مواكب للسياحة و السفر

شركة فاشلة بمعني الكلمة من حيث المواعيد والتعامل والتنظيم...مكاتب مكركبة ما بردو على تفلونات العملاء لانهم دايما معجوقين يعني مرة كنت عندهم بالمكتب رن تلفون الارضي الموظفة اللي على المكتب رفعت السماعة وسكرتها لانو حضرتها ما بدها تستقبل اتصالات... صراحة اسوء شركة شفتها بحياتي وللعلم متعودين على البهادل بشكل كبيييييييييييير

مكتب سياحة وسفر شامل

عندو رحلات داخلية وخارجية .. داخلية متل ( العقبة ، وادي رم، جرش ، ام قيس، كل يوم جمعة و العقبة ووادي رم ثلاثاء وخميس

رحلات خارجية متل سوريا ، لبنان ، تركيا ، انطاليا ، ماليزيا ،كمان بعمل رحلات عمرة مع طيران الملكية

وكمان بعمل رحلات لفلسطين :) وانا هادي رحلة حاليا عم بقدملها ويارب تتطلع الفيزا وازور فلسطين وبس لازم يلي حابين يطلعوها يقدموا للفيزا قبل 23 يوم واحتمال تتطلع 70% طبعا المكتب بقدمها

* أنا جربت معهم الرحلات الداخلية والخارجية والي عجبني عندهم:

1- الباصات مريحة ومكيفة .

2- الدليل السياحي بضلو معك طول الرحلة وبجاوب على اي استسفارات منا بوجه بشوش واحنا من حظنا كان دليل معنا شاطر يعني بالحدود كان يجمع كل الجوازات منا ويختملنا ياها فورا يعني ما نقعد كتير على حدود

3- كل شي مكتوب بالبرنامج الخاص بالرحلة الي مسجلينها بينعمل بالحرف الواحد بس يمكن يكون في تأخير بس ممكن يكون من المسافرين نفسهم .

4-اسعارهم شاملة الضريبة ومو مكلفة ،، ونفس الاسعار الي بنشوفها باعلاناتهم بندفعها بس نحجز للرحلة لا زيادة ولا نقصان

5- وكل اسبوع بنزلوا اعلانات لالهم بالجرايد ودايما في تنوع عندهم وشي جديد .

6- حبيت فكرة عندهم يعني اذا حابين انتو تعملو رحلة لمجموعة بس انتو تكون بالرحلة موجود يعني انتو فيكم تختاروا الفندق ، المطاعم ، عدد الايام ، البرنامج الي رح تمشوا عليه بالرحلة والمواصلات المكتب بنظملكم ياها وبحجزلكم وبجيبلكم اسعار منيحة كمان وبطلع معكم دليل

سياحي كمان من المكتب فكرة كتير حلوة وانا صممت لرحلة هيك وساعدني المكتب كتير

7-عندو خدمة تذاكر طيران كمان

8- مكتبهم كتير مرتب وفي موظفين بعدد جيد يعني الواحد اول ما بفوت على مكتب فورا بساعدو ما بتقعد تستنى

وتلفوناتهم دايما بردوا عليها وبجاوبوا على اي استسفار عن طريق التلفون .

* إذا مفكرين تسافروا وحابين تغيروا جو وخصوصا عيد الاضحى جاي على الابواب بنصحكم تجربوا مواكب وهاي نصيحة مجرب واكتر من رحلة مو رحلة وحدة

عنوانه : الصويفية - بجانب مخابز السفراء - فوق مطعم المنقل الطابق 2 تلفون 06/5819833 - 0797115525

وعلى فكرة في فرع في اربد

شارع الحصن - مجمع ( فاشن سنتر )

كتييير كتيير مناااح تعامل راقي ...مواعيد نوعا ما دقيقة أسعار ضمن متناول الجميع تنقصهم شغلة وحده وهيه الخبرة ....بس كابداية شيئ كتيير جميل و حلوو و ألهم مستقبل مشرف ان شاء الله

مواكب للسياحه والسفر سافرت معهم مرتين خدمتهم جيده والتزام في المواعيد واسعارهم للرحلات منيحه والتنظيم لاباس فيه والباصات يعني منيحه مش بطاله وبامجهم السياحيه كويسه والتعامل مع الزباانن جيد

تعامل الموظفين بالمكتب كثير ممتاز ومتعاونين كثير

التزامهم بالمواعيد وببرنامج الرحلة جيد جداً

رحت معهم رحلتين رحلة على البترا ووادي رم والعقبة بهاي الرحلة كان مبيتنا في العقبة بس مبيت أغلب اللي جايين معنا في وادي رم

فحجزولنا باص مخصوص إلنا يوخذنا من وادي رم لحد الفندق في العقبة وثاني يوم أخذونا من باب الفندق لنكمل الجولة بالعقبة والمرشد كان كثير مهتم فينا وبكل واحد في الرحلة

ورحت كمان معهم على سوريا يوم واحد كانت ممتازة ما عدا المرشد كان ثقيل دم واستغلالي من حيث المصاري يعني أخذ من كل راكب مبلغ من المال عشان الحدود السورية طبعاً 3 أرباعه لجيبته وجيبة السايق .

إجمالاً بعطي مواكب 5 نجوم بس اللي خلاني أعطيهم 4 بعض المرشدين لازم يختاروا ناس أحسن ومش غلط لو اتصلوا بعد الرحلة ببعض الناس وسألوهم عن المرشد تبعهم .

تعتبر من اسوء الشركات السياحية والتي تستغل السائحين، ذهبت في رحلة معهم على عيد الاضحى لبيروت و:

1. تاخر الباص ساعة حتى طلع

2. خرب الباص عند حدود جابر واستنينا 3 ساعات ختى اجا باص غيرو

3. عند الحدود بيجي الدليل بحكيلك اعطيني 2 دينار من كل راكب عشان يمشونا (2* 50 = 100 دينار) تصهم يروحو للدليل.

4. خرب الباص مرة تانية في جبال لبنان لأكثر من 4 ساعات

5. الدليل (اسمة احمد) وظيفته السمسرة على حساب الركاب اخذنا عصب عنا لمطعم ما مقرف وحلا كل واحد يدفعله 20 دولار حق وجبة اكتشفنا بهدين انها ب 10 دولار.

6. وصلنا الفتدق بعد 18 ساعة في الباص (من الساعة 12 بليل وحتى الساعة 8 المسا ثاني يوم).

7. تعامل سيء مع الركاب وعدم اخذهم للأماكن السياحية المشهورة الا في احر يوم واحنا مروحين بفرجينا اياهم من الباص (الروشة/ الصخرة/ الحمرا ...الخ)

8. تأخرت وحدة وامها وابنها في التلفريك وتركوهم يدبروا حالهم ويروحوا لحالهم مع العلم انه كل الركاب كانوا موافقين يستنوهم.

9. في الترويحة خرب الباص وشبعت صدرونا روائج البنزين.

10. نفس اسلوب السمسرة في المطاعم وهند الحدود.

للعلم تم تصوير اراء جميع المسافرين في تلك الرحلة التي توضح الانظباع السيئ عن الرحلة واقتراح تغيير اسم الشركة من (مواكب) الى (عناكب).

قبل اكمن شهر روحت على لبنان وسوريا طبعا بعد شهر الرحلة اطلعناها ... اجلوها اكتر من مرة ... البرنامج مش منظم الاماكن الي بتكون مكتوبه ما بتزورها ... الاسعار عادية العروض بس حكي مافي تنفيذ ... جايبين شفير باص مش عارف يطلع من الاردن لسا ... طبعا ضعنا اخر شي في شخص دله على الطريق ... الرحلة كانت ابـــــــــــــــدا مش حلوة

رحت معاهم برحلة على رم و البتراء

لاحظت لطف الموظفين و الدليل كان مرح

السعر كان منطقي

لكن الباص اللي رحنا فيه كان بطئ بشكل مزعج

التزام الشركة بالمواعيد مقبول

التنظيم كمان مقبول

ما جربت غيرهم فبقدرش اقارن لكن ممكن ارجع و اروح معهم مرة ثانية

مكتب مواكب الكائن بالصويفية جيد جدا لاسباب التالية

قبل فترة اجيت احجز باوتيل بالعقبة و كان كالأاتي :

-جميع مكاتب السياحة طلبت اكثر من سعرهم بما لا يقل عن 15 دينار للغرفة

-بيعملو خصم زيادة حتى عن العرض بالجريدة مثلا انا حجزت لليلة من عندهم ب 95 و باقي المكاتب و منهم دالاس السعر كان لا يقل عن 108 دينار

-معاملة لطيفة و بروفيشينال مافي لا دلع ولا غيرو

-ماجربت اطلع معهم برحلة منظمينها بس أظن بتكون ممتازة

الله يوفق :)

-