زين للاتصالات

انا مشتركة مع الشركة منذ 2004 تقريبا وخطي كنت بحتفظ فيه وبحبه كتير ..لكني بقيت فترة ماشحنته فذهبت للشركة لأجل أيقافه وخصوصا اني اريد السفر خارج الاردن فطلبوا مني ان اشحنه علما ان كان 20 _3 سينقطع نهائيا فقمت بشحنه بــ 12 دينار قبل هذا التاريخ ..وسافرت خارج الاردن ولغاية الان انا في الخارج

قبل مدة حاولت اتصل من خطي الزين على الاردن فعلمت انه توقف نهائيا وبعد ان سئلت علمت بان خطي قد تحول بأسم شخص ثاني ..

وانا اعرف بان هناك موظفين يساعدون بالسرقة واعرف واحدة منهم بالخصوص لان لها اسبقيات بالموضوع

والان ..من سيرد لي خطي المسروق ..وكيف يحصل هذا في شركة كبيرة ..عفوا كنت اظنها كبيرة ولهذا استمريت معها طوال هذه الاعوام

بتلاقي حالك مشترك بخدمة بدون ما يستازنو منك عشان يخصمو من رصيدك برضو بدون ازنك وبتحكي مع خدمة الزبائن بوعدوك انهم يسحبو اشتراكك اللي مش عارف كيف اتورطت فيه وبدون فايدة ولا حياة لمن تنادي.... اسوا خدمة واسوا سعر وانصب شركة اتصالات بالبلد عنا

لو مو كل صحابيني زين ما شريتو!!

لانو خطي مش طبيعي ..

ازا بشحن دينار زيادة احتياط بيطير!!

نفسي أفهم وين وكيف ازا بحكي في بلاش والمسجات ببلاش؟؟

انا من يوم يومي وانا خط زين هو فعلا اسعارهم غالية بس بضلها جودة ارسال قوية من شركة امنية الي اول خط معي من 2004-2010 منيح خط بس كان غالي بعدين غيرته بخط تاني 2010 -2012 وهلا معي شرحيتين ذي بعض بس واحد مع نت وتاني لا خطين مش طبيعي وكل صحابي الأغلبية معهم امنية بس انا متعود على زين بس مشكلة لما اسافر رصيد بروح مني عادي برد اشحنه

هذه شركه نصابه اليكم ما حصل معي

قررت شراء رصيد لجوالي من الموقع الخاص بشركه زين

قمت بشراء رصيد 1.65 دينار عن طريق الفيزا الخاصه بي

تم سحب الرصيد من بطاقه الفيزا وقالو لي لم يتم الدفع فشلت

كلمت البنك قالو لي تم سحب الرصيد

كلمت شركه زين 4 مرات

اول مره شرحت لهم القصه قالو خلال 24 ساعه إذا ما وصل كلمنا لنحل المشكله

كلمتهم بعد 24 ساعه مع العلم لم يوصل الرصيد

قامو بأخذ مني معلومات.....

قالو لي تم وضع مشكلتك في قائمه المتابعه خلال 2 ساعه سوف يتم حل المشكله

كلمتهم بعد ساعتين قالو لي قلنا لك سوف يتم حل المشكله خلال ثلاثه ايام

من تاريخ المشكله مع اعلم قبل ساعتين غير حكي كان

قلت لهم اوك يوم غداً سوف يكون اليوم الثالث وعلى الاغلب لن يتم الدفع لي

احذرو من هذه الشركه النصابه

انا استخدمت امنيه في شحن جوالي عن طريق موقعهم خلال ثواني وصل لي الرصيد بدون مشاكل

بالتوفيــــــــــــق

انا خطي من 8 سنين زين وما بغير عنه

تغطية الشركة ممناز, عروضهم ممتازة, انا حالية مشترك بخدمة المش طبيعي

اي استفسار بحكي مع خدمة المشتركين, كتير بساعو وبفيدو الزبائن

بتمنى منهم المزيد من التقدم والعروض المميزة

فترة الاشتراك من شهر واحد الى شهر ٧ التجربة الاخيرة مع الشركة اثبتت انو الشركة همها الاول والاخير النصب والاحتيال على المواطن والمغترب سواء سواء كان صاحب شركة او طالب او مواطن ميسور الحال تجربتي كالاتي : اليوم ٢-٩-٢٠١٢ الساعة من ٣-٥ مساء المكان مقر شركة زين الدوار الثامن

بعد الغاء اشتراك النت مع زين في اخر شهر ٧ لسبب رئيسي وهو تدني سرعة النت الى مستوى اني لا استطيع فتح اي شيئ قمت اليوم وبعد اكثر من ٤٠ يوم انتظار ومراجعات بالذهاب للشركة الام في الدوار الثامن لاسترجاع مبلغ التأمينات البالغ ٤٩ دينار , بعد دقائق من وصول الدور فامت الموظفة وكعادة موظفي شركة زين بالمماطلة والتسويف حيث قالت ان امر دفع التأمينات لم يصل ويجب الانتظار لسبوعين اضافيين (يعني بالعربي الفصيح ابرة مخدر) بعد ذلك مباشرة قررت تقديم الشكوى عند مدير الشكاوي في شركة زين مشان اطالب بالتأمينات (٤٩ دينار), بعد ما لغيت اشتراكي من النت اخر شهر ٧, اللي حصل انو بدل ما يحللي مشكلتي ويرجعولي المصاري فاجأني بأني مطلوب ٩٩.٤ دينار !! , انا لا انتقد احد ما حاليا ولكن اليوم سمعت ما يرعب من خلال انتظاري مع اخرين في استعلامات زين , شخص سافر لمدة ٤ ايام خارج الاردن ومعا خط زين ورجع وتفاجأ انو مطلوب ٥٠٠٠ دينار اردني , الاخر صاحب شركة من ٤ سنين وهو مشترك مع زين (خطوط شركات) وفجأة يجيلوا تلفون من القسم القانوني انو مطلوب للمحكمة مشان يدفع ١٤٠٠ دينار على اساس انو علي فواتير متراكمة ولمن طلب صاحب الشركة فاتورة تفصيلية اجا الرد انو في مشكلة بالنظام تبع المحاسبة , والاسوأ انو لمن طلع يسافر اظطر يدفعهم واليوم اجة مشان يسترجعهم ويشكي لزين . هذه نبذة بسيطة كانت عن شركة زين في الاردن.

أسوأ شركة اتصالات

اصبح الكثير يشكي من النصب المتراكم وسوء الخدما والضغط على المستخدم في دفع الفواتير والغاء العقود

يعني لما رحت بدي الغي اشتراكي طلبو مني تسديد قيمة باقي العقد اي ما يقارب 8 اشهر تقريبا

وساءت الخدمة بعد تتالي العروض الاخيره

مثل الاستخدام المجاني بعد ال 12 بعد ما الناس اشتركت طلعو بشغلة ال200% بعد ما خلص رمضان رجع كل شي وراحت هالعروض والناس لازم تلتزم بمدة عقد النصب والاحتيال

شركة زين!!

شركة إتصالات أردنية أبعد ما تكون عن إحترام عقلية المستهلك!! يتم التعامل مع الزبون بطريقة تنم عن عدم إحترافية و جهل بأبسط مبادئ خدمة الزبائن!! و حتى لا يكون كلام في العدم سأذكر 3 مواقف شخصية حصلت لي مع شركة زين دفعتني للكتابة في هذا الموقع المحترم.

1- حجز الرصيد من تلفونك دون إشعارك.

للعلم تقوم شركة زين بخصم قيمة معينة من رصيدك عند تعبئة الرصيد و تتحفظ عليه في حال أردت إستخدام الإنترنت, هذا الموضوع ينطبق على الهواتف الذكية, و يمكنك إستخدام الرصيد في عمل مكالمات,

تمام ما في مشكله نحجز على رصيدي عشان انا حابب أستخدم الإنترنت و حضرتكم خايفين يزيد إستخدامي تعريفة و يصير بدكم مني تعريفة, بس ممكن حدا يفهمني اذا انا مشترك بحزمة 500 ميجا و لسى ما استهلكت منها 20 ميجا!! شو مبرر الحجز؟؟؟؟ ليش بتحجز على رصيدي و انا أصلا مشترك معاك ب 500 ميجا؟؟؟ بس يخلصوا إحجز على الرصيد!! بس أكون مشترك ب 500 ميجا و فوق هيك حاجز على رصيدي؟؟!!!

2- "عفوا منك, عم نعمل تحديث على النظام" مين منا ما سمع هاي الجملة, كل ما تحكي مع شركة زين تسألهم عن مشكلة بقللك بنعمل تحديث على النظام!! يا زلمه اي هو بخلصش تحديث هالنظام!! بتذكر مرة في الشتا اللي مر, حكيت مع شركة زين الساعة 9 المسا يوم خميس و كانت الدنيا ثلج! و كان في تأخير مش طبيعي على خدمة البلاكبيري الشب اللي رد علي بحكيلي "عفوا احنا حاليا بنحدث في النظام" و كان ردي "حبكت!!!" احترموا عقولنا!!

3- اخر نقطة و هي أكثر نقطة مستفزة!!!

بتنزل شركة زين عرض "500 ميجا على جهازك الخلوي فقط ب 6 دنانير" و بكونوا محملينك 1000 جميلة على انه ب 6 دنانير!!! بتسحب حالك و بدك تشترك, بحكيلك عفوا بس ال 6 دنانير بنخصموا من رصيدك!!! يا اخي انا موافق انه أدفع ضريبة مبيعات على ال 6 دنانير!! بس ليش أدفع ضريبة زي كأني حاكي تلفون؟؟

في النهاية الشيء الوحيد اللي بقدر احكيه!!

"اللهم أعوذ بك من غلية الدين و قهر الرجال و خدمات المشتركين في شركات الإتصالات"

literally horrible

If you don't care about how much money they will deduct, with reason and without... go for them

If you don't care to visit their showrooms many times without having your problem solved, go for them

I regret I have subscribed with their wireless broadband offer, but the catastrophe was when trying to unsubscribe!!!

They sold me the offer with commitment for 1 year, but the showroom guy didn't tell me all the details and consequences when I need to unsubscribe.

I don't want to talk about the details here, but always ask for the details and be careful as if you were dealing with a professional frauding company in case you couldn't find alternative.

Viva Jordanian people.... you're surrounded all over with greedy institutions looking at your humble pocket :(

اسوأ شركة في مجال النترنت تعاملت معها ، انا اشتركت معهم بال HSPA+ ، والمفروض انو السرعة عندي UP to 42.2

لاني كنت ادفع اكتر من المشتركين بالسرعة up to 21 ومع هيك في كان يفصل كتيييير و الداولود بطيء جدا

وبس احكي معهم كل اللي بيقولولي ايا انو بيعتمد على عدد المستخدمين الشابكين على البرج بدون ما يحالو انهم يحلو المشكلة ببناء برج جديد مثلا مع العلم انو المنطقة اللي انا فيها هي الرابية.

اسعارهم غالية بالنسبة للخدمة كتييير.

ما بنصح حدا يتعامل معهم نهايئا.

شركة زين عندها فرع المبيعات و الاعلانات كتير قوي

مشان هيك دايما بتلاقي عروضهم منشورة بكل مكان

بس بالنسبة لتجاربي معهم دايما بحس انهم مغلوانين غير عن كل الشبكات

احيانا بتلاقي عرض بحكولك نار و من احسن العروض و بس تشترك بتكتشف انو لسا بدك تدفع كمان اشي

مشان هيك بطلت اثق بالمره باي عرض بقدمو

زين وريثة fastlink إلي كانت أكبر وأول شركة خلويات، من الناحية التقنية هي الأفضل، التكنولجيا هي أول من تطبقه، يمكن الاعتماد كلياً على الخلايا، والأقوى ارسالا... لكن, مع تطور الاتصالات في الاردن وضعف البنية التحتية, الفرق في الخدمة في بعض المناطق يكاد يكون معدوم, وبالتالي المقارنه على مستويات أخرى... مثل الاسعار, خدمة الزبائن والقدرة على المراوغة!

أنا شخصيا تجربتي مع زين سيئة, الخط الخلوي مدفوع مسبقا, وشغال عال العال, وانصح به, مع إنه الضرايب دبحتنا, بس عالاقل بجكش sms بنبص اليل إنه نص دينار تبرعات غصبن عن اللي خلفوك! (أو يمكن يحصل, ولكن توسلاتي لهم بان يبعثو الرسائل بالانجليزي ذهبت هباء, موبيلي لا يدعم العربي)

أما البرودباند أو انترنت, الإرسال قوي, لكن ال 7 ميجا بتشوفيش منهم غير نص كيلو وهذا متوقع ومفهوم لذلك هاي ليست نقطة قوة ولايستطيع أحد ان يتفوق في السوق اعتمادا على هذة النقطة... لكن المشكلة الطرق الاحتيالية لجعل الفاتورة تتضاعف في وقت قليل... مثل, بيع بطاقات 20 دينار, والسماح بشحن 18 فقط, طب وين راحو الدينارين؟ وهكذا... أنا لاحظت إنه معظم الشكاوي على زين مالية... ليست تقنية... عندهم قدرة عجيبة على اهمال الزبون لفترة طويلة وعدم اعطائه كامل المعلومة, هي هكذا أو انهم يتعمدون توظيف أشخاص غير مؤهلين لخدمة الزبائن...

لخطوط الهاتف انصح بالمدفوع مسبقا, ولخدمة الانترنت, حسب منطقة سكناك, انصح بغيرهم

بناء على التجربه الشخصيه فأن شركه زين للاتصالات تقوم بسرقه المواطنين عينك عينك وتأكيد على كلامي فاتورتي لخطي لهذا الشهر تمت اضافه الاشتراك الشهري مرتين والضربيبه مرتين والمخفي اعظم

انا جربت شركه زين من سنوات حتى لما كان اسمها فاست بصراحه الشباب بحترموني لما بتصل عليهم وباخذ وقتي بالحكي وبحل المشكله بس في عندهم مشكله الرد الالي ما بستفيد منه كثير

انا صراحة بستغرب من كل واحد كاتب عن زين إنها مش منيحة.. بالعكس أنا من يوم يومي خطي زين.. وكل يوم بطلع عرض جديد اقتصادي ومفيد اكتر من اللي قبله... يعني انا بالنسبة الي خطي "مش طبيعي‏"‏ بدفع ٥ دنانير بالشهر وبحكي ببلاش على زين.. وفي عروض لكل واحد وحالته الإجتماعية.. بالنسبة للمعاملة في مشكلة صغيرة إنهم ما بردوا عليك بس تحكي معهم... بس بصراحة لو ردو بتكون معاملتهم بكامل الإحترام.. اما بالنسبة للمعاملة داخل فروع زين.. انا صرت عامل إلي ولعشرة خط المش طبيعي وما شفت أفضل وأرقى من هيك معاملة خصوصا بفرع عبدون.. انا راضي كزبون عن الشركة وما عندي اي شكوة او اي مسألة بتضايقني.. وانا بحبها وبشجع الناس فيها.

زين مع انها اكبر شركة اتصالات في عمان بس بصؤاحة اسم عالفاضي

خدمة الزبائن ابدا ما بردوا عليك

عن في المنطقة الي ساكنين فيها ما في شبكة ابدا لما بدنا نحكي التلفون لازم نعيد الكلمة اكتر من مرة لتوصل

وحكينا معهم كتير وعلى شي فاضي

وحتى اذا شبكنا انترنت كمان مافي شبكة

وانا بحسهم بنصبو على ناس بقصة المسابقات وبخصموا اكتر ماهو مطلوب في عندي صاحبة اشتركت عندهم في مسابقة بعتت 15 مسج شركة حاسبتها على 45 مسج وهادا انا بعتبره نصب

وفي عندهم شغلى انا ما بحبها كل شوي وهو بجيلك مسج اعلانات

يعني بصراحة انا ما بحب استخدم زين

ماخدين بحالهم مقلب! هاد اللي بقدر احكي! تعامل الموظفين (الكول سنتر) مش محترم بالمرة و ما بساعدوك ابدا يعني المرة الماضية اتصلت اسأل عن مشكلة تقنية حولوني 100 مرة من موظف للتاني و ما حدا عارف يساعد!

و غير موظفين السيتي مول ما شاالله عليهم! المانيجر بحكي معك و هوه لافف ظهرو يعني ولا حتى مستنضف يطلع عليك و بعاملوك زي كأنك انت الغلطان و همه دايما على حق!

و المشكلة اللي عندي هيه الراوتر اللي عملو عرض عليه قبل اكمن شهر عم ندفع الاشتراك و الراوتر ما بشتغل بالبيت بس لما نوديلهم ياه عالمعرض بالتامن بشتغل عندهم! بس بالبيت لأ و حكولي رح يبعتو حدا يشوف المنطقة عنا بلكي الغلط منها بس هي صرلنا اكتر من شهر عم ندفع لخدمة احنا مو مستفيدين منها! اذا هاي المشكلة ما انحلت رح احكي مع محامي لأنو هاد اسمو نصب!

هاي الشركة عليها نقاط كتيرة من ايام ما كانت فاست لينك فكيف هلأ؟؟ بصراحه الرصيد بيروح الواحد ما بيعرف كيف و ليش وازا بالغلط الواحد اشترك بإشي بالموت لا يخلص منه طبعا بعد ما يكون دفع بلاوي زرئا حتى الارسال فيها صار سئ جدا يعني الواحد صار لازم يئعد على الشباك مشان يلئط اشي و بئضيها الواحد عيد و مش سامعه !! و جديد خدمة العملاء صارت سيئة مرة اعدت اسبوع كامل كل يوم بحكي لمده ساعه و ما حدى برد علي آخر اشي لغيت الرقم كله و جبت خط امنيه !!

شركه زين شركه عالميه ومعروفه فانا معي خطين رايسيين من 10 سنوات ولم تواجهني اي مشاكل معهم وانا من كبار العملاء عندهم وخدماتهم جيده ويقدمون الكثير من العروض باستمرار ولهم فروع منتشره في جميع انحاء المملكه وفروعهم في المولات يداومون باستمرار حتى في العطل الرسميه