Sana'a Msha'al Beauty Salon

انا جربت الصالون مرتين ,, مرة على حفلة عادية و كان مكياجي حلو و التسريحة حلوة ,, المرة التانية بيوم عرسي و مارح ارجع اعمل عندهم بعدها ,, المكياج تقيل كتير ,, و ازا طلبت مكياج بطريقة معينة ما بترضى مدام سناء تعملوا , بتقلك ما بزبط على و جهك و على عينيكي,, كأنو المكياج الوحيد يلي بزبط هوه التقيل ,, و التسريحة طلبت تسريحة معينة قبل ب يوم و فرجيتها الصورة و قالتلي ماشي, و بس رحت عندهم يوم عرسي ما رضيت الكوافيره تعملها و عملتلي وحدة بتخزي ,, بيعملوا نفس التسريحات لكل العرايس ,, و بخلوا راسك كتير كبير من ورا ,, و ازا طلبت اتغيريها ما برضوا بحجة انو راح تطلع تسريحة بشعة و هيك بتخربي سمعة صالون سناء مشعل !!!

بيوم عرسك ازا حبيتي المكياج التقيل و التسريحة المنفوخة كتير من ورا روحي عندهم,, ازا بتحبي الاشي الرايق ما تقربيهم

اشي تاني, بحكولك انو كل الصور اللي نازلة على صفحتهم بالفيس بوك من شغلهم !! يعني كزبة كتير كبيرة صغروها شوي !!!

انا جربت صالون مدام سناء عملت تسريحة ومكياج وفرنش تجربتي كانت رائعة لانو شغلهم بجنن واسعارهم ممتازة وانشالله رح اكرر التجربة بالمستقبل

من بعد تجربتي مع هالمكان حبيت اشترك بجيران لحتى اشاركو بتجربتي اولا انا شفت شغلهم عالفيس ومدح الجميع فحبيت اروح اجرب عشان ازا عجبني احجز لعرسي عندهم ... طبعا احسن شي عنوانهم واضح جدا وما بيغلب ابدا والاسعار برضو منيحه بس معاملتهم سيئه جدا جدا اولا عدم احترام المواعيد وتانيا المحل زغير والزباين كتار والموظفات مو ملحقييين والاهم ازا طلبتي منهم اشي وما عرفو يزبطوه متل مابدك يحطو الحق عليكي او بتيجي وحده بتحكيلك اول مرة بسمع فيه .. انا صبغت وقصيت شعري وسشورت يومها بالنسبه للون ضرب والسشوار والقص شلفقه لانه كان فيه ضغط بالصالون هاد بالنسبة للموظفات اما بالنسبه لمدام سناء كلمه الحق تنحكا شغلها بالمكياج حلو انا شفت شغلها ع صبايا كانو بالصالون .. وبتمنى انهم يحسنو معاملتهم مع الزباين وانه يختارو موظفات اشطر من هيك .. رح اعطيكم نجمه وحده وحاليا ما بنصح حدا يروح عليه وبالنسبه الي مارح اكرر هالتجربه وان شاء الله تحسنو من حالكو شوي بالتوفيق

من فتره رحت اجرب صالون سناء مشعل من كتر ماحبيت نصيحة جارتي منى عليه اخدت موعد ورحت الموقع مابضيع ابدا وسهل كتير والبنايه جديده ولسا ما افتتحوها الصالون بالطابق الاول وبس فتحت الباب اول شي ماحبيته انه الباب بفتح عالصالون مباشره يعني مافي برايفسي للزبونات والشباب بس يمرقوا بشوفوا كل يلي قاعدين جوا !!!

المكان مو كبير ٤ كراسي للكوافير و٢ للبديكير وغرفه مترين بمترين للميك أب والتسريحات !!

كان في زباين كتير ويلي بشتغلو ٤ مو ملحقين على شي ونظام المواعيد مو دقيق بالمره كان موعدي عال٢ ونص ومن العجئه بلشنا عال ٤ بصراحه مرتين كنت بدي اروح ويعتذروا عن التأخير واضل استنا

شغلهم حلو بس مو بروفشنال من حكم خبرتي بالتجميل وكان هدفي من الزياره اشوف شغلهم وبعطيهم نجمتين صراحه عالمواعيد والشغل والسرعه

اليوم إجى ع بالي أجرب صالون سناء مشعل قد ما بشوفهم بنزلوا أشياء حلوة ع الفيس بوك :) ركبت بهالتكسي وقلت يا الله، عنوانهم بالمرة ما بضيع على نفس إشارات البشيتي ياللي بخلدا بمجمع جديد ع الكوربا جنب كلية الخوارزمي اسم المجمع بيت العمر، هم بالطابق الأول.. الصالون من جوا مو كتير كبير بس كل شي عندهم وصراحة ديكوراته كتير حلوة، استقبلتني مدام سناء بابتسامة وبطريقة كتير حلوة :) بلشت بدي أعمل بديكير ومناكير وعاملين هلا عرض إنه البديكير والمنيكير مع رسمة على اصبعين ب12 دينار وصراحة الصبية ياللي بتعمل الأضافر خرافية قد ما شغلها حلو :) بتعمل كل الأضافر نفس الطول وبنفس الطريقة وجد بتطول بالها كتيييييييييير ليطلع الشغل ممتاز جداً :) الرسمة بتقدري تختاريها من تشكيلة كتييييييير كبيرة من الرسمات الموجودة وباللون إلي بدكم إياه وإزا بدكم تزيدوا رسمات ع كل رسمة بياخدوا نص دينار.. خلصت الأضافر وبلشت بالحواجب وعملتلي إياهم مدام سناء وجد أول مرة ما بتوجع من الخيط والحلو إنه قد ما يكون الحاجب مضروب ما بترفعه :) إجى وقت السشوار غسلولي شعري وبلشت الصبية تسشورلي ماشالله شو سريعة وصراحة كنت خايفة من سرعتها ما يطلع شي مرتب بس ربنا الله طلع إشي خيالي والحركة ياللي عملتها فيه كتير حلوة بيّن وكإني مغيرة قصة شعري :) صراحة لو كان معي وقت أكتر كنت حابة أجرب عندهم الحمام المغربي بس انشالله إلهم زيارة خص نص من أول اليوم لأعمل عندهم كل شي :) الحلو إنه كل شهر بيعملوا عروض كتيير مميزة وحلوة :) أسعارهم كتيييييييييييييير مناسبة يعني بديكير ومناكير وحواجب وسشوار ب19 دينار :) صبايا بنصحكم تجربوا وأكيد ما رح تخسروا :) شغل ممتاز وأسعار جداً مناسبة وموقع قريب وتعامل ولا أروع :) جد يعطيكي العافية مدام سناء إنتي وكل الصبايا :)