Bashar Snobar

Bashar Snobar

عمان . منذ أغسطس 2011
125 من المراجعات
الأماكن المضافة
71
مراجعاتي
125
صوري
118
أماكن فضّلتها
58

مراجعاتي

  • Review by Bashar of شوكلاته الفرسان
    قبل 6 سنوات
    نبدا بالصفة الصعبة... والمحل الصغير... التشكيلة منيحة والأسعار زي باقي المحلات تقريبا... الطعم منيح بس التعامل مش ولا بد... الموظف أبدا مش لطيف... صراحة ما رح أرجع عندهم... ما في إشي مميز...
  • Review by Bashar of فونجان كافيه
    قبل 6 سنوات
    يمكن من أكتر المحلات اللي عجبتني.... الديكور كتير حلو والمحل مليان ناس... الموظفين لطيفين كتير... المنيو منيحة ومتنوعة... طلبت ميلك شيك كروكان وكان زاكي... صاحبي حكالهم بدو إشي غريب جابوله شيك فانيلا مع ليمون ونعنع....فعلا غريب ولطيف... الأسعار مناسبة وأكيد بنصح فيه.... خدمة الاصطفاف متوفرة...
  • Review by Bashar of الدكتور عثمان صابر
    قبل 6 سنوات
    الدكتور عثمان لطيف كتير وفهمان... العيادة موقعها منيح والصفة ما بتغلب في مواقف بالاجرة قدامها... بتعامل مع شركات التامين...
  • Review by Bashar of مطعم بيت شقير
    قبل 6 سنوات
    الموقع مش كتير منيح لأنه بحارة مليانة شباب والباقي عندكم.... الطلة كتير حلوة والفكرة لطيفة كتير... هو عبارة عن بيت قديم تم تقسيمه ليكون جزء منه مطعم وجزء محلات وجزء زي مدخل فيه معروضات قديمة... التعامل كتير رائع عالتلفون وبالمحل... الأكل بمعظمه زاكي.. جربنا شقف و سلطة وشيش طاووق ومتبل و كبدة (مش كتير حبيتها) وكبة مشوية (طعمها وحتى شكلها زي الكباب! بس زاكية)... المكان هادئ وكان شبه فاضي... تعليقي انو المكان لازم يكون انضف... يعني النظافة غائبة.. ومغسلة الحمامات (موقعها برا الحمامات) مش نضيفة أبدا... حتى المنيو كاحتة من كتر ما هي قديمة... المصلى صغير ولكن للأسف تغيب عنه مظاهر النظافة بشكل مزعج... الأرض وسخة والسجادة صايرة سودة من الوسخ... ككل كل اشي حلو بس لو يهتموا بالنضافة...
  • Review by Bashar of الملكية الأردنية
    قبل 6 سنوات
    اليوم كانت أول زيارة إلي للمكان... الموقع منيح بس الصفة شوي صعبة... الديكور رائع والموظفين لطيفين وخدومين... أكيد رح أحب إني أتعامل معهم...
  • Review by Bashar of ديملاج جاليري
    قبل 6 سنوات
    المحل كبير ومرتب وفاق توقعاتي... الموظفين خدومين كتير... عندهم تشكيلة كبيرة إشي ماركة دملاج وإشي ماركات ثانية... حسب حكيهم إنو الزجاج والبورسلان بجيبوه من تركيا وايطاليا وبطبعوا عليه النقوش بمصنعهم بالمقابلين.. الجودة واضح انها عالية... بس الأسعار كتير غالية! الصفة سهلة كمان...
  • Review by Bashar of مطعم عتابا السياحي
    قبل 6 سنوات
    هالمرة بدي أختلف مع جيراني... ما استلطفت المحل أبدا... الديكور مش حلو... الخدمة منيحة... المحل نظيف... أكلنا سمك وكان أبدا مش زاكي... طري جدا بطريقة منفرة... الدجاج كان زاكي... طلبت ليمون مع نعنع وكان مليان سكر وطلبت يغيرولي اياه... برضو ضل السكر زيادة... صراحة ما في إشي كتير مميز لفت انتباهي... جزء من المحل إلو طلة حلوة بس كتير محلات بالدوار الأول إلها طلة حلوة فبصراحة مش كتير إشي مهم... في كراج خلفي للأمانة بس على الأغلب بكون مليان. الأسعار متفاوتة... إشي رخيص وإشي غالي...
  • Review by Bashar of فروت شو
    قبل 6 سنوات
    المحل ديكوره حلو وموقعه منيح وتعامل الموظفين لطيف... عندهم ميلك شيك وعصير وسلطة فواكة وجيلاتو وأشياء تانية... جربت جيلاتو بنكهة الشوكولاتة وكانت زاكية وتقيلة... وجربت ال Blueberry وكانت لطيفة... يعني ما بقدر أحكي إنو الطعم خرافي بس فكرة إنو المنتجات مصنوعة من فواكه طازجة بحد ذاتها فكرة مشجعة... أكيد ممكن أرجع أجرب أنواع تانية...
  • Review by Bashar of ذا كيك شوب لاونج
    قبل 6 سنوات
    تعامل رائع جدا جدا من كل الموظفين اللي تعاملت معهم! المحل ديكوره حلو وحجمه منيح... في خدمة الاصطفاف... عندهم تشكيلة منيحة... جربت أكثر من نوع بس أزكى إشي كانت كيكة النيوتيلا... لازم تجربوها.... الأسعار غالية شوي... أكيد بنصح بتجربة المحل.
  • Review by Bashar of الدكتور حسن القواسمي
    قبل 6 سنوات
    اليوم رحت عند دكتور حسن... شوي العنوان بتوه... العيادة صغيرة نوعا ما... اتصلت بالسكرتيرة وحكتلها اني جاي بعد ربع ساعة ورحت وتفاجأت انو الدكتور مش موجود والعيادة مليانة ناس!! فكرت انو يكون محجوزلي موعد أو إشي.... الدكتور لطيف بالتعامل وفهمان... أكيد ممكن أرجع عليه مرة تانية
  • Review by Bashar of الدكتور فيليب الصناع
    قبل 6 سنوات
    أنا صدقا مصدوم من مبارح! كانت أول زيارة إلي عند الدكتور بناءا على وجود إسمه في كتيب التأمين... طبعا العمارة عبارة عن كارثة والدرج من كتر الوسخ لونه أسود ... غرفة الانتظار ليست أحسن حالا... قديمة بشكل غريب!! ووسخة كمان على الرغم من اشتراك 3 دكاترة بنفس غرفة الانتظار... دكتور باطني ودكتور أسنان والدكتور فيليب... الحمد لله إنو الدكتور حكى إنه مش مشمول بالتأمين تبعي فما دخلت عنده وما شفته وأكيد مستحيل أنصح أي شخص فيه... المكتوب واضح من العنوان...
  • Review by Bashar of الدكتور زهير الصباغ
    قبل 6 سنوات
    مبارح أول مرة أروح عند الدكتور زهير. الموقع منيح والصفة ما غلبتني. السكرتيرة كتير لطيفة. غرفة الاستراحة قديمة شوي بس نظيفة. عيادة الدكتور مرتبة والدكتور مريح وشاطر. بنصح فيه أكيد.
  • Review by Bashar of مطعم وكافيه نبتة و فتة
    قبل 6 سنوات
    المحل أبدا مش لطيف... القعدة سيئة... التعامل كان كتير منيح.. في قعدتين داخلية وخارجية... الكراسي مش مريحة... المنيو منيحة... ما بنصح فيه.
  • Review by Bashar of كارفيل
    قبل 6 سنوات
    تجربة غير موفقة صراحة... رحت أجرب الice cream... عندهم أنواع قليلة جدا... حتى معظم الأنواع يا دوب ضايل منها... المنظر ما كان مشجع والموظف ما كان بشوش... طلبت نكهة القهوة وكانت منيحة... اللي لفت نظري اني حسيت حجم الطابة كبير... ممكن تحط إضافات للice cream وممكن تحطها بين قطعتين كوكيز... ما بنصح فيه...
  • Review by Bashar of أوليفا
    قبل 6 سنوات
    المحل أصغر من توقعاتي بس لطيف ومرتب. فيه 3 طاولات جوا وطاولتين برا. المنيو بسيطة نوعا ما... فيها كتير أنواع بيتزا و3 أنواع معكرونة ونوع سلطة. الموظفين رائعين صراحة! طلبت بيتزا أوليفا وكانت زاكية وطلبت Penne Pesto وكانت جيدة جدا. البيتزا حجمين وسط وكبير... الوسط ممكن تكفي شخص واحد. الأسعار أبدا مو غالية. ما تغلبت بالصفة بس الموقع شوي غريب ما بتتوقع تلاقي مطعم هناك. للأسف ما عندهم فيزا. أكيد بنصح فيه.
  • Review by Bashar of مطعم كاليفورنيا المكسيكي
    قبل 6 سنوات
    المحل صغير نوعا ما ومحتاج شوية ترتيب... فيه قعدة داخلية وخارجية... صاحب المحل لطيف وخدوم وبتحسه بحب شغله... المنيو مش كتير متنوعة... الأكل أقل من عادي والأسعار مقارنة بالطعم كتير غالية.. طلبنا Burrito, Enchilada and Quesadilla. صراحة ما في إشي مميز بالمحل. حتى الناتشوز ما كانت زاكية وكلها زيت علما انو المحل بعملها بنفسه.
  • Review by Bashar of مطعم زوار
    قبل 6 سنوات
    طلعة جيران هالمرة كانت لزوار... موقعه بعيد شوي... خدمة الاصطفاف إلزامية... المحل كبير وفيه صالة داخلية وقعدتين خارجيتين بمساحات كبيرة وعندهم بركة للأعراس مع غرفة للعرسان... الخدمة كانت منيحة والأكل بمجمله زاكي... اليلنجي كان رائع وشخصيا حبيت المشاوي.. زاكية وطرية... برك الجبنة كلها زيت والجبنة اللي جواتها لازمها ملح لأنو مش طالعلها طعم أبدا... شربت عصير فراولة فرش وكان جيد... التحلاية كانت قطع صغيرة من أصابع زينب و عوامة وهرسية.. الهريسة ما كانت زاكية وحكوا إنو الباقيين كمان مو زاكيين... الأسعار مش رخيصة بس القعدة لطيفة وفيها شلال حلو و منطقة للأطفال...
  • Review by Bashar of مايا لا شوكوليتري
    قبل 6 سنوات
    فعلا مكان روعة! من المنيو للموظفين للتعامل... المحل مش كتير كبير بس لطيف...الكراسي ممكن تكون أريح شوي... عندهم خيارات متعددة... الطعم كان كتير زاكي... طلبت Chocolate Fondue.... وطلبنا كمان Rose Hot Chocolate وكانت لطيفة وغريبة... الأسعار عادية... ممكن تدفع بال Visa... أكيد بنصح فيه وأكيد رح أرجع عليه إن شاء الله.
  • Review by Bashar of فاشن كافيه
    قبل 6 سنوات
    اليوم رحت أجرب المحل... طلبنا دجاج كساديا وكانت كتير عادية بل أقل و نوع تاني ساندويش دجاج ناسي إسمه كان ناشف وأبدا مش زاكي والسلطة اللي معها أقل من عادي... ديكور المحل لطيف... الصفة شبه إلزامي "فاليه" التعامل كان عادي... الأرجيلة منيحة... الخدمة متوسطة... الأسعار عادية... يعني ممكن الواحد يرجعله يشرب إشي بس أكيد ما بنصح بأكله أبدا... طلبنا كمان sticky toffee وكانت نص نص...
  • Review by Bashar of قهوه عبدون
    قبل 7 سنوات
    اليوم رحت أجرب المحل... هو "مقهى" بكل معنى الكلمة بس بشكل عصري نوعا ما... أول ما دخلت ما كان في Host... وصلت نص المحل تقريبا قبل ما ألاقي موظف يقعدني... شرشف الطاولة ما كان نضيف... الخدمة عادية... للأسف ما عندهم أي نوع من المأكولات (ساندويشات أو وجبات أو سلطات).. أو على الأقل المنيو اللي جابولي إياها ما فيها أكل... عندهم كم نوع حلويات والباقي مشروبات وأراجيل... طلبت كركديه وكان زاكي.. المحل مكون من طابقين وعندهم خدمة الاصطفاف و Visa. بعدالساعة 7 الحد الأدنى للطلب 5 دنانير للشخص. ما بنصح فيه وما أعتقد أرجعله.
  • Review by Bashar of 7 ورقات
    قبل 7 سنوات
    أول وآخر مرة بإذن الله... مش عارف على شو الناس بتحبه... المكان كتير أزمة والصفة كتير كتير صعبة (بس في خدمة إصطفاف إذا بدك) والتعامل كان مش مريح أبدا... الموظف مفكر حاله قاعد بالحارة عندهم!!!! لأ وبتعامل بأسلوب إنو يلا بدكمش تروحوا!! وبده يقومنا من مكانا عشان الدنيا صارت ليل وصار في "عائلات" ويقعدنا جنب الباب!!! الأسعار منيحة... طلبت وجبة 7ورقات... عبارة عن ساندويش دجاج بخبز الشراك مع جبنة ودرة على ما أذكر.. عندهم Visa..على العموم بنصحكمش فيه...
  • Review by Bashar of الخطوط الجوية اليطاليا
    قبل 7 سنوات
    المكان مرتب والتعامل كتير منيح بس للأسف قوانين الشركة كتير بتحد من الخدمات اللي ممكن يقدمولك إياها بالمكتب... لازم تصف شوي بعيد... باخدوا رسوم إصدار للتذكرة 30 دينار...
  • Review by Bashar of أزهار جنة عدن
    قبل 7 سنوات
    رحت يوم عيد الأم على المحل... طبعا كان فيه كتير ناس.. الصفات سهلة والموقع منيح... التعامل كان منيح والتشكيلة متنوعة... الأسعار مش غالية... عندهم قسم للشوكولاتة على ما أعتقد... الورد كان ممكن يكون أفضل شوي خصوصا بيوم زي عيد الأم... يعني منقدر نحكي إنو الورد كان جيد جدا مش ممتاز..عندهم Visa... أكيد ممكن أرجعلهم مرة تانية...
  • Review by Bashar of أريج الشام
    قبل 7 سنوات
    طلعتنا الشهرية لجيران... كالعادة رائعة وهاي المرة زادت روعتها بالخدمة الرائعة للمكان... الموقع شوي غريب والصفات مش سهلة بس في خدمة الاصطفاف... المحل كبير ومكون من طابقين.. الأول كبير وفيه بحرة على النمط الشامي.. وفي قاعة كمان بينعمل فيها بوفيه الإفطار المفتوح اللي بيعمله المطعم في بعض الأحيان.. والطابق التاني أصغر شوي ومغطى بسقف متحرك... الخدمة كانت أكثر من رائعة صراحة وطريقة تقديم الأكل مرتبة كتير ومميزة... المقبلات والسلطات كانت كتير زاكية بمجملها متل الحمص والحمص مع لحمة والحمص مع جاج, المتبل, حراق أصبعه, سلطة الجرجير والفتوش, الشنكليش. الكبة كتير زاكية وبرك الجبنة جيدة جدا. دبس الرمان كان حاضر بكتير من الأطباق وأضاف نكهة لطيفة للأكل. البرغل مع البندورة أول مرة أدوقه بس عجبني كتير... والمشاوي زاكية وطريقة تقديمها مرتبة... الأشياء اللي ممكن تكون أزكى شوي كانت التبولة (كانت خشنة وبدها ليمون) و مخلل الخيار (طعم التوم كتير واضح فيه) واليلنجي والكبدة مع دبس الرمان. التحلاية كانت مهلبية وكانت جيدة جدا... كمان حطولنا بسكوت مع راحة و 4 أنواع من المربيات وقضامة (البيضة والزهرية مش عارف شو إسمها ههههه). شخصيا شربت نسكافيه (جيد جدا) وعصير جزر. ككل التجربة ممتازة والمطعم نضيف وأسعاره زي باقي المحلات وأكيد بنصح فيه وممكن أرجعله إذا حافظ على نفس المستوى... صحيح عندهم مطرب على ما أعتقد كل أيام الأسبوع عدا الإثنين والثلاثاء. حسب ما سمعت عندهم منطقة لعب صغيرة للأطفال. وفي مكان ممكن تصلي فيه كمان. مسؤولة المطعم إجت سلمت علينا وصاحب المطعم عمللنا لفة صغيرة مع شرح عن المحل.
  • Review by Bashar of فن وشاي
    قبل 7 سنوات
    طبعا كانت طلعة رائعة مع فريق جيران... الموقع حلو والديكور كمان لطيف وهادئ... محل روقان باختصار... ما فيه ارجيله... الحيطان بينعرض عليها لوحات للبيع... لما رحنا كانت رسومات كاريكاتيرية للفنان عمر العبداللات وطبعا كان متواجد شخصيا في المحل.... المنيو بدها شوية تنوع... دقنا الكوكيز وكانت جدا عادية... جربت اطلب ورد (مشروب ساخن) وكان عادي... المكان نضيف والصفة سهلة والاسعار مناسبة وشخصيا أكيد ممكن أرجع عليه... ممكن تقعد جوا أو على البرندة برا... وبالتوفيق بما إنو المحل جديد نسبيا
Next

أماكن أفضلها

    صور أضفتها

    صورة من داخل المكتبة لقسم الكتب
    صورة لواجهة المسجد من الشارع الرئيسي
    المركز من الداخل