سما خالد

سما خالد

عمان . منذ أبريل 2011
32 من المراجعات
الأماكن المضافة
1
مراجعتي كانت الأولى
4
مراجعاتي
32

مراجعاتي

  • Review by سما of مطعم ورد
    قبل 9 سنوات
    كتير كنت حابة اروح هالمطعم على اد ما سمعت عنه واليوم رحت مع الاهل افطرنا هناك وتعليقي هو انه عادي جدا من حيث المأكولات والخدمة مو سريعة وممكن نحكي دون المستوى اللي كنت اتخيله والشي الوحيد الللي حسيته مميز هو الاعدة والجو العام فعلا حلوة واجواء مميزة وشي منيح يضاف اله وجود مصلى للجنسين .
  • Review by سما of ستديو روبينا
    قبل 9 سنوات
    قبل ما اتعامل معهم سمعت عنهم كتير انهم روعة ومحترفين لحديت ما جربتهم وفعلا ما حد يسمع من الناس لانهم ببالغوا بشكل كبير ...
    تعاملت مع روبينا قسم المحجبات وسيء جدا والموظفات صغيرات بالسن كتير وما عندهم اي خبرة واي احترافية واول ما رحت كانوا عالفيس بوك وتويتر وبتخوتوا على بعض . المهم انه الصور ابدا ما كانوا بالشكل المطلوب مع العلم اني خبرتهم على شو بالزبط يركزوا ومع ذلك ما كان في اي شي مميز والله العظيم شغل صغار فعلا . غير انه مواعيدهم مو دقيقة بالمرة 4 ايام رايحة جاي اليوم وبكرة ومشغولين وما بعرف شو مع العلم اني كنت دافعة. شكيت عالبنات الموجودات و الصور رميتهم لانهم بأرفوا واتصل المدير فيي يرجعلي الفلوس وما رضيت . روبينا للمحجبات سيء سيء سيء سيء .
  • Review by سما of مركز الحسين للسرطان
    قبل 9 سنوات
    انا تفاجأت من المركز اولا كبناء كتير مرتب ومتعوب عليه والنظافة جيدة جدا ولكن تعليقي الوحيد انه لما قمت بزيارة احد المرضى من الاقارب في الجناح الثالث قسم الرجال تفاجأت من اسلوب الكادر التمريضي لما طلبت منهم متابعة حالة المريض وانه يريد ان يشرب الماء ومو اي حد بقدر يشربه المي لحالته الدقيقة والحرجة وجاوبوني ما النا دخل لما ييجي الممرض المختص بالمريض سيقوم بمتابعته علما انهم حكولي وين اللي كان بشربه السوائل بالبيت ؟؟؟ حكيتلهم انها ابنته الممرضة وبس هي مو موجودة هلا . المهم انهم ما شربوا المريض وهو كان ميت عطش عن جد انا تفاجأت من الاسلوب ؟؟؟
  • Review by سما of كافيه ديز ارتيست
    قبل 9 سنوات
    فعلا مكان مريح وهادي وأعدته حلوة واجواءه مختلفة نوعا ما عن غيره بالديكور الفني والبسيط واسلوب عرض اللوحات وفكرة نشر الغسيل اللي ذكرها جاري هشام كانت حلوة ومميزة بالمكان .وبتحس حالك بالبيت ايام الشتا والكل أعد بالصالون والغسيل حواليه شعور كتير حلو واله معنى خاص وطريقة ترتيب الكنب والكراسي مريحة والمشروبات متنوعة وجيدة والخدمة سريعة بس ياريت يمنعوا التدخين منعا باتا .
  • Review by سما of تي جي اي فرايدايز
    قبل 9 سنوات
    فعلا اكله زاكي كتير وخصوصا الستيك التوسكاني مع صوص البلسميك والمشروبات منعشة واساميها غريبة ناسية شو طلبت .
    والأعدة حلوة ونظيف والخدمة جيدة جيدا والاجواء مريحة بس غالي يعني بتخيل اقل طبق ب 10 بدون عصير ومقبلات واشيا تانية بس ستحق التجربة .
  • Review by سما of كارفور
    قبل 9 سنوات
    آه من كارفور ؟؟؟
    بالنسبة الي ما برتاح فيه ابدا ولا مرة رحته وجبت كل شي بدي اياه بالعكس بجيب الشي اللي ما بدي اياه و دايما بدوخ وانا بدور ويا سلام لو وانا طالعة تزكرت شي ورجعتله طبعا ماراثون وانا بلفلف على أد ما هو كبير . بس اكيد فيه كل شي وبعمل عروض كويسة بس انا بفضل المكان الاصغر للتسوق .
  • Review by سما of ناتشورال لوكس
    قبل 9 سنوات
    كتير بحب هالمكان وبحب منتجاته من كريمات مغذية للبشرة طبيعية والكريمات بالفايتيمينات الطبيعية من مصدر البرتقال والخيار والصبار وفعلا رائحتها طبيعية وانواع مزيلات العرق رائعة والسبريي شور والميك اب الطبيعي . بس اخر فترة غيروا التشكيلة وانا حسيت كانت افضل من هلا وبالنسبة للاسعار غالية ومرات ببالغوا بالاسعار على اساس انه طبيعي .
  • Review by سما of السفارة الفرنسية
    قبل 9 سنوات
    تعاملهم لطيف والخدمة منظمة وبمواعيد مسبقة انا جربتهم بخصوص معاملات الهجرة والبعثات والدراسة وكانت المسؤولة مدام هند ملكاوي رائعة وببتعطيك كل التفاصيل المطلوبة والمعلومات بشكل واضح وسهل .
  • Review by سما of سارة السعودي سبا/الجامعة
    قبل 9 سنوات
    سارة السعودي فرع اجبيهة كتير روعة من حيث الديكور الداخلي والمبنى والتعامل والتنظيم طبعا في طابق سفلي للاجهزة والايروبيكس والمائيات والمدربات لطيفات ومتعاونات والطابق العلوي كل خدمات البشرة والليزر وفي مسبح مكشوف بالصيف.
    اوقاتهم كتير حلوة من 7 صباحا لل 10 مساء والجمعة من 9 صباحا لل 7 مساء واحلى شي انه فقط للسيدات ... اسعاره طبعا غالية مقارنتا مع غيره بس فعلا نادي مريح انا جربته من السنة الماضية وان شالله حرجعله .
  • Review by سما of السمهوري للصرافة
    قبل 9 سنوات
    السمهوري للصرافة كتعامل راقي وخدمة ممتازة تعاملت معهم بالحوالات ارسال واستقبال حوالات كتير خدمتهم كويسة وتعاملهم لطيف وعمولتهم اغلى من غير محلات صرافة بس ملتزمين وبتحملو اي خطا ممكن يحصل لانه مرة صار في تأخير واتصلوا اعتذروا وكان اسلوبهم راقي بالتعامل وحلوا المشكلة بسرعة .انا تعاملت مع السمهوري فرع شارع الجامعة الاردنية.
  • Review by سما of الرضوان
    قبل 9 سنوات
    مدارس الرضوان من افضل المدارس بعمان بالجمع بين الدين والعلم البرامج التعليمية والمناهج كتير متطورة ومتناسبة مع ثقافتنا وبنفس الوقت بتضاهي التطور المطلوب .والانشطة اللامنهجية كتير غنية ومفيدة والكادر التعليمي مؤهل واادارة جيدة جدا بس ما بشغلوا الا المعلمات المجلببات وما بعطوا فرص لغيرهم وبالنسبة للاقساط نوعا ما غالية وعندهم بالصيف بعملوا نوادي صيفية غنية بالنشاطات .انا ما جربتها بس اختي معلمة فيها وكتير بتمدحهم .
  • Review by سما of حياة أف أم
    قبل 9 سنوات
    قناة متنوعة بطابع ملتزم ومتوازن بتطرح قضايا مهمة واخبارها جديدة وسباقة وبرامحها كتير حلوة وخصوصا برنامج عالم حواء بيطرح كل شي بهم المراة باسلوب جميل وبرنامج لدكتور امجد قورشة كمان كتير حلو .انا بفضلها وبعتبرها افضل الموجود عالساحة حتى لو في بعض الانتقادات اللي مممكن اصلاحها .
  • Review by سما of متحف الأطفال
    قبل 9 سنوات
    متحف رائع بمعنى الكلمة عبارة عن مجتمع صغير للاطفال بتحليل علمي وعملي فعلا تجربة جميلة للاطفال والكبار لانهم حيستفيدوا ورح تضل بالذاكرة ويا ريت تتكرر متل هالمشاريع اللي بتخدم الاطفال وتكون بمتناول الجميع متل المجتمع الياباني اللي عنده هالمشاريع متوفرة للكل وموجهه للعقول .
  • Review by سما of جي بي سي كافيه
    قبل 9 سنوات
    النظافة سيئة مرة طلبت قهوة وكان الفنجان وسخ من بقايا سابقة . وتلبية الطلبات بطيئة وفعلا بالشتا بكون بارد وآعد على اعصابك من البرد واسعاره غالية والطلبات عادية والنسكافيه اللي بقدموه مو اصلي وطعمه بالمره .
    فقط الديكور حلو والاعدة الخارجية .
  • Review by سما of شول
    قبل 9 سنوات
    مكان رائع ومريح والعاملين فيه كفاءة عالية والمستلزمات المستخدمة حديثة كتير ان كان اهتمام بالقدم من علاج ومساجات ومراهم وترطيب واحذية طبية كتير رائعة من حيث الراحة بس كأشكال للاحذية ما بتكون مودرن يعني عادية بس فعلا مريحة واسعاره غالية بس بستاهل .
  • Review by سما of صالون أمل عبدالله
    قبل 9 سنوات
    الصالون حلو ومرتب والميك اب بسيط وحلو بس بالنسبة الي ما حرجع لانه تعاملهم سيء وخصوصا امل العبدالله يا الله شو مستبدة وما بتحب اي رأي يمشي غير رأيها وبتحسسك انك حشرة عم تحكي وما بتعمل الا الرؤية اللي هي بتشوفها حتى لو انتي طلبتي غير شي .
  • Review by سما of جورجيس بيوتي سنتر
    قبل 9 سنوات
    هاد الصالون جربته بعرس اختي بناء عسمعته الكبيرة .
    حجزنا لعروس ومرافقة ويوم العرس ما بتتخيلوا العجأة بالصالون والكل مشغول ومافي اي اهتمام بالعروس وتوتر مو طبيعي بالوقت وهم يحكولنا هلا وكمان شوي وفعلا اندمنا وقتها والمهم بالاخير عملت التسريحة للعروس بتلت ساعة والمكياج والله 5 دقائق واسعاره غالية اخدوا 350 ومابعرف على شو يعني كنا متوقعين معاملة ملوكية ومريحة بس للاسف طلع العكس تماما ومع كل هالتوتر اللي صار .
  • Review by سما of تشيه تشيه
    قبل 9 سنوات
    مكان جلو ونظيف وأعدته جميلة وخصوصا بالهواء الطلق كتير روعة والخدمة جيدة ونفس الملاحظة للجيران انه فعلا الجراسين تعاملهم مو كتير لطيف.
    واكيد رح يضل هالمكان اله انطباع خاص بسبب لقاء الجيران بهاد الفرع وتشرفت بالجميع بس كأنه كان كل اتنين او تلات قريبين من بعض عم بحكو مع بعض وما كان في مجال للحوار الجماعي بسبب البعد بالجلسة وتاني شي بسبب صوت الاغاني العالي. بشكل عام المكان حلو بس الاحلى الأعدة برا .
  • Review by سما of روان كيك
    قبل 9 سنوات
    روان كيك من الاماكن المفضلة عندي بمجال الحلويات كتير مرتب ونظيف والجودة عالية والاسعار مناسبة وافكاره مبتكرة وخصوصا بحفلات اعياد الميلاد للاطفال عنده كل مستلزمات اعياد الميلاد من الكيك للبالون .
  • Review by سما of مانجو
    قبل 9 سنوات
    هلا في ملابس عنده حلوة ومميزة بس مرات كتير بتلائي ملابس كتير غالية بدون ما يكون فيها شي مميز بروح اتفرج اغلب الاحيان و يمكن كل سنتين بشتري منه لبسة.
  • Review by سما of مدينة الجبيهة الترويحية
    قبل 9 سنوات
    فعلا اصبحت سيئة من العاب قديمة وعدم راحة نفسية ابدا لوجود شباب سيئين واسعارها زادت عشي فاضي مافي اي تطوير وبتخيل بيوم من اايام لا سمح الله نسمع عن حوادث داخلية بالالعاب لانه ما بتوقع في صيانة اصلا .ومحلات التحف والانتيك والتذكارات صارت شغل استهبال بالاسعار غالية كتير .يعني غير ملائمة للعائلات بوقتنا الحالي بانتظار التحديث ان حصل
  • Review by سما of حدائق الحسين
    قبل 9 سنوات
    حديقة جميلة وكبيرة ومتكاملة للصغار والكبار فيها ساحات للعب ومتحف الاطفال رائع والركض والمشي والتأمل فيها كتير حلو ومريح للبنات مافي مضايقات بس اتدايق على طول بروح حدائق الحسين اتنفس هوا نقي .بنصح الكل يجربوها ويحافظوا عليها ويكونو اد المسؤولية بنظافتها .
  • Review by سما of زين للاتصالات
    قبل 9 سنوات
    من احسن الشركات حتى لو غالية بالنسبة الي مرتاحة معهم من 6 سنين نفس الخط معي وما رح اغيره خدمتهم كويسة وارسالهم قوي وتعاملهم لطيف وعروضهم كتيره وما بعملو الها اعلان كافي عشان هيك ما بنستفيد من العروض بس بشكل عام هي الشركة الاولى والاحلى والاجمل والافضل بالاردن . جربت امنية النصابه بخط فاشل وجربت اورانج النصابة التانية بالانترنت والضرائب الخفية اللي بصدموك فيها لما بدك تفصله .
  • Review by سما of شركة أمنية
    قبل 9 سنوات
    خدماتها سيئة ونصابة وارسالها مقرف ونفسي ارفع قضية عليهم وخدمة الزبائن من اسوا الشركات بحكولك كل شي تمام وبالحقيقة مو عاملين شي انا اشتريت خط امنيه وحكيت لصاحب المحل اللي اشتريته منه انه بدي اياه بس استخدمه خلال فترة قصيرة انزل اعلان بالجريده فيه وبعدها بفصله يعني مو مهتمة كتير بالعروض المطروحة واعطاني خط بنغالي ههههه وبحياتي ما شفت اسوا من هيك خط 24 ساعة رسائل هبلة مالها معنى وبس اشحنه على طول يخصمه منه لو شحنته ب5 بخصمه 5 ولو 10 بخصمه 10 بدون اي شي واضح وسبب وطلعت روحي وانا اتصل واراجع الشركة وعالفاضي بالاخير رميته من الزهأ.
  • Review by سما of مجتمع طلال أبوغزالة للمعرفة
    قبل 9 سنوات
    مجتمع طلال غزالة يقدم لطلاب الجامعات كل الخدمات الميسرة من اجواء دراسة وكافتيريا ومكان جلوس وانترنت واماكن نقاش جماعي ونوادي للغات باشتراكات سنوية رمزية ومحاضرات مجانية متنوعة تخدم فئة الشباب ومكتبة لبيع القرطاسية والنسخ والتصوير ومحاضرات باسعار رمزية في مجال التسويق والاقتصاد والترجمة وبناء الذات.ويعقد فيه نادي توظيف كل سنة بمشاركة كبرى الشركات والمؤسسات من مختلف المجالات .
Next