King Hussein Park

Great place to have fun , breath fresh air , play &

knock around plus a beautiful place to pray in King Hussein Bin Talal Mosque .

حدائق الحسين في بداياتها كانت المتنفس الوحيد للعائلات لكن في الوقت الحالي دايما عجقة شباب, مستحيل تلاقي صفة منيحة

ايجابياتها انها تحتوي على شجر وملعب واماكن واسعة للمشي او للجلوس, كما تحتوي على متحف الاطفال ومتحف السيارات الملكي

وسلبياتها الصفة ودايما عجقة شباب

من افضل الاماكن للعائلات على الاطلاق مكان جميل و منظر رائع و مريح للجلسات العائلية .. كل اسبو بسهر فيه مع عائلتي و بتمنى الكل يروح يزورو ...

الحديقة حلوة كتير فيها شغلات حلوة للاطفال والمساحة كتير كبيرة لعبت هناك كرة قدم والملاعب حلوة كتير الدخول هناك مجاني بس ناقص المكان مطاعم مثل ماكدونالدز وكنتاكي وبابايز ومن هالمطاعم وتكون الحديقة حلوة كتير بنصح الكل يزور هالمكان لانو جد بيستاهل ورح ينبسطو كتير هناك

أحلى حديقة بالمملكه..

كبيرة واسعة ونضيفة وفيها سوبرماركت ومصفات ومسجد

المشكله إن حماماتها مو نضاف وصغار يعني حديقة ذي هاي لازم فيها حمامات كبار ويكون فيها آزنات..

كمان طلب مني 10 قروش !!!

وللاسف فيها زعران مع وجود الشرطة

مكان رائع جدا لتنزه العائلات وهو مكان كبير وواسع ويحتوي على أشجار رائعة المنظر ومكان للأطفال ومراجيح ومكان للعب كرة القدم

بسم الله الرحمن الرحيم

حدائق الحسين مكان جميل ومسلي للطفال والشباب والعائلات وموقعه الجميل المطل على ستي مول ومدينة الحسين للشباب والجامع

الحدائق متنفس حلو للمنطقة ، تقريبا كل يوم بمر بجانبها ، و اكيد كل صيفية بنقضي ساعات فيها ، فيها شوية نواقص و في ممارسات كتيرة من الناس مزعجة نظرا لقلة تنظيمها ، لكن بشكل عام الحديقة جيدة ، فيها متحف السيارات الملكي و كمان عندها يوجد مسجد اتوقع اسمه مسجد الملك حسين الله يرحمه ، بيضفي للحديقة جمالية خاصة ، مشكلتي مع الحديقة متل ما قلت قلة التنظيم خلت الناس تعمل ممارسات غير لائقة و مثل بتلاقي عائلات بتطلع بتاكل مثلا وبتكب الزبالة على الارض و شباب كمان ، بتسمع الشباب باعلى صوتهم بالالفاظ الوسخة وهاد بيخليك ما تاخد عائلتك عليها و ما بدي احكي عن وضع دورات المياه ، يعني الحديقة لازمها مموظفين يسهروا على تنظيمها ، فيها ملاعب يمكن حجزها مسبقا للعب فيها و فيها العاب للاطفال. و المواقف فيها متوفرة لكن كتير من الاحيان بعيد عن المحل الي انت بدك اياه بالحديقة ، زوروها :)

حدائق الحسين – عمان – الأردن على شارع الملك عبد الله الثاني في منطقة دابوق .

و هي من كبرى الحدائق العامة في الأردن ، فيها العديد من المرافق مثل :

1- مسجد الملك حسين الذي يعتبر تحفة معمارية و مصمم بإسلوب معماري رائع.

2- متحف السيارات الملكي و الذي تعبر معروضاته عن جزء من تاريخ المملكة الأردنية الهاشمية .

3- العديد من المقاهي و المطاعم و الخدمات و المرافق العامة .

4- بالإضافة إلى ملاعب كرة القدم و كرة السلة .

5- و مدرجات لإقامة الحفلات و المهرجانات .

6- متحف الأطفال و هو مبادرة جديدة و نوع جديد من أنواع المتاحف .

تجتمع هذه المرافق مع بعضها في مكان مميز شامل يجذب كافة طبقات المجتمع الأردني لما فيه من أماكن جلوس و تنزه و العاب للأطفال فهو مكان مثالي للأسرة للتمتع بيوم مليء بالفرح و المتعه .

من أجمل مميزات حدائق الحسين :

1- مساحته الكبيرة و تعدد أماكن الجلوس و التنزه فيه .

2- الإطلالة الرائعة خاصة بالجزء الخلفي من الحدائق .

3- التنظيم بحيث يوجد أماكن خاصة لوقوف السيارت و طرق داخلية تلتف حول محيط الحدائق ، لكنها لا تدخل إلى الساحات و المتنزهات الداخلية ما يجعل الأطفال بأمان .

4- الأرصفة و الممرات الداخلية مع الإضاءات تشكل جزء رائع يلفت الانتباه .

5- كافة الأبنية في الحدائق مصممة بإسلوب معماري حديث يعكس التطور المعماري و الحضاري في الأردن.

6- وجود رجال أمن للحدائق ما يعطي شعور بالراحة .

7- المدرجات الجميلة و التي يمكن قيام أي نشاط بها .

8- الدخول المجاني بأي وقت .

9- جوها الجميل صيفا كونها منطقة عالية و مكشوفة .

أما من السلبيات في حدائق الحسين :

1- عدم الاهتمام بالنظافة " خاصة المرافق و الحمامات العامة " و التي تحتاج إلى اهتمام كبير لتكون بمستوى يليق بمثل هذه الحدائق ، بالإضافة إلى قلة عددها و بعدها عن أماكن تجمع العائلات .

2- تعد الحدائق من الأماكن التي يكثر فيها العشاق ، و هذا الشيء يؤثر على الحديقة ، لأن جزء كبير من الزوار هم عائلات .

مرحبا بك في حدائق الحسين :) في البداية هذا مشروع أنشأته الحكومة الأردنية ليخدم متطلبات الشعب الأردني وهو من أحد المشاريع الضخمة في الأردن فهو يتكون من 1. مسجد 2. معرض السيارات 3. متحف الأطفال 4. منتزة ضخم يحتوي على أشجار الصنوبر والأشجار الحرجية 4. ملاعب لكرة القدم وكرة السلة مع جميع مرافقهم 5. مدرجات 6. مقاهي ومطاعم للوجبات السريعة . رح أبلش فيهم واحد واحد . أولا : المسجد : يعتبر مسجد الملك الحسين من أهم المراكز الدينية في الأردن فهو ليس بمجرد مسجد إنما يحتوي على مراكز دينية متنوعة تهتم بجميع المسائل الدينية أما عن بناء المسجد الداخلي فيعتبر من أروح المساجد التي شاهدتها في حياتي من زخرفة اسلامية و ابداع هندسي . وقد تكرم جلالة الملك بزيارته عدة مرات وأدى فيه الصلوات أما على المستوى العالمي فقد زار الباب بنديكتوس السادس عشر بزيارة الى هذا الصرح الديني مما يدل على رسالة الاسلام السمحة والمتعاطفة مع جميع الأديان الأخرى . ثانيا : معرض السيارات وهو أمتع شي موجود في الأردن فهو يحتوي على جميع السيارات التي ملكتها العائلة المالكة التي تتمثل بعراقتها وجمالها و اتقان صنعها وقد صمم هذا المعرض بطريقة وديكور ممتع وملفت للزائر يعني بالعربي أد ما زرته ما رح تزهئ منه . ثالثا : متحف الأطفال : الذي عني بالاهتمام به جلالة الملكة رانيا العبدالله وهو يحتوي على أساليب تعليمية جميلة ومفيدة وممتعة في نفس الوقت . أما عن ضريبة الدخول فهو رقم زهيد جدا بالنسبة للوسائل التعليمية المتطورة في المتحف وقد أجريت العديد من المهرجانات والكرنفالات في هذا المتحف "وكنت أنا في واحد من هدول الكرنفالات وكتييييير استمتعت " .رابعا : أما عن الملاعب فهي كتيرة وواسعة و كتير من المنتخبات الوطنية بيتدربوا فيها وكتير من اللي ادربوا فيها اطوروا ليلعبوا على مستوى عالي ودولي .خامسا : المدرجات : وأنا شخصيا لعبت " بالسكيت " فيو كتيييييييير ممتع لأبعد الحدود وبنصحكم تجربوا . سادسا : أما عن المطاعم والمقاهي فهي كتيرة ومنتشرة بجميع جوانب الحدائق . منها ما هو شعبي ومنها ما هو مرتب شوي . لكن بشكل عام الحدائق تعتبر مكان عام يقصده الشعب من جميع الطبقات بغض النظر عن اللون او الجنس او العمر او الحالة الاقتصادية فبهيك بتشعر بالراحة والامان والطمأنينة ومنها بتلعهب ولادك وبتتفرج عليهم وانت بالك متطمن عليهم وانت كمان مستمتع :) زوروا

دخلتها من جديد الجمعة

كل شي فيها حلو ما عدا امرين فعلا ضايقني كتتتتتتتتتتتتير

الاول: الحمامات قذرة للغاية ولاتستحق الدخول اليها لانها بعيدة جدا عن النظافة ولا يوجد من يقوم بتنظيفها ابدا

الثاني: لماذا لاتخصص للعائلات فقط؟ حيث كان يوجد بها العديد من الشباب الذين يطلقون على انفسهم الفايعين وهم بالاصل حمقى وتافهين وجاءو فقط لعمل المشاكل

حدائق الحسين من أجمل وأكبر حدائق عمان.. وهي هادئة جدا و]اتي الناس إليها للإسترخاء وتهدأة البال.. وأنا دائم ال\هاب إليها سواء للعب كرة القدم أو للعب كرة السلة فهي تتمتع بعدة ملاعب خضراء لكرة القدم عدة ملاعب خاصة بكرة السلة.. فلما تكون فاضي وولادك مجننينك مش غلط تاخدهم هالمشوار اللي انت رح تستمتع فيه وتريح بالك وتقعدلك قعدة حلوة بالهويات... بالنسبة للنظافة الحديقة مليئة بعمال النظافة اللي ما بخلو ولا محرمة على الأرض.

انه حديقة حلوة وكبيرة كتير وفيها كل شي بس بعيدة عن عمان شوي يعني صعب تروحلها كل ما تكون زهقان وبلايام العادية بتجنن ولا احلى من هيك بس يوم العطلات ولا بنصح حد فيها بتكون قايمة قاعدة وكلها شباب وناس فوق بعض

أنا زرت متحف الأطفال موجود بحدائق الحسين وهاد المتحف رائع جدا وتعليمي بالدرجة الأولى عن طريق اللعب والترفيه طبعا هاي النصيحة رح تفيد المتزوجون واللي عندهم أطفال أنا بنصح الكل يزروا لإنه مكان جميل وممتع وبنفس الوقت تعليمي، طبعا مساحته واسعة ويحتاج إلى 3 ساعات أقل شيء حتى يتمكن طفلك من استكشاف كل ما بداخله، طبعا أعمار الأطفال المستفيده من هذه الألعاب التعليمية من 3 سنوات ولغاية 15 على ما أعتقد وشكرا جيران عمان

مكان روعة بجنن بالصيف

احلى شي لما نطلع جروب كبير اللي معاه شبس واللي معاه كيك واللي معاه ارجيلة والله الصراحة كتير رايق بس المشكلة الزعران اللي معبينو مش عارفة من وين بطلعوا للواحد

بصراحه انا كأردنيه بفتخر إنه عنا في الأردن متل هيك حديقه مساحتها الخضراء كبيرة..

وخدماتها واضحه وجليه...

وغير هيك دايماً نضيفه مع انه عتبي على أهالي عمان إنه جد عيب ليه يعني ما بحافظو على نظافة ماكن جلوسهم

طبعاً مو الكل ..

قديش بنبكر بعيون الغير وبعيونا زات نفسنا وقت نكون نضاف جوه البيت وبره البيت...

الحديقه للجميع،،،والموقع الحكومه إنتقتوا بعنايه حتى يكون جوه مناسب وملائم...

خلينا نحافظ عليها متل ما إستلمناها.

ما في اهتمام بانه اتكون حديقة فعلا، يعني مش كل الأرض خضرا و ازعاج. الأمن ما بعمل اشي للي بكونوا فاتحين مسجلات السيارة على العالي وقاعدين بره ينطربوا. حاولت مرة أو مرتين أركض أو أمشي هناك بس كانت الدنيا كثير زحمة وعجقة وصوت. بعدين ما بفهم كيف حديقة بعملوا فيها كل النشاطات المزعجة زي الحفلات. الحدائق مفروض اتكون أماكن راحة من زخم المدينة وضجيجها مش أخذ الضجة معي على الحديقة. كمان الحديقة لما يعملوا فيها حفلة بتسكر الشارع، مافي أي نوع من التنظيم.

الحلو فيها الترتيب وتوفر أماكن اصطفاف ووجود المسجد بعطي جماليه للمكان، للتحسين لازم ايزيدوا الرقعة الخضراء والاعتناء فيها أكثر و نشر أمن أكثر يمنع الناس من الازعاج واشعال النار .

في جو ايماني لطيف رائع داخل جامع الحسين بن طلال طيب الله ثراه و معبر عن عظمة البناء الجغرافي الذي يجمع بين حضارات الماضي و حضارات الحاضر و المستقبل فقد كنت ازورة انا و اصدقائي للتعرف على الجامع الكبير ذو الموقع الجغرافي المميز في عمان و حوله حدائق الحسين االكبيرة ذو الاشجار الخلابة و خدمات للعائلات الكبيرة و مقاهي و اماكن هي قمة في الجمال كل ذلك فاكثر داخل حدائق الحسين طيب الله ثراه و لكنني تفاجاة و انا امشي بالسيارة بلافتة ممنوع اشعال النار فقلت في نفسي هل يمكن ان نمرح و نجتمع الجو العائلي المميز دون شوي مثلا فاتمنى ان يصبح تعديل على هذا الموضوع و يصبح هناك اماكن مخصصة لاشاعل النار و امكان اخرى لا يمكن اشعال النار حيث يمكن بان تنفذ جميع طكلبات الزائر او السائح الذي ايتي من خارج عمان او من داخلها ليرى طبيعة اشجارها و وطبية جمال عمان من اطلالة المكان و السلام عليكم و رحمة الله و بركاته و شكرا

بالنسبة الي حدائق الحسين هو أفضل مكان بحب اتوجهله في وقت الفراغ أو أيام العطل لانه جد مكان كتير مناسب للعائلات هادي وواسع وفيه فعاليات وأماكن عن جد جميله ..... ناهيك عن المناظر الطبيعية الجميلة والأشجار والنباتات الرائعة..... وطبعاً مارح انسى ملاعبه وساحاته الواسعة للعب أي نوع رياضة بتحبها

مكان جميل وهاىء واسع وحلو لجميع الناس خاصه العائلات والحلو انه بصير فيه مهرجانات كتيرة حتى الناس تنبسط والصغار كمان وجلساته حلوة مريحه بين الاشجار واسع للعب للاطفال وخاصه بكون اجمل باليل لان جوعمان بكون بارد وبجنن وجربوه كلكم ما بتخسروا شي