مطعم ساروجا

انا من زباين هادا المحل لانه الاكل كتير زاكي ونظيف عندهم صارلي تقريبا سنتين بشتري من هالمحل وجودة الطعام هيا هيا ما تغيرت ..

انا دايما بطلب من عنده ديليفري .. ملتزمين جدا بمواعيدهم والديليفيري عندهم مجاني عالاقل هيك انا بعرف يمكن لاني بنفس المنطقه .. بس للاسف ما عنده ديليفيري ازا كان الطلب وجبه وحده :(

طبعا انا بوصي بالكبسه عندهم لانها كتير زاكيه واسعارهم كتير مناسبه .. صح زاد سعر الوجبه شوي بس بصراحه ما اثر كتير يعني كانت بدينارين ونص صارت بدينارين و٧٥

مطعم سروجة (أيمن لبناني) هو الوجهة الأولى للعمال لأن السعر عنده مناسب جدا وكمية الأكل مشبعة.

يوفر الأكل العربي مثل المنسف والكبسة بشكل دائم إضافة إلى وجبات مختلفة على مدار الأيام مثل الكبة اللبنية أو الكفتة أو حتى الفاصوليا البيضا. وهذا يجعلك تشعر وكأنك في بيتك.

وبغض النظر عن نوع الأكل الذي تختاره فإنك ستحصل على نفس الدجاج.

المحل دائما أزمة وربما لا تجد مكان فيه لكن يمكنك أن تطلب التوصيل داخل الصويفية مجانا.

من أفضل المطاعم التي زرتها، وجبة الكبسة متوفرة يوميا و طازجة دائما من كثرة الطلب. هناك وجبات أخرى مثل الأوزي و المنسف و جميعها رائعة. الأسعار مناسبة جدا، وجبة الكبسة مع سلطة و لبن فقط بدينارين و نصف. يتوفر لديه أيضا خدمة التوصيل.

صاحب المحل "أيمن اللبناني" محترم وتعامله راقي جدا.

قد يكون المأخذ الوحيد لي على المطعم أن مساحته لا تتناسب و حجم الطلب فالطلب كبير جدا والمحل ممتلئ أغلب الأوقات.

أنصح الجميع بزيارته.

مطعم كثير رائع.. الاكل عندو طعمه غير شكل يعني الطبيخ الي بطبخو ممتاز كتير و ما بتلاقي واحد بكفائته وبتشبع و صاحب المحل بتاكد انو كلشي تمام و طلبك زي ما بدك ،وانا بنصح اي واحد بشتغل بالصويفية يجربه لانه كتير صاحب المحل محترم و تعامله راقي و بقدم اكلات متنوعه.

صاحب المكان اسمو ايمن اللبناني ... أسم صاحب المكان مشهور أكثر من أسم المكان إلي هوا ساروجا...

المحل موقعة مخفي شوي !! بس ماشاءالله مشهور وكل الصويفية بتعرفو :) بعمل طبيخ كتير زاكي ومرتب في عندو الكبسه والمنسف هدول دايماً بعملهم طول الاسبوع ... يوم الثلاثاء بعمل كبه لبنية كتيييير زاكية انا ما باكل إلا هيه والكبسه مشان هيك ما بعرف شو بطبخ بالايام التانيه بالتحديد. إذا حابب تعرف شو طبخة اليوم بكون كاتب على وايت بورد الاكلات إلي عاملها اليوم.

بالنسبة للوجبة رز وقطعة جاج انت ممكن تحدد إلي بتحبها وسلطة ولبن ومخلل :) الوجبة بتشبع منيييح :)

سعر الوجبة الوحدة ثابت 2.5 دينار .. بتخيل انو كتير منييح ورخيص كسعر.

الصفة كتيير صعبة مع انه في جمبو ارض فاضية بس دايماً مليانة سيارات.

عندو قعدة جوا تقريباً عندو 6-7 طاولات اذا ما لقيت محل تنجبر تطلب سفري. المكان نظافتو 70% كبيئة مش كأكل الاكل كتير نظيف.

صاحب المحل "أيمن اللبناني" كتييييير محترم ومزيح بس اوعا اوعا تاخد فراطة من الصحن إلي حاطة على المكتب بدون ما هوا يعطيك الباقي ههههه. بخف عقلو وبجحرك جحرة عمرك ما بتنساها هههه .

الخدمة كتير سريعة يعني مرة طلبنا 7 وجبات ... خلال 10 دقايق كان مخلصهم ومغلفهم :)

جربو واحكمو :)

هذا المطعم كان تجربة علماشي ، سمعت عنه وقلت اجربه ، طلبت دليفري واجا الطلب على الوقت ، بس منظر الاكل ما كان بشجع كتير يعني كله محطوط بكياس هبلة وبطريقة عجيبة ومش مرتب بس لما جربناه عن جد بستاهل الواحد يدوقه ، طلبت كفتة بالطحينية وكانت بتشهي ( مع انو المنظر مش ولا بد) كانت من ازكى الوجبات الي اكلته كأكل شرقي من مطاعم ، والي احلى من هيك انو الوجبة عندهم ب ليرتين ونص وهذي الوجبة بتتضمن : الطبق مع خبز ولبن وسلطة ، ومني وعلي الوجبة بتكفي شخصين بالراحة من كبرها ، صديقاتي كمان جربوه وكانو مبسوطين كتير .

بالنسبة للمحل انا ما رحت عليه بس سمعت انو عنده قعدة كمان.

بس بشكل عام المطعم كتير زاكي

اليوم أكلنا من عندو. بصراحة الطعم عادي، مو مميز بالمرة، ع اساس انها كبسة ما الها اي دخل بالكبسة، كإنو رز بس، لا بهارات ولا صوص، و السلطة كمان كمان، من الاخر، اكل مستشفيااات، حطيت عليه رطل ملح مشان احس انو الو طعم، الي جرّبو اكلات تانية قالو زاكي، فإزا حابيت تجربو لا تجربو الكبسة، و الجاج مقلي!! :-( ، السعر بالنسبة للكمية كويس، بس للطعم لأ

اليوم طلبنا من عنده الغدا، أنا طلبت رز بخاري كان طيب كتير، كان معه لبن وسلطه ومخلل، المخلل تجاري والسلطة عادية جدا، بندورة وبقدونس.. الدجاج كان مقلي قلي وكان حاطط كل الدجاج بكيس لحالهم، يعني مو مع صحن البخاري، ما حبيته، الاكل نضيف ووصل بسرعة، قلناله بدنا اياه عالوحدة ونص وفعلا هيك اجا، السعر مناسب جدا الوجبة بدينارين ونص، وبتشبع كتير، يعني اذا ما كنتو اكّيلين اطلبو كل اتنين وجبة وحتشبعو :)

أكلت من هاد المطعم مرتين مرة أكلنا كبسه كان مشي حالها بس أكيد الكبسه تاعت البيت أزكى :) وتاني مرة أكلت كبه بلبن كتير كانت زاكية وحجمها مناسب .. بشكل عام بحاولو يعملو الوجبات متكامله بإضافة السلطات والخبز، من ناحية نظافة ما شفت شي مو نضيف ،، بس المكان نفس ما في مجال البنات يعدو في الأحسن إن يطلب ديليفري أو دريف ثرو :)

مطعم رائع.. أكلو بفش الغل وبشبع، يعني لو انت بتشتغل بالصويفية المفروض تتغدى عندو ثلاث ايام بالأسبوع ع الأقل، أحلا في في المطعم إنو صاحبو سوري ومشاء الله عليه بهتم بزباينه واحد واحد، حتى اني مرات بفوت المطعم واللي بمشيني صاحب المطعم، ومن مميزات المطعم إنو سريع جداً في تقديم الطلبات، الوجبة بتشبع وكافيه وكل يوم عندو عدة طبخات متنوعة.

وبالنسبة للسعر مش حتلاقي بعمان كلها مطعم بقدم هيك وجبات بس ليرتين ونص، حتى اني بفكر أعزم صحابي عليه اخر الشهر بدل ما "أطبل" وأكت مصاري في مطاعم وجبات سريعة ووجبات غربية.

وأحلا ما في المطلعم إنو للزلام بس!! لأنو عمري ماشفت بنت بتشتري منو، لأنو غالباً بطلبو ديلفري!

نصيحتي لصاحب المطعم إنو يسأل الزبون اللي بطلب طلب في رز خارجي إذا كان بدو خبز ولا لاء لأنو معظم الناس ما بتوكل الرز بالخبز.