حوارات عمان مساعدة؟

الوحدات والفيصلي

Saleh138
من: Saleh Thaher |قبل: عامين ضمن: مقاهي وكوفي شوب
مغلق

انا من عاشقي كرة القدم.. بس ما بشجع لا الفيصلي ولا الوحدات لكن بحب أشوف المباراة اللي بتجمع بين الفريقين الكبيرين من حبي لهذه الرياضة..

حابب أحكي إنو العنصرية بين جمهور الفريقين شديدة جدا ولا داعي لها.. أصلا كرة القدم تشجع الروح الرياضية.. المشكلة فقط بين الجماهير المتعصبين أما اللاعبين كلهم أصدقاء وفي منهم زملاء في المنتخب الأردني..

مبارح ما حدا فاز بس بعد المعركة التي دارت في الملعب قامت حرب شديدة إن صح التعبير بين جماهير الفريقين.. حيث قامت مجموعة من مشجعي الناديين برمي الحجارة فيما بينهم اول ما طلعو من الملعب فتدخلت الشرطة للفصل بينهم...
فوق هيك تم التعدي على رجال الأمن بالحجارة وتم توقيف ١٢ شخص من مسببي المشاجرات بين المشجعين.. وكملت الناس على سيارات الأمن والناس اللي ما إلها دخل وكسرو إشارة.....

السؤال: ليش هذا التعصب وهو أصل الرياضة التعاون والروح الرياضية؟؟؟
ليش هذا التعصب الشديد جدا ما بصير غير عنا؟؟؟
أكبر الأندية العالمية ما بصير فيها هيك... مطلوب هذا الوضع يتصلح قبل ما تصير مشاكل أكبر تؤثر بشكل أكبر...
إذا مش إحتراما للرياضة أقل ما فيها إحتراما للبلد!!!!!!!!!

انس38
من: انس العضايله |  قبل عامين

مسا الخير صالح ... انا كنت بالملعب وخرجت انا وجمهور الفيصلي من المدينة كاملة .. بدون اي مشكلة ... لكن اللي صار بعد هيك لارمي حجارة ولا مايحزنون ... المشكلة هي ان التعليمات تنص على خروج جمهور الفريق الخاسر اولاً وفي حالة التعادل خروج جمهور الفيصلي اولاً وبعدها بنصف ساعة يخرج الجمهور الاخر .. لكن اصرار جمهور الوحدات على الخروج سبب نوع من الانفلات في المدرجات والقفز من فوق السياج الحديدي بين المدرجات والملعب مما ادى الى الدرك بالتدخل وبعد خروج جمهور الوحدات كان قد بقي عدد قليل من جمهور الفيصلي وهنا حدثت الاشتباكات بين الطرفين لكن الاشتباكات الاكثر كانت بين الدرك وجمهور الوحدات .. وتكسرت سيارات للدرك والامن العام وحرقت اشارة ضوئية في المنطقة .. طبعا احداث لانرغب بمشاهدتها في ملاعبنا . ... وصدقني انه في دول عربية وعالمية هناك عنصرية كروية اكبر من التي بالاردن .. بالعكس انا بشوف انه بالاردن مافي عنصرية مثل غيرنا .. الا عند البعض والقلة . والتي يجب ان يتم اجتثاثها ....
مش غلط تتعصب لفريقك .. من زاوية رياضية كروية .. وطبيعي جداً ان تغضب لخسارة فريقك . ولكن بدون اي اعتداء على الاخرين ...

Saleh138
من: Saleh Thaher |  قبل عامين

بفهم من كل حكيك إنك مع الفيصلي بس كانت الأعداد كبيرة في الشجار يعني مش معقول ثلث ترباعهم وحداتية... بس انا معك في اخر جملة ان كل شخص يغار على خسارة فريقة ويحب له الإنتصار والفوز بس بدووووووووووون تكسير وتخبيط.

انس38
من: انس العضايله |  قبل عامين

التعبير عن مشاعر الجمهور مابين الغضب والفرح هي حلاوة كرة القدم .. ولكن في بعض الاحيان ضعاف النفوس يستغلوا هذه الفرصة للتعبير بطريقة خارجة عن نص القانون وعن الروح الرياضية ...

Saleh138
من: Saleh Thaher |  قبل عامين

الروح الرياضية هي أساس كرة القدم والمتعصبين ليس لهم علاقة بالرياضة بل هم متحيزين للمنتخب أو الأشخاص أو المنطقة وما إلهم دخل بالرياضة.

ماجد40
من: ماجد داود |  قبل عامين

كيفك يا انس ..اسمحلي اعقب على كلامك ....في البداية انا ما بعتقد انه عنا رياضة ....لا عنا و لا عند العرب كافة ..لسه بدنا 1000 سنة ضوئية ...لما نصير زي الدوري الاوروبي....انا بتابع دوري اوروبا بس بشوف اخبار عن الوحدات و الفيصلي ...انت يا انس شملت التعصب بالوحدات و هذا غير صحيح ...مشجعي الوحدات و الفيصلي فيهم فئة متعصبة بشكل متخلف ....مش عارف على شو !!!!!!!!! وين الوحدات و الفيصلي في دوري ابطال اسيا ..لسه مش معترف فيكم !!!! كأس الاتحاد الاسيوي بطولة للاندية المسخمة بلعبوا فيها ........

انس38
من: انس العضايله |  قبل عامين

لا ياماجد ... انا ماشملت التعصب بالوحدات فقط... انا كنت ارويلك الاحداث اللي صارت يوم السبت فقط .. لكن من ناحية التعصب بشكل عام فهي موجودة عن الوحدات والفيصلي والرمثا وكافة مشجعين كرة القدم الاردنية .. صحيح انه احنا متخلفين كثير كروياً وثقافتنا الرياضية معدومة ... لكن صدقني في انجلترا وايطاليا واسبانيا ودول اوروبية كثيرة .. في تعصب اكثر من الموجود بالاردن . ..

هدى331
من: هدى العقرباوي |  قبل عامين

انا ما بحب كرة القدم بس بكره اسمع انو في مباراه بين فريق الوحدات والفيصلي لانو بنكون عارفين انو حيصير مجزره زي مباراة السنه الماضيه وقوات الدرك وضرب كانت شي بيخزي لا في روح رياضيه ولا ما يحزنون ........
هلاء صحيح انو بكل العالم في عنصريه متل اهلي وزمالك او ريال وبرشا و بس احنا الموضوع بيتحول من عنصريه رياضيه الى عنصريه وطنيه يعني (( اردني وفلسطيني)) فمصيبتنا اكبر من دول العالم لانو هالشي بيخلي الحقد يزيد عند الطرفين وفي بعض لنفوس المريضه بتستغل هالشي لزيادة العنصريه

وحسرتنا الكبيره انو احنا مسلمين والمفروض نكون غير عن باقي الشعوب لانه متل ما حكى الرسول ((لافرق بين عربي ولا اعجمي إلا بالتقوى))

Saleh138
من: Saleh Thaher |  قبل عامين

انا صراحة من ناحية العب جد بحب أتفرج لإنو الاعبين عندهم روح رياضية ولعبهم حلو... يعني احنا منشوف زي ما حكيتي الفرق الأخرى والعنصرية اللي بينها بس هون مع تحول العنصرية من رياضية لوطنية صار الوضع جد صعب... مش كاينين يفهمو إنو السلطي والنابلسي إخوان وإنو الإربدي والخليلي حبايب.. مافي هيك بس بدهم يطاوشو ويكسرو....

مطلوب نكون المثل في الأخوة والأخلاق ديننا ما بفرق بين الأبيض والأسود فكيف بين الأخوين الأردني والفلسطيني....

فراس570
من: فراس قاسم |  قبل عامين

انا صرت اكره الدوري الاردني من ورا مباراة للوحدات والفيصلي (صح انا وحداتي متعصب ) بس بكره التشجيع يللي بصير من كلا الفريقين وبصراحة يللي بشوفو عنا بالمقابلين بخليني اكره قوات الدرك (من ناحية التعصب لجماهير الفيصلي )
مابدي حد يزعل مني بس للاسف يللي ساكن بالمقابلين بعرف هاد الموضوع منيح، لازم يصير معركة بين الجمهورين بعد المباراة مهما كانت نتيجتها، والمصيبة قوات الدرك بتجي بتضرب جماهير الوحدات بس وهاد الشي بصير كل مرة ومش انو عم اتعصب او اميل لجمهور الوحدات كوني وحداتي لا والله واقسم بالله ورحمة امي يا جماعة انا صرت اكره اليوم يللي بصير فيه مبارة للفيصلي والوحدات من ورا هاد التمييز ، العام الماضي اولاد عمي انضربو من قوات الدرك بدون سبب بس لانهم كانو ماشيين بناحية جماهير الوحدات وقصص خير الله بتصير ورح ضلها تصير من ورا مباريات الفريقين، لي مابعرف بس هاد يللي بصير ، الدرك بنحاز بشكل علني لجمهور الفيصلي وبصير يضرب عن جنب وطرف بجمهاير الوحدات حتى لو مش عاملة شي
المصيبة زي ما حكت هدى انو قلبوها لعنصرية وطنية بين (فلسطيني واردني ) ولي مابعرف مع انو التنين اردنيين والتنين في منهم اصول فلسطينية

فراس570
من: فراس قاسم |  قبل عامين

وفي منهم اصول اردنية، حتى وصلت الامور لجمهور الرمثا؟ ومن جديد جمهور المنشية، صارت كلها عنصرية وطنية وكانو الدوري عنا دوري اسيوي مو اردني خالص وكانو الاندية عنا بتلعب باسماء دول وليست باسم الاردن
لما نقارن يللي بصير برا بنتفاجء، صح في تمييز وفي عنصرية خصوصا في اسبانيا (البرشا ومدريد ) بس كمان عندهم في برشلونة بالذات (اسبانيول وبرشلونة) وفي مدريد (ريال مدريد واتليتكو مدريد) وفي مقاطعة الباسك (بلباو) وفي ال مقاطعة الاندلس (اشبيلية وبيتيس )بتصير عندهم حروب وبنفس الطريقة بس مابصير مذابح زي عنا الا ماندر وقليل مابسنمع عن مذابح زي للي بصير عنا
الحل عنا يا يلغو الدوري او يعملو المباريات بدون جمهور ولحماية المدنيين يللي مالهم اي علاقة انو يدخل قوات الدرك بحيادية تامة
اسف لكلامي ازا زعل حدا بس هاد الموضوع كتير حساس وبنفس الوقت مهم وشكرا لصالح يللي فتح الموضوع

Saleh138
من: Saleh Thaher |  قبل عامين

والله العظيم إنو مشكلة الدرك اللي حكيت عنها جد إنها مصيبة كبيرة.. الدرك اللي مطلوب منهم الإصلاح وفك الإشتباكات.. انا مش قصدي اتدخل بالأمن بس ما إلهم الحق بالضرب... هذا بني آدم اللي قدامك مش دابة والمشكلة إنو هو بجوز متعصب أكثر منه.. حلولك جميلة بس صعبة جدا.. إلغاء الدوري إشي كتير بهدي الوضع خصوصا إنو رواتب اللاعبين مش بزيادة بل هي قليلة جدا وأغلب اللاعبين عندهم شغل تاني غير إنهم لاعبين... صحيح إنو الوضع متأزم بس لما نشوف الوضع من ناحية أوسع منشوف إنو هذا الأمر ممكن يقود لزوال الرياضة من البلد وهذا أكيد إشي سلبي بسبب مشاكل ما إلها أي داعي بين الجماهير...
اما مباراة بين الوحدات والفيصلي بدون جماهير فهذا شيء شبه مستحيل!!

انس38
من: انس العضايله |  قبل عامين

اخ صالح .. موضوع الضرب والدرك .. شيء لابد منه .. لانه لما الدرك يشوف انه الامور بدأت تتأزم والمشاكل والشغب يتفاقم .. لابد من الضرب وغاز المسيل للدموع . لانه لما يكون في حالة شغب .اكيد مارح تروح للمخرب او المتظاهر وتقله لوسمحت وهو يستحي على حاله ويبطل تكسير بالمحلات والسيارات .. وياريت تشوف اللي بصير بالسلط . وتخيل ان محلك تكسر او سيارتك اللي دافع دم قلبك عليها .. شو رح تحكي وقتها .. اكيد رح تقول الحق على الدرك والامن اللي مابضربوهم . ثاني شي سهل جداً اقامة مباريات الفيصلي والوحدات بدون جمهور .. وفي احد المباريات قرر الاتحاد اقامة المباراة بدون جمهور وفعلا تم ذلك .. ومع ذلك حدثت مشكله بين مصور موقع الفيصلي نت ولاعبين الوحدات يومها ... يعني لو مابلعبو مع بعض لازم تحصل المشكلة .. لكن مشاكلنا والحمدلله بسيطه جداً

Saleh138
من: Saleh Thaher |  قبل عامين

وجهة نظرك بالنسبة للدرك صحيحة ١٠٠% انا لو تكسر محلي او سيارتي زي ما قلت بحط الحق على الدرك وانا لا أظن إنو الدرك بضربو واحد ما بستاهل بغض النظر عن الضرب المتعصب تبع الوحداتية اللي قال عنه زكي شان... صدقني لو بطل في فريق فيصلي وفريق وحدات لتضل المشاكل هاي بين الجماهير للأسف........ صراحة انا مش معك بإنه مشاكلنا بسيطة... ممكن تكون مشاكلنا بسيطة نسبيا إنو مافي قتل (لحد الان) بس لا تعتبر بسيطة أبدا برأيي.

فراس570
من: فراس قاسم |  قبل عامين

فكرة الغاء الدوري مش غلط واحد الحلول ازا استمرت هاي المشاكل بس انو اقامة المباراة بدون جمهور بتصير وبتزكر انها صارت قبل فترة؟ مابعرف بس انا هيك ظني
وعلى كل الحل مش موجود بنظري بهاي الفترة

انس38
من: انس العضايله |  قبل عامين

مرحبا .. زكي . شكرا لصراحتك بالموضوع .. صراحة قوات الدرك الله يعينها .. جمهور الفيصلي بقول ليش هيك قوات الدرك بتتعامل معنا وجمهور الوحدات نفس الشي .. حتى جمهور الرمثا ضرب جمهور الفيصلي وكسر سياراته وضربو الجمهور بالحجار .. ومع ذلك زعلو ليش الدرك يتدخل ..
قوات الدرك الها اهداف وواجبات ومنها الحفاظ على الامن والنظام .. ومرات التجمعات بتخلي الاجهزة الامنية تشك انه ممكن يحصل احداث شغب . عشان هيك ممكن تتعامل بقوة شوي مع المتجمعين في منطقة معينة .. اما ان الدرك متحامل على جمهور الوحدات بالذات فهذا ابدا مش صحيح ومرات فرض النظام بزعج البعض صدقني ..وبعد انتهاء المباراة يوم السبت حصل استفازازات بين الجمهورين اللي كان داخل الملعب واللي خرج من الملعب ولكن قوات الدرك تعاملت بشكل عقلاني مع الموقف ..
اما بالنسبة لموضوع التعصب .. فالبعض من الجماهير وليست كلها قد تتخذ من الوحدات والفيصلي (اردني وفلسطيني ) مع العلم انه نصف لاعبين الفيصلي من اصول فلسطينية .. وهناك ثلاث لاعبين بالوحدات اردنيين ولاننسى ان من تولى اول رئاسة لنادي الوحدات هو عاكف الفايز بني صخر ..

فراس570
من: فراس قاسم |  قبل عامين

بس حبيت اضيف كلمة، مو معنى كلامي انو بكره الفيصلي؟ او جمهور الفيصلي، بالعكس انا الي اصدقاء كتار فيصلاويين بس والله محترمين وللاسف الشديد التعصب يللي بصير عنا هم فئة قليلة بس عاملين المصايب وهما يلي لازم ينحبسو وينضربو ، ومش كل الجمهور بعمل مشاكل سواء من جمهور الوحدات وجمهور الفيصلي انما فئة قليل زي ماحكيت، وللاسف كمان صارت تكبر عنا بين جماهير البرشا والمدريديين؟
يعني بمختصر الكلام التعصب يللي عنا جد مو طبيعي وانشالله نتخلص من هاي المشكلة لانو جد هيا عم تكبر مش عم تصغر وصار كل مرة يصير في مشاكل

Saleh138
من: Saleh Thaher |  قبل عامين

انا برشلوني.. وبكل صراحة حولي مافي أي مشاكل بالنسبة لبرشلونة ومدريد لا بصويلح ولا بالرابية ولا بمكان بحضر فيه المباراة.. بس للأسف بسمع بهاي المشاكل والمشكلة إنو بجوز لا برشلونة ولا مدريد ولا كل واحد بإسبانيا بعرف إنو في بلد بالعالم إسمها الأردن (مع إحترامي) وإحنا نازلين منطاوش على إشي إحنا بالحقيقة ما دخلنا فيه..... كل مرة المشاكل عم تكبر وتزيد والحل مطلوب ولا الوضع شوي شوي رح يخرب وببطل في كرة قدم عنا.

انس38
من: انس العضايله |  قبل عامين

في اخر مباراة وقبل المباراة تحديداً .. قام جمهور الفيصلي بتحية عامر شفيع حارس الوحدات وكالعادة التصفيق لعامر ذيب .. وعلى الطرف الثاني جمهور الوحدات يحي لؤي العمايرة حارس الفيصلي .. لكن صدقني قله من الجمهور واللي لازم يجتثوها من الملاعب هي من تحرك موضوع اردني وفلسطيني .. ولاننسى دور رؤساء الاندية .مثلاً طارق خوري رئيس نادي الوحدات سابقاً عندما يخرج ويصرح بان الوحدات قطعة ارض محرره من فلسطين . تصريح ليس له اي داعي وغير منطقي .. بالتالي حرك النزعات العنصرية من جديد لاهدافه الشخصية . والكل يعرف شخص طارق خوري .. وعندما يصف قوات الدرك بانهم يهود الداخل .. زاد الطين بله
بعتذر للجميع اذا كان كلامي في اساءة لاي شخص .. لكن هاي الحقيقة
يوم امس في كولومبيا قتل احد الحكام على يد مشجع لانه احتسب هدف غير صحيح . فأين نحن من شغب الملاعب ..احنا اللي عملنا الفيصلي والوحدات اردني وفلسطيني .. لكن هم مجرد فريقين كرويين لا اقل ولا اكثر

فراس570
من: فراس قاسم |  قبل عامين

والله يا أنس متل ماحكيت هيا المشكلة في قلة من الجمهور وبعض الاداريين يللي بفتعلو هاي المشكلة الضخمة، التمييز والعنصرية يلي صارت تكبر، والمشكلة انو بعض الاداريين بزيدو الطين بلة
بس جد مش عارف شو حل هاي المشاكل؟ احنا مابدنا تكبر هاي المشاكل ولا بدنا اصلا تمييز ولا عنصرية لانو كلنا هون ايد وحدة وبلد واحد بغض النظر عن اصولنا يللي جميعنا بفتخر فيها وكلنا وطن واحد

سيد229
من: سيد صالح |  قبل عامين

أقول للجميع : دعوها فإنها منتنة .. (عن العصبية والعنصرية)

حمّل تطبيقات جيران على هاتفك المتنقل الان!