Muna Al-Reshiq

Muna Al-Reshiq

عمان . منذ سبتمبر 2010
crazy girl love to live each day like its her last day ;)
83 من المراجعات
الأماكن المضافة
11
من وجدوا مراجعتي مفيدة
2
مراجعاتي
83
صوري
175
أماكن فضّلتها
8

مراجعاتي

  • Review by Muna of شاورما الحناين
    قبل 4 سنوات
    هاد المطعم من المطاعم المفضلة بالنسبة إلي، كتير بحب الشاورما من عندهم كميتها كبيرة وأسعاره مناسبة وطعمتها كتير مميزة وزاكية :) عندهم قعدات بالمطعم بس المشكلة بالمصفات عنده.
  • Review by Muna of خبزة وشاورما
    قبل 5 سنوات
    من مطاعم الشاورما المميزة بالأردن، أزكى شي إنه الخبز بيعملوه طازة عندهم :) طعم الشاورما عندهم مميز سواء لحمة أو جاج وأسعارهم معقولة :)
  • Review by Muna of شاورما ع الصاج
    قبل 5 سنوات
    فعلاً من أزكى مطاعم الشاورما بالبلد، ساندويش نظيف وحجمه منيح وسعره مناسب وطعمه خرافي :) بنصح فيه كتير ويا سلام لو تضيفوا ع الساندويش أو الوجبة دبس الرمان وجبنة :)
  • Review by Muna of جبران
    قبل 5 سنوات
    مكان حلوة قعداته بالصيف والمنيو كبيرة وفيها كل شي بس صراحة كتييييييييير غالي والخدمة عندهم كتير بطيئة
  • Review by Muna of جواهر كافيه
    قبل 5 سنوات
    من المحلات إللي كتير بحب أروح عليها :) تعامل الموظفين كتير مميز مع الزباين والأسعار جداً مناسبة والمحل كتير مرتب ومش مضغوط. المنيو عندهم فيها كل شي تقريباً والأراجيل مميزة الراس ما بينحرق بسرعة :)
  • Review by Muna of سبانتينو
    قبل 7 سنوات
    اليوم بالشركة قررنا نجرب نطلب من سبانتينو وطلبنا 11 وجبة مشكلة (زنجر، فاهيتا، شيش طاووق، كوردون بلو، فايستا) صراحة الطعم خرافي والسعر كمان كتير معقول :) عندهم ديليفري وخدمتهم مميزة :) بنصحكم تجربوه :)
  • Review by Muna of ووكس اند كومباني
    قبل 7 سنوات
    قبل كم يوم لفت نظري العروض ياللي عاملينها، كل يوم اتنين بوفيه سوشي ب19++ وكل يوم تلاتاء بوفيه هندي ب12.75++ وكل أربعا بوفيه صيني ب12.75++ حجزنا طاولة يوم الاتنين لبوفيه السوشي ورحنا، موقعهم بعبدون مقابل حديقة بنك الاسكان.. وصلنا واستبقلتنا الوايتر ووصلتنا لطاولتنا، الحلو إنه في قسم للمدخنين وقسم لغير المدخنين.. قمنا ع البوفيه حطينا سوشياتنا ورجعتنا ع طاولتنا، صراحة كتيييييييييييير زاكي ونظيف وقعداتهم كتير حلوة ومريحة :) خلصنا وطلبنا بعد الأكل سموذي فراولة وعصير تفاح وشاي أخضر.. خلصنا قعدتنا وطلبنا الحساب طلع تقريباً 69 دينار.. تجربة كتير حلوة وأكيد رح أعيدها :)
  • Review by Muna of سالتيناس
    قبل 7 سنوات
    قبل كم يوم كنا عم نتمشى بمكة مول وإجى ع بالنا ناكل شي وأكتر من مرة مرقت من جنب هالمحل وبيلفت نظري البوفيه الدائم عندهم.. فتنا واستبقلنا شب عن الباب وحكالنا شو الطبخات المتوفرة يومها، أخدنا صحن وحطينا من السلطات والمقبلات ياللي الواحد بيحتار شو يحط وشو ما يحط :) طلبنا وجبة ستيك مع فطر وكريمة ووجبة كبة بلبن و2 عصير برتقال، قعدنا ع الطاولة لحد ما يجهزولنا أكلاتنا وبأقل من 5 دقايق كان أكلنا عنا :) صراحة كإنه طبيخ بيت قد ما هو زاكي وخفيف :) حبيت كل شي عندهم من المقبلات للسلطات للأكلات الرئيسية للعصير الفريش :) خلصنا اكل طلبنا الحساب وطلع يومها حسابنا تقريباً 27 دينار :) صراحة بنصحكم تجربوه :) طعم زاكي وكمية كبير وخيارات كتيرة وسعر كتير منيح :)
  • Review by Muna of مقهى ومطعم أتاي
    قبل 7 سنوات
    جربته مرتين وبالمرتين ما حبيته كتير، الاستقبال تبعهم حلو بس ياللي بيقهرني عندهم إنهم بالمرتين كانوا يسكروا المدخل بالمفتاح وعادي الواحد يضل يستنى حد يفتحله الباب، بيستقبلوا الواحد بابتسامة حلوة وبيوصلوه ع طاولته ومن هون بتبلش رحلة المعاناة مع الوايترية، عادي إنه الواحد يقعد نص ساعة يستنى وايتر يجي ياخد طلبه :( ولما ياخدوا الطلب عادي كمان يقعدوا ساعة ليجيبوا الطلب :( بس صراحة كل شي عندهم زاكي ونظيف وبيستاهل الواحد يستنى شوي مشانه، أسعارهم مناسبة يعني زي أسعار أي مكان تاني :) أنا مني وعلي ممكن أرجعله في حال حسنوا وضع الخدمة شوي عندهم..
  • Review by Muna of فيفيد لاونج
    قبل 8 سنوات
    هالمكان رحت عليه مرتين، أول مرة كنا طالعين أنا وأختي وماما ومو عارفين وين بدنا نروح اقترحت عليها نروح نجرب فيفيد، والله رحنا أول ما صفينا السيارة إجو شباب الفاليه فتحولنا البواب وابتسامتهم ع وجههم وأخدوا السيارة :) دخلنا لجوا فتحلنا وايتر الباب واستقبلنا بابتسامة وبترحيب كتير حلو وخلانا نختار وين بنحب نقعد، حبينا نقعد بالقعدات ياللي برا، كتير حبيت توزيعهم للصوبات وحبيت أكتر إنه في ناس كانوا بردانين وجابولهم حرامات خفيفة يحطوهم ع حالهم :) أول ما قعدنا إجت وايتر فلبينية بتحكي عربي بطريقة خرافية وجابتلنا المنيو وتركتنا براحتنا، طلبنا أرجيلة وأميريكان كافيه وليمون ونعنع سموذي وإم علي وجد أسرع مكان بيحضروا فيه طلبات :) أكتر شي حبيته إنه تبع الأرجيلة ما بيلحق يروح إلا هو راجع وبيضلوا يستفسروا إزا كل شي عاجبنا أو لأ :) خلصنا وطلبنا الحساب وروحنا وودعونا بنفس الطريقة الحلوة ياللي استقبلونا فيها :) تاني مرة رحناه كنا أنا وأختي وصاحبتنا رحنا يوم خميس وكان المكان شبه مليان بس استقبلونا بنفس الطريقة الحلوة وما شكوا إنه مو حاجزين أو شي بالعكس، يومها طلبنا شي اسمه فيفيدتشينو واحد بكراميل وواحد ببندق وليمون ونعنع وطلبنا فرايد بلاتر، جد كل مرة عم بحبه بزيادة لهالمكان، الأكل خرافي ومو تقيل ولا كله زيت، المشاريب كلها زاكية عندهم وجد الواحد بستمتع بطريقة مو طبيعية، بحب إنهم ما بيكشروا بوجه الزبون لو شو ما طلب وقد ما يغلبهم بيضلوا مبتسمين :) كتير خدمتهم سريعة ومميزة صراحة :) أسعارهم كتير مناسبة وموقعهم حلو وخدمتهم ممتازة :) بنصحكم تجربوه وبشدة ;)
  • Review by Muna of بيانكو نيرو كافيه
    قبل 8 سنوات
    هالمكان جربته أكتر من مرة وكل مرة بحبه وبحب اصحابه أكتر وأكتر :) أول مرة جربته كانت يوم اتنين وكنا قارئين بالفيس بوك إنه عنده عرض كل يوم اتنين الأراجيل فري للبنات :) سحبنا حالنا ورحناله بالبريك بحكم إنه جنب شغلي (الصويفية - ش. باريس - أول دخلة يمين "الدخلة ياللي بعد ناتشورال كير" - آخر الشارع تقريباً) وصلناله وكان لسه مسكر بس كان صاحب المحل موجود فيه واستقبلنا بكل أريحية مع إنه مو وقت إنه يفتح فيه.. قعدنا وطلبنا تشيكي كريب (بتيجي كريب محشي دجاج وفطر وذرة وأشياء كتيرة) كتيير زاكية كانت صراحة ومشبعة بطريقة لا توصف وطلبنا أرجيلة.. تأخر علينا شوي بالطلبات واعتذرلنا ألف مرة مسكين مع إنه احنا ياللي وقتنا غلط كان.. صراحة قعدة المحل كتير حلوة وجد الواحد بيحس حاله قاعد في بيته :) أحلى شي إنه صحاب المحل هم ياللي بيعملوا كل شي بإيديهم وبهيك الواحد بيضمن النظافة والخدمة الصح :) خلصنا قعدتنا وقمنا وكان صاحب المحل مستحي لإنه تأخر علينا وكان ما بدو ياخد منا الحساب :) صراحة من أول زيارة إله ومن التعامل الحلو ياللي تعاملنا فيه صرت كل فترة أنطلهم :) الجماعة كتير مناح وودودين وهاد بيحبب الناس في المحل :) بنصحكم تجربوه :)
  • Review by Muna of ماكدونالدز
    قبل 8 سنوات
    مبارح رحنا نتغدى بماكدونالدز أنا وماما وأختي وولادها مع إنا مو من هواة الماك بس ولادها اختاروه مشان الألعاب ياللي بتطلع بوجبات الأطفال، وصلنا ع المطعم صفينا بالباركينج الخاص فيه ودخلنا، كتير حبينا كيف مغييرين فيه ومكبرينه شوي، نقينا طاولة وقعدنا ماما والأطفال ورحنا نطلب، بناءً ع نصيحتي طلبنا 3 بيج تيستي و3 كيدز ميل وتشكن ونجز وناجتس وتشكن سيزر سالاد، أقل من 10 دقايق كان طلبنا جاهز برغم العجئة الخرافية ياللي كانت بالفرع، أخدنا الأكلات وبلشنا ناكل، أختي ما حبت طعمة اللحمة بالساندويش حسته دسم شوي وراحت طلبت جراند تشكن ديلوكس،أنا أكتر شي بحبه من الماك هو البيج تيستي :) الونجز كتييييييييييييير زاكي والناجتس زاكي كمان :) خلصنا أكل وإجى ع بالنا نتحلى كانوا عارضين فطيرة بالكاسترد والكرز والصغار كانوا بدهم بوظة رحنا بدنا نطلب بس اكتشفنا إنه ما في بوظة ما بعرف ليش لهيك طلبنا 4 فطيرة كاسترد وكرز و2 فطيرة تفاح، فطيرة الكاسترد والكرز طعمها خرافي وكتير خفيفة وقرشتها يمي يمي :) رحنا غسلنا وحبيت نظافة التواليت :) يعني مهتمين بالنظافة بطريقة خرافية، حتى بالصالة في شب بيضل يلف بالصالة وأول ما يقوموا الناس عن الطاولة بينظفها ع طول :) ما حبيته وهو معجوء بعد الساعة 4 لدرجة إنه الناس بطلوا يلاقوا طاولات :( بيفرفط الروح صار.. الشي ياللي ما كتير عجبني منطقة لعب الأطفال كان في شب وبنت واقفين ع الباب والمفروض إنهم واقفين يراقبوا الأطفال، بس كانوا واقفين بيحكوا مع بعض ومو سألين بالأطفال بالمرة حتى إنه ابن وبنت أختي الصغار ضاربينهم 3 ولاد ومهشمين وجهه خراميش وما انتبهنا عليهم إلا لما إجت بنت أختي وهي بتبكي ولما رحنا لا لقينا البنت ولا الشب :s هاد أكتر شي دايقني صراحة :( بتمنى يهتموا شوي بموضوع الأطفال. تجربة جيدة إجمالاً واحتمال أعيدها في حال ما كان معنا أطفال..
  • Review by Muna of جفرة زهر الرمان
    قبل 8 سنوات
    واحنا بنتمشى باربد قبل كم يوم لمحنا كافيه ومطعم جفرا وطلعنا عليه صراحة فكرناه فرع لجفرا عمان وسط البلد بس حبينا إنه كديكور كتير أحلى، قعدنا ع التراس المطل ع شارع الجامعة وأول ما قعدنا إجى الوايتر وأعطانا المنيو كان فيه من كل شي عادي وسبيشل أرجيلة عصير ميلك شيك كله سألناه طلعت الأرجيلة بيكون الراس تفاحة السبيشل والعادي مش تفاحة وأي شي تاني بيكون السبيشل إنه في أشياء اكسترا، طلبنا أرجيلة جفرا عادي وأرجيلة ليمون ونعنع سبيشل وقهوة دبل وميلك شيك شوكولاتة، صراحة كتييييييييييييير بطيئين بالخدمة يمكن استنينا ربع ساعة لإجى الطل تبعنا، بس صراحة بيستاهلوا :) بس القهوة تبعتهم طعمها غريب كان ما بعرف ليش، المهم قعدنا وكتير انبسطنا بس كان في شغلة صغيرة ما حبيناها إنه صوت الأغاني ياللي حاطينها كتير عالي ومو مناسبة جو المحل، قعدنا بحدود 4 ساعات بعدين حاسبنا ونزلنا لفت نظرنا إنه في محل تحت الكافيه بنفس الاسم بس بيعمل أشياء هدايا وتركيب عطور وجبت من عنده مج كتير حلو :) صراحة تجربة حلوة كانت وأكيد كل ما أروح ع اربد رح أروح ع جفرة :)
  • Review by Muna of بوبايز
    قبل 8 سنوات
    قبل كم يوم كنا باربد وقررنا نتغدى ببوبايز، طلبنا وجبة بترفلاي (وجبة الجمبري) ووجبة غولدن ميل، كان الجاج معبى بس حكولنا إنه طلبنا بدو 10 دقايق قلنا ليسا، قعدنا نستنى طلبنا لحد ماجهز وجابولنا إياه، استغربت إنه البطاطا مو بطاطا بوبايز يعني بطاطا تجارية بحتة ما عليها خلطة البهارات المميزة تبعت بوبايز :( الجمبري المفروض بيجي معه ترتر صوص كان معه متومة عادية :( والجاج كنا طالبينه مو حار كان في قطعة حار :( بس إجمالاً كان الأكل مش بطال، الطامة الكبرى كانت لما قمت أغسل :( التواليت أبداً مش نظيف والأرضية كلها مي وقالبة على سواد :( الصابون كان عبارة عن مي بترغي :( عجئة عيد اوك ما اختلفنا بس إنه 3 من الشغيلة واقفين ع باب التواليت بيطقوا حنك وبيتفرجوا على الرايح والجاي هاي مش طبيعية :s بتمنى يهتموا شوي بالنظافة ويحاولوا يكون مستوى فرعهم متل الفروع التانية..
  • Review by Muna of وايت ليلي بيوتي سنتر
    قبل 8 سنوات
    اليوم قرأت النصايح عن الصالون وتشجعت إني أروح أجربه بوقت البريك بما إنه قريب من شغلي، رنيت عليهم أخدت موعد واستفسرت عن موقع الصالون بالزبط والصبية ياللي ردت علي كتير حبابة :) موقعهم بالصويفية شارع الوكالات مجمع رقم 19 الطابق الأول، وصلت واستقبلوني وقعدت استنى دوري :) الصالون كل ياللي بيشتغلوا فيه صبايا :) كان في 3 صبايا عم بعملوا شعرهم وبيعملوا مكياج، حبيت كيف بيطولوا بالهم ع الزبونة وما بيجبروها ع الشي إللي براسهم بالعكس :) بالوقت ياللي قعدت استنى فيه قعدت أتفرج ع الديكورات وكتير حبيت الألوان :) يعني صالون ستاتي بمعنى الكلمة :) كله زهر ونهدي وألوان حلوة وهادية :) مرتب كتير الصالون مع إنه صغير شوي :) إجى دوري وقمت وبلشت أسشور وصار في شوية حكي بيني وبين الصبية ياللي سشورتلي وحبيت إنهم مو من النوعية ياللي بدهم ياخدوا ع الزبون خاوة بالعكس بيفوتوا بالزبون بأسلوب حلو :) خلصت سشوار بسرعة وصراحة توقعت يكون سشوار شلفقة بس حبيت إنها عادتلي ع الغرة أكتر من مرة لإنها ما كانت مقتنعة إنها زابطة مع إني ما شفت فيها شي غلط :) إجيت بدي أحاسب وسألتها شو عندهم بالصالون وحكتلي إنه عندهم سكر وواكس ومساج وسكراب وبديكير ومنيكير وأي شي بدها الوحدة تعمله يفضل تحجز قبل بوقت :) حاسبت وطلع حسابي 5 دنانير يعني سعر عادي متل أي صالون تاني مو غالي بالمرة :) صراحة كتير حبيتهم وناوية أجربهم بأكتر من شي :) وبنصحكم تجربوهم كمان :)
  • Review by Muna of مطعم سارة للمأكولات البحرية
    قبل 8 سنوات
    إلي فترة عم بتشهون ع أكلة سمك وقد ما سمعت عن مطعم سارة وقرأت عنه هون بجيران من زمان كان نفسي أجربه، لهيك خططنا إنه الخميس نجربه :) الخميس صحيت ولبست وانطلقنا ع سارة :) حبيت موقعه إنه جاي مقابل هاشم تقريباً ومدخله بالدخلة ياللي قبل الإشارة :) أول ما دخلنا حبيت إنه مع إنه مطعم سمك بس ما في ريحة زنخ، يعني في ريحة سمك بس حلوة :) طلعنا ع الطابق التاني مشان كل قعداته هناك والوايتر خلانا نختار الطاولة ياللي بدنا إياها، كنت حابة أقعد ع البلكونة بس لإنه وصلنا وقت الظهر كنت رح أحس حالي قاعدة بالشارع :( حسيت حلاوة قعدتها المسا وهي البلد هادية شوي :) قعدنا ع طاولة وأعطونا المنيو :) عندهم تشكيلة خرافية صراحة، كل أنواع المأكولات البحرية تقريباً موجودة عنده وفي عنده كل أنواع السلطات والمقبلات والمشروبات (ما في مشروبات روحية طبعاً) حتى عنده تحلاية وأراجيل.. طلبنا متبل ومحار بالجبنة وطبق سمك مشكل مع الجمبري وطبق سمك سالمون مشوي مع الجمبري و2 عصير واحد برتقال وواحد رمان، حكولنا إنه الأكل بدو 45 دقيقة ليجهز ونزلولنا البقدونسية وصوص البندورة الحارة مع طبق بطاطا ودجز وخبز محمص وصحن ليمون طبعاً هدول بينزلوا ع كل طاولة :) ووصل العصير معهم وصراحة كان عبارة عن طنجرة عصير طبيعي :) جد طعمته كإنه معصور بالبيت لا زايدين مي ولا سكر ولا إشي :) خلال وقت تحضير وجبتنا قعدت اتفرج ع الديكورات وكتير حبيت ديكوراتهم إنه كلها خشب بس بأشكال كتير مميزة ومبينة قديمة وهاد ياللي أعطاها الميزة الخرافية بالشكل :) المهم وصل طلبنا، جابولنا سمكاتنا وصراحة السلمون خرافي من ناحية الطعم أو الترتيب أو الشكل، كتيييييييييير حبيته حتى الجمبري أول مرة يتقدملي بقشره واستمتعت وأنا باكل فيه :) دقت من الطبق التاني بس ما حبيته كتير حسيت السمكة نهرية مو بحرية، بس إجمالاً طعم جد مميز، وصل المحار بعد السمك لإنه كانوا حاكيينلنا إنه بياخد وقت جابولنا إياه مع خضار مش مع جبنة ما بعرف ليش بس كمان كان زاكي :) كتير حبيت ترتيب الصحون عندهم :) وحبيت الوايترية ياللي بيضلوا حواليك وبيسألوك إزا بدك شي أو ناقصك شي بس بنفس الوقت ما بيزهقوك من وجودهم :) خلصنا أكل وقمنا غسلنا وطلبنا الحساب، كل هاي الطلبات طلعت ب30 دينار وفراطة حاسبنا وطلعنا :) صراحة تجربة مميزة وبتستاهل كل قرش اندفع :) أكيد رح أرجع أجربه أكتر من مرة وأكيد رح أجرب كل شي عندهم :)
  • Review by Muna of المختبرات الطبية التخصصية
    قبل 8 سنوات
    رحتله من فترة مشان أعمل تحاليل، أول ما وصلت حبيت ترتيبه ونظافته، أعطيت وراقي للدكتور الموجود كان وخلال دقيقة إجى ناداني مشان يسحبلي دم، خبرته إنه عندي فوبيا من الإبر وكتير حبيت قديش تحملني وضل قاعد بيحكي معي وبيحاول ما يخوفني من الموضوع :) صراحة إيده كتير خفيفة وكتير حبيت تعامله معي :) خلصت سحب دم وأعطاني موعد النتائج وكان في واحد من التحاليل المطلوبة ما بيغطيه التأمين بس حكالي رح يحكي مع الشركة ويمشيها :) رحت تاني يوم أخد النتيجة وطلع جد مزبطلي الموضوع ومشى كل التحاليل ع التأمين :) طلع علي 5 دنانير :) مركز مرتب ونظيف وتعامل ممتاز صراحة بنصح فيه :)
  • Review by Muna of المركز التخصصي للأشعة و الرنين المغناطيسي المفتوح د. طه شهاب
    قبل 8 سنوات
    من كم يوم رحت اعمل صورة أشعة لركبتي بهالمركز، الموقع تبعهم ما بضيع بالمرة إنه أول جبل الحسين مجمع عادل القاسم الطابق الرابع :) دخلت وانصدمت إنه المركز كتير صغير استقبلتني الصبية وأخدت وراقي وبعد أقل من دقيقتين دخلتني جوا لحتى أعمل الصورة، صراحة جوا كتير واسع المركز وفيه أكتر من قسم :) أخدتلي صورة وطولت بالها علي كتير صراحة :) المهم خلصت وطلعت أحاسب طلعت الصورة ب3.5 دنانير مع التأمين (الشرق العربي) دفعتهم وطلعت :) بس صراحة تعاملهم جداً حلو ومريح :)
  • Review by Muna of مطعم برشلونة
    قبل 8 سنوات
    مبارح كنت بالبيادر وقلبت الدنيا ع محلهم الجديد لإنه جد كان جاي ع بالي أكل وجبة ميسي :) لقيت المحل بعد جهد جهيد، طلع بنفس الدخلة ياللي كان فيها بس لجوا شوي :) حبيت موقعه الجديد وحبيت إنهم موسعينه توسيعات خرافية ومزبطينه كتير :) دخلت وكان في قدامنا شبين عم يطلبوا فلحد ما إجى دوري ألقيت نظرة سريعة ع ترتيب المحل ونظافته، صراحة مرتبينه بطريقة خرافية ومقسمين كل قسم لحال، في تحت 3 طاولات وفي إله قعدات فوق على ما أظن وفي قعدات برا :) إجى دورنا وطلبنا 5 وجبات ميسي طلع الحساب 10 دنانير و90 قرش يعني الوجبة تقريباً دينارين وعشرين فسعرها جداً مناسب بالنسبة لكميتها :) ماشالله كان في عجئة مش طبيعية عنده يعني لما طلبنا كان رقم فاتورتنا 48 وهم كانوا عم بنادوا لسه ع رقم 29 فتخيلوا قديش ماشالله الضغط عليهم، قعدت أتفرج عليهم وهم بحضروا الوجبات، مع إنهم معجوئين بس ماشالله الموظفين شو سريعين بالتحضير، حبيت إنه برغم سرعتهم ما كانوا يشلفقوا بالعكس كله مرتب ومنظم وأهم من كل شي نظيف، كل عامل لابس كفوف بإيديه وصدفت إنه وقع شغلة ع الأرض قامها العامل وبدل كفوفه بكفوف جديدة ع طول :) جهزوا وجباتنا وأخدنا الكولا وطلعنا، السيئة الوحيدة ياللي ما حبيتها إنه الكولا عندهم كلها صايرة بس كاسات ما في علب :( يعني احنا كنا بدنا كل وجباتنا سفري طول الطريق ونحنا ماسكين الكاسات وعلى مطب كاسة انفتحت وعبت الدنيا :( بس إجمالاً بيستاهل ينكب عشانه كل الكاسات ;) صراحة صراحة طعمة الساندويش متل أول وأزكى، كتييييييييير بحبها هالسندويشة وجد كوجبة مشبعة بدرجة خرافية :) بنصحكم تجربوه وبنصحكم تدمنوا عليه كمان ;)
  • Review by Muna of المنقل تشكن تكا
    قبل 8 سنوات
    من كم من يوم كنا بجبل الحسين أنا وماما وإجى ع بالنا ناكل، كنا بأول جبل الحسين ومالقينا حالنا إلا جنب المنقل، دخلنا ع المطعم وطلعنا ع الطابق التاني بحكم إنه الطابق الأرضي ما فيه إلا 4 طاولات تقريباً والقعدة فيه مو مريحة، وصلنا ع الطابق التاني كان المطعم فاضي اخترنا طاولة وإجى الوايتر زبطلنا القعدة، جابولنا المنيو وطلبنا كباب ودجاج تكا 4 قطع (بيكون جاجة كاملة) وبقدونسية وسلطة ذرة و صحن بطاطا كبير وخبز بوري وعصير برتقال و2 بيبسي، أخد طلبنا تقريباً 10 دقايق لبلش يجهز، جابولنا السلطات أول شي مع المتومة، صراحة المتومة حسيتها عصير تومة ما إله طعم :( البقدونسية كانت كتير زاكية وسلطة الذرة كمان زاكية حبيتها كتير خبز البوري كان زمان أزكى صراحة وأخف :( صحب البطاطا توقعت بما إنه مكتوب كبير يكون كبير يعني مش صحن صغير :( بعد 5 دقايق من وصول المقبلات جابولنا الأكل، الكباب كان كتير زاكي وخفيف والتكا كان كمان زاكي وطعمته مميزة :) صراحة أكلنا أنا وماما لدرجة إنه بطل فينا مجال نتنفس :) خلصنا أكل قمنا غسلنا رجعنا كانوا منضفين الطاولة :) جابولنا هايجين ونكاشات سنان، صراحة حبيت هاي الحركة منهم :) بس خلصنا من الهايجين إجى وايتر ضيفنا قهوة سادة، كانت كمان لزيزة وكتير كانت لازمتنا بعد الأكل :) طلبت الحساب طلع 19 دينار تقريباً.. حاسبنا وطلعنا :) صراحة تجربة حلوة وممكن أعيدها :) صراحة المطعم كتير نظيف بس التواليت كان بدو شوية تنظيف زيادة..
  • Review by Muna of الدكتور مروان الهندي
    قبل 8 سنوات
    الدكتور مروان جد من أحسن وأرقى الدكاترة الموجودين بالبلد بالمرة مش مادي وماشالله شو شاطر.. رحتله يوم الاربعا لإني كنت أعاني من وجع قاتل بالركب، موقع عيادته بجبل الحسين بمجمع الأنشاصي (المجمع ياللي فيه مطعم المنقل ياللي بأول جبل الحسين) الطابق الأرضي.. مع إني وصلت متأخرة عن موعدي نص ساعة بس السكرتيرة استقبلتني بوجه بشوش وما حكت شي ع التأخير، خلال أقل من 10 دقايق إجى دوري، فتت لعند الدكتور استقبلني هو كمان بابتسامةوسألني عن الأعراض ياللي بعاني منها وبعدين فحصني واكتشف إنه عندي تخشن :( طلب مني أعمل تحاليل وصور أشعة ليتأكد وبس طلعوا النتائج وصفلي الأدوية اللازمة وما خوفني من شي بالعكس حاول يطمني ويعطيني علاجات سهلة ومو مكلفة :) كتير حبيت تعامله وصراحة بنصح فيه كتير مو شوي :) هو معتمد من شركة تأمين الشرق العربي وأظن كشفيته 10 دنانير (ما رضي ياخد مني الكشفية لإنه ع حد قوله مش مستاهلة :) )
  • Review by Muna of جو عجين
    قبل 8 سنوات
    من كم يوم كنت بالمنطقة وفرطانة جوع قلت دايماً بشوفه وبمرق من عنده فرصة أجربه، أول ما فتنا استقبلنا شب وأعطانا منيو وحبيت التشكيلة ياللي عندهم :) مناقيش وبيتزا ومعجنات وكل شي :) طلبنا منقوشة جبنة وتيركي ومنقوشة تيركي مع خضار ومنقوشة نوتيلا مع موز طلع الحساب 5 دنانير تقريباً، خلال أقل من 15 دقيقة كان طلبنا جاهز.. حبيت العجينة إنها طرية ومو سميكة ولا طعم المنقوشة عجين زي أغلبية المحل، بس ما عجبني التيركي بخضار حاطين معها زيتون أخضر وأنا ما بحبه لإنه بيعطي مرارة بالأكل بس إجمالاً كان الأكل زاكي وبيشبع ومو تقيل ع المعدة بالمرة وأكتر شي حبيته عندهم إنه كل منقوشة حاطينها بصحن لحاله ومغلفينها :) صراحة بنصحكم تزوروه وتدوقوا من عنده أي شي :) ع فكرة في عندهم قعدة صغيرة لياللي بيحب يطلب وياكلها طازة :)
  • Review by Muna of جيران
    قبل 8 سنوات
    جد موقع جيران من أحسن المواقع ياللي صارت بالدنيا :) أنا من الناس المدمنين للموقع :) صراحة بفتحه أكتر من الفيس بوك صايرة :) موقع بفيد الكل سواء من ناحية الحوارات أو النصائح ع الأماكن :) أكتر شي مفيد عملوه هو التطبيق تبع الموبايل :) بس يا ريت لو يعدلوا عليه ونقدر نضيف نصايحنا عن طريقه بصير أحلى وأحلى :) موفقين يا أحلى جيران ويا رب نشوفكم بتكبروا أكتر وأكتر :)
  • Review by Muna of ستوديو روزانا
    قبل 8 سنوات
    هاد الستديو كتير بحب أتعامل معه، أول شي موقعه تقريباً مميز إنه جاي بعد إشارات أبو نصير ع طول فالواحد بيقدر يصف بكل أريحية، طريقة استقبال الموظفين للزباين كتير مميزة وكتير بحبها صراحة :) يعني بيستقبلوا الواحد بإبتسامة وبيشوفوا شو طلبه وإزا مو فاضيين بيرحبوا فيه وبيخلوه يقعد ليخلصوا ياللي بإيدهم :) بالنسبة للتصوير عندهم كتير إحترافي بحسه وجد المصورين هناك فنانين، سريعين وعندهم أفكار مميزة صراحة، أي صورة بحتاجها ع طول بروح لعندهم وإزا كنت مستعجلة ع الصورة بيطلعولي الصورة خلال 10 دقايق وبتكون مرتبة كتير :) بحب تشكيلة البراويز والألابيم ياللي عندهم حتى بتزكر قبل فترة احتجنا براويز خشب للشركة ياللي بشتغل فيها وما لقيت من الموديل ياللي طالبينه الإدارة إلا عندهم ووصيت ع كمية وكنت مستعجلة عليهم كتير وأمنولي إياهم تاني يوم المسا وبسعر كتير رخيص :) صراحة ستوديو كامل مكمل مو ناقصه شي بالمرة :) بنصحكم تجربوه أكيد :)
  • Review by Muna of كلاج عمر
    قبل 8 سنوات
    مبارح كان في شب معنا بالشركة بده يجيبلنا حلوان ع الشركة من كلاج عمر، كنا بدنا نطلب طلبية كبيرة نوعاً ما إنه 30 جوز و30جبنة ولهيك قررنا نرن عليهم مشان يجهزولنا إياهم قبل ما نروح نجيبهم، ضلينا من الساعة 4:30 للساعة 5:45 واحنا بنحاول نرن عليهم وما حد بيرد، رنيت ع فرع شارع المدينة لأفهم شو القصة بكل برودة أعصاب الزلمة بيحكيلي يمكن معه خط موبايل ومو فاضي يرد ع الأرضي :s إنه عفواً من حضرتك بس لكلكته ع الموبايل أهم من الزباين؟؟ المهم بعتنا المراسل يجيبلنا الطلبية ويستنى ليجهزوها، الحلو إنهم ما تأخروا كتير ووصلنا الكلاج سخن بيغلي، طعمته زاكية كتير صراحة بس مشكلته قطره كتير زيادة :( جربت كلاج الجوز وجد كان خرافي :) صراحة رح أرجع أجربه مرة تانية بس ع الأغلب من فرع تاني :)
Next

أماكن أفضلها

صور أضفتها

Oreo Cake
Kitkat & m&m's cake
entrance