطاولات اللي جواتهم حوض سمك, ما جربت الأكل عندهم بس للأسف الخدمة كانت بطيئة يعني كتير غلبونا لقعدونا على طاولة ولما طلبنا برضو كانوا بطيئين يمكن كان يومها معجوق! يمكن ارجع اروح عليه بس مش مع مجموعة كبيرة!
  • Review by Wala of عجينتنا
    قبل 7 سنوات
    اكتر محل بحب أروح عليه وأنا بالجامعة, المحل بينفع فطور, غدا, عشاء. الطلب شوي بياخد وقت ليجهز بس بستاهل انك تستنى البيتزا عنده بأنواعها زاكية وصراحة بالنسبة للجودة والحجم أسعاره كتير منيحة. بس مشكلته بشغلتين اللي هيه المصفات والقعدة يعني قبل سنة كان كتير صغير المحل مافي غير طاولتين و وسعوا ومع هيك برضو لسه صغير, يعني أغلب الوقت بناخد وبناكل بالجامعة. المناقيش زاكية بس مرات اذا كان معجوق ممكن تنحرق المنقوشة من تحت ف بيطلع طعم مرار! بس ما صارت غير مرة. و كتير الموظفين مناح يعني انا مرة طلبت ودفعت وقرب الطلب يجهز بس صار معي ظرف اضطريت الغي الطلب ما حكوا أي شي بالعكس رجعولي المصاري بدون ما أحكي وحكولي تعالي بأي وقت تاني كتير كانوا محترمين.
  • Review by Wala of سناك وعجين
    قبل 7 سنوات
    المحل قبال جامعة الأميرة سمية بالضبط, عنده أكل بنفع للفطور وبنفع للغدا كتير الأكل نضيف بس مش دايما بتلاقي مكان تقعد. عنده ساندويشات متنوعة (بخبز حمام او خبز فرنسي) وعنده صاج. الزنجر زاكي كتير عنده بس بالعادة اذا بتطلب صاج زنجر بكتر الجبنة فيه ف بتقدروا تحكولهم يقللوها, التركي و البرجر الدبل كمان زاكي عنده. و عنده مشروبات متنوعة. وأسعاره منيحة و متفاوتة يعني السعر بعتمد أحيانا على نوع الخبز, بعد الساعة 4 بكون فاضي عشان أغلب طلاب الجامعة بكونوا مروحين و الطلب بجهز بسرعة
  • Review by Wala of بلانت دوناتس
    قبل 7 سنوات
    جودته عم بتقل يوم بعد يوم كان من المحلات المفضلة عندي بس هلأ مش كتير! الاشي الوحيد اللي حسيته ضل زي ما هو ال cinnamon twist بس معظم الاشياء اللي بالشوكولاته تغير طعم الشوكولاته فيها وحتى صارت أقل من قبل وأسعاره عم ترتفع و حجم الحبة عم بقل ف مش منطقي أبدا اللي عم بعملوه, جربت الكابوتشيو عنده وبالمرة ما عجبني. بتذكر مرة انه كانو معلقين ورقة مكتوب عليها انه عندهم انترنت وايرلس ف رحت على هاد الاساس ادرس فيه وبس سألتهم بحكولي ما عنا قمناه من زمان يعني اذا قمتوه ليش لسه مخليين الورقة!
  • Review by Wala of معجنات نور الشهباء
    قبل 7 سنوات
    المحل موقعه قريب على البوابة الشمالية للجامعة الأردنية وجامعة الأميرة سمية بس الصفة عنده شوي بتغلب يعني مش دايما بتلاقي مكان ف ممكن تضطر تمشيله شوي, كتير زاكية المعجنات عندهم أنا جربت الخضار الحارة, جبنة بيضاء, لحمة بس ما كانت كتير زاكية, البيتزا عندهم زاكية, وسبانخ و بطاطا بس عندهم اشياء اكتر بس هاي الشغلات اللي جربتها وبسخنلك الطلب اذا بدك وصراحة أسعاره جدا رخيصة مقارنة بمحلات المعجنات اللي حواليه وبالنسبة لجودة الأكل اللي بقدمه وكمان مناسبة أسعاره لأنه معظم زباينه طلاب جامعات.
  • Review by Wala of أزكدنيا
    قبل 7 سنوات
    من اكتر الأماكن اللي بحب أروحها بعمان, الديكور كتير حلو ومتناسق مع فكرة المكان, أول ما تدخل بستقبلوك استقبال حلو وكتير بشوشين الموظفين, جوه الى حد ما عائلي وبأيام معينة يعني العطل مش كتير مناسب تروحووه مع العيلة لأنه معجوق بكون و عندهvalet وصراحة حسيت انه من المحلات القليلة بعمان اللي حافظ على سمعته من أول ما فتح والدليل انه فتح فرع تاني بعبدون. الأكل عندهم زاكي أنا جربت منقوشة حلوم ومنقوشة فلافل تاريخي هاي شوي غريبة بس حلو التغيير (عجينة فلافل مع خضار) و أصايع الجبنة المقلية زاكية كتير كمان, مولتين شوكلت,والشاي بالميرمية عندهم أزكى من شاي بنعنع. و رحنا مرة اتسحرنا برمضان كان الجو رايق والأكل زي كأنك بالبيت كتير نضيف ومتقن بس عمري ما جربت أفطر فيه الصبح إذا حدا جرب يا ريت تحكولي أي ساعة أنسب شي أروحه وشو ممكن أطلب أشياء؟
  • Review by Wala of كافيه نجار
    قبل 7 سنوات
    من أحلى الكافيهات بشارع مكة, قعدته رايقة والقهوة والكابتشينو زاكي عندهم! أنا عملت عيد ميلادي فيه وكتير كانو لطيفين بالتعامل وسريعين. عنده خدمة فاليه وأسعاره متوسطة
  • Review by Wala of مريم كافيه - زيروفور
    قبل 7 سنوات
    بالنسبة الي كان أسوأ كافيه بروحه! الخدمة بطيئة لدرجة انهم بنسوك و بنسوا طلبك, طلبت مي و قهوة أخدو أكتر من ساعة لجابوها. وكتير الأغاني صوتهم عالي ما قدرنا نسمع بعض والتهوية سيئة. الديكور ماشي حاله بس الكراسي مش مريحين والطاولات كتير عاليين! الأسعار جيدة مقارنة بغيره! بس لازم يحسنوا خدمتهم لأنه لسه جديد المحل
  • Review by Wala of مقهى سرايا عبدون
    قبل 7 سنوات
    المكان حلو ومرتب, وفي قعدة جوا وبرا. خدمة الزبائن نوعا ما جيدة بس كتير بحكو مع بعض وما بنتبهو للزبائن يعني اخر مرة رحته كتير طولوا لجابو الحساب! الأكل زاكي أنا جربت بيتزا فونجي وجابوها بسرعة, وعنده الميلك شيك زاكي. وللي بحبو الأرجيلة بقدرو يشترو معسل من المحل. و موقعه حلو بعيد عن عجقة عبدون بس ما بنصح تروحوه يوم خميس لأنه كتيييير بكون معجوق
  • Review by Wala of تشيلي هاوس
    قبل 8 سنوات
    الأكل زاكي و نظيف و ما عليه أي حكي بس المشكلة كانت بتعامل الموظف اللي عالكاش! كان التعامل مش محترم بالمرة و كل ما أسأله شغلة بصير يتأفأف حتى طنشني اكتر من مرة و صار يحكي من الموظفين يعني الأفرع التانية التعامل فيها ولا أروع و ما كانت أول مرة بتعامل فيها هيك مع الزبائن!
  • Review by Wala of ديرتنا اكسبرس
    قبل 8 سنوات
    المحل مرتب كتير و نظيف يعني بحس أكله زي أكل البيت أسعاره غالية نوعا ما بالنسبة لحجم الوجبة.
    عنده أطباق يومية: الأحد- ورق عنب مع لبن, بيف ستراغنوف مع أرز, دجاج بالليمون و الفطر مع أرز. الاثنين- كفتة بطحينة مع أرز, ملوخية بالدجاج مع أرز, قدرة مع دجاج. الثلاثاء- كبسة دجاج, شيشبرك مع أرز, مقلوبة مع باذنجان. الأربعاء- صيادية سمك, داوود باشا مع ارز, أوزي دجاج. الخميس- مفتول دجاج,كوسا باللبن, روستو مع أرز. الجمعة- مسخن, فريكة مع دجاج. السبت- كبة لبنية مع أرز, مسخن,مندي دجاج. و كل يوم عندهم مجدرة و منسف و صرر أوزي و لازانيا باللحمة و اسكلوب دجاج. و في عنده تبولة و سلطة يونانية و سيزر و فتوش و مقبلات باردة (حمص, يلنجي, حراق اصبعه, و لبن و محمرة) و عنده مقبلات ساخنة(بطاطا مقلية,سمبوسك جبنة, وكبة مشوية و مقلية) و أكيد عنده مشاوي ببيع بالصحن ( 3 أسياخ مع بطاطا) أو بالكيلو. صحن الكباب ب3.95 أما الكيلو ب 15.95 وصحن الشيش طاووق ب 3.95 و الكيلو ب 15.95 أما صحن المشاوي المشكل ب 4.10 و الكيلو ب 16.95 مع العلم انه يتم اضافة 16% على سعر الطبق (ضريبة مبيعات). و عنده عرض لما تطلب أي وجبة من وجبات الكومبو بعد الساعة 8 بتاخد ساندويش مجانا. و خدمة التوصيل جيدة بس بناءا على تجربتي أحسن تاكل عندهم بالمحل, و أكتر اشي بخلص بسرعة عندهم هوه المجدرة و صرر الأوزي يعني كتير عليهم طلب.
  • Review by Wala of عصرونية الكعكة اللبنانية
    قبل 8 سنوات
    من أفضل محلات المعجنات او الكعكة اللبنانية برأيي المحل مرتب و نظيف و بنفع فطور و غدا و عشا و هوه تقريبا قريب على كتير مناطق (عند البوابة الشمالية للجامعة الاردنية و قريب كمان من جامعة الاميرة سمية). و الخدمة ممتازة ،بتقدر تشوف الشيف و هوه بعملك الاوردر و عندو خيارات متنوعة و أحجام متنوعة، عندو 3 احجام: عصرونية(كعكة كبيرة) أليطة(وسط بس بتشبع) و لئموشة هاي كتير صغيرة بس لما بدك تطلب اللئموشة بتاخد 3 أنواع (يعني 3 كعكات صغيرة بأنواع مختلفة) أسعاره مناسبة نوعا ما عنده أغلى اشي عصرونية " مكس لحوم سبيشال" هادي بأربع دنانير و أرخص اشي الزعتر السادة بستين قرش و عنده مشروبات متنوعة (شاي، عصير، مشروبات غازية، قهوة، هوت شوكليت.....) و اذا حابب تضيف خضار على الكعكة بتقدر تضيف (زيتون اسود، خيار، بندورة) بس بزيد 35 قرش عالطلب. و عندهم كمان بيتزا (بكعكة) كتييير زاكية أنا جربت البيتزا بخضار الحجم الوسط اللي اسمها (أليطة) كان سعرها 2.25 شامل الضريبة و بسرعة عملوها. و عندهم اذا حابب تحلي كعكة نوتيلا او كعكة نوتيلا و موز. و مرة عملو مسابقة لطلاب الجامعات و سحب على اسماء و الفائز بالمركز الاول بربح غدا مجاني لطول السنة الدراسية شامل المشروب الساخن فقط و المركز الثاني بربح خصم 50% على وجبته بس خلصت المسابقة للأسف. و عندهم خدمة توصيل. بتمنى الكل يجربه و ان شاء الله يعجبكم.
  • Review by Wala of زين للاتصالات
    قبل 9 سنوات
    ماخدين بحالهم مقلب! هاد اللي بقدر احكي! تعامل الموظفين (الكول سنتر) مش محترم بالمرة و ما بساعدوك ابدا يعني المرة الماضية اتصلت اسأل عن مشكلة تقنية حولوني 100 مرة من موظف للتاني و ما حدا عارف يساعد!
    و غير موظفين السيتي مول ما شاالله عليهم! المانيجر بحكي معك و هوه لافف ظهرو يعني ولا حتى مستنضف يطلع عليك و بعاملوك زي كأنك انت الغلطان و همه دايما على حق! و المشكلة اللي عندي هيه الراوتر اللي عملو عرض عليه قبل اكمن شهر عم ندفع الاشتراك و الراوتر ما بشتغل بالبيت بس لما نوديلهم ياه عالمعرض بالتامن بشتغل عندهم! بس بالبيت لأ و حكولي رح يبعتو حدا يشوف المنطقة عنا بلكي الغلط منها بس هي صرلنا اكتر من شهر عم ندفع لخدمة احنا مو مستفيدين منها! اذا هاي المشكلة ما انحلت رح احكي مع محامي لأنو هاد اسمو نصب!
  • Review by Wala of صالون أمل عبدالله
    قبل 9 سنوات
    المحل مرتب نوعا ما بس دايماً معجوق والتعامل مش حلو بالمررررره يعني ما بتحكي معك أبداً وما بتقبل أي تعليق أو وجهة نظر والأسعار كتيييير غاليه بالنسبه للتعامل وبالنسبة للميك اب دايماً نفس الشغل بغض النظر عن لون الفستان يعني أنا شخصياً ما إرتحتلها
  • Review by Wala of باستيش كافيه
    قبل 9 سنوات
    قعدتو احلى و اروق قعدة و خصوصا هاد الفرع لانو بالمول يعني بعد ما اخلص شوبينج بروح بقعد في و الاكل عندو كتير زاكي خصوصا السلطات و الحلويات زي البراوني مع الايس كريم كتيييير زاكيه عندهم
  • Review by Wala of صالات جبري للأفراح
    قبل 9 سنوات
    المكان حلو و مرتب و الخدمة ممتازة و الأكل بالأعراس زاكي بس غير هيك لأ! و لازم يجددوا الديكور و السجاد و البرادي و ديكور الغرفة اللي بتصوروا العرسان فيها كمان لأنو مو حلوة الألوان اللي فيها و من ناحية السعر يعني مقبول مقارنة بالخدمة اللي بتتقدم بس أنا رأيي ما يبالغوا لأنو مو فندق حتى ياخدوا مبلغ كبيييير
  • Review by Wala of مكة مول
    قبل 9 سنوات
    ما في بعد السيتي مول لأنو كل شي مبين في و ما بضل تدور على المحل لأنو مكة مول بتوه في صراحة و بحسو كتيييير بتعب و معجوء ٢٤ ساعة! بس بروح عليه اذا بدي اشي من مايلز او ناتشورال كير
  • Review by Wala of تي جي اي فرايدايز
    قبل 9 سنوات
    أحلى قعدة و أزكى أكل و الله أنا عملت عيد ميلادي السنة الماضية في و كان كتير حلو انبسطنا كتير و اجو كلهم غنولي Happy Birthday :) بنصح الكل يجربو بس أسعاره شوي غالية
  • Review by Wala of ليمون شيشة بيسترو
    قبل 9 سنوات
    أنا جربت فرع عبدون اول ما فتح و كان ممتاز و بعدين جربت فرع شارع مكة لما فتح و عجبني اكتر لأنو حسيت اللي في عبدون دايما عجقة و بطولوا حتى يجيبوا الاوردر!
    و بالنسبة للأكل عندهم رائع ، الفاهيتا و الباستا بكل انواعها و في تشيكين كاسيديا زاكي كتير، و ايس كريم أوريو
  • Review by Wala of بيرشكا
    قبل 9 سنوات
    كتيييير بحب أواعيه و أسعاره مناسبة بس تعامل الموظفين مش منيح بالمرة!!! كتير شايفين حالهم و ما بطلعوا على الواحد لما تحكي معهم
  • Review by Wala of بيك اون
    قبل 9 سنوات
    دايما بنطلب منو و بسرعة بجيب الطلب! بس اخر مرة طلبنا جابلنا طلبية ناس تانيين بس بعدين اعتذر و كانوا كتير محترمين يعني عنجد تعاملهم رااااائع و الخدمة ممتازة بنصح الكل يجربوا خصوصا اللحمة بعجين
Next

أماكن أفضلها

    صور أضفتها

    شاورما بلاتر
    Folded Manaqeesh (Halloumi cheese and black olives)
    Grilled Halloumi Sandwich