Kobbeh & Bastouni Café

كبة و بستوني كل اسبوع لازم اجيه مرة على الاقل المكان رائع بكل ما الكلمة من معنى !!

الديكور حلو بسيط شوي بس اجواء صحبة و شلة و لعب شدة و زهر ..

المحل نظيف كتير صراحة ما عمري اكلت فيه بس بشوف الاغلب هناك بطلب اكل , الاراجيل زاكية و الفحم ما بطول ...

كتير برتاح فيه بس المسى بقلب كله شباب ما بنصح البنات يدخلوه لانه في شاشات لعرض المباريات و الشدة و هيك ..

في قعدة داخليه و خارجية في تنوع في المنيو في بارك مجاني ورا المحل ..

المحل على دوار عبدون مباشرة ما بتوه اسعاره عادية متله متل باقي المحلات بس بالنسبة الي بحبه اكتر لانه بتعملو فيه شي بتلعبو شدة و بتنبسطو مش بس قاعدين و بتحكو ...

بحب كتير الاغاني الي بحطوهم بالمحل ..

بس في مشكلة انه المحل فيه كتير طاولات و هو صغير بتحس الناس الي قاعدين جنبك قاعدين معك !! بس كل حدا بكون ملتهي بلعبته و الشدة ..

كتير بنصح فيه صراحة

انا زرتو اكتر من مره ............ القعد فيه بتجنن ومريحه كتيير

الخدمه ممتازه جدا والنظافه عاليه كتيير

بصاااحه انا بنصح الكل يجربو لانو عنجد بيستاهل التجربه مره واكتر

من أسوء الاماكن اللي عمري زرتها

الخدمة سيئة و الشغيلة بعاملوا الزبائن بعدم اهتمام

الأجواء غير مريحة بتحس أنوا في اشي مش صح

الأسعار مش لازم تكون زي الكافيهات اللي حوليك لأنوا ما في مقارنه لازم تكون كتييييييير أرخص منهم لانه ما بتقدموا ربع اللي بقدموه

انا رأيي انه ترجعوا نايت كلب زي ما كنت قبل بكون أحسن

i went to this place about 3-4 times only because i can play cards there, but each time i found it more and more uncomfortable, first of all it is so crowded and the music there is so loud and annoying, second the service there is so bad, what happened with me last time the music was so loud so i asked the waiter to reduce it a little, then he start to make fun of it and also the man on the cash then they make it louder so i went out of the cafe and that waiter was so pleased about it like he is making fun about it he said you are the most welcome,, very bad service and not polite at all ,, i dont recommend this cafe at all

امبارح جربت كبة وبستوني لاول مره، وما بنصح اي شخص فيه لانه ما عجبني نهائي

المحل مو كتير كبير وفي قعدة داخلية وخارجيه بالنسبة للديكور كويس بس مش واو وكان الي كتير ملاحظات على هاد المكان

اول شي قعدنا ساعه الا ربع ولا حدا اجا سالنا شو تشربو ولا جابولنا المينيو ولما زهقنا واحنا بناشر للشباب الي بشتغلو بالاخر قمت انا عليهم وحكيتلهم معلش النا زمان وبدنا نطلب، المهم طلبنا..

ثانيا انا طلبت عصير اورانج منشان ابرد شوي بالحر جابولي اياه مو بارد ابدا والي كانو معي طلبو اشياء تانيه وحسب ما حكو مو كتير زاكيين

ثالث شي جابولنا صحن مكسرات فاحنا فكرنا على اساس ضيافه ونزلو عالفاتورة ثلاث دنانير بدل مكسرات ولما حكيتلهم بس احنا ما طلبنا حكالي الويتر احنا كان عنا miniman charge 7 دنانير عالشخص ( يعني ليش يكون عندهم miniman charge لا في عندهم حفلة او فعاليات ولا شي محرز)

رابعا عندهم الموظف الي بياخد الطلبات شكله ازعر وبيطلع عالبنات بطريقه مو حلوه وانا ما عجبني هاد الشي

خامسا سعره غالي يعني انا ما طلبت غير عصير اروانج ومي ودفعت عن حالي 6 دنانير تقريبا يعني الواحد يروح على شي فخم او فندق ويدفع شوي زياده احسن

بالنسبه لقعدة المكان مو مريحه بالنسبه الي لانه الطاولات قريبين من بعض وما في خصوصية بالقعدة والمحل شعبي كانك قاعد بقهوة بوسط البلد

انا شخصيا ما بفكر ارجع افوته مره تانيه

كافية مريح نفسياً ... ديكور حلو ومرتب ومهتمين بالنظافة كتير ... أجواءه حلوه ما في صوت أغاني عالي، في قعده خارجية و

داخلية الخارجية حلوه وجوا الديكور حلو ومرتب، ارجيلة سبيشال خرافية :) ، وشوكليت ميلك شيك كمان خرافي، الفحم ما بطول ليجيك بس في ويتر كل شوي وهوا ناطت بدكم اشي تشربو اشي ، انو طلبنا مالك يا زلمه الظاهر حبنا للوووولل :)

الناس الي في حلوين ومرتبين.

بالقعده الي بره ما بصير تلعب شده وطاولة بس جوا،

اسعاره زي باقي الكفيهات الي من نفس الطبقة...

جربو يستحق التجربة

من الاماكن المفضله لدي .. فيو قعده بره و جوه الديكورات من جوه رهيبه طبعا المحل عباره عن كافيه و مطعم .. الارجيله السبشل من عندو رهيبه .. بعدين الحلو بالموضوع أنو بتقدر تلعب شده و طاولة زهر :) و أسعارو جدا عاديه .. و كأنو بعملو كل خميس مسابقات أو ألعاب كتير الجو بكون حلو :)

الكافيه كتير حلو و رايق و المشروبات و الاكل كتير طيب ، انا جربت عندو سيزر سلاد و سنكرز ملك شيك طعمه روعة، الاراجيل كمان ممتازة.......... باختصار صار مكاني المفضل :)

كبة و بستوني اصبح واحد من الاماكن المفضلة عندي. الكافيه موجود على دوار عبدون تحت افنيو جنب السنابل.

المحل عندو قعدة داخلية و خارجية، ديكوره كتيير حلو، قعدته مريحة و جوه جميل.

ارجيلته ممتازة و طيبة، جربت من عندهم four seasons كوكتيل و ويدجز فرايز و Rocca Salad و اكثر من صنف، جيد من طريقة التقديم و الطعم، لكن عندي ملاحظتين، الاولى ان المنيو مش منوعة كتير و اتوقع انها بحاجة لبعض التعديل و الاضافات.

الملاحظة التانية انو المحل مرخص للعب الشدة و الطاولة الزهر فقط في الداخل، و ممنوع اللعب في القعدة الخارجية، مع انه مع الاجواء الربيعية الان معظم الناس بتحب تقعد برا، فبتنجبر تستغني عن لعب الشدة.

الخدمة ممتازة جدا، الموظفين سريعين و بشوشين.و اسعاره ممتازة معتدلة، و في عندهم خدمة فاليه.

هاد المحل اول مرة بدخلوا ، بس لأجل اللي شفتوا رح الغي كل الكوفي شوبات اللي دخلتها لانه بقبة وبستوني ارجيلة بتجنن ، والخدمة رائعة والجو رائع والديكور بهبل والجلسة مريحة جدا ، الاجمل من هيك الاسعار قليلة مقارنة بالخدمة والموقع ( دوار عبدون ) وما في ضريبةاو اي دفع على الخدمة ، يعني بتدفع السعر اللي على المنيو بس ، زبائين كوالتي ، عائلي وللشباب المرتبة بس ، بتفوت كأنك بين عيلتك ، مثلا الارجيلة 3.5 وعلى الكاش نفس الشي ، بنصح الجميع يزورو وهو الكوفي شوب مرخص للعب الشدة للتسلية بجو عائلي

بنصح الجميع يزورو ،،،،،،،،،،،،،،،،،،،،،،،،ن