Amman talks Help?
النصيحة شيء والتقييم شيء أخر
السلام عليكم جيران ...
أنا مشاركتي بالحوارات جداً قليله فأعذروني إذا كان موضوع هاد الحوار مطروح قبل الأن ..
في شيء غريب بنصائح الجيران، ما بعرف إذا حدا إنتبه أو لأ ... بس إن بكون بمدح في المكان إلي راح عليه .. "والقعده حلوه والارجيله زاكيه والأكل خورافي" وكمان شوي بدو يسلخوا قصيدة شعر ... وبعدين الصدمه !!! التقيم : نجمه وحده !! بعد كل هاد الحكي ونجمه !!
شوفو نصيحة Nayef :
http://jo.jeeran.com/p/ones-pizza-and-lebanese-pastry-2-amman/
احكي هاد التناقض نصف مصيبه !! لإنو إحتمال بنسبة 123% إنو صار في غلط واللي كتب النصيحة ما إنتبه !
المشكله وين ؟؟ إلي بكتب النصيحة ويبدأ في التفصيل الممل "و هاد احسن مطعم و الأكل دايماً فرش و السلطة .... و الخ "، والله لو إنو المحل إلو ما حكى عنو بالمنيح هيك ... وبعدين الصدمه !! التقييم : 3 نجوم !! يا زلمه ... يا زلمه طيب ليش 3 نجوم !! ما إنت ما حكيت ولا كلمه مش منيحة !! يعني شو لازم اتشوف حتى تعطي ال-5 نجوم ..
فإنت "القارئ " بتصير تتحزر ... مش عارف إتروح وإتجرب ولا لأ !! ويا حرام المكان هوه إلي بكون خسران !! يعني 3 أشخاص زي هيك بطلع التقيم العام 3 نجوم !!
شو الحل يا جيران ؟؟
هههههههههههههههههههههه ضحكتني أخوي حمد ما أظن الموضوع اطرح قبل هيك لكن أظن انو الناس عنا بحطو النجوم على مدى فخامت المكان و مش على جودة الأكل أو الإستمتاع بالمكان أنا نصيحتي انك تروح تجرب
ههههههه انت مش عارف !! ما هوه كمان بكون حاكي ان المكان فخم !!!!!!
ههههههههه لا والله و انت الصادق بحط النجوم على المزاج !!
هههههه
مابتعرف ممكن من لزة الطعم خاف ينحسد
فاهم التقييم غلط
ممكن ، و ممكن كمان انو حزيره !!
ههههههههه والله شي محزن !!
ههههههههههههههههههههههه
عنجد بيختبر زكاءنا وبيشوف قوة ملاحظتنا
بعدين معلش لو لاحظت مو كاتب غير هالنصيحة :)
يمكن ما انتبه النصيحة التانية بيعطي نجمتين وهيك.. هههه
هههههههه الله يهدي !! و اللي في بيت اهلو على مهلو !! على شو العجله !!
حقو .. ههههههه
حرام أخدنا سيئاتو آخر هالليل
ييييي انشاء الله لأ !!
احنا اللي غلط !! يعني فش تشويق .. الصح انك تكتب اشي و تقييم شيء تاني ،، يعني لازم عنصر المباغته يكون موجود :))
صح...عن جد شيء مضحك...!!
أكيد أكيد شيء التقييم مهم جداً..!!
أتمنى إنوالجار نايف ينتبه بالمرات القادمــة..
المشكله انو في اماكن عم تنظلم من هييك اخطاء
يعني لو شد شعروا صاحب المكان اللي صار في هييك قليل ...
نعم هناك تناقض واضح .. لكن هذه أول نصيحة للجار نايف فكان يجب على الإدارة أن تنبهه لأن نصيحته مخالفة للشروط .. على كل حال شكراً له على إبداء رأيه ..
والجار نايف ليس الوحيد فهناك الكثير من النصائح مخالفة للشروط الموضوعة للنصيحة والتي يجب الالتزام بها ... لكن يبدو أن سياسة الإدارة هي في "تكثير" النصائح على حساب "النوعية والجودة" ..
فالمعايير ما قلت موجودة لكن لا يتم تطبيقها من قبل بعض الجيران كما لا يتم التدقيق كثيراً من قبل فريق الأماكن ..
مرت فترات كان يتم فيها التدقيق الحازم على النصائح ومرت فترات يكون فيها تساهل في قبول كل النصائح أو أغلبها ..
شكراً لك جارنا حمد العدوان على هذه الملاحظة و التي تم مناقشتها كثيراً ..
المشكله يا سيد مش باللي زي نايف ، المشكله بالفئة التانيه !! من كلامو نفسو يحط ٥ نجوم بس خايف ! مش عارف ليش ؟؟!!
في من كلامك بخصوص انو النصائح مش زي الاول ، بس والله كمان انا من الناس اذا بدي احكي كل بزهق و ببطل اكتب !! يعني جيران لو بعملو النصيحه عباره عن نقاط و كل نقطه الها علامه من ١ الى ٥ ، و في مكان للي حابب يكتب شو اللي صار معو بالتفصيل ،، هيك كتيير اسرع و النصيحه بكون فيها كل الاشياء الضروريه و اللي معو وقت يحكيلنا بالتفصيل
و شكرا لك سيد :)
العفو جاري حمد
الأصل أن يكون كاتب النصيحة موضوعياً في الطرح وليس عاطفياً بشكل يخل بالنصيحة ويقلل من قيمتها ..
يجب أن يذكر كاتب النصيحة الإيجايبات أولاً ثم السلبيات وبعد ذلك يقيّم بوضع عدد النجوم المناسبة،،
أنا شخصياً أحاول أن تكون نصائحي غير متناقضة مع التقييم وإذا كانت غير ذلك فأذكر السبب في النصيحة..
باعتقادي حصول المكان على أعلى تقييم "خمس نجوم" يجب أن نقلل منه وأن لا نضعه إلا لمكان يكون مميزاً مثالياً لا توجد فيه أية سلبيات ولذلك فهو يستحق هذا التقييم (100%) وأعتقد قليل من الأماكن يمكن أن يستأهل هذا ..
شكراً لك ..
صحيح سيد ، و أنا راح ابدا من عندي و لو اني كسوول بس راح اصير اكتب بموضوعيه ان شاء الله و احاول اوضح قدر الامكان لأنو في اماكن بتستاهل و في اماكن النجمه كتيير عليها
صباح الخير حمد .. شكراً على موافقتي الرأي وننتظر مشاركاتك المكثفة في الحوارات والأماكن ..
صباح النور سيد :) إن شاء الله
ههههههههه
عنجد .. وين الادارة ماهي مابتنشر النصيحة الا ليقرؤوها!!
الله يعينهم من يلاقوها ولا من وين ،، اكييد اللي قرأها من الاداره بكون لهلا مصدوم !!! يعني .. ما قدر يتحمل
ههههههههههه
بس شو تهيألك تنتبه هلأ.. غريبة انوالي بعدو ما انتبهولو وفي وحدة معلقة عندو كمان!!
هوه اللي صار اني بدي اجرب محل جديد و هاد المكان طلع بوجهي ، المهم كل الناس حاطيين ٤ و ٥ نجووم الا نصيحه !! فقلت بس واضحه .. هاي النصيحه اللي راح تنقذني من المقلب ! بس خلصت ما صدقت و عملت ريفرش للصفحه، انو اكييد في غلط .. بعدين اكتشفت الاكتشاف الخطيير !! انو هوه فاهم بالعكس ، يعني اعطى نجمه على اساس المركز الاول !!!!!!! الحمدلله اللي ما عادها ..
هههههههههههه اكييد نفس التفكيير
انا ماكنت أنتبه .. بس بقرأ النصيحة الا ماندر أشوف التقييم
والله ياجاري حمد كون الاخ نايف كتب لاول مرة نصيحة فاكيد هو مو عارف عن موضوع التقييم او انو مش فاهم النقطة بالزبط، فاعتبر انو النصيحة تكفي وماعرف يقيم صح
واعتقد انو هاد هو السبب في تناقض النصيحة الممتازة مع التقييم السيئ
وبشكرك يا حمد على هاد التوضيح فعلا لانو احنا بحاجة لهيك تنبيهات بالموقع علشان الجميع يستفيد ويتعلم
الشكر الكم جيراني ؛)
المشكله إنو في ناس كتير هيك، والمشكله الأكبر باللي بحكي كل شي منيح وبعدين ما بعطي التقييم الصحيح !!
إن شاء الله كلنا بنستفيد وبنتعلم من هي الأخطاء
شكراً لك مختارنا :)
شكرا لك جارنا حمد . موضوعك من المواضيع المهمة جدا ، والتي نعمل جاهدين على التقليل منها في جيران . ونعتذر على نشر هذه النصيحة وسنقوم بالاتصال مع نايف لتعديل نصيحته.
لكن ما يسعدنا اكثر وجود مستخدمينا الحريصين على ان يكون المحتوى المضاف اكثر افادة وصحة . وهذا شيء لا يقيم بثمن . نشكرك ونشكر كل المستخدمين الرائعين في موقعنا وسنعمل ان شاء الله على التركيز اكثر على هذا الموضوع والتاكد من استيعاب جميع المتخدمين لاهمية التقييم.
انه لشرف عظيم وجودكم معنا بالموقع
أحرجتوني فريق جيران !! شكراً الكم
هوه بصراحة احنا أكتر المستفدين من موقع جيران، أنا صار إلي تقريباً سنتين ما بروح ولا مكان بدون ما أشوفو على موقع جيران، ما بحب أجرب ومش مستعد أروح وأكل مقلب..
شكراً جيران عمان على مجهودكم ..
بتصور انه السبب انه اللي بكتب النصيحة و بسترسل فيها بكون ناسي يقيم في البدايةو بس يطلعله المسج عشان يقيم بقيم بسرعة و ما بنتبه بكون همه بس انه ينشر النصيحة .. اقتراحي انه الاخوة اللي بقر}ا النصيحة قبل نشرها اذا شافوا فجوة بين التقييم و النصيحة يرفضوا لنصيحةو يبعتوا لصاحبها
هو أنا بفضل لو كان زي إقتراح Fox Jordan
يعني يكون في نقاط معينه وإلها علامات (و لنفترض من 1 إلى 5) وأخر شيء يتم احتساب المجموع تلقائياً وهيك ما حدا بنسى اي شيء وتقل فرصة الخطأ
فكرة رائعة جدا و تضيق مجال الخطأ بشكل كبير
انا لا أرى أي رابط ما بين النصيحة والتقييم - الآن مثلاً على تقييم المطاعم لتكون موضوعي ومفهوم للجميع يجب عدم وصف الأشياء بشكل شخصي جداً أو مزاجي أو سمعت من من صحابي أو مثلا زعلت من الجرسون أو اذا الجرسون\ه زبطتك وزبطته\ـا - على سبيل المثال انا كشخص دخلت على مطعم على موقع جيران لأشوف شخص كاتب انو الأكل ممتاز ويقول مثلاً البيتزا زاكيه وبتشهي وفوق الخيال - صراحة أنا شخصياً لا أهتم بهذا الوصف لأنه واقعياً الوصف لم يعطيني أي فكرة عن مدى جودة مكونات تلك البيتزا وغزارتها وعن طبيعة ورقة العجين أو عن طريقة التقديم الــخ - وكذلك الناس أذواق وما بقدر شخص يفترض ان الجميع سيحب ما أحبه لأنه هو حبه - هههههه
بالنسبة للتقييم -اقتراح هو أن النجوم هي تكون عبارة عن تقييم للمكان توضع بشكل آلي عند اختيار واحد من الخيارات الموجودة للذي يريد ان يضيف النصيحة مثلاً
سيء
جيد
جيد جداً
ممتاز
والــخ
بالنسبة أن أصحاب موقع جيران يقومون بعمل موافقة أو عدم موافقة على تعليق أو نصيحة من أي جار
يعتبر شيء غير مقبول في عالم البالغيين وللحريه الشخصية في التعبير الحر وهو بداية فقدان الرواد للموقع
اكون معك صريح اذا بقيم أو بكتب نصيحة عن موقع ما وتقوم ادارة موقع جيران بعدم نشرها أكيد وبدون تردد لن أناقشهم لكن لن أعيد التفكير مرتين في عدم الدخول للموقع مرة أخرى - وقس على ذلك جميع الناس الآخرين غيري سيفكرون بنفس تفكيري - لأنه ما حد بقبل تدخل الادارة في شيء لا يعنيهم - متلا شخص يكتب نصيحة جدا سيئة عن موقع ما - آه خليه يكتب ليش لأ - ولا بس بدنا النصائح يلي كلها نفاق وكذب
وبالأخير على صاحب أي موقع ان كان مطعم أو للخدمات انا يتخذ اجراءات تحسين موقعه أو أحسن يسكرو لانه الناس مش عبارة عن مصاري متحركة على الأرض - على كل صاحب مصلحة ان يعتبر نفسه زبون لنفسه ويقيس عليه - ولكن في اصحاب مصالح هم انفسهم من دنيئي النفوس ومستعدون للعيش في البواليع - فكيف ننتظر منهم ان يفهمو الزبائن ويقدروهم
أنا واحد من الناس أعتبر نفسي ضيف عندما أذهب لأي مكان - إن كان سوبر ماركت\مطعم\حتى لو عند خياظ أو دراي كلين
لذلك في حال دخلت من عتبة مدخل المكان ولم أشعر بوجود من قدر دخولي ولا من عبر وجودي - سأخرج في الحال ولن أعود لذلك المكان مرة أخرى
وانا صارم في هذه الأشياء حتى لو ذلك المكان يوجد فيه شيء حصري
كلامك صحيح 100% لإنو الواحد ما بروح في بلاش ولا صدقة !! يعني في أماكن كتير بحملك جميله إنك بتقعد في !! وكانو جاي تشحد !! بس الحق مش عليه، الحق على إلي ما بطلع من عندو وعملتها في مكانين!! مش بستنى وبحكي المرة الجاي ما راح أرجع !! والله المحلات اكتر من الهم على القلب وفي بدل المحل 1000 وأحسن منو وأرخص منو !!
شكراً على مشاركتك للموضوع ؛)
نعم نعم كتير في أماكن بتحس انه اللي بشتغلوا فيها بحملوك جميلة في الجية !!!! و متل ما حكيت دواهم الطلعة من عندهم لأنه المحلا اكتر من الهم عالقلب
والله مرت بفكر من الصبح لليل وين بدي أروح ، هاد المكان أو هداك ؟؟!! بدل الكوفي شوب وبنفس الشارع بتلاقي 20 (زي شارع الرينبو مثلاً) وكلهم مختلفين وحلوين، فاللي ما بحترم زباينوا بوفر وبريح !!
لا أنا بقولك شي.. اوقاات بتروح بوقت بيكون عجقة فبفكرو حالهم مو محتاجينك..
وبتروحلهم بوقت تاني بيشلوك على راسهم
انا بحس الناس هون بالزات كتييير مزاجيين .. ازا البواب بتلاقيه مرة بيسلم ومرة مابيرد السلام حتى!!! والكل هيك
فلا تحكم عمكان من مرة وحدة لانو ممكن بيوم واحد مارح تلاقي مكان مرتاح فيه لانو انت كمان بتدور عشي معين لهيك مابعجبك هالمكان أو ترتاح فيه
وبخصوص الادارة بالموقع بيرفضو بس بيقولو السبب .. وبيهمهم انك تعدلها وبيقولولك عدلها بس ممكن بتتكاسل بهداك الوقت وبعدين بتعدلها معك أسبوع >> مع اني بتكاسل بالأغلب اني أعدلها
غفران كلامك في منو، بس أنا كمان شو إلي جابرني إني اصبر عليهم وأرجع أحاول كمان مرة ؟؟!!
المشكله في الأغلب بصاحب المكان، بشغل ناس ما بعرفو يتعاملوا مع الزباين بس عشان يعطيهم راتب أقل !!
بتلاقي الواحد منهم كانو قاتلوا أبو إذا حكتلو الارجيله مش زابطة مثلاً ! بدو إياك تقعد زي الأرنب ....
والله أنا مني وعلي بحكي لصاحب المكان وبروح .. الواحد بتعب لحتى يجب هيك مبلغ اللي ممكن بطعمي عائله أسبوع كامل (الحمدلله والله يفرجها على الكل) مش عشان يجي يشوف بوز زي بوز السيارة !!
وبالنسبه إلي ما بكتب كتير نصائح عشان هيك، يعني بدها طولت بال، فلازم يكون في شي أسرع :)
انا من طبعي بطلب الادارة وبحكيلهم.. هاد بعد ماكون حكيت للسوبر فايزر تبع الجرسونات..
بس مو دايماً أوقات بشفق عليهم فبمزح معهم وازا تواقحو او أخدو عين بشكيهم ههههه
مابعرف صح أو غلاط بس حرام همة الهم ظروفهم ..وارضاء الناس غاية لاتدرك..
وانا بكتب كتير نصايح بس مو كلها بتتنشر وعادي بكتب عن مكان تاني ..
ايزي الحياة وماوقفت عنصايح ..
وبحب انهم بيهتمو وبيطلبو نعدلها.. بس بطنش هههههه
انا من طبعي بطلب الادارة وبحكيلهم.. هاد بعد ماكون حكيت للسوبر فايزر تبع الجرسونات..
بس مو دايماً أوقات بشفق عليهم فبمزح معهم وازا تواقحو او أخدو عين بشكيهم ههههه
مابعرف صح أو غلاط بس حرام همة الهم ظروفهم ..وارضاء الناس غاية لاتدرك..
وانا بكتب كتير نصايح بس مو كلها بتتنشر وعادي بكتب عن مكان تاني ..
ايزي الحياة وماوقفت عنصايح ..
وبحب انهم بيهتمو وبيطلبو نعدلها.. بس بطنش هههههه
>>
عذرا هذا المحتوى مكرر. جيران تشجع المحتوى الإبداعي المفيد.
تفضل .. وهيني ابدعت هههههه
اقتباس
"مابعرف صح أو غلاط بس حرام همة الهم ظروفهم ..وارضاء الناس غاية لاتدرك.."
اذا عمرك تعاملتي مع مطعم موظفين أجانب أو اذا عمرك سافرتي على بلد آخر راح تغيري وجهة نظرك للموضوع
بعلم الضيافة والتعامل مع الجمهور بعلمو الموظف شغلة بسيطة هي مشاكلك بترميها قبل ما تدخل على مكان عملك ولما تخلص الدوام بتوخذها معك على بيتك وبتفكر فيها براحتك هناك
ما أنا قلتلك ما بحكم بسرعة او بالعكس بضحكهم اوقات
إذا الهندي بالامارات بكن بوزو شبر هههه وهو مدلل و بيجيه بقشيش كتير الصراحة هون ما حد أو نادراً يعطو بقشيش صح ولا غلط
كمان كل الناس مزجييين أوقات رايقين أوقات منكدين و هاد طبيعي
وكتر بحكو بأسلوب مو حلو معهم وبفكروهم عبيد..
وهو انسان مهما يعمل مو ديماً بقدر يضحك :)
غفران !! بالله عليكي قلبك شو حنون، هههههه !!
ما حدا قال يضحك ، بس بلاش الكشرة ! ما هوه ماشالله عليه لما إتكون بنت إلي بتحكي معا بصير "منشكح" وبنسى كل مشاكلو .. وأكيد في ناس زي ما حكيتي ما بعرفو يتعاملوا، و بكون شايف حالو ومش مصدق !!
لا مين قالك ياما ناس كشرو وتأفأفو بوجهي
مرة قلت لواحد بد وقت لأطلب عصب وما حد اجا هههه
أنا زعلت وقمت وروحت بس جطو كمان مرة ونفس الشي التل أنا بحب أفكر قبل ما اطلب إذا بدايقك بروح .. خجلتو :)
بس لو زعلني مرة تانيه بتكون امو داعيه عليه ههه :p
ههههه ، الله يسترنا احنا كمان ؛ب
والله يا فوكس هاد صح يللي حكيتو حتى احنا بعملنا هون بالوزارة دائما بتلاقى ناس بجيو الوزارة بوزهم زي بوز السياراة متل ما حكا حمد ، وهون بتصير المشاكل مع المراجعين ببطل يتعمال متل الخلق معهم وبصير ينفرز ع اي شي، الصحيح انو اي واحد بكون عندو مشاكل برا العمل يخليها برا العمل لانو العمل مكان للرزق وبس وازا في الك مشاكل احكيها مع حدا معاك بس لاتخليها تأثر على شغلك
انا صارت كتير معي ادخل ع محل وبلاقي صاحب المحل او الموظف بحملني جميلة انو دخلت عليه او شريت منو وتلقائيا ببطل ارجعلو واصلا بحكي للناس عنو انو هيك تعاملو وبرجع الو لما اسمع انو تغيرت معاملتهم او ادارتهم او على الاقل الكادر الوظيفي الهم تغير
ما بتعرف ليش مرات بتحسو بكرهك !! كأنك قاتل حدا من عائلتو ! ولو بقدر بسلخك كفين ... الله يعين الناس شو صايرين عصبيين .
والله يا جار كلامك حلو بس زي ما بحكو "دان من طين دان من عجين".
لزم هاد اللي يصير، وعشان هيك لزم تكون نصائحنا في جيران مفيده قدر الإمكان، والله في أماكن كتير كنت حابب أزورها ولما شفت النصائح لغيت الفكرة !!! ووفروا ... ههههه
شكرا الكم جيرانا على الكلام الرائع الي تفضلتوا فيه . واكيد مع بعض منعمل على تحسين النصائح في الموقع . وكلما كان عدد الاشخاص المهتمين بنشر الفائدة اكبر كلما تطور الموقع بشكل اكبر .
وانتم كمستخدمين نشطين في جيران وكجيران محبين للخير تستطيعون ايضا المساعدة في ذلك . عن طريق التبليغ عن النصائح التي لا ترون فيها فائدة او النصائح ذات التقييم الخاطئ وذلك عن طريق زر التبليغ عن اساءة او ارسال رسالة لنا سواء على هذا الحساب او عن طريق المساعدة . ونعمل على النظر فيها وتعديل الخطأ .
وشكرا لكم جميعا.
والله ياريت خصوصاً انو لو تعلمو مين الي علق أو رد عالموضوع..
جميل أنكم موجودن معنا يا "فريق جيران المحترمين" في الحوارات التي تهتم بالأماكن والنصائح ..
ننتظر أن نراكم أكثر في الحوارات كلها كما ننتظر أن تقوموا بتحسين الحوارات ومعالجة المشكلات الموجودة التي بح صوتنا ونحن نطالب بحلها وكل مرة تسألون " هل من اقتراحات! "..
شكراً لكم
يارب يا سيد وانشالله تستمر الادارة في متابعة كل الحوارات الموجودة ع الموقع وان تستمر في ردودها وعلى امل ان تعجل الادارة في تلبية وتنفيذ الطلبات اللي بعتناها الهم على القريب وبالسرعة الممكنة ان شاء الله
إن شاء الله ... ونحن بالانتظار ..