Rana Atilli

Rana Atilli

عمان . منذ أبريل 2011
:) (:
68 من المراجعات
الأماكن المضافة
9
من وجدوا مراجعتي مفيدة
14
مراجعتي كانت الأولى
19
مراجعاتي
68
صوري
7
أماكن فضّلتها
8

مراجعاتي

  • Review by Rana of أنجوس برجر اند ستيك
    قبل 3 سنوات
    المحل هادي ونضيف ومرتب، الاكل ممتاز ممكن ينحكى انه احسن برچر بجربه بحياتي جربت ماشروم النكهة والطعم رائع، الاسعار جيدة..
  • Review by Rana of نخبة الأردن للبولينج
    قبل 3 سنوات
    مرتب وحلو وهادي بس اسعاره شوي غالية مافي ازمة ومناسب للشباب والبنات اظن بيعملو عروض اللعبة للشخص الواحد 4 دنانير
  • Review by Rana of كافيه جدايل عمان
    قبل 3 سنوات
    كافيه هادئ وراقي من جديد اصبح عندهم منيو طعام خاص واسعار الوجبات عنده مقبولة ، يقدم اكل شرقي وطبخ وفي تنوع كبير بقائمة الطعام الجديدة وبتقدر توصي من عندهم للمناسبات، خدمته رائعة والحلو كمان نزلوا اسعار المشروبات يعني صار فنجان القهوة بدينار فقط بعد ما كان دينارين ، قائمة الاسعار عندهم شاملة الضريبة، الارجيلة جيدة والمحل نضيف ، تم الغاء القعدة اللي بالطابق التاني بس التراس والقعدة بالطابق الارضي لسا موجودين، ينصح بتجربته محل لطيف
  • Review by Rana of ب معجنات لبنانية
    قبل 4 سنوات
    اذا كنت بالمنطقة وجوعان ينصح انك تشتري من عنده، في اشياء زاكية متل التيركي وشيدر وفي اشياء بالمرة مش زاكية، قانون التسعير عنده مش مفهوم بحسب عالمنيو شكل والسعر بيطلع شي تاني، مو مستاهل تروح مشوار مخصوص عليه بس اذا بطريقك وبدك تجيب من عنده لا بأس
  • Review by Rana of راس بيروت
    قبل 4 سنوات
    محل نضيف ومرتب ومتنوع وجميع المعجنات عنده زاكية واحجامها كبيرة وبتشبع واسعاره بالنسبة للكمية تعتبر جيدة، يستحق التجربة
  • Review by Rana of عرب بوكس للصناعات البلاستيكية
    قبل 4 سنوات
    خدمة رائعة وسريعة، والجميع بساعدك، وخصومات عالكميات، عندهم تقريبا كل ما يلزم مصانع الالبان من سلال و سطول، كمان عندهم براميل بجميع الاحجام، البلاستيك عندهم نخب ما بينكسر ولا بسيح بسهولة، اي منتج من عندهم ممكن يخدم لفترات طويلة بدون ما بتضرر، الجميع متعاون من موظفين المستودع للادارة
  • Review by Rana of محامص خير جدودنا
    قبل 4 سنوات
    محمص جيد، وقهوته طيبة، وعنده تشكيلة كبيرة من الشوكولاتات والنوجا وكلها باسعار معقولة وجودة عالية، غير هيك تعاملهم جيد جداً
  • Review by Rana of مخبز الهلال
    قبل 4 سنوات
    مخبز ما اله لزوم، بس يعني بيخدم اذا في ازمة بالمخابز التانية او اذا مستعجل وبطريقك، بدك تشتري من عنده انت وحظك احياناً بكون عنده كل شي جديد واحياناً بكون بايت يعني حتى اذا بدك تشتري خبز المسا بدك تعرف انه هاد الخبز من العصر، احياناً بكون عنده تنوع وعنده حلو وكعك ومرات بكون فاضي ما عنده شي، في مكان للصفة قدامه ومافي ازمه، العاملين لطيفين واذا المنتجات الاي عنده فريش بتكون ممتازة بس اي شي بس يبات بتتغير طعمته
  • Review by Rana of مخبز دوار الشهيد
    قبل 4 سنوات
    يعتبر احسن مخبز بالمنطقة، متنوع وفيه جميع انواع الخبز والحلويات وكله باسعار جيدة وطعم مقبول، بس المعجنات عنده سيئة، مشكلته انه بيعجبك صنف من عنده ممكن ما ترجع تلاقيه تاني يوم يعني في تشكيل وتنوع بس ما في استمرارية بالانتاج، ما عدا الخبز طبعا موجود بكل وقت، الموظفين جداً متعاونين وبساعدوك بس تطلع ع واحد فيهم ع طول بيجي يشوف طلبك، موقعه ع دوار سحاب مستحيل تقدر تلاقي مكان تحط سيارتك فيه لهيك بدك تصف بعيد وتيجي مشي، الاسعار رخيصة يعني كله نفس الاسعار اللي معلن عنها بالتموين، وكل الكعك عنده بنفس السعر ، مخبز نضيف جداً
  • Review by Rana of مصنع عمرة لتصنيع الاملاح الاردنية
    قبل 4 سنوات
    مكانه بضيع وبدك تدور كتير لحتى تلاقيه واله اكتر من مدخل يعني بدك تلف مرتين حوالي المصنع لحتى تعرف من وين تدخل، طبعاً فيه كل انواع الملح وكل الاحجام، ما بيلزم الشخص العادي التعامل معهم بس للكميات الكبيرة والصناعات الغذائية، العاملين جداً متعاونين والجميع ممكن يساعدك بنوع الملح الي بيلزمك، وموظف المحاسبة كتير محترم واذا حس انه طلبك غير عن المسجل بنبهك انه ممكن موظف المستودع ما فهم عليك او مخربط معك، دوامهم بيخلص عالساعة 3 ويوم الخميس عال 1
  • Review by Rana of مطعم ومقهى أنغام
    قبل 4 سنوات
    كافيه مرتب ، قعدته هادية ومافيه عجقة واطلالته مميزة، ارجيلته جداً ممتازة وخدمته رائعة والمشروبات جميعها جيدة، ما جربت الاكل فيه، مناسب بكل الاوقات العصر او بالليل وصيف شتاء، مناسب للعائلات و اسعاره خفيفة ومناسبة للجميع ، اول مره رحته بالصدفة وما كنت متوقعة الاقي هيك كافيه بالحسين بس بعد هيك في مرات رحت مخصوص عليه يعني ما الي شغل بالحسين
  • Review by Rana of فيو
    قبل 4 سنوات
    اول زيارة لهاد المحل كانت ب 2004 وبعد هيك فترات الجامعة كنا نروح عليه بشكل مستمر وكل ما يصحلي مشوار ع شارع الجامعة بروح عليه، محل رائع نفس الديكور من 11 سنة ، الاكل عنده جيد والارجيلة ممتازة والقعدة مريحة نفسياً وتقسيم المحل بخليك تحس بالتغيير يعني كل مكان بتقعد فيه بتحس انك داخل محل جديد، اسعاره جدا معقولة والخدمة فيه جيدة، مناسب جداً للطلاب وللعائلات بجميع الاوقات فترات المسا باغلب ايام الاسبوع بكون فاضي تقريباً بس فترة العصر بكون ازمة كتير وكل الطاولات مليانة
  • Review by Rana of عفرا
    قبل 4 سنوات
    رحت هاد المحل عدة مرات بفترات متباعدة يمكن حظي معهم جيد، كل مرة جربت عندهم نوع مختلف من الاكل وكلها كانت جيدة جداً، البيتزا والباستا والمشاوي والسناكات والمقبلات كلها بمستوى جيد، قعدة التراس كتير حلوة ايام الجمعة فيه مطرب وباقي الايام ما بكون ، رحته مرة يوم خميس وما كان في طاولة الموظفين جابولنا طاولة وكراسي خلال دقيقتين، الخدمة عندهم ممتازة والارجيلة منيحة والشب اللي بحط الفحم بيعمل لفة عالطاولات كل عشر دقايق، اذا زاد اكل كتير ع طول الموظف بيسألك اذا يلفلك اياه تاخده، عندهم فاليه بس موظف الفاليه دمه تقيل يعني بصفلك السيارة وبس ترجع تاخدها بيعطيك المفتاح وبيحكيلك وين صاففها عشان انت تروح تجيبها، اسعاره اكتر من الوسط بشوي يعني كيلو مشاوي و 2 ارجيلة و 2 مقبلات و 2 شاي ب 50 دينار، يعني المحل يستحق الزيارة من فترة للتانية المشكلة الوحيدة اللي تكررت بكل الزيارات انه بيتأخروا ليجي الحساب وبيتأخروا ليرجعوا الباقي
  • Review by Rana of مقهى بسمان
    قبل 5 سنوات
    مكاني المفضل خصوصاً بالصيف، مقهى شعبي قديم وبسيط، فيه قعدة خارجية وقعدة داخلية، بس مشكلته انه فترة المسا غالباً بكون بس شباب، اما فترة الصبح والعصر بكون في بنات، ما عندهم اكل بس بيسمحو انك تجيب اكلك معك، عندهم كل المشروبات وارجيلة ممتازة، الخدمة رائعة حتى لما يكون المحل عجقة وفترة مباريات ما بقصروا بالخدمة، المحل نضيف جداً، القعدة الخارجية فيها كم شجرة كبار كتير مغطيين التراس كله يعني يعز الصيف بكون الجو فيه خيالي.. اسعاره كتير ممتازة وبتناسب الجميع يعني ارجيلة ومي وكاستين شاي بحدود 4 دنانير.. المحل الله مدخلين من الدرج اللي قبب مخبز صلاح الدين والدرج اللي بعده بكون بنص الدرج، وممكن تجيه من الشارع الخلفي فيه اماكن كتيرة للاصطفاف
  • Review by Rana of مقهى بلاط الرشيد
    قبل 5 سنوات
    موقعه جداً غريب، ما اله مدخل من الشارع يعني بتشوفه وانت ماشي بشوارع البلد بس ما بتعرف من وين يندخل عليه لحتى تسأل حدا، مقهى جداً بسيط ، مقهى شعبي ، مش مرتب ابداً والارض وسخة يمكن هاد المحل عمره الف سنة بس مع هيك القعدة فيه جداً مريحة ، رحت عليه فترة الصبح بكون فيه بنات بس المسا ما اظن، ما بينفع ابداً شب يفكر ياخد حبيبته هناك، يعني المحل شغل شباب او بنات لحال، الخدمة جداً ممتازة وبإبتسامة، في لعب شدة والارجيلة تمااام وعندهم مشروبات شعبية يعني زهورات قهوة شاي سحلب كركاديه، واسعاره جداً رخيصة يعني كاسة سحلب مع ارجيلة ومي بدينارين ونص
  • Review by Rana of أمسيات عمان
    قبل 5 سنوات
    بهاد المحل الواحد بترتاح نفسيته، محل هادي بشكل عام، اضائته خفيفة وفي مطرب بدق ع العود وبغني اغاني حلوة ما في ضجة مع انه الحركة فيه منيحة، الخدمة جيدة والارجيلة تمام، الاكل عنده طيب والمنيو مشكل، كل المشروبات زاكية، في خدمة اصطفاف وهاد اهم شي بالنسبة لمحلات البلد، اسعاره جداً مناسبة
  • Review by Rana of مطعم طواحين الهوا
    قبل 6 سنوات
    هاد المطعم تقليد عائلي قديم يعني من ايام الطفولة ونحن بنجي عليه كل اسبوع تقريباً من 15 وهو تاع الغحم نغسه وتاع القهوة السادة نفسه، الخدمة عندهم احياناً جيدة واحياناً مش بزيادة بس لأنه نحن من الزباين القدام للمطعم ما بقدر اعطي تقييم دقيق النا المعاملة بتكون يمكن مختلفة، الاكل كمان احياناً بجون توب وممتاز واحياناً بكون بقرف وما بيتاكل ، بس بكل الاوقات المقبلات عندهم روعة يعني اذا ما عجبك الاكل بتمشيها مقبلات، الجو العام للمطعم حلو والقعدات مختلفة ومنوعة بالصيف بس بالشتا بتكون ملزوم بالصالة، الحلو انه فيه تجمع كبير من كل الجنسيات يعني دايماً في جروبات اجانب و سياح عرب بتشوف وجوه مختلفة، الاسعار تعتبر غالية شوي بس المطعم يستحق التجربة وحلو للعزايم الكبيرة واللمات
  • Review by Rana of مغرم البيتزا
    قبل 6 سنوات
    من اطيب محلات البيتزا ، جربت كل فروعهم وكلهم بنفس الجودة، خدمة سريعة وحتى التوصيل سريع، جربت كل انواع البيتزا عندهم وكلها طيبة غالباً بطلب فونجي بيتزا، عجينتهم طرية ومستوية واذا بردت ما بتنشف متل اغلب البيتزا ع الحطب.. اسعارهم معقولة جداً وحجم البيتزا كبير يعني الاسعار ما بين 3.75 لـ 7 حسب النوع.. في اماكن للاصطفاف قدام المحل، تعاملهم لطيف والنظافة عالية
  • Review by Rana of ذا كيك شوب لاونج
    قبل 6 سنوات
    استغربت انه تقييم الاسعار متوسط بس شكلها الشغب غني مرة وحدة المحل ديكور وترتيب وقعدات وخدمة يعتبر رائع جداً ومناسب جداً للجمعات واعياد الميلاد.. بس انا مجربة كل محلات الكيك اللي بالاردن من اسوأها لأحسنها وهاد المحل بجودة الكيك اللي بقدمه لا يعتبر اكتر من جيد الكيك عادي جداً جربت الجيرمان كيك ما بعرف يا انا الي كل السنين اللي فاتت محلات الكيك بتضحك عليي يا اما هو عنده الجيرمان مختلف هو جيد بس مو نفس الطعم اللي بعرفه، وجربت الكلير عنده زاكي يعني يعتبر جيد جداً ، وجربت اوريو تشيز كيك انا اصلاً بكره التشيز كيك بس كرهته زيادة طعمة الجبنة واضحة جداً فيها، شكل الكيك عنده روعة وحجم القطعة يعتبر كبير، بس الاسعار فوق السعر المقبول ما بعرف اسعار القوالب الكبيرة بس سعر قطع الكيك من اي نوع بمحلات الكيك بشكل عام تتراوح مابين دينار ونص لدينارين ونص ، بس عنده الاسعار بتبلش من 3 واطلع ما عدا الكب كيك يعني اظن سعره 1.80 ، ما بعرف شو بقدم غير الكيك بس اظن عنده سناكس وقهوات وعصير.. انا حبيت المحل كديكور خصوصاً اني كنت براقبهم لحظة بلحظة وهم بجهزو فيه قبل ما يفتح لأني ساكنة جنبه، بس ضليت مترددة كتير قبل ما اجربه لأنه اغلب اللي زاروه ما نصحوني، بس مع هيك المحل يستحق التجربة، يعني بنصح الكل يجربه خصوصاً فترة الصبح لأنه جد القعدة فيه رايقة وبتفتح النفس حتى لو الجودة عادية وبكفي ابتسامة العاملين فيه وانهم كتير محترمين
  • Review by Rana of مطعم يامو
    قبل 6 سنوات
    هاد المحل من سنين باكل من عنده معكرونة بنا اربع انواع جبنة، كتير زاكية وكميتها كبيرة يعني باكل بالمحل وباخد الباقي ع البيت ومن زمان لهلأ بنفس الجودة.. هاد المطعم متخصص بيتزا وباستا وطبعاً عنده اكلات تانية وسندويشات وجودة الاكل ممتازة ، اغلب اللي بمرو من عنده بفكروه انه بس المطعم اللي تحت وسفري، بس فوق في كافيه ومطعم مرتب ، القعدة هادية وغالباً ما في عجقة وصوت الاغاني واطي مو مزعج، المنيو مشكل اكل ومشروبات وكيك وأراجيل، الارجيلة ممتازة والخدمة رائعة والمحل كتير نضيف وبطل ع جهتين ع شارع مكة و على مجمع جبر.. اسعاره مناسبة جداً يعني أرجيلة و 2 بيبسي و باستل وبيتزا و 2 مي بـ 16 دينار، واحلى شي انه اسعار المنيو شاملة الضريبة، الاكل بيتأخر شوي لأنه بينعمل وقت الطلب يعني ما عندهم شي جاهز من قبل، المشكلة الفعلية الوحيدة بالمحل هي الحمام مافي غير حمام واحد بس ومشترك يعني ذكور او اناث نفس الحمام مع انهم بفوتو بنضفوه اول بأول بس بضل هاد الشي غير مقبول.. بس غير هيك المحل يعتبر جيد جداً وانصح بتجربته إن كان سفري أو بداخل المطعم
  • Review by Rana of كرز بوكس
    قبل 6 سنوات
    كافيه رائع، كنت مترددة اجربه بالبداية بس لما فتت لقيت المحل كتير نضيف ومرتب وواسع وقعدته هادية وبطل ع جبل الحسين، اولاً الخدمة كانت جداً رائعة والشب اللي بيمسك الطاولة بضل معك من لما تيجي لتروح ما بغيرو كل دقيقة واحد، ثانياً الاكل يعتبر بالمستوى الجيد جداً طلبنا فوتوتشيني وسندويشات دجاج بالبيستو و تونا وكانت ممتازة والسندويشة بتيجي مع بطاطا وسلطة وحجم السندويشة كبير خبز فرنسي، ثالثاً الارجيلة كمان جيدة جداً والفحم ما بيتأخر بيتغير اول بأول.. العاملين جداً لطيفين ومبتسمين، الاسعار كمان رائعة جداً يعني قعدتنا طلعت ب 15 دينار
  • Review by Rana of وزارة البيئة
    قبل 6 سنوات
    صح انه حجم الوزارة صغير والمكاتب صغيرة لكنها لا تحتاج مبنى اكبر لأنه عدد المراجعين مو كبير جدة، الموظفين رائعين ومبتسمين، والجميع يقوم بعمله على اكمل وجه، بساعدو جداً وواضحين وغير متطلبين ، بتخلص المعاملات بوقتها المحدد وبشكل سريع وسليم، زرتها لغايات الرخيص وقدمولي كل المعلومات اللازمة وساعدوني بملى الاستمارة، والرخصة صدرت بموعدها اللي حددولي اياه، وبعد فترة رجعت طلبت نسخة تانية من الرخصة وطلعولي اياها بخمس دقايق الشكر الجزيل لجميع العاملين بهذه الوزارة
  • Review by Rana of مطعم عقل
    قبل 6 سنوات
    الاكل بهاد المطعم صاير كتير سيء مع انه زمان كان كتير منيح، الخدمة ممتازة بس الاكل بيخزي والاسعار صايرة خيالية يعني وجبتين بدون دجاج ولا لحمة يعني رز كبسة سادة ولبن جميد سادة وتبولة وكفتة بدون رز طلعو ب 23 يعني بياخدو خدمة 10% للاكل بالمطعم، وللاسف لبن الجميد طعمته بتخزي ورز الكبسة بقرف ، يعني كان مقلب مع انه انا باكل من عندهم من زمان وكانت اسعاره معقولة والجودة عالية بس هلأ بعد ما صار مشهور ومعروف وعليه الحركة عالية قلل من جودته.. كان يقدم احسن بوفيه افطار برمضان ما بعرف هي السنة شو رح يكون وضعه
  • Review by Rana of دينا
    قبل 6 سنوات
    انا اول نصيحة كتبتها بحياتي ع موقع جيران كانت عن هاد المطعم بس الله يسامحهم جيران مسحولي اياها، المهم ما زال برأيي انه هاد مطعم الفلافل الافضل بتلاع العلي او ممكن نحكي حتى بالمناطق المجاورة ، المطعم قعدته حلوة والاستقبال بكون بإبتسامة، عندهم الخدمة ممتازة والاكل رائع وعندهم سلطة ارمنية بتجنن والفتة بكل انواعها زاكية واهم شي خبز الطابون السخن اللي بيطلع من الفرن اول بأول ، الاسعار جداً مناسبة يعني من زمان لهلأ ما ارتفعت الاسعار ارتفاع كبير يعني فلافل وصحن حمص وصحن فول وصحن سلطة ارمنية وصحن فتة و 2 شاي و 2 مي غير المخللات اللي بتنزل ع كل طاولة طلع الحساب بحدود 8 دنانير وحتى لو بيطلع اغلى انت بتدفع وانت مبسوط لأنه جودة الاكل والهضار عندهم عالية والنضافة ممتازة ولا شك فيها يعني في بعض المطاعم بتكون الكاسات مزنخة او ماسحلك الطاولة بفوطة معفنة بس هاد المحل كله نضيف وريحته خلطة مابين ريحة الخبز الطابون وريحة الشاي بنعنع، يعني اذا بتبلش يومك بزيارة لمطعم دينا رح تضل معك الابتسامة طول اليوم
  • Review by Rana of انتيكا بيتزا
    قبل 6 سنوات
    هي نصيحتي التانية ع نفس هاد للمحل وهتد بسبب التغيير اللي صار طبعاً هو كان منيح وهلأ صار افضل واظن انه حتى اسعاره صارت ارخص، اول شي البيتزا عنده ممتازة جداً والتحضير كتير سريع يعني اقل من 10 دقايق كان الطلب عندي، المنيو صار فيه تشكيل اكتر يعني صار عندهم تواصي مسخن ومعجنات، غير انه صار عندهم مناقيش بكل انواعها وبأسعار معقولة ، حجم البيتزا العادي عندهم منيح يعني 2 بيتزا عادي ممكن يكفوا ل 3 اشخاص ، طلبنا 1 مرجريتا عادي و 1 بيتزا تيركي عادي و 1 مناقيش لبنة وزعتر و 3 مناقيش زعتر سادة و 2 كولا وطلع الحساب 9 دنانير، والمناقيش جداً رائعة وحجمها كبير، بنصح الكل يجربه ، كنت اول احتار بالرابية من وين ممكن اجيب مناقيش زاكية بس هلأ ممكن اقرر بدون تفكير
Next

أماكن أفضلها

صور أضفتها

هي لوحة موجودة ع المدخل
الستيج والدي جي