Nesreen Alsadeq Flowers girl

Nesreen Alsadeq Flowers girl

عمان . منذ أغسطس 2011
one love is all we need
9 من المراجعات
من وجدوا مراجعتي مفيدة
32
مراجعاتي
9

مراجعاتي

  • Review by Nesreen Alsadeq of كلية القادسية
    قبل 9 سنوات
    كلية القادسية :
    الموقع : شميساني / خلف برغر كينج كلية جامعية متوسطة (خاصة) تمنح الطالب درجةدبلوم وتمتاز بتنوع التخصصات مثل(الهندسة،التمريض،الصيدلة،تربية الطفل،E،محاسبة،نظم ..الخ) الذي يميز هذه الكليه قلة الرسوم (وهذا ما يجذب عدد كبير من الطلاب اليها) يعني هاي الكلية فرصة للي الحظ ما حالفو بالتوجيهي وما جاب معدل يدَّخلو على جامعة او كلية حكومية.. وما بيقدر على تكاليف الجامعات الخاصة... طبعا اي خدمة بالدنيا او اي كلية او جامعة رح تكون متناسبة بشكل طردي مع الرسوم اللي بندفعها (يعني كل ما زادت الرسوم بتزيد جودة الخدمة وكل ما قلت الرسوم بتقل جودة الخدمة) ومع انو مستوى جودة الخدمات منخفض(طبعا لانها ارخص كلية خاصة بعمان) بس مستوى الكادر التعليمي متميز ..يعني في كتير من دكاترة الكلية بدرسو بالجامعات والكليات ذات الرسوم العالية.. النتيجة : نفس مستوى التعليم بس بخدمات ذات جودة اقل( بس - للأمانة - الكلية في حالة تطوير دائم للخدمات ) النظافة : جيدة المبنى : قديم بس جددوه من جوا .. وزبطو الحيطان وحطو بلاط جديد وتدفئة الكافتيريا : زغيرة .. وما فيها اشياء كتير .. بس الكلية بشميساني (يعني حواليين الكلية في مطاعم كتير وكفتيريات كتير وسوبر ماركتس وكل اشي ) طبعا لانها زغيرة الطلاب كلهم بكونو قراب من بعض وكلهم بيعرفو بعض (يعني لكل اشي في ايجابيات وسلبيات هههههه) الساحة : برضو زغيرة وما كان في مكان عشان الطلاب يقعدو .. بس جابولنا كراسي ووزعوها بالساحة ... المكتبة : فيها 3 طاولات ..وفيها تقريبا كل الكتب اللي بنحتاجها ..ومع انها كتير زغيرة بس عمري ما رحت ولقيتها مليانة!!ههههه(شكلو الطلاب يا دوب يقرأوا كتبهم) البوك شوب : صاحب البوك شوب عصبي (اختصروا احسن) او صَوّروا الاوراق برا الكلية او لما يكون حدى غيروا... المهم البوك شوب بيوفر كل الكتب اللي بيطلبوها الدكاترة يعني ما في حدى بيتغلب بالكتب او بيقعد يدور عليها هون وهون ، خلس بتنزل عالبوك شوب بتلاقي الكتاب وبتخلص . القبول والتسجيل : (بقدما الدكاترة والعميد والمهندسيين بحسسوك انك فبيتك وبيتعاملو معك باحترام شديد وحب وكأنكم عيلة) بقدما القبول والتسجيل بحسسوك بالعكس .. ودايما معصبين ومش فاضيين (يلا مافي اشي كامل).. بس بيستنو عالطلاب وبيراعو ظروفهم.. طبعا انا بدرس هندسة مدنية والمهندس المسؤول عنا (متل اخونا)كتييير متفهم وتعاملو راقي..
  • Review by Nesreen Alsadeq of مخابز برادايس
    قبل 9 سنوات
    انا بحب اشتري قطايف من عندو ما بعرف بحسها مميزة..والخبز كمان..خبزو زاكي كتير وعندو كل الانواع..(انا بحب خبز الحمام)وكلها زاكية،،وعندو معجنات لذيذة كمان وكيك وكعك وبيتيفور يعني كتير كتير اشياء وحتى عندو حلويات..يعني اشياء كتير وكلها لذيذه....بعدين نظيف ومنظم ومو غالي كتير ((يعني))..بس بنصحكم تجربوه
  • Review by Nesreen Alsadeq of تمور البركة
    قبل 9 سنوات
    انا بحب هاد المحل لانو قريب من شغلي ومرات بمر عليه بشتريلي كم شغلة زاكية..هو عندو انواع كتير تمر... يعني مو بس التمر العادي.. عندو تمر محشي لوز او مكسرات وهيك اشي ... وتمر عليه شوكلاته سودا او بيضا..او قرفة..يعني اشياء كتير.. وعندو سلات تمر بتنفع تكون هدايا شكلها كتير حلو..وعلب تمر حلوة كمان..ومو غالي..والتمر عندو اردني مو سعودي او عراقي او هيك لانو مرة سالت صاحب المحل حكالي هاد تمر اردني عشان هيك مو غالي بس كتير زاكي ومنيح يعني ..مش تفكرو انو لانو رخيص بكون مو منيح بالعكس والله زاكي.. بنصحكم تجربوه ^_^
  • Review by Nesreen Alsadeq of برجر كنج
    قبل 9 سنوات
    انا بحب افطر فيه..عندو اشياء بحبها متل الموزاريلا ستيكس ممممممممممم ما ازكاها وهي سخنة ودايبة وكرنشي عنجد بحبها... والبطاطا تبعتهم طعمها مميز مو زي باقي الفرايد بوتيتوز اللي بالمطاعم التانية....اكتر وجبة بحبها حي ستيك اند مشروم سويس ممممم لو كل يوم اكل منها ما بزهق هههه...طعمها غريب هيك مميز مش عارفة شو بحطو فيها بالزبط عشان يعطي هاي النكهة الغريبة بس يمكن بيشو الماشروك والستيك برضو مشوي والصوص اللي عليها كتير لذيذ يمكن السر فيه.. ومو غالي
  • Review by Nesreen Alsadeq of شوغر داديز
    قبل 9 سنوات
    يعني هاد المحل كل اشي في زاكي الكب كيك كتير زاكي بالأخص اوريو وكاروت كب كيك .. وبالنسبة للسلايسز ازكى اشي هامينج بيرد كيك و تشوكليت فلورليس تورت ممممممممممممم بتشهي هاي اكتر وحدة بحبها لانها كيكة بدون طحين بس تشوكليت بتجنن.. وطبعا التشييز كيك خيالي وازكى اشي الستروبري والتشوكليت(بس مو دايما بيعملو تشوكليت).. برمضان عندهم ديت كب كيك فيها تمر وقرفة كتير لذيذة وفي كيكة تانية فيها تمر اسمها ستيكي توفي كيك ..المحل قعدتو كتير حلوة بس ما في غير 6 طاولات ..الابل باي عندهم حلوة كتير يعني اللي ما بحب الحلاوة اللي زيادة (متلي) ما بنصحو يجربها... بالنسبة للسيارة بتقدر تحطوها بالارض الفاضية اللي قدام شوجر دادي بس مرات ما بكون في وسع.. امين وفادي (الاونرز) كتيييييير لطيفين بالاخص امين بجنن ودايما مبتسم وبفتح النفس..
  • Review by Nesreen Alsadeq of كارفور
    قبل 9 سنوات
    يعني اذا عنا عزومة اكيد بشتري منو ..عشان اختصر الوقت والجهد واللفلفة..يعني اذا بدي خضار بلاقي واغلب الانواع(بس مو كلها) ومعلبات عندهم كل الانواع وفواكة مجففة اغلب الانواع..طبعا اجبان على كيفك واي نوع بيخطر عبالك (خصوصا انا بحب الجبنة كتير)..وعصائر ولحوم (سمك وجاج ولحمة وجمبري ومش عارفة ايش يعني بدل ما الواحد يروح على سوبر ماركت وبعدين على خضرجي وبعدين على لحام وبعدين على محل ادوات منزلية او محل اجبان ....الخ بروح على كارفور وبريح راسو وخلص
  • Review by Nesreen Alsadeq of مكة مول
    قبل 9 سنوات
    يعني انا بحب اروح عليه لانو كل اشي موجود هناك يعني اذا بدي بشتري اواعي او اكسسوارات او بتفرج عالموبايلات الجديدة وفي مطاعم كتير يعني بيتزا وتشيكن بكل الانواع وفي سناكز كتير بوظة كتير زاكية ودونتس ومارشملو مشوي او مع شوكلاته يعني اي شي بيخطر عبالكم..واهم اشي في سينما يعني اذا زهقت بحضر سينما وخلص..صح السينما تبعتهم زغيرة عجقة شوي بس ماشي حالها.. المهم مكان في كل اشي .. بس مرات ما بكون في وسع بالباركينج مع انو كبير 3 طوابق يمكن ومع هيك مرات ما في وسع.. احسن اشي روحو بتكسي..واول ما تتطلعو بتلاقو تكسي تاني عالباب حتى لو عال 3 الفجر يعني ما في غلبة..بنصحكم فيه
  • Review by Nesreen Alsadeq of قاعة دوشارا للإحتفالات
    قبل 9 سنوات
    يعني فندق عنجد 5 ستارز يعني في فنادق بتكون 5 ستارز متل الهوليدي ان مثلا بس مو حلوة بالمرة والخدمة كأنها 2 ستارز..اما الشيراتون عنجد بجنن واحلى اشي طبعا ال view عندهم منظر حلو وال فرنش كوفي عندهم خياليه.... وبالنسبة لرمضان فالبوقيه عندهم كتير كبير وزاكي وفي كل اشي اصلن ما حدى بيقدر يدوق كل الانواع والصالات حلوة والمطاعم وكل اشي سراحة..حتى الويترز كتير مناح و kind بنصح الكل يجربو.. وصحيح جربو المسبح لانو عنجد نظيف
  • Review by Nesreen Alsadeq of روميرو
    قبل 9 سنوات
    هو مطعمي المفضل... ^_^
    ديكور بيجنن ومويسقى حلوة وخدمة حلوة الويترز طول الوقت حواليك..الاكل بيجنن اكل ايطالي باستا فتوتشيني واكتر اشي بحبو( توتو نودو) ممممممم.. بس مرات بطولو لما يجيبو الاكل.. بنصح الكل فيه
  • Review by Nesreen Alsadeq of ستاربكس
    قبل 9 سنوات
    قعدتو حلوة والموسيقى هادية..والويترز كتير كايند ومتعاونين يعني اذا اشي ما عجبك بتبدلو او بحطولك اضافات على كيفك..المشروبات عندو كتير زاكية (بتجنن) بس الفرابتشينو مرات ما بكون زابط (بكون الحليب تحت والتلج فوق وبسير متل طعم المي) بس عالاغلب زاكي (ازكى اشي كراميل وفانيلا وبرضو -الروزباري-، غريب شوي بس زاكي متل التوت)..والحلويات عندو كتير زاكية وما في متلها (بنصحكم تجربو الكراميل تشيز كيك).. وعندهم بانيني لذيذ وكرواسان بالزبدة... يعني لو بزبطو الفرابتشينو دايما كان اعطيتو 5 نجوم..والاسعار كمان مرتقعة شوي بس بيستحق..
Next